National Health Mission Alappuzha

18/01/2026

ആരോഗ്യ കലോത്സവം :

16/01/2026

പാലിയേറ്റീവ് രംഗത്ത് കേരളം ലോകത്തിന് മാതൃക: പി പി ചിത്തരഞ്ജൻ
എംഎൽഎ

പാലിയേറ്റീവ് സ്നേഹസംഗമം സംഘടിപ്പിച്ചു

പാലിയേറ്റീവ് കെയർ രംഗത്ത് കേരളം ലോകത്തിന് തന്നെ മികച്ച മാതൃകയാണെന്ന് പി പി ചിത്തരഞ്ജൻ എംഎൽഎ പറഞ്ഞു. ലോക പാലിയേറ്റീവ് ദിനാചരണത്തോടനുബന്ധിച്ച് ആലപ്പുഴ ജില്ലാ പഞ്ചായത്തും ആരോഗ്യവകുപ്പും സംയുക്തമായി തുമ്പോളി ബീച്ചിൽ സംഘടിപ്പിച്ച പാലിയേറ്റീവ് സ്നേഹസംഗമത്തിൽ വിശിഷ്ടാതിഥിയായി സംസാരിക്കുകയായിരുന്നു അദ്ദേഹം.

സംസ്ഥാന സർക്കാർ ഈ മേഖലയ്ക്ക് നൽകുന്ന വലിയ പിന്തുണയും കരുതലുമാണ് കേരളത്തെ മുമ്പന്തിയിലെത്തിച്ചതെന്നും ലോക പാലിയേറ്റീവ് ദിനം ആഘോഷിക്കാൻ ഏറ്റവും അർഹതയുള്ള സംസ്ഥാനം നമ്മുടേതാണെന്നും അദ്ദേഹം പറഞ്ഞു.

'കരുതലോടെ കൈപിടിക്കാം, കൂടെയുണ്ടാകാം' എന്ന സന്ദേശമുയർത്തി നടത്തിയ പരിപാടിയിൽ ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ ഭിന്നശേഷിക്കാരുടെ സ്റ്റാളുകൾ ഉദ്ഘാടനം ചെയ്തു.

രോഗാവസ്ഥയിൽ വീടിനുള്ളിൽ കഴിയുന്നവർക്ക് മാനസികോല്ലാസം പകരുക എന്ന ലക്ഷ്യത്തോടെ നടത്തിയ സംഗമത്തിൽ മാരാരിക്കുളം തെക്ക്, ആര്യാട്, മണ്ണഞ്ചേരി എന്നീ പഞ്ചായത്തുകളിലെയും, ആലപ്പുഴ നഗരസഭാ പരിധിയിലെയും നിരവധി ഭിന്നശേഷിക്കാർ പങ്കെടുത്തു. ഭിന്നശേഷി കലാപരിപാടികളും ഭക്ഷ്യകിറ്റ് വിതരണവും ചടങ്ങിന്റെ ഭാഗമായി നടന്നു.

ചടങ്ങിൽ ജില്ലാ പഞ്ചായത്ത് സ്ഥിരംസമിതി അധ്യക്ഷരായ എസ് രാധാകൃഷ്ണൻ, അഡ്വ. ആർ രാഹുൽ, ജില്ലാ പഞ്ചായത്തംഗം അഡ്വ. ആർ റിയാസ്, മാരാരിക്കുളം തെക്ക് ഗ്രാമപഞ്ചായത്ത് പ്രസിഡന്റ് വി ഡി അംബുജാക്ഷൻ, മണ്ണഞ്ചേരി ഗ്രാമപഞ്ചായത്ത് പ്രസിഡന്റ് ദീപ്തി അജയകുമാർ, ആലപ്പുഴ നഗരസഭാഗം പി വി ബനഡിക്ട്, ആര്യാട് ഗ്രാമപഞ്ചായത്തംഗം വി പി ബിന്ദു, ദേശീയ ആരോഗ്യ ദൗത്യം ജില്ലാ പ്രോഗ്രാം മാനേജർ ഡോ. കോശി സി പണിക്കർ, ആലപ്പി ഇനിഷ്യേറ്റീവ് ഇൻ പാലിയേറ്റീവ് പ്രസിഡന്റ് ഷഫീക്, ആരോഗ്യവകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

16/01/2026

15/01/2026

അശ്വമേധം 7.0 കുഷ്ഠരോഗ നിർണയ ഭവന സന്ദർശന പരിപാടിയുടെ ഭാഗമായി ആശാപ്രവർത്തകയും പുരുഷ വോളണ്ടിയറും ജനുവരി 20 നു മുൻപ് നിങ്ങളുടെ വീടുകളിൽ എത്തി ത്വക്ക് പരിശോധന നടത്തുന്നു

