Physio Jared

30/03/2023

大家身邊可能有人試過膊頭痛，會話患上左五十肩，肩周炎🤕。

但如果膊頭痛之餘，仲有陣時覺得隻手麻痺、無力、感覺冰冷🥶或者無血到等嘅情況或症狀，有可能係患上左四角空間症候群 (quadrilateral space syndrome)。

咁咩係四角空間? 其實呢個空間係我地嘅腋下後面，佢係由以下3條肌肉同1條骨頭🦴組成:
-小圓肌 (teres minor)
-大圓肌 (teres major)
-三頭肌 (triceps)
-肱骨 (humerus)

呢個空間雖然細，但中間會有血管 (Posterior Circumflex Humeral Artery)同神經線 (Axillary Nerve)係到穿過。

如果因為某啲原因，令到四角空間嘅肌肉出現異常或繃緊😬，就會令到四角空間收窄，咁中間嘅血管同神經線就有可能長期受壓，慢慢就會出現膊頭痛、麻痺等嘅症狀，引致四角空間症候群 (quadrilateral space syndrome)。

#物理治療 #香港物理治療 #運動 #痛症 #四角空間 #四角空間症候群 #肩周炎 #五十肩 #勞損 #尖沙咀

13/03/2023

脊柱側彎(Scoliosis)就咁字面睇就係我地嘅脊骨左右彎弓歪左，但其實呢個病患係3D三維上嘅變形，影響左脊骨嘅生理弧度。
咁我地觀察脊柱側彎嘅時候可以係冠狀面(conronal plane)，矢狀面(sagittal plane)同水平面(horizontal plane)檢查歪左嘅情況。🧐

冠狀面: 我地係正面或者後面睇，正常係會見到脊骨係垂直一條直線黎，而係患者身上我地會睇到脊柱向左右側彎左，形成一個C形或 S形的曲線。

矢狀面: 我地係側面睇，正常係會見到頸椎向後彎，胸椎向前彎，腰椎向返後彎，形成一條S形曲線。但係患者身上可能會見到條脊椎拉直左，彎嘅幅度少左甚至彎嘅方向調轉左。

水平面: 我地係頭頂望落去嘅時候，正常每一節脊椎係向前嘅，但患者有機會其中一部分左右旋轉扭曲左，見到膊頭或者盆骨左右一前一後咁。

大家可以定期係呢3個方向檢查自己嘅脊椎，及早發現有冇脊柱側彎，避免情況惡化。👍

#物理治療 #香港物理治療 #運動 #痛症 #脊柱側彎

30/01/2023

如果唔好彩整親受傷斷左骨🤕(fracture)，一般需要打石膏或者開刀做手術去固定骨折位置。大家可能會問啲骨係點樣癒合(healing)，幾時會好返?

一般黎講，骨折嘅部位會出現以下幾個階段去完成癒合過程：

血腫期 (Hematoma formation)：
骨頭周圍都有好多血管，骨折嘅時候都會令呢啲血管斷裂，引起斷骨位置出血🩸，同時會出現炎症反應 (inflammation)，產生血腫 (hematoma)。呢個時期我地會見到斷骨位置好紅好腫，通常呢個狀況會維持1-2個星期。

修復期 (Reparative phase)：
大概過左1-2個星期之後，本身斷骨嘅血腫就會畀軟骨痂 (soft callus) 取代，固定住斷開嘅骨頭，不過呢個時期駁埋嘅位置都未食到力，唔可以亂咁受力🚫。
身體繼續修復軟骨痂，慢慢由比較硬嘅組織取代，形成硬骨痂 (bony callus)。硬骨痂通常會係幾個星期後出現，照X-ray都會見到啲骨埋左口，呢個時候一般都會拆石膏，可以郁動關節同做相應嘅訓練🧘。

骨質重塑 (Bone remodeling)：
硬骨痂可能會比原本嘅骨頭大舊，甚至有啲凹凸不平，咁身體會慢慢重塑呢個癒合嘅骨頭，將佢轉化為成熟嘅骨頭，變返原本嘅形狀同強度，等斷過嘅骨頭可以承受返正常嘅負荷。成個重塑過程需要幾個月甚至超過一年嘅時間去完成🗓。

骨折係一個嚴重嘅傷患，需要好長嘅時間好返，大家要跟從醫生同物理治療師嘅指示，去促進傷患復原💪。

28/12/2022

有啲人可能拗完柴 (ankle sprain) 之後冇理佢等佢自己好，覺得係好少事，但原來拗柴都可能會引致骨折 (fracture)，如果斷骨又冇及時處理後果可以好嚴重🤕。

咁我地點知自己拗柴有冇傷到骨，要睇醫生👨‍⚕️去照X-ray?

