Psyche Palace 「心臨」

17/03/2022

《本源》

沁人心脾的季候風
輕抹安撫躁動的暑天
那刺熱得像皮疹上的藥膏

你可看到千枝百葉
透出期盼而興奮的空氣
還有大樹張臂
如分隔兩地的情人

螞蟻匆匆彳亍
蓋上與加固蟻巢
對付將至的猛獸般的洪水

孔雀不再談及
夏季溫情的滿足
卻在憂思
如何保存那爭妍競艷
卻碩大無朋的羽毛

農夫翻找鋤犁
再來翻起泥土中的豐實生機
只因風中訴說初雨的消息

城市裡大夥兒準備
遺忘一隅的雨傘 或許
有隻小舟也說不定

種種熱鬧 不過是
生命尋覓生命
永恆之花的道 在於
本源

（翻譯作品，Sadhguru《Eternal Echoes》，The Source）

08/08/2020

呢個係好多人抗拒占卜嘅理由：懼怕占卜嘅結果(尤其是唔好嘅)，便斷定一個差嘅結果。我認為咁講不盡準確：至少在塔羅牌，再差嘅事情，都會比你一個出路。

其實能夠預測差嘅運勢，可唔可以係一件好事呢？假設你係一個島民，預測會有海嘯發生，及早撤離不是一件好事嗎？假設你係一個股民，預測大市會崩潰，及早沽空避險不是一件好事嗎？

好似係而家嘅香港咁，好多人都係行緊逆勢。如果能夠把握住今次機會，去做以前沒有嘅反思，去享受忙碌生活不容許嘅休息，會唔會都係一件好事呢😇

軟性決定論，認為人有定數與命限，但也有自由意志的空間。我們要活得自在，並不是強要用意志改變運勢；相反，利用意志去馭勢而行。順勢便勇於進取，逆勢便稍作休息。 有人說：這不是也代表沒有自由改變命運嗎？非也.....

04/08/2020

[抱歉今次音質有啲差🙉]

有少少一集難過一集嘅感覺，但係我覺得討論「人生重覆發生的事」同埋「人生課題」，係最容易"入坑"身心靈嘅切入點😆 同埋自己覺醒到自已人生pattern個一刻，真係會有種眼前一亮、睇世界唔同左嘅感覺。

如果你一直相信每人人生都有意義、但又未搵到屬於自己嘅意義，希望呢段片可以比到少少啟發～

泛目的論，認為天地萬物皆有其目的，因此存在；所以人的一生必然是有意義的。塔羅與占星可說是新時代運動的分支，當中的世界觀便提出人的一生，有不斷成長之目的。 Opening & closing music: Sapien Medicine - Radiate Positivity

25/07/2020

嗯...上次段podcast，自己聽多次都覺得太hardcore，希望呢一段無咁悶啦😂 今次仲加埋小標題，希望觀眾聽落更加條理清晰啦~

今次都address咗幾個問題：術數師係咪「財迷心竅」? 術數師係咪都係呃人? 風水命理，又等唔等同迷信?

仲會有下幾集，我又慢慢改進談吐技巧先🙃

是次分享兩點：剖析迷信心理的來源，還有大眾對術數師的刻板印象(stereotype)。 Opening & closing music: Sapien Medicine - Radiate Positivity

22/07/2020

繼續失業，繼續漫談身心靈。(笑)

今次轉咗少少形式，變咗類podcast。希望喺大家等外賣、食飯、通勤嘅時候，會有趣嘅topic聽吓。至於入面提及嘅教授……知邊個就知，唔知就算啦😂

歡迎有咩唔清晰或者唔同意我嘅說法，都可以留言話我知👍🏻

總結一下大眾(教授)對術數命理的批評。 Opening & closing music: Sapien Medicine - Radiate Positivity

18/07/2020

其實......距離中大搞攤都八個月了，我哋兩個老鬼都已經畢業了🙈 可惜嘅係，男塔羅師因為疫情關係，維持係無業/待業/失業嘅狀態。既然係咁，就係最好嘅時機去重投塔羅啦~ (笑

係認真出發之前，我一直思考嘅問題，就係「我想透過塔羅帶比人咩嘅價值？」What value would I create? 或者換個問題問「人做塔羅我做塔羅，我又有冇帶到啲咩唔同嘅嘢比人？」

