安盼中醫診所

09/10/2025

【鼻咽癌放射治療後副作用的調治】
中醫角度認為鼻咽癌的發病，主要與「肺熱內盛」相關，且因「情志內傷」 、「飲食失調」等等所致。肺開竅於鼻，肺氣通於鼻，咽屬肺系，煙酒、油煙等可直接損害肺部，導致肺熱，使上焦熱盛，迫血離經出現鼻衄（流鼻血），繼而氣血凝滯，津液結停，致鼻塞而變生癌腫。

《靈樞·經脈》曰: 「肝足厥陰之脈……循喉嚨之後，上入頏顙」,文中之「頏顙」類近現代解剖的鼻咽部,是肝經所過之處。肝主疏泄,若肝氣鬱結,情志抑鬱，亦可致氣滯血瘀，痰濁內生，阻於脈絡，久則氣血凝聚，痰濁困結，逐漸形成腫塊。

此外,癌症的發生，不外乎「痰、濕、瘀、毒、虛」,長期過食辛辣及刺激性食品，以致脾胃受傷，熱毒蘊積，上擾鼻咽，結聚成癌。又或老年元氣虛弱，腎精虧損，而為邪毒所犯,因正虛邪盛，漸漸積聚而成癌腫。

鼻咽癌多以放射治療為主，中醫認為放射治療所使用的放射線屬火邪，火性炎上，會耗傷人體津液(放療後鼻咽、口腔黏膜、唾液腺等等受燒灼而萎縮，保護及滋潤鼻咽、口腔的功能減退)，故病人會出現患部紅腫發熱、咽乾咽痛、小便黃等熱性表現，同時亦有口乾口渴、大便乾等津液不足癥狀。因此，中醫多以養陰生津、清熱扶正之法治療，以減輕鼻咽癌放射治療後的副作用。

以下是一些適合鼻咽癌放射治療後的中醫食療，可根據不同的證型選擇適合自己的湯水。(湯水四人份量)

一、 胃陰枯涸(陰津兩傷)
表現：
口乾，唇焦、咽痛，胃納尚可(但常因口乾或咽痛影響進食)；脈滑或弦滑、滑或數、細滑；舌邊紅或瘀斑，或舌質紅有黃白苔。

(1) 雪耳杏仁百合湯
功效：清熱生津，養心潤肺
材料：雪耳2朶；南杏、百合各30克；無花果5粒；瘦肉500克
做法：
1. 所有材料洗淨，雪耳浸水分小份；瘦肉切件出水。
2. 燒開水，下所有材料，水滾後改慢水煲1個半小時，下鹽調味即可。

(2) 雪梨燉杏仁
功效：清熱生津，潤肺化痰
材料：雪梨1個；南杏30克；無花果3粒
做法：
1. 所有材料洗淨，雪梨去芯去核切件；南杏以小量水浸30分鐘；無花果切開。
2. 燒開水，將所有材料(連浸南杏水)放入燉盅內，加水至覆蓋所有材料。
3. 隔水用慢火燉1個半小時，即可食用。

二、脾陽虛(脾胃失調)
表現：
胃納差，神倦，頭昏，手足發麻，大便溏泄；脈細或細緩、細弱、細滑；舌邊紅，舌面乾，或光絳無苔，或有裂紋，或舌胖有齒印。

(1) 山藥紅蘿蔔冬菇湯
功效：健脾益氣，補肺固腎
材料：新鮮淮山半根；紅蘿蔔1個；冬菇3朶；木耳3朶；瘦肉500g
做法：
1. 所有材料洗淨，瘦肉切件出水。
2. 新鮮淮山及紅蘿蔔切段；香菇及金針菇切條；木耳以水泡發，去蒂洗淨切條。
3. 燒開水，下所有材料，水滾用慢火煲1個半小時，下鹽調味即可。

(2) 薏仁蓮子湯
功效：健脾補虛，養心安神
材料：生熟薏仁、蓮子各30g；陳皮1個；去核黑棗或紅棗8粒；瘦肉各500g
做法：
1. 所有材料洗淨，薏仁、蓮子及大棗先用水浸軟；瘦肉切件出水。
2. 燒開水，下所有材料(連浸水)，水滾後改慢火煲2個小時，下鹽調味即可。

三、 陰血虧損(氣血兩虧)
表現：
面色蒼白，頭暈目眩，心悸、氣短，手足麻痺，無力，厭食，惡心，嘔吐；脈細或細弱，沉細，偶有結脈；舌質暗淡、嫩紅，苔灰暗或光剝。

(1) 白果淮山粥
功效：健脾益氣，養肺除痰
材料：白果20粒；淮山、百合各20g；瘦肉、白米各150g
做法：
1. 將所有材料洗淨，白果去殼、皮及芯，與淮山及百合先浸水30分鐘 ；瘦肉切片。
2. 燒開水，下所有材料(連浸水)，水滾後改慢火煲成粥，下鹽調味即可。