其實我地可以用渥太華踝關節規則 (Ottawa Ankle Rules) 好快又簡單👍咁檢查隻腳去判斷會唔會係拗柴嘅時候骨折左。

受傷之後我地可以檢查以下5件事：

1. 外側腳眼 (lateral malleolus) 對上6cm 範圍內有骨頭嘅壓痛🦶
2. 內側腳眼 (medial malleolus) 對上6cm 範圍內有骨頭嘅壓痛
3. 第五蹠骨底部 (base of 5th metatarsal) 有骨頭嘅壓痛 (腳指尾外側最突出嘅位置)
4. 舟骨 (navicular bone) 有骨頭嘅壓痛 (內側腳眼前下方突出嘅位置)
5. 受傷後❌無法承重 (weight bear)，並不能順利行4步🚶

如果檢查嘅時候發現或者懷疑有是旦其中1樣，都可能有骨折🛑，咁就要及早去照X-ray作進一步嘅診斷。

04/12/2022

身邊有冇識人係成日拗柴 (ankle sprain)，甚至畀人話係“玻璃腳”?
究竟咩原因會令啲人大啲機會拗柴扭親🦶?

原來有研究 ((Delahunt & Remus, 2019) 發現有以下5個風險因素🛑 (risk factor) 會增加拗柴嘅風險:

-年輕人👨‍🦰: 24歲以下嘅人比起其他年紀嘅人係較大機會拗柴，而拗柴嘅高鋒期，女性係10-14歲嘅時候係最容易拗柴，男性係15-19歲嘅時候最容易拗柴
-體重指數 (BMI) 高: 如果BMI超標，有超重嘅人會容易啲拗柴
-受傷史🤕: 如果曾經試過拗柴嘅話，呢班人係會比其他未試過拗柴嘅人更容易係未來再扭親腳腕
-下肢肌力🦵弱/不正常: 如果控制腳腕嘅肌肉 (足背屈肌dorsiflexor同小腿肌肉calf muscle) 有肌力唔平衡或者髖關節伸肌 (hip extensor) 肌力弱嘅人會比較容易整親
-平衡力🤸下降: 如果平衡力本身較差嘅人，例如做單腳企會唔穩陣，係容易啲發生拗柴

如果發現自己係呢5個因素入面中左其中一部分嘅話，咁就有機會比一般人容易拗柴，成為“玻璃腳”。但其實做返啲相應嘅訓練同運動🏋️‍♀️，係可以改變其中一啲因素，咁就可以預防同避免拗柴受傷嘅風險啦。

Reference:
Delahunt, E., & Remus, A. (2019). Risk factors for lateral ankle sprains and chronic ankle instability. Journal of athletic training, 54(6), 611-616.

27/11/2022

如果見到一個人行完一層樓梯就出晒汗，上氣唔接下氣🥵，我地通常會話呢個人唔夠”fit”。但其實咩係fit唔fit，實際上係啲乜?

我地講緊嘅”fit”其實就係體適能💪 (physical fitness)。
呢樣野係代表身體有冇能力係有精神同活力嘅狀態下去完成日常工作同活動，同時又有充足嘅精力去享受空餘時間⛱，甚至可以面對到啲突發情況。

同健康有關嘅體適能有以下5大因素:
-身體成份 (Body composition): 係指身體嘅肥瘦組合，脂肪比例，通常我地會用身體質量指數 (BMI)，腰圍等嘅方法去量度
-肌力🏋️‍♀️ (Muscular strength): 係指肌肉收縮產生嘅最大能力，可唔可以拎起或者搬啲重野
-肌耐力 (Muscular endurance): 係指肌肉反覆動作嘅持久能力
-心肺耐力🏃 (Cardiorespiratory endurance): 係指循環同呼吸系統持續供應氧氣去做體力活動(例如跑步、踩單車)嘅能力
-柔軟度 (Flexibility): 係指關節係唔覺痛嘅情況下可以活動到嘅最大範圍

如果大家係呢5大因素都達標，身體夠fit，咁就可以減低患上長期病嘅機會，改善精神健康同埋生活質素👍。
但如果有其中一啲因素比較差，咁就要做返啲針對性嘅運動同訓練去改善啦。

29/10/2022

大家有冇試過做完運動第二日起身會肌肉痠痛?

呢種痠痛我地會叫做遲發性肌肉痠痛 (Delayed Onset Muscle Soreness DOMS)。一般黎講呢個症狀會係運動後12-24小時🕛開始出現，24-72小時症狀會最強烈。

咁點解會出現DOMS? 一般人會以為痠痛一定係因為乳酸積聚 (lactic acid accumulation)引起，其實呢樣係一個誤解❌。

事實上呢種肌肉痠痛係因為做運動時肌肉纖維出現左微細損傷 (microtrauma)，呢種損傷係良性嘅，咁係肌肉修復嘅過程中就會有呢啲痠痛嘅情況，而修復後痠痛嘅肌肉會變得更加強壯有力💪。

咁做啲咩運動會容易啲引起DOMS?通常肌肉訓練，跑跳多嘅運動🏃，落斜路落級多嘅運動會易啲出現DOMS，而通常係類運動肌肉都需要做比較多離心收縮 (eccentric muscle action)。