14/01/2026

ആരോഗ്യ വകുപ്പിന് പുതിയ വെബ് പോര്‍ട്ടല്‍

ഒറ്റ ക്ലിക്കില്‍ ആരോഗ്യ വകുപ്പിന് കീഴിലുള്ള 10 വകുപ്പുകള്‍, 30 സ്ഥാപനങ്ങള്‍

സംസ്ഥാനത്തിന്റെ ആരോഗ്യ വിവരങ്ങള്‍ സംബന്ധിച്ച ആധികാരിക വിവരങ്ങള്‍ പങ്കുവെയ്ക്കാന്‍ പുതിയ ഔദ്യോഗിക വെബ്പോര്‍ട്ടല്‍ സജ്ജമായി. ആരോഗ്യവകുപ്പ് സംഘടിപ്പിച്ച 'വിഷന്‍ 2031' എന്ന ആരോഗ്യ സെമിനാറില്‍ ആരോഗ്യാവകുപ്പ് മന്ത്രി വീണാ ജോര്‍ജ് ആണ് വെബ്പോര്‍ട്ടല്‍ ലോഞ്ച് ചെയ്തത്. health.kerala.gov.in എന്നതാണ് പോര്‍ട്ടലിന്റെ അഡ്രസ്. കേരള സര്‍ക്കാര്‍ സ്ഥാപനമായ സി-ഡിറ്റ് ആണ് പോര്‍ട്ടല്‍ നിര്‍മ്മിച്ചത്.

കേരളത്തിന്റെ ആരോഗ്യ മേഖലയിലെ നേട്ടങ്ങള്‍, പ്രവര്‍ത്തങ്ങള്‍, വിവരങ്ങള്‍, ബോധവത്കരണം തുടങ്ങിയവ ലോകത്തിന്റെ വിവിധ ഭാഗങ്ങളിലുള്ള പൊതുജനങ്ങളിലും ഗവേഷകരിലും എത്തിക്കുകയാണ് പോര്‍ട്ടലിന്റെ ലക്ഷ്യം.

ആരോഗ്യ വകുപ്പിന് കീഴിലുള്ള 10 വകുപ്പുകള്‍, 30 സ്ഥാപനങ്ങള്‍ എന്നിവയുടെ വെബ്‌സൈറ്റുകളെക്കൂടി കോര്‍ത്തിണക്കിയാണ് പോര്‍ട്ടല്‍ ഒരുക്കിയിരിക്കുന്നത്. ഇവയുടെയെല്ലാം ആധികാരിക വിവരങ്ങളും, അറിയിപ്പുകളും, പ്രവര്‍ത്തങ്ങളും ജനങ്ങളിലെത്തിക്കാന്‍ പോര്‍ട്ടല്‍ കൂടുതല്‍ ഉപകാരപ്രദമാകും.

വളരെ ഡയനാമിക് ആയ ഡാഷ്‌ബോര്‍ഡില്‍ കേരളത്തിന്റെ ആരോഗ്യരംഗത്തെ ജനസംഖ്യാ പരിവര്‍ത്തനം സംബന്ധിച്ച ഗ്രാഫുകള്‍, ടേബിളുകള്‍ എന്നിവ ഉള്‍പ്പെടുത്തിയിട്ടുണ്ട്. ആരോഗ്യ മേഖല സംബന്ധിച്ച് ജനങ്ങള്‍ക്കാവശ്യമുള്ള നിയമങ്ങള്‍, മാര്‍ഗനിര്‍ദേശങ്ങള്‍, ഉത്തരവുകള്‍ എന്നിവയും ലഭ്യമാക്കി വരുന്നു. ആരോഗ്യ വിവരങ്ങള്‍ക്ക് പുറമെ പ്രധാനപ്പെട്ട ബോധവത്കരണ പോസ്റ്ററുകള്‍, വിഡിയോകള്‍ എന്നിവയും ലഭ്യമാണ്.

14/01/2026

പാലിയേറ്റീവ് സ്നേഹ സംഗമം ജനുവരി 15 ന് വൈകിട്ട് 3 മണിക്ക് തുമ്പോളി ബിച്ചിൽ. ഏവർക്കും സ്വാഗത്വം.