初步嘅答案係：自我認識。坊間好多占卜工具都係用作趨吉避凶，但係西方占卜嘅命運觀，比較強調自由意志嘅作用。

沒有自我認識，哪有自由意志？再次呼應翻我哋嘅名：Psyche，即係人嘅心靈。

就係咁。簡單一個post，宣告存在。下一步做咩，之後慢慢走，再決定 :)

22/01/2020

［影片有字幕🤓］

咳，原來整一條片嘅時間都唔短😲

今集就會講下星座同四大元素。講講吓先發覺，講到學術味濃，哈哈😂 好多時坊間對於星座理解，都係偏神秘色彩同埋命定論，到底又係唔係呢？！

鍾意影片嘅話，記得like同share比朋友睇啦😆

09/01/2020

［影片有字幕🤓］

大家好呀！潛咗水兩個月，新一年又開學，我哋決定嚟緊每個星期，推出一系列嘅片，去介紹返唔同嘅靈性議題同工具（當然包括塔羅同星座啦）☺️

呢度講嘅靈性（spirituality），唔係特定宗教會講嘅靈性/同神嘅接觸，而係一般意義上承認靈魂同埋比人類更高等嘅存在。

所以呢個時候，就要介紹近年興起嘅大佬：New Age Movement！呢個大佬就大啦，平時聽開嘅水晶占星塔羅占卜靈氣全部都歸佢管💫

鍾意影片嘅話，記得like同share比朋友睇啦😆 有咩問題可以下面comment問呀 ~

Psyche Palace 即是心靈宮殿的直譯，我們希望透過塔羅等身心靈工具，為大學社群帶來不一樣的活力。 facebook: https://www.facebook.com/psychepalace91/

25/11/2019

《塔羅介紹所 之四》

適逢今屆區議會選舉咁歷史性嘅時刻，梗係要介紹返一張塔羅牌去賀一賀佢啦！

「正義 Justice」入面坐住一位法官，同終審法院屋頂嘅正義女神形象相似，一手執天秤，象徵善惡判斷；另一手執寶劍，象徵獎賞與懲罰，行動導致結果。

抽到「正義」嘅話，代表法官正義嘅提醒：你嘅努力同善良會得到回報。相反，如果係走精面、期待不勞而獲、甚至立心不良的話，法官就會給予你應得嘅警戒。所以趁事情仲有彎轉嘅時候，建議你審視下自己嘅行為啦~

如果事情係已經發生咗，或者你係面對緊人際衝突嘅話，「正義」就代表最好以一個客觀、公正嘅態度去面對。尤其對於天秤座嘅同學仔，「正義」嘅課題你要肩負起過去決定嘅結果，為之前種下嘅因負上責任，然後昂首向前。

分辨一個成熟嘅人嘅方法，就睇佢如何看待自己曾經犯下嘅過錯。

19/11/2019

《塔羅介紹所 之三》

其中一張最廣為人知嘅塔羅牌，就係「死神 Death」啦~ 好多人覺得「死神」好得人驚，代表死亡來臨，其實又係唔係呢？

死亡，並唔單單指肉體嘅死亡，更可以係規律、秩序、信念嘅死亡。係呢個層面嚟講，死亡係象徵一個階段嘅結束，正所謂「舊嘅唔去，新嘅唔嚟」，死神正正係預留位置予新嘅黎明來到。

從牌面上睇，骷髏死神騎著一匹白馬來臨城中：代表物質世界嘅國王首先倒下，寓意秩序更替；堅守信念嘅教宗仰望死神，似乎難逃正面衝突；代表情感嘅女皇明白死神嘅必要性，卻不忍直視；只有純真嘅小朋友唔會害怕，好奇咁觀察一切。

咩情況會抽到「死神」呢？改頭換面嘅大變動：升學、搬屋、轉工、移民、關係嘅階段性終結...... 總之係一件事嘅大變化。雖然係咁，變化就係成長嘅催化劑，所以唔洗擔心太多，亦都唔洗搵方法避開佢；事前好好準備，就已經係最好嘅方法~

18/11/2019

《塔羅介紹所 之二》

第二次介紹嘅牌，就係8號牌嘅「力量 Strength」啦。

第一眼見到牌上面嘅獅子，你可能覺得獅子就係力量嘅泉源。呢個講法只係啱咗一半，因為獅子代表剛陽嘅力量；相對地，馴服獅子嘅女人，代表陰柔嘅力量。而呢一張牌嘅啟示，就係講強硬與柔和並重，先至係最大嘅力量。

