Rm 1101, 11/F., Central Commercial Tower, 736 Nathan Road, Mong Kok (Mong Kok MTR Exit B3)![[終於得閒打吓文] 間中會有肩頸痛病人提及，當症狀嚴重嘅時候，會感到喉嚨有嘢卡住，甚至連吞嚥都有困難。部份病人因此曾經向耳鼻喉科醫生求診，但又搵唔出有明顯毛病。 當排除咗內科問題，剩低嘅可能往往就係肌肉及關節。我哋前頸裡面，有一組好特別嘅肌...](https://img5.findhealthclinics.com/550/418/1466347405504180.jpg)
24/04/2026
[終於得閒打吓文] 間中會有肩頸痛病人提及，當症狀嚴重嘅時候，會感到喉嚨有嘢卡住，甚至連吞嚥都有困難。部份病人因此曾經向耳鼻喉科醫生求診，但又搵唔出有明顯毛病。
當排除咗內科問題，剩低嘅可能往往就係肌肉及關節。我哋前頸裡面，有一組好特別嘅肌肉，叫「肩胛舌骨肌」（omohyoid）。肩胛舌骨肌分為上下兩部份，下半段由肩胛上端開始走向前頸，並於該處連接至一段肌腱，再由該肌腱演變為上半段肌肉，最終連接到下巴下面嘅舌骨（hyoid bone）。
不論係吞嚥或發聲，舌骨上面嘅肌肉都會將舌骨、喉頭（larynx）及與其相連嘅舌頭向上拉。而肩胛舌骨肌嘅主要功用，就係將上述嘅組織向下拉，並將其回復至原本嘅位置。
作為唯一一組直接由前頸連接到背後嘅肌肉，肩胛舌骨肌於正常情況下，係靠肩胛提供穩定嘅地基，從而作出上段提到將喉頭及舌骨向下拉嘅功能。
不過，如果我哋長期以圓肩、聳膊、突頦（即俗稱嘅「烏龜頸」）等不良姿勢進行電腦工作，肩胛舌骨肌會因應肩胛骨嘅不良位置而縮短並變得繃緊，如是者就有可能會將舌骨過份往下拉扯，造成不適，甚至吞嚥困難。
治療方法其實同一般肩頸痛無異，一樣係先處理好上背、肩胛及前胸嘅軟組織同埋關節，然後再處頸椎、下巴及牙骹嘅問題。當然最重要嘅，係指導病人正確嘅電腦姿勢、作息有序、與及定時進行復康運動。