13/01/2026

മാധ്യമവിചാരം: ഡി ആരഭി ജേതാവ്

അമീബിക് മസ്തിഷ്ക ജ്വരത്തിനെ സംബന്ധിച്ച മാധ്യമ വാർത്തകളെ ആസ്പദമാക്കി ജില്ല ആരോഗ്യ കുടുംബക്ഷേമ വകുപ്പ് ഹൈസ്ക്കൂൾ വിദ്യാർത്ഥികൾക്കായി നടത്തിയ മാധ്യമവിചാരം മത്സരത്തിൽ മണപ്പുറം സെന്റ് തെരേസാസ് ഹൈസ്ക്കൂളിലെ ഡി ആരഭി ഒന്നാം സ്ഥാനം നേടി. വിവിധ മാധ്യമങ്ങളിൽ വന്ന അമീബിക് മസ്തിഷ്ക ജ്വരത്തെ സംബന്ധിച്ച വാർത്തകളെ വിശകലനം ചെയ്ത് വിദ്യാർത്ഥികൾ തയ്യാറാക്കിയ റിപ്പോർട്ട് അവതരിപ്പിച്ചതിനെ ആധാരമാക്കിയാണ്‌ വിജയികളെ നിശ്ചയിച്ചത്. മുഹമ്മ മദർ തെരേസ ഹൈസ്ക്കൂളിലെ എ.എം. മാധവ്, കലവൂർ ഗവ. എച്ച്,എസ്.എസിലെ ദ്യുതി ആർ കുറുപ്പ് എന്നിവർ രണ്ടും മൂന്നും സ്ഥാനത്തിന്‌ അർഹരായി. അറവുകാട് എച്ച്.എസ്.എസ്. ലെ റയൻ എ നസീർ, പൊത്തപ്പള്ളി കെ.കെ.കെ.വി.എം. എച്ച്.എസ്.എസ്.ലെ യഷ് രാജ് എന്നിവർക്ക് വിധികർത്താക്കളുടെ പ്രത്യേക പരാമർശം ലഭിച്ചു. ജില്ലയിലെ വിവിധ സ്കൂളുകളിൽ നിന്നുള്ള വിദ്യാർത്ഥികൾ പങ്കെടുത്ത മത്സരത്തിൽ ചെട്ടികാട് താലൂക്ക് ആശുപത്രി സൂപ്രണ്ട് ഡോ. വിപിൻ കെ രവി, ജില്ല ഇൻഫൊർമഷൻ ഓഫീസിലെ അസിസ്റ്റന്റ് എഡിറ്റർ ടി.എ. യാസിർ എന്നിവരായിരുന്നു വിധികർത്താക്കൾ.ഡെപ്യൂട്ടി ജില്ല മെഡിക്കൽ ഓഫീസർ ഡോ. ദിലീപ് കുമാർ എസ് ആർ വിജയികൾക്കുള്ള സമ്മാനം വിതരണം ചെയ്തു. ഡെപ്യൂട്ടി ഡി.എം.ഒ. ഡോ. എം. അനന്ത്, ഡോ. പാർവതി പ്രസാദ്, ഡെപ്യൂട്ടി ജില്ല എജ്യൂക്കേഷൻ മീഡിയ ഓഫീസർ ഡോ. സേതുനാഥ് ആർ, ആരോഗ്യ കേരളം കൺസൾടന്റ് ആഗ്നൽ ജോസഫ് എന്നിവരാണ്‌ നൂത്നമായ ഈ മത്സരത്തിന്‌ നേതൃത്വം നൽ കിയത്. ആദ്യ 3 സ്ഥാനക്കാർക്ക് 3000, 2500,2000 രൂപ വീത്വും പ്രത്യേക പരാമർശം നേടിയവർക്ക് 1000 രൂപ വീതവും ധനസമ്മാനം ലഭിക്കും.

11/01/2026

ഈ ഞായറാഴ്ച്ച ഒരു സ്വയം പരിശോധന നടത്തിയാലോ?

09/01/2026

കുഷ്ഠരോഗം നിവാരണം ചെയ്യുക എന്ന ലക്ഷ്യത്തോടെ സമൂഹത്തിൽ ഒളിഞ്ഞിരിക്കുന്ന കുഷ്ഠരോഗം കണ്ടെത്തുന്നതിന് 2026 ജനുവരി 7 മുതൽ ആരംഭിച്ച ജനുവരി 20 വരെ തുടരുന്ന ആരോഗ്യ വകുപ്പ് അശ്വമേധം 7.0 എന്ന പേരിൽ ക്യാമ്പയിന് ജില്ലയിൽ തുടക്കം കുറിക്കുകയാണ്. ജില്ലയിൽ നിലവിൽ 18 പേരാണ് കുഷ്ഠ രോഗത്തിന് ചികിത്സയിലുള്ളത്.