(2) 杏仁百合湯
功效：滋陰潤肺，袪痰止咳
材料：豬肺250g；南杏、百合各30g；去核紅棗或黑棗5粒；瘦肉250g
做法：
1. 所有材料洗淨，將豬肺用水徹底沖洗，用手擠去豬肺內氣管中的水及泡沫；南杏、百合和大棗用水浸軟；瘦肉切件出水。
2. 燒開水，下所有材料(連浸水)，水滾後改慢火煲1個半小時，下鹽調味即可。

四、血熱型
表現：
頭痛頭暈，視力模糊，或視一為二，舌歪，口苦咽乾，鼻塞，鼻衄，流濁涕；脈弦、弦滑、或弦數、滑數；舌邊紅或舌質紅，或黃厚苔。

(1) 紅菜頭益氣湯
功效：健脾祛濕，涼血補血
材料：紅菜頭、紅蘿蔔、粟米各1個；木耳3朶；南、北杏各15g；瘦肉 250g
做法：
1. 所有材料洗淨，紅菜頭、紅蘿蔔、粟米、瘦肉切件；杏仁用水浸軟；木耳浸軟去蒂 。
2. 燒開水，放入瘦肉出水。
3. 再燒開水，下所有材料(連浸水) ，水滾後改慢火煲2個小時，下鹽調味即可。

(2) 三耳湯
功效：滋陰清熱，涼血補血
材料：黑木耳、白背木耳、雪耳各2朶；紅蘿蔔1根；黑棗或紅棗6粒；瘦肉250g
做法：
1. 所有材料洗淨，瘦肉切片；紅蘿蔔切件；木耳、雪耳浸水泡開，去蒂切件。
2. 燒開水，下所有材料，水滾用慢火煲1個小時，下鹽調味即可。

除了食療以外，亦有一些外治法幫助舒緩鼻咽癌放射治療後的副作用。

一、 頭頸部肌肉纖維化是放療後副作用之一，此時可作頭頸部運動 - 「米字操」。

「米字操」：
將頭當成筆，寫「米」字，緩緩向上仰，維持姿勢數10秒，再慢慢將頭擺正至原位，再將頭向下屈（盡量將下巴貼胸），數10秒後再將頭回復原位，然後左轉，右轉（可加上側屈，即將耳朵盡量往肩膀貼），如此類推，左上、右上、左下、右下等不同方向進行拉伸如寫「米」字。

「米字操」主要作用是放鬆頸部肌肉，舒緩頸椎壓力，一般針對頸部肌肉比較緊張、頸部勞倦的情況，此法每日可施行2-3次。
但以下患者不宜：
-有脊髓型頸椎病患者，包括頸椎骨轉移患者
-病情嚴重的椎動脈型頸椎病患者
-頸部轉動時疼痛加重的病患者
-高血壓患者

二、咽鼓管吹張法 - 捏鼻自行吹張法，可治療咽鼓管阻塞病症，有助引流中耳鼓室積液，提高聽力。

「捏鼻自行吹張法」：
用手指捏緊鼻孔，閉口屏氣，然後將氣鼓入腮側，使耳中可聞「卟」聲。如此反復多次，此法每日可施行2-3次。但注意: 若耳痛較甚，鼓膜充血，或上呼吸道感染，或鼻塞涕多者，不宜進行此法。

三、穴位按壓：合谷、內關、足三里、三陰交等等。
耳穴取神門、肺、肝、膽、腎等穴位，每次選3-4穴，用王不留行藥珠或磁珠貼壓3-5天，經常用手輕按貼穴，以維持刺激。

肺開竅於鼻，肺喜「潤」而惡「燥」，鼻咽癌患者放療後往往以津液耗損，乾燥癥狀多見，故食療上可多選擇滋陰潤燥之品如雪耳、雪梨、南杏、百合等等，飲食上亦要注意忌煎炸辛辣的食物，同時配合「米字操」、穴位按壓等希望能幫助大家舒緩鼻咽癌放射治療後的副作用。

以上內容只供參考。如有疑問，可請教認可中醫或西醫意見。亦可瀏覽防癌會網站上嘅癌症小冊子查詢更多內容。
王克信
註冊中醫師
香港浸會大學中醫學碩士
廣州中醫藥大學中醫學學士

23/09/2025

特別通告：
由於受到超強颱風樺加沙影響，診所將於今日下午至9月25日暫停服務，請各位留在安全地方暫避。

08/09/2025

特別通告：

因天文台發出8號烈風信號，診所會暫停服務，請各位留在安全地方暫避。

8號烈風信號除下兩小時後，診所會恢復運作，護士會為受影響病人再安排覆診時間，請耐心等候。

14/08/2025

因近日天氣不穩定，若8號或以上烈風信號、黑色暴雨警告信號發出，診所會暫停服務。
直到8號烈風信號或黑雨警告信號取消後兩小時，診所會恢復服務。

14/08/2025

特別通告：
因天文台發出黑色暴雨警告，診所會暫停服務，請各位留在安全地方暫避。
黑色暴雨警告除下兩小時後，診所會恢復運作，護士會為受影響病人再安排覆診時間，請耐心等候。