另一層嘅象徵意義，就係獅子代表人心裡嘅潛意識（unconscious）獸性。顯意識嘅理性承認、疏導、掌控獸性，就係「力量」嘅境界。

抽到呢一張牌嘅同學仔，通常係提醒你，你已經有足夠嘅心靈力量去應付目前嘅難題。如果以人生課題嚟講（尤其是對於獅子座），呢張牌建議你去測試你嘅能力。

有時，你對自己嘅能力有所懷疑；事實上，只要用適當嘅方法去證明，你嘅疑惑就會如陽光下嘅迷霧，一掃而空。

16/11/2019

正如呢個專頁一開始提及，Psyche Palace係由兩位中大同學組成。香港中文大學喺呢個星期經歷反修例運動之中一連串事情，當中嘅事有令人憤怒嘅、令人感動嘅、令人慨嘆嘅；我哋都無時間或者心情去更新專頁，特致致歉🙇🏻‍♂️

塔羅係一門好偏門嘅世藝，喺決心推廣呢件事以及與書院溝通期間，我哋一直都有問自己：點解我哋要推廣塔羅呢？點解係塔羅呢？

雖然我哋未有一個完滿嘅解答，但係我哋至少同意：我哋無當塔羅係一樣玩玩吓嘅事，而我哋希望比更多人知道，制度外有好多可以幫助你成長嘅工具。由始至終，我哋相信身心靈工具係指出咗好多現實睇唔到嘅成長盲點。

大學學期結束，書院亦停止運作，要同大家喺中大再見可以話遙遙無期；儘管如此，我哋希望可以堅持繼續更新專頁──無論塔羅直接幫助到你也好，或者閒時睇睇放鬆身心也好。

喺紛亂之中，有同學可能覺得有幾個方式走落去，但係唔識揀；有同學可能因為運動升溫，而同身邊嘅人關係出現裂痕；有同學可能因為停課與三罷，一時唔知點算好……. 於是，我哋打算推出網上嘅塔羅服務，略盡綿力，幫助有需要嘅人。

網上塔羅詳細將稍後公佈，屆時可能包括免費嘅塔羅服務，敬請繼續留意我哋嘅專頁。在此之前，希望大家保重，天佑香港🙏🏻

10/11/2019

10/11/2019

《塔羅介紹所 之一》

今次第一次介紹嘅牌，就係「愚人 The Fool」啦~

有唔少同學仔抽牌都有見過呢張，放心唔係話你蠢嘅意思😆 作為塔羅排列嘅第一張牌，愚人藴含住全新起點、純真性格、包袱輕鬆嘅意思，名乎其實「手空空無一物」嘅狀態。如果你樂天咁開展一段新嘅人生旅程，就有可能抽到呢張牌。（相反，如果係包袱比較大嘅改變，咁「死神 Death」嘅意思就更吻合。）

對於啱啱入大學嘅同學仔，唔多唔少對愚人嘅故事有所共鳴，因為入到大學，大家都係有好多想像與憧憬。就好似畫中嘅愚人，佢嘅目光並唔係腳下嘅驚濤駭浪，而係沉醉於天地之間嘅歡樂。

因為佢相信，宇宙會為佢安排最美好嘅旅程，一段獨一無二嘅旅程。

06/11/2019

《伍宜孫院慶 ─ 心臨塔羅》

多謝大家支持我哋第二次擺攤，今次雖然時間短咗少少，但係我哋都做足三個鐘無停過，哈哈。

喺中大投兩次攤，接觸咗好多對塔羅有興趣嘅同學仔~ 雖然短期內好似未有大笪地，不過我哋會籌備用其他形式嘅活動，再嚟同大家見面嘅！

呢兩日幫咗超過70個同學仔做塔羅分析，見到有啲牌出現次數都幾高，之後我哋會揀幾張，攞出嚟同大家分享吓~

05/11/2019

《敬文節 ─ 心臨塔羅》

大成功！大家反響非常熱烈，估唔到第一次開攤，就7點到11點做唔停😆 係呢度同排隊排咗好耐、或者等唔切嘅同學講聲唔好意思~ 不過唔緊要，我地今晚仲會係 伍宜孫院慶 Wu Yee Sun College Anniversary Celebration 擺攤，有興趣嘅同學今晚見啦！