ഇതിൽ രോഗം മൂലം ഭാഗികമായി അംഗവൈകല്യമുള്ള 3 പേർ ഉൾപ്പെടുന്നു. 2 കുട്ടികളും ഉൾപ്പെടുന്നു. കുട്ടികളിൽ കുഷ്ഠരോഗം ഉണ്ടാകുന്നു എന്നത് രോഗത്തിൻ്റെ സമൂഹത്തിലെ വ്യാപനമാണ് ചൂണ്ടി കാണിക്കുന്നത്. അതുകൊണ്ടു തന്നെ ഇനിയും കേസുകൾ കണ്ടെത്താനുണ്ട് എന്നതാണ് കണക്കുകൾ സൂചിപ്പിക്കുന്നത്. ഭവന സന്ദർശന പരിപാടിയിൽ ജനപിന്തുണയും സഹകരണവും ഉറപ്പാക്കിയാൽ മാത്രമേ കൂടുതൽ കേസുകൾ കണ്ടെത്താൻ സാധിക്കുകയുള്ളു. പരിപാടിയുടെ ഭാഗമായി ആരോഗ്യ വകുപ്പ് ജീവനക്കാരുടെ നേതൃത്വത്തിൻ പരിശീലനം ലഭിച്ച ഒരു ആശ പ്രവർത്തകയും, പുരുഷ വോളണ്ടിയറും അടങ്ങുന്ന ടീം വീടുകളിലെത്തി പ്രാഥമിക ത്വക്ക് പരിശോധന നടത്തും.1957 ടീമുകളെ ഇതിനായി ജില്ലയിൽ സജ്ജമാക്കിയിട്ടുണ്ട്. പരിശീലനം ലഭിച്ച ടീം അംഗങ്ങൾ ജില്ലയിലെ 608769 വീടുകളിൽ രണ്ടാഴ്ച്ചകൊണ്ട് സന്ദർശനം പൂർത്തിയാക്കുന്നതാണ്. ജില്ലയിൽ ആകമാനം പ്രയാലിംഗഭേദമെന്യേ 2400692 വ്യക്തികളെ പരിശോധിക്കേണ്ടതുണ്ട്. രോഗ ലക്ഷണങ്ങൾ സംശയിക്കുന്നവർക്ക് ആവശ്യമായ തുടർ പരിശോധനയും ചികിത്സയും ആരോഗ്യ കേന്ദ്രങ്ങളിൽ നിന്ന് ലഭ്യമാക്കുന്നതാണ്. വ്യക്തിഗത വിവരങ്ങൾ തികച്ചും സ്വകാര്യമായി സൂക്ഷിക്കുന്നതും ആണ്.

വായുവിലൂടെ പകരുന്ന ഒരു രോഗമാണ്. കുഷ്ഠരോഗം..തൊലിപ്പുറത്ത് നിറം മങ്ങിയതോ ചുവന്ന നിറത്തിലുള്ളതോ ആയ പാടുകളിൽ സ്പർശനം, ചൂട്, തണുപ്പ് , വേദന എന്നിവ അറിയാതിരിക്കുക, വേദനയില്ലാത്ത വൃണം, കൈകാലുകളിലെ പെരുപ്പ് ,മരവിപ്പ് എന്നിവ കുഷ്ഠരോഗത്തിൻ്റെ ലക്ഷണമാവാം.
എല്ലാ പാടുകളും കുഷ്ഠരോഗം മൂലമകണമെന്നില്ല . എന്നാൽ ചില പാടുകൾ, തടിപ്പുകൾ എന്നിവ കുഷ്ഠ രോഗം മൂലമാവാം. അതിനാൽ ശരീരത്തിൽ പാടുകളോ, തടിപ്പുകളോ ഉണ്ടോയെന്ന് സ്വന്തമായും , ശരീരത്തിന്റെ പുറം ഭാഗങ്ങളിലുള്ള പാടുകൾ ശ്ര ദ്ധിക്കപ്പെടാതെപോകാമെന്നതിനാൽ കുടുംബാംഗങ്ങളുടെ സഹായത്തോടെയും പരിശോധിക്കണം.ആരോഗ്യ പ്രവർത്തകർ നടത്തുന്ന ഭവന സന്ദർശന വേളയിൽ അവ കുഷ്ഠരോഗം മൂലമല്ലായെന്ന് ഉറപ്പ് വരുത്തുന്നതിന് ആരോഗ്യപ്രവർത്തകരുടെ ശ്രദ്ധയിൽപ്പെടുത്തേണ്ട`തുമാണ് . ആറു മുതൽ 12 മാസം വരെയുള്ള ചികിത്സയിലