14/01/2025
শৌচদ্বাৰৰ যিকোনো অসুবিধাক ৰোগীয়ে পাইলচ বুলি বৰ্ণনা কৰে। গতিকে, চিকিৎসকে খুচঁৰি খুচঁৰি সুধি, প্ৰত্যক্ষ কৰি বা আন পৰীক্ষা কৰি প্ৰথমে উলিয়াব লাগে যে প্ৰকৃততে কি হৈছে। ৰোগীয়ে পাইলচ বুলি কলেও পৰীক্ষা কৰাৰ পাছত সেয়া পাইলচ, ফিষ্টুলা, ফিচাৰ, পেৰিনিয়েল এবচেচ, মলদ্বাৰৰ কৰ্কট ৰোগ, প্ৰকটাইটিচ, চেন্তিনেল টেগ, পলিপ , প্ৰলেপচ ,পাইনেডাল চাইনাচ ইত্যাদি পোৱা যায়, আনকি ৰক্তক্ষৰণৰ কাৰণ মলদ্বাৰৰ ওপৰৰ মানে বৃহদান্ত্ৰতো থাকিব পাৰে।
হয়, পায়খানাৰ ৰস্তায়েদি তেজ যোৱা মানেই আপোনাৰ পাইলচ নহবও পাৰে, ফিচাৰ, কেঞ্চাৰ, কলাইটিচ আদিও হ'ব পাৰে।
আজি কেৱল এইবোৰৰ মাজত অলপ পাৰ্থক্যবোৰ চমুকৈ আৰু সহজকৈ লিখিবলৈ লৈছোঁ -
#পাইলচ হৈছে মলদ্বাৰৰ ভিতৰৰ বা বাহিৰৰ আঙুৰৰ দৰে এটা বস্তু হোৱা যি কেতিয়াবা ফাটি গৈ তেজ যাব পাৰে | বেছিভাগ ক্ষেত্রতেই এই বলবোৰ প্রকৃততে মলদ্বাৰত থকা সিৰাবোৰৰ ফুলি যোৱা অৱস্থাহে | গতিকে, টান পায়খানা বা আন কাৰণত সিৰা ফাটি গলে পোনে পোনে সিৰাৰ পৰা সতেজ তেজ ফোটা ফোটকৈ পৰে | পাইলচ হোৱাৰ বিভিন্ন কাৰণ আৰু তত্ত্ব আছে যদিও প্রায় সকলোতে মলদ্বাৰত অধিক চাপ দিয়াটো কাৰণ হিচাপে থাকে | লেট্রিনত বেছি সময় বহি থকা, কোমল লিপিট খোৱা গাদীত বেছি বহি থকা, সদায় কোষ্ঠ কাঠিন্য থকা, বেছি জোৰ দিয়া আদি বিভিন্ন প্রকাৰে মলদ্বাৰত সদায় চাপ পৰিলে সিৰাবোৰ ফুলি যায় যাক আমি পাইলচ বুলি কওঁ | পাইলচত সাধাৰণতে বিষ নাথাকে | কিন্তু তেজ গোট মাৰিলে বা সংক্ৰমণ হলে বিষাব পাৰে।
#ফিচাৰ হৈছে পায়ুপথ ফাটি যোৱা বা ঘাঁ হোৱা । টান পায়খানা, পেলু বা এমিবা জাতীয় বীজানু , পায়ুমৈথুন আদি বিভিন্ন কাৰণৰ ওপৰিও কলাইটিচ , IBD থকা ৰোগীৰো এই অসুবিধা পাব পাৰে | ফিচাৰ হ'লে পায়খানা কৰাৰ পাছত প্ৰচণ্ড বিষ আৰু জলাপুৰা হব পাৰে , খজুৱতিও থাকিব পাৰে লগত। ফিচাৰত পায়খানাৰ সৈতে তেজ লাগি আহিব পাৰে বা টয়েলেত পেপাৰত তেজ দেখা যায় ।ফিচাৰ মেৰামতি কৰিবলৈ আহা কোষবোৰ কেতিয়াবা ফিচাৰৰ আশে পাশে জমা হৈ ছাল বৃদ্ধি পোৱাৰ দৰে দেখা যায় , এইবোৰক চেণ্টিনেল টেগ বোলে।
ফিচাৰ গুৰিৰ পৰাই হওক, বা কেতিয়াবা মলদ্বাৰৰ ভাজত সংক্ৰমণ হৈ ফোড়া ওলাব পাৰে | ইয়াক পেৰিনিয়েল #এবচেচ বুলি কোৱা হয় | ইয়াত বিষ থাকে প্ৰচণ্ড।
এবচেচ ভাল নহলে ই কেতিয়াবা #ফিষ্টুলাৰ ৰূপ লয় । বিশেষকৈ মলদ্বাৰৰ ভিতৰেদি মুখ ওলাই এটা সুৰুংগৰ দৰে হৈ পৰে। পূঁজ আহি থাকে, খজুৱতি বিষ থাকিব পাৰে , ঔষধ খালে দুই এদিন ভাল হোৱা যেন লাগে , কিন্তু কিছুদিন পাছত আকৌ বাঢ়ে।
কেতিয়াবা কিছমানৰ গোটেই মলভাণ্ড ওলাই আহে তাক প্ৰলাপচ বুলি কোৱা হয় ।
কঁকালৰ তলত কেতিয়াবা ফোড়াৰ নিচিনা ওলায় ভিতৰত চুলি জমা হৈ থকা দেখা যাব পাৰে , ইয়াক পায়েনিডাল চাইনাচ বোলে |
দীঘলীয়া হোৱা বাবে আজিলৈ ইমানতে সামৰিছোঁ | অধিক জানিবলৈ মেচেজ বা কমেন্টযোগে জনাব পাৰে |
✍️ ডাঃ আমিৰুল ইছলাম খান |
যোগাযোগ - 9395681839
ডাঃ খানক আমাৰ দেৱদাৰু ডাইগ্নষ্টিকচ অভয়াপুৰী ত সাক্ষাৎ কৰিব পাৰে প্ৰতি শুক্ৰবাৰ, দেওবাৰ আৰু মঙ্গলবাৰ বিয়লি ২ বজাত। আগতীয়াকৈ বুকিং লবলৈ ফোন কৰক 9395642474
