06/05/2026
立夏已過，天氣卻未見真正轉暖，反而仍然帶有幾分寒意。
呢種「應熱未熱、應暖未暖」嘅天氣，對身體其實幾容易造成影響。
我問阿仔：「你知唔知係咩日子呀？」
佢答我：「知呀，5 月 5 號。」
正正就係立夏。
按節氣嚟講，立夏之後應該逐步進入夏天，陽氣開始上升，氣溫亦會慢慢回暖。
但今年嘅感覺，反而係夏天到咗，天氣仍然凍冰冰。
我就凍到四肢好唔舒服，阿仔就肚仔涼涼哋。
對中醫角度嚟講，呢種天時反常，容易令人體嘅陽氣運行唔夠暢順，特別容易出現怕冷、倦攰、手腳冰冷、胃口差，甚至肚腹唔暖、大便溏薄等情況。
如果本身體質偏虛寒，或者平時已經比較怕凍，就更加要留意保暖，唔好因為已經入夏就掉以輕心。
今年春天又少見雷雨，入夏後亦未見明顯暑氣，整體天時確實比較反常。
古人講「非其時而有其氣」，而家睇返，真係幾有感覺。
最近大家除咗要注意著衫之外，飲食同作息都要配合返。
少啲生冷凍飲，唔好長期吹風受涼，尤其係小朋友、長者同平時體質較弱嘅朋友，更加要小心。
天時變化大，身體感受最誠實。
大家記住，唔好因為見到日曆入夏，就以為身體可以即刻跟得上。
保重身體，少食寒涼生冷。我今年都要食少D 雪糕啦。