05/08/2025

特別通告：
因天文台發出黑色暴雨警告至少維持至下午三時，今日診所會暫停服務，請各位留在安全地方暫避。
護士會為受影響病人再安排覆診時間，請耐心等候。

29/05/2025

【補嘢就一定好？癌症病人可唔可以食靈芝丸、雲芝丸？】
靈芝、雲芝屬菌類生物，於傳統中藥典籍有相關記載，以供藥用。靈芝，性味甘平，入心、肺、肝、腎經，具有補益氣血、寧心安神作用。而雲芝，性味甘淡、微寒，入肝、脾、肺經，具健脾利濕、止咳平喘、清熱解毒嘅作用，所以靈芝同埋雲芝，一個寧心安神，一個健脾利濕，本身都係好嘢嚟嘅。

近代藥理研究發現，靈芝、雲芝入面嘅成份具有調節免疫系統功效，提示佢哋或者可以幫助提升人體免疫力。然而，到目前為止仍未有充足證據能證實單用靈芝、雲芝有防治癌症嘅作用。

癌症治療往往好複雜，需要根據患者嘅病種、證型、治療階段等等，從而選擇清熱解毒、軟堅散結、化痰祛瘀、疏肝理氣、益氣補虛等唔同嘅治法。癌症病人嘅惡病質表現，同《金匱要略》當中大黃蟄蟲丸證嘅描述相類似，「五勞極虛，羸瘦腹滿，不能飲食。食傷、憂傷、飲傷、房室傷、飢傷、勞傷、經絡榮衛氣傷，內有乾血，肌膚甲錯，兩目黯黑，緩中補虛，大黃蟅蟲丸主之。」病人瘦到皮包骨，肚腹脹滿，胃口差唔想食嘢等等，呢個情況係因實致虛，腫瘤過度消耗而引起，就需要用大黃蟄蟲丸去攻，而呢種虛弱嘅惡病質狀態一味靠靈芝、雲芝去補，反而藥不對證，效果自然唔理想。

值得注意嘅係，市面上靈芝丸、雲芝丸質素參差，相關產品中嘅靈芝或雲芝含量成疑，甚或混有其他雜質。有啲癌症病人覺得食咗靈芝丸、雲芝丸感覺精神唔錯又好瞓啲就不停食，結果令肝酵素升高，逼不得以暫緩化療，影響療程，因此，病人不宜長期大量服用靈芝丸、雲芝丸等健康食品。如果真係要食嘅話，我哋建議只食最低分量。

所以補嘢係咪就一定係好？唔一定嘅。其實只要飲食均衡，根據食物金字塔建議分量而食，就足夠身體營養所需，唔好偏食。要適得其補，根據時令、個人體質而選擇唔同嘅湯水或食療，以偏糾偏，反而比單純服用靈芝丸、雲芝丸更「補」。最近天氣炎熱又夾濕，大家都可以煲吓清補涼湯嚟飲。

【清補涼湯】：健脾益氣，清熱利濕
材料：生、熟薏苡仁（薏米）、沙參、玉竹、淮山、蓮子、 乾百合各30克；瘦肉500克
做法：
1. 所有材料洗淨，生熟薏米、蓮子及淮山先用清水浸30分鐘；瘦肉切件汆水。
2. 燒開水，下所有材料（連浸水），水滾用慢火煲1個半小時，下鹽調味即可。

以上內容只供參考。如有疑問，可請教認可中醫或西醫意見。亦可瀏覽防癌會網站上嘅癌症小冊子查詢更多內容。
王克信
註冊中醫師
香港浸會大學中醫學碩士
廣州中醫藥大學中醫學學士

18/02/2025

【真人真事-婆婆「小病」變大病的故事】
嚮新年前嘅某一日，阿女接婆婆返屋企時，落的士嗰陣婆婆腳步浮浮企唔穩，阿女即刻扶住佢。

婆婆話有啲感冒，已經睇咗醫生，可能食咗藥瘟瘟沌沌，之後就去咗梳化度休息下。

到咗夜晚十一二點左右，婆婆開始條氣唔順，出現氣喘症狀，發出“hehe”聲，阿女見狀就即刻幫佢夾手指，一夾就發現原來婆婆嘅血含氧量（SaO2）得86-87%！

情況好危險，阿女就換定曬衫準備打999送婆婆去醫院。但係老人家覺得新年流流入院唔老嚟，無論點勸都唔肯去醫院。

唯有先將婆婆置於半臥位姿勢等佢透氣易啲，西藥又食咗，屋企又冇中藥，嚮呢個情況下得番穴位按壓呢個方法，阿女同孫仔就嚮天突、膻中、定喘、合谷、太沖、內關、公孫等穴位起勢咁按，幫婆婆排痰通氣。一路按一路見住婆婆嘅SaO2由86%慢慢上翻去90、92、93%，最高仲試過上翻去96%，按到阿女同孫仔手都軟埋，唔經唔覺原來已經按咗成個鐘喇!

