03/03/2026
今日係元宵節，同時都係👩🏻⚕️朱醫師BB 滿月🎂
時間真係過得好快！ 最近BB醒咗都要人陪吓佢玩， 我哋就陪佢練吓抬頭， 今日發現佢已經做到抬頭！😍
👩🏻❤️👨🏻除咗BB每日都有進步，新手爸媽今個月都學識咗好多新技能
✅餵奶
我生之前已經決定試下喂人奶，因為營養多啲， 又可以令到自己修身快啲。未生之前覺得自己一定會泵奶， 但生咗之後發現原來埋身餵真係好方便， 唔使洗奶樽， 半夜BB喊要飲奶，又可以即刻令到佢唔喊， 個奶泵好似冇用過已經棄置咗。不過因為我預計之後會返工，所以都有補奶粉，奶樽直接買8個，夜晚一次過放喺洗碗碟機洗之後再消毒，方便好多！
✅掃風
我哋個BB比較鍾意直立式拍， 通常拍拍下就瞓得着，咁我哋就輕鬆好多， 可以有me time！好彩買左大量紗巾， 每次掃風餵奶都用最少一條！
✅換片
原來換片真係好有技巧， 經過無數次失敗經驗，我地而家換片已經好熟手。一開始試過包得唔實， 結果半夜要幫BB換過成套衫。如果換得唔舒服， BB中間又會噴尿，試過噴到爸爸要換衫😅。試過轉紙尿片牌子， BB唔習慣會喊唔停。我地發現一次隔尿墊真係好好用，就算BB係換片期間突然屙尿或者屙屎，都唔使再換衫/ 洗墊，換張隔尿墊就可以！
✅沖涼
坐月期間我唔掂得生水， 沖涼交俾爸爸負責， 爸爸絕對係神隊友！ 不過我地一開始都係雞手鴨腳， BB一除咗衫，冇安全感就會喊，要不停陪佢傾偈分散佢注意力。之後我哋試咗用坐躺浴網， BB沖涼時有個位承托住就無再喊，仲會舒服到唔想起身
✅剪指甲
BB指甲出得好快，一開始我驚用鉸剪剪指甲好易剪到出血，所以買咗磨甲器，但發現原來單用磨甲器會磨得好慢同唔平， BB都係會搲到塊面出血。所以我都係練習吓用鉸剪剪指甲，最後再用磨甲器收返平啲位， 我覺得而家自己可以做BB 美甲師! 😝