DOMS一般會係幾日內消失同恢復👍，如果痠痛程度唔太犀利其實可以唔使特別去處理。

但如果痛楚係做緊運動時就出現，或者症狀過左一個禮拜都仲有嘅話就未必係DOMS，要揾返專業人士或物理治療師作進一步檢查👨‍⚕️。

11/10/2022

我地做肌肉訓練🏋️‍♀️需要活動個關節做相應嘅動作，去刺激我地想練嘅肌肉。但其實訓練嘅時候我地係唔只用緊1舊肌肉，身體唔同嘅肌肉會擔當住唔同嘅角色🕺，去幫我地完成唔同嘅動作。

咁肌肉有以下4種功能角色:

主動肌 (agonist)係主要負責郁動個關節嘅肌肉，或者叫做原動肌 (prime mover)。

協同肌 (synergist)係協助🤝主動肌去郁動個關節，但呢啲肌肉係個動作上唔係主要發力嘅肌肉。

穩定肌 (stabilizer)係會等長收縮 (isometric)咁去支持同穩定⚖️個關節，等主動肌同協同肌佢地可以有效咁做到成個肌肉動作。

拮抗肌 (antagonist)係啱啱同主動肌做相反動作🤜嘅肌肉。

用返舉啞鈴練肱二頭肌 💪(biceps brachii)做例子。
我地拎住啞鈴屈手踭時，肱二頭肌就係呢個動作嘅主動肌，而肱撓肌 (brachioradialis)同肱肌 (brachialis)就係協助屈埋手踭嘅協同肌。
我地要用手腕同手指嘅肌肉去握實✊個啞鈴，而呢啲前臂肌肉 (forearm muscles)就係穩定肌。最後肱三頭肌 (triceps brachii)係同肱二頭肌做相反嘅動作，咁佢就係呢個訓練動作嘅拮抗肌。

如果練一個動作時，負責是旦1個功能角色嘅肌肉有問題，咁就有機會做嘅時候容易攰唔夠力🥵，有唔舒服，甚至受傷 (injury)。所以我地練肌肉嘅時候唔係剩係練舊主動肌，亦都需要留意協同肌、穩定肌同拮抗肌嘅情況去做返適合嘅訓練。

02/10/2022

大家有冇諗過腰骨有機會係不知不覺間勞損左?但無端白事，又冇整親過，又冇做粗重野做乜會勞損?

一般黎講，關節勞損係代表身體上某關節不斷進行重複性動作 (repetitive action) 同過度使用 (overuse)，繼而引起嘅關節損傷☠️。

咁我地嘅腰骨係咩時候做左啲重複性動作或者過度使用左🧐?

原來日日都要做嘅唞氣呼吸😤都有可能關事。

其實一個成年人正常嘅呼吸頻率係每分鐘12-20次，如果我地計一計🕛嘅話，會發現我地1日係會進行1萬7千至2萬8千次呼吸。

而我地呼吸嘅時候係需要用到橫隔膜肌肉嘅活動，而橫隔膜嘅膈腳 (crura) 係連住我地嘅第2 節 (L2) 同第3節 (L3) 嘅腰椎。

如果我地姿勢唔好，例如凸肚企🕺，加上腹肌弱形成肋骨外翻 (ribs flare)，我地呼吸嘅時候膈腳就會不斷將我地嘅腰椎向前拉，其實呢個動作就好似我地做向後拗腰一樣。

試諗下，原來有啲人有機會不知不覺間因為呼吸而每日做左萬幾至二萬次拗腰動作，畀左腰骨過度嘅壓力🏋️‍♀️，出現關節勞損，最終可能出現腰骨痛啦。

15/09/2022

15/09/2022

11/09/2022

啲人企唔穩，行路好易kick親，會畀人話平衡力🤸‍♂️ (balance) 唔好，要練下啲平衡力。咁其實究竟係練啲乜?

我地身體有3個系統控制我地嘅平衡，分別係視覺 (visual)，身體感覺 (somatosensory)同埋前庭系統(vestibular system)。

視覺👀: 我地身體會利用我地睇到望到嘅事物去理解周圍嘅位置同變化

身體感覺🦶: 我地身體會根據肌肉，肌腱同韌帶嘅拉伸以及皮膚嘅觸覺去感知身體嘅位置變化

前庭系統👂: 我地嘅內耳入面嘅前庭系統會利用重力，頭嘅轉動同活動去話我地知身體嘅空間同位置

一般黎講，我地主要都會依賴左視覺去保持身體平衡。通常話平衡力差左係講緊身體感覺或者前庭系統嘅能力弱左，當我地嘅視野受到阻礙或者去左陰暗嘅地方，就有機會覺得平衡唔好。

所以練平衡力之前，我地會做一啲測試去檢查返各個系統嘅能力，再根據邊個系統弱左去做返相應嘅訓練🏃。