就嚮呢晚，阿女就覺都唔瞓咁守住婆婆身邊有咳嘅時候就幫佢拍痰，有喘嘅時候就幫佢按下穴位，最後都平安度過咗咁危險嘅一晚。

然後第二日幫婆婆撩鼻就發現佢中咗甲流，後尾先知原來當時西醫已經叫婆婆入院，但係婆婆就以為係普通感冒冇乜野，所以就冇話比屋企人知原來咁大鑊，不過好彩，經過治療後婆婆已無大礙。

呢個故事提醒咗我哋，老人家可能身體抵抗力較虛弱，肺炎症狀未必咁明顯，例如只有胃口麻麻、精神不振等等，唔似得普通人一有肺炎就出現咳黃綠色痰、高熱、呼吸困難等等，所以平時要多啲留意老人家。

留意生命體征係咪穩定，如心率過快、SaO2低下、發燒、氣喘、面色蒼白、意識迷糊等情況時，唔好拖，請立即求醫。

另外，老人家咳痰唔易，有時都要我哋幫手拍背脊（曲一曲手掌用空掌拍）以助排痰。有啲穴位亦可以改善呼吸如天突穴、膻中穴、定喘穴又幫佢哋按下，可加配合谷、內關穴等等。

（按：張錫純曾於《醫學衷中參西錄》寫道「點天突穴以治痰厥，善針灸者，大抵知之。而愚臨證體驗，尤曲盡點法之妙。穴在結喉（頸間高骨）下宛宛中。點時屈手大指（指甲長須剪之）以指甲貼喉，指端著穴，直向下用力（勿斜向內），其氣即通。指端，當一起一點，令痰活動，兼頻頻撓動其指端，令喉癢作咳，其痰即出。」）

依家啲病毒已經變曬種，用六合一檢測包都未必測到出嚟，加上最近天氣都亂曬大籠，冬天應凍不凍，春天應暖不暖，令人難以適應，病邪容易乘虛而入。所謂「正氣存內，邪不可干；邪之所湊，其氣必虛」，平時飲食要均衡、作息定時、充足睡眠、多做運動、保持二便暢通、心情舒暢均有助增強人體正氣，減少病邪乘虛而入嘅機會。

PS：阿女係林醫師，孫仔係王醫師

06/02/2025

乳腺癌有咩要戒口？

有超過7成嘅乳腺癌患者屬於激素受體陽性型，有唔少朋友擔心有啲食物或者中藥入面，例如當歸、黃豆等都含有植物雌激素，怕食咗會容易誘發乳腺癌，究竟可唔可以食呢？

唔同嘅文獻研究入面都有唔同講法，有啲就話攝取某些植物雌激素可以抑制腫瘤生長，而有啲研究就發現植物雌激素又可能會通過雌激素受體途徑誘導乳腺癌，真係唔知邊個先啱。

就以大豆為例，《本草綱目》中記載：“大豆有黑、白、黃、褐、青、斑數色，黑豆名烏豆，可入藥，及充食，作豉；黃者可作腐，榨油，造醬；余但可作腐及炒食而已。而豆漿，性平味甘，利水下氣，制諸風熱，解諸毒。”古人發現原來豆漿有補虛潤燥、清熱、通便等功效。但係亦有古文記載大豆“服多壅氣生痰動嗽”，如果多食大豆，會容易氣滯生痰，以致咳嗽，令人身體重墜，誘發面黃瘡疥。

日常生活當中一啲常受胃脹氣之苦嘅朋友都可能有過類似嘅經驗，就係食多咗豆製品後個胃更難受、胃脹胃頂等，呢啲都係氣滯痰濕加重嘅表現。所以，適量進食大豆類食品，係有益健康嘅，但多食就容易氣滯生痰，滯住滯住，有損健康。大凡所進食之物，適可而止，過則傷身。

《丹溪心法》指出：“凡人身上、中、下有塊者，多是痰。好多時乳腺癌患者最初嘅癥狀都係自己摸到乳房有腫塊，而腫塊多屬中醫所講嘅有形之痰，屬氣滯痰凝證嘅乳腺癌患者在臨床上亦多見。

一啲嘅食材或中藥例如高麗參、鹿茸、蜂王漿、當歸等等都容易過補壅滯，同樣地佢哋都含有雌激素，雖然仍存在爭議，但為避免風險，唔單只乳腺癌，對於其他婦科腫瘤患者，我哋都唔建議食用。

除此之外，高脂肪食物亦會增加乳腺導管上皮對雌激素嘅敏感性，容易誘發乳腺癌，所以我哋亦經常強調“食雞唔食肥皮，食豬唔食肥”，日常嘅飲食要盡量避免動物性脂肪及皮，例如雞皮、豬皮、肥豬肉等。

《外科正宗》指出：“夫乳病者，乳房陽明胃經所司，乳頭厥陰肝經所屬”，乳房疾患多責之於肝同脾胃。中醫認為肝主疏洩，就女性而言，肝唔單止疏洩情緒，亦負責調暢沖任，沖脈為血海，任脈主胞胎，女性之經、帶、胎、產都同沖任關係密切，而肝經、沖任二脈皆循經於胸中，不良嘅精神刺激例如唔開心、焦慮等可以令肝失疏泄、沖任失調，繼而痰濕瘀血聚於胸脅，誘導乳腺癌發生。

所以，要預防乳腺癌，除咗要盡量避免雌激素多同肥膩嘅食物，最緊要係保持心情舒暢，開開心心；）

以上內容只供參考。如有疑問，可向您的中醫師查詢。如對乳腺癌內容有興趣，可瀏覽防癌會網站上嘅癌症小冊子查詢更多內容。
王克信
註冊中醫師
香港浸會大學中醫學碩士
廣州中醫藥大學中醫學學士

27/01/2025

12/12/2024

大腸癌，一種食出嚟嘅癌
根據衛生處資料顯示，大腸癌係香港第二位最常見嘅癌症。大腸，分結腸同直腸，係消化系統最後嘅部份。大腸癌約90%以腺瘤開始，發展過程較長，可以長達10年或以上，如果能夠及早發現癌前病變並且處理咗佢，係可以有效預防患大腸癌嘅。另外，大腸癌早期治療效果好好，能夠達到完全治癒。可以話係可防可治嘅腫瘤，但點解香港仍有唔少人患上大腸癌？我哋又應該點樣應對？

既然係可防可治，咁大腸癌有乜高危因素？
有流行病學嘅研究結果指出，大腸癌有家族聚集傾向以及同環境因素有關。有接近20%大腸癌病人嘅家屬亦曾患上大腸癌。另外，亦都同飲食習慣關係密切。低纖維或長期進食大量紅肉、加工肉類同大腸癌嘅發病率有關，所以健康飲食習慣係有助預防或者減低患大腸癌嘅機會。

便血係咪一定係大腸癌嘅徵兆？
便血唔一定係大腸癌嘅徵兆。便血係一種常見嘅消化道疾病症狀，通常最多見嘅就係痔瘡引起。痔瘡引起嘅便血多數係鮮紅嘅，而附喺大便嘅表面而唔同大便撈埋一齊，亦都可以表現為大便前後滴血，嚴重嘅話會呈噴射狀，通常係喺便秘嗰陣發生。而大腸癌嘅便血常表現為持續性、慢性帶黏液血便，同大便撈埋一齊，便意頻頻，有時只係屙一啲血或黏液而無糞便。大腸癌早期缺乏特異性表現，令人以為便血只係普通痔瘡所引起，正正就係因為咁，容易被誤診為痔瘡。所以如果有持續性嘅便血，又或者大便潛血試驗陽性嘅人士，千祈唔好掉以輕心，建議作進一步嘅檢查，排除係咪大腸癌所引起。

大腸癌嘅病徵包括：
• 大便出血、便中帶血或排黑色稀便，甚至乎痾血
• 大便後仍有肚仔或肛門谷住、墜住嘅感覺
• 大便帶有黏液
• 排便習慣改變（例如突然變得頻密咗或持續便秘）
• 貧血及體重無故下降

咁從中醫角度嚟睇，大腸癌嘅發生同乜嘢有關？
大腸癌嘅發生同濕有關。大腸癌屬於中醫學 “癥瘕”、 “積聚”、 “腸蕈”、“髒毒”、“腸風”等範疇。而其中“腸蕈” 個“蕈”字係“菇”咁解，試諗嚇喺咩環境下先會容易生菇？潮濕、溫暖、陰暗嘅角落。係中醫角度嚟睇，大腸癌嘅發生同濕有關（正氣虧虛嘅前提下）。濕嘅形成大致可分為外濕同內濕。大家有冇覺得香港特別濕？夏天又濕又熱，冬天濕凍“世一”，呢樣係同氣候、地域有關，香港位於嶺南一帶，天氣炎熱容易耗氣，潮濕容易則礙脾，係外濕嘅主要來源。而內濕就同脾胃關係密切，中醫認為脾胃其中一個主要功能係運化水濕，每當飲食失節，如成日飲涼茶、中意飲凍嘢、食壽司等等，容易造成脾胃虛寒，又或者食太多肥膩嘢、放題、邊爐、燒烤等，容易壅塞脾胃，令脾胃運化功能受損，痰飲、水濕內停，外濕再加上內濕，呢個時候就認真「濕滯」，好易出現成身好重，個頭好似比嘢罩住咁、食嘢冇胃口，肚脹、屙爛屎等等症狀，呢啲都係香港人典型脾虛濕蘊嘅體質特點。

點樣預防大腸癌？
預防大腸癌應從日常生活開始。飲食失節唔單只係冇節制咁解，而係失去調節嘅意思，例如飲食唔定時，節食、偏食而導致的營養搭配不均衡都計埋。所以我哋選擇食物嘅時候，應根據「健康飲食金字塔」嘅指引，適當咁進食五穀類、蔬果類、奶類、肉類嘅食物，去確保攝取足夠嘅營養，即澱粉質、蛋白質、脂肪、纖維素、維生素同礦物質等。其實同《素問•臟器法時論》所提出：「五穀為養，五果為助，五畜為益，五菜為充」嘅概念相類似，最緊要樣樣食啲，均衡飲食。

點解食多啲蔬果有助預防大腸癌？
根據營養師建議，每日應進食五份蔬菜和水果，日日2加3（即每日吃2份水果加3份蔬菜，一份等如半飯碗蔬菜或一個中型水果)。植物性嘅食物如蔬果、穀類和豆類等含有大量纖維同營養素，有助預防大腸癌。纖維有分兩種，包括水溶性纖維和非水溶性纖維。水溶性纖維吸水後變成啫喱狀，如蔬菜、水果肉、麥皮、薏米等，有助減低膽固醇和穩定血糖。非水溶性纖維吸水後會變成海綿狀，如穀類外殼、果仁、種子、果皮、粗纖蔬果等，幫助促進腸道蠕動，縮短致癌物喺體內停留嘅時間。

大量進食紅肉同加工肉類會增加患大腸癌風險？
紅肉包括牛、豬、羊肉等等；加工肉類是指煙燻、鹽醃或添加防腐劑的食物，包括火腿、煙肉、香腸、臘腸等。紅肉中醫角度嚟睇雖然有補益嘅作用，但性偏溫，多食則易積熱。《素問·熱論》提出“病熱稍愈，食肉則復，多食則遺，此其禁也。”認為患熱病者應當限制肉類嘅攝取，避免濕熱積聚，以致熱邪遺留唔走，或熱病復發。而一啲加工醃製過嘅食物，佢哋個樣望落都係乾噌噌、顏色唔靚仔，一句講曬就係唔新鮮，試諗下，啲醃製過嘅肉係肉，而我哋條腸又係肉，當啲醃製過嘅嘢經過我哋嘅腸道嗰陣係咪某程度上會醃埋條腸？間唔中一兩餐食少少無乜問題嘅，我哋嘅身體仲代償得到，但係如果長期食就會增加患大腸癌嘅風險，所以就唔好大量食紅肉同加工肉類，凡事要有節制。除此之外，食煙飲酒呢啲就盡量避免啦。

原來每日運動同keep fit係有助預防大腸癌？
任何類型嘅運動都可減低患癌風險，最緊要唔好成日坐，要郁多啲，咁樣條腸先會蠕動得好啲，體內嘅廢物先會容易啲排走。而保持體重都好重要，根據衞 生署資料參考，理想嘅體重指標 (BMI) 係界符18.5至22.9之間，而女士嘅腰圍最好唔好超過80釐米或31.5吋，男士嘅腰圍唔好超過90釐米或35.5吋，有助減少體內脂肪積聚，降低患癌風險。

醫師我成日便秘，有冇一啲嘅食療可以推薦？
中醫認為六腑以通為用，對於大便秘結嘅朋友，以下有啲食療幫你紓緩便秘（腹瀉者不宜）：

1. 【木瓜雪耳湯】
功效：補脾益肺，潤腸通便
材料：木瓜250克，雪耳2朶，南杏20克，無花果5粒，瘦肉500克
做法：
1. 所有材料洗淨，木瓜切塊；無花果切粒；雪耳以水泡發，去蒂分小份；南杏先浸水30分鐘；瘦肉切件汆水。
2. 燒開水，下木瓜、南杏、無花果及瘦肉（連浸水），水滾後改慢火煲1個半小時。
3. 最後下雪耳，再水滾後煲10分鐘，下鹽調味即可。

2. 【南瓜濃湯】（1人份量）
功效：健脾益氣，潤腸通便
材料：南瓜、薯仔各150克
做法：
1. 將所有材料洗淨切片，加水500毫升打成汁狀。
2 . 成汁後煮沸即可。

3. 【黑芝麻糊】（1人份量）
功效：健脾益腎，潤腸通便
材料：黑芝麻30克，白米15克，鮮奶250毫升，白糖適量
做法：
1. 將黑芝麻及白米洗淨，加水磨成糊狀。
2. 磨好後煮沸，加入鮮奶及白糖共煮沸即可。

另外，順時針咁搓下個肚仔都有助紓緩便秘，因為啲大便響大腸入面係先從升結腸（向上走↑），再到橫結腸（打橫走→），最後到降結腸同乙狀結腸→（向下走→）咁樣順時針走，順住大便走向搓有助排出大便，但係搓嘅幅度要大啲同埋搓到個肚仔軟為止先有幫助。此外，飲多啲水都可以促進腸蠕動，有助排便。（分次少量效果更好）。

而對於成日容易肚屙嘅朋友，以下都有啲食療幫你紓緩一下。（便秘者不宜）

1. 【淮山蓮子栗子湯】
功效：健脾止瀉，補腎養心
材料：淮山、蓮子各20克，栗子15粒，瘦肉500克
做法：
1. 所有材料洗淨，淮山及蓮子先浸水30分鐘；栗子去殼及衣；瘦肉切件汆水。
2. 燒開水，下所有材料（連浸水），水滾後改慢火煲2小時，下鹽調味即可。

2. 【淮山薏米粥】
功效：清熱利濕，健脾止瀉
材料：生、熟薏米各15克，淮山30克，白米150克
做法：
1. 所有材料洗淨，生、熟薏米及淮山先浸水30分鐘。
2. 燒開水，下所有材料（連浸水），水滾後改慢火煲成粥，下鹽調味即可。

以上食療僅供參考，建議在註冊中醫師指導下使用。

穴位（揉按）：
1. 天樞
定位：在腹中部，臍中旁開2寸，腹直肌中。
天樞為大腸經募穴，能整腸通便，疏瀉為主。

2. 足三里
定位：在小腿前外側，當膝部兩側凹陷（膝眼）下3寸，小腿前部最硬骨凸外一橫指處。
足三里為足陽明胃經合穴，“合治內腑”，能健脾和胃，補中為要。

3. 合谷（孕婦不宜按）
定位：在手背，以一手的拇指指骨關節橫紋，放在另一食指與拇指之間的虎口處，當拇指尖下便是穴位。
合谷為大腸經之原穴，能通降腸胃。
以上穴位有相向調節作用，便秘、腹瀉者皆宜。

管住嘴、邁開腿，大腸健康由今日做起
預防往往勝於治療，從今日起食多啲蔬果，食少啲加工肉類，做多啲運動，習慣定時定候排便，養成健康嘅生活方式，配合定期篩檢，係有效預防大腸癌最好嘅方法。

以上內容只供參考。如有疑問，可向您的中醫師查詢。如對大腸癌、食療、穴位等內容有興趣，可瀏覽防癌會網站上嘅癌症小冊子查詢更多內容。
王克信
註冊中醫師
香港浸會大學中醫學碩士
廣州中醫藥大學中醫學學士

25/10/2024

莫再悲！探討肺癌與情緒關係

乜原來肺臟同情緒係有關係嘅咩？
有呀！中醫將喜、怒、憂、思、悲、恐、驚稱為七情，七情屬於正常嘅精神生理現象，如果七情太過，造成人體嘅氣血、陰陽、臟腑、經絡功能失調而發病。而大家又可以估下，七情當中，有邊啲同肺有關呢？答案係憂同埋悲。悲、憂都同肺有關，七情入面就佔咗兩個。中醫認為肺係主宰悲傷情緒嘅臟腑，試想像一下當你感到悲傷嗰陣，係咪做咩都會提唔起勁，呈現一種好鬱悶嘅狀態？

咁樣，悲傷嘅情緒又關肺癌事？
關㗎！《素問·舉痛論》曰：“百病生於氣也……悲則氣消。”悲傷嘅情緒容易消耗肺氣，肺氣虛弱，容易令肺主氣司呼吸（肺通過吸氣同呼氣嘅過程生成氣，並調節全身氣機）、衛外（抵禦外邪侵襲，類似現代醫學嘅免疫系統）等嘅功能失常，從而出現好攰、成身無力、唔夠氣唔想講嘢、情緒低落等等嘅症狀。而肺癌發病往往就係以正氣虧虛（抵抗力差）為先，在正氣虧虛嘅前提下，痰、濕、瘀、毒聚結，繼而發為肺癌。

好多時癌症病人需要面對各種治療同埋不良反應、病情有反復嘅時候又倍感失望，又或者出現癌性疼痛、持續性嘅疲乏，睡眠障礙等，對於患者嘅身心，都會造成唔少負擔。而悲傷、抑鬱等情緒，又對病情有負面影響，形成惡性循環。喺呢個時候，唔單只肺，亦都同肝有關嘅。

原來肺同肝又有關係？
肺癌係香港癌症頭號殺手，而根據衛生資料統計，過去十年香港女性肺癌嘅年齡標準化發病率有上升趨勢。有唔少女性肺癌患者，佢地無吸煙習慣，但係好不幸地都患上肺癌，究竟又點解呢？

中醫認為肝主疏泄（肝負責疏通全身氣機，幫手調節情緒、消化、代謝系統等等），假如肝疏泄不及，就容易出現胸脅、兩乳、少腹等局部脹悶，就好似處身喺一間將啲門窗閂到實一實，密不透風嘅房入面，令人倍感氣悶，俗稱肝氣鬱結。而女子以肝血為用，肝血足則氣機暢達，情志調和，所謂肝之性喜調達而惡抑鬱，而女性本身有經帶胎產等嘅生理變化，容易造成肝血虛，而令肝失濡養以致情志失調，再加上種種嘅社會壓力，比較容易生悶氣。

而《靈樞‧經脈》肝經“上貫膈，布脅肋”、“上注肺”，可見肝同肺嘅經脈喺貫通嘅，肝氣鬱結可影響肺嘅氣機，令肺主氣司呼吸（通過一呼一吸嘅運動，促進氣血運行同埋生成）功能失常，而人體氣機運行，就如太極圖嘅圓轉運動咁，肝自左升，而肺主右降。當肝經又或者肺經都出事嗰陣，身體就好容易亂曬大籠，氣機好易卡住而變得唔順暢，所以從生理、病理，抑或治療上，對於情志嘅調暢係唔可以缺少嘅內容。

所以對於肺癌患者，情緒嘅調節係好重要㗎。悲傷嘅情緒係人之常情嚟嘅，係正常㗎，唔洗特登壓抑又或者否認佢，要意識佢嘅存在並允許自己悲傷。然後嘗試用下唔同嘅方法令自己心情靚仔啲，例如向身邊嘅人傾訴、做運動、聽音樂等等，都幫到改善情緒㗎，以下係一啲中醫嘅方法，睇下幫唔幫到你：

食療：
1. 氣陰不足：症見咳嗽、口乾、乏力等
【雪耳杏仁百合湯】（四人份量）
材料：雪耳2朵，南杏、百合各30克，蜜棗5粒，瘦肉500克
做法：
1. 所有材料洗淨，南杏、百合和蜜棗用水浸軟；雪耳浸開；瘦肉切件汆水。
2. 燒開水，下所有材料（連浸杏仁、百合和蜜棗水），水滾後改慢火煲1個半小時，下鹽調味即可。
功效：清熱生津，養心潤肺

2. 食慾不振：
【番茄薯仔瘦肉湯】（四人份量）（反酸者不宜）
材料：番茄、薯仔、瘦肉各250克，生薑3片
做法：
1. 將所有材料洗淨，番茄及薯仔切件；瘦肉切片。
2. 燒開水，下所有材料，水滾用慢火煲1小時，下鹽調味即可。
功效：開胃健脾

3. 肝氣鬱結：
【玫瑰花茶】（一人份量）
材料：玫瑰花10枚，去核紅或黑棗3粒
做法：先置玫瑰花及棗於保溫杯內，用滾水沖泡，加蓋焗30分鐘，代茶飲用，一般沖泡3-5次。
功效：疏肝解鬱，健脾益氣

穴位（揉按）：
1. 【合谷】（孕婦不宜按）
定位：在手背，以一手的拇指指骨關節橫紋，放在另一食指與拇指之間的虎口處，當拇指尖下便是穴位。
大腸經之原穴，陽明為多氣多血之經，能調和氣血，通經活絡。

2. 【內關】
定位：在前臂掌側，伸出手心，握拳，可見前臂有兩條明顯肌腱，放鬆拳頭，用另一手拇指按揉腕橫紋上2寸，兩條肌腱中間位置。 心包經絡穴，別走少陽三焦，八脈交會穴之一，與陰維脈相通，能寬胸理氣、寧心安神。

3. 【太沖】
定位：在腳部，大拇趾與第二趾骨之間，沿骨縫間隙，後方凹陷處。
肝經之原穴，能疏肝理氣。與合谷穴相配名為四關，二穴相用增強行氣活血之功。

運動：
1. 八段錦
舉個例子，唔開心嘅時候係咪容易垂頭喪氣，唔覺意垂低咗個頭，同埋透氣都唔夠力咁，縮埋個人，喺呢個時候氣機就容易鬱滯；又或者情緒緊張嘅時候，留意一下兩個膊頭，其實係會唔自覺咁縮咗上去，好容易扯住肩頸。咁響呢個時候，八段錦入邊嘅“兩手托天理三焦”、“左右開弓似射雕”等等嘅招式唔單只可以舒緩肩頸嘅緊張，亦可以充分伸展胸廓嘅經絡臟腑，暢通返啲氣機。

2. 腹式呼吸法
首先放鬆自己身體，慢慢用鼻深深吸氣，感受肚仔漲起（而唔係胸廓），然後停一停，用嘴巴慢慢呼氣，肚仔縮返入去，儘量將空氣完全呼出，重複做幾分鐘，呢個方法有助放鬆身心，增加肺部吸氧量。

早發現、早治療
早期肺癌一般冇乜明顯病徵，所以唔少患者發現時已到肺癌後期，好似出現持續性咳嗽（1個月以上）、痰中帶血、胸肺反覆感染、聲音嘶啞、胸悶痛好耐都唔好，鎖骨上淋巴結腫大、杵狀指（手指末端膨脹）、食慾不振及體重下降、好攰，要盡快檢查，照一照個肺睇吓有冇唔妥。

喜樂的心乃是良藥
其實情緒唔單只同肺癌有關，其他癌症都有關係，好多時啲病都係鬱返嚟，所以好好咁調養自己嘅情緒係好重要㗎，希望大家都能夠擁有一顆平安、喜樂嘅心，開開心心咁過每一日，要記住“喜樂的心乃是良藥”（箴言17:22）。

以上內容只供參考。如有疑問，可向您的中醫師查詢。如對肺癌、食療、穴位等內容有興趣，可瀏覽防癌會網站上嘅癌症小冊子查詢更多內容。
王克信
註冊中醫師
香港浸會大學中醫學碩士
廣州中醫藥大學中醫學學士

#肺癌 #情緒 #養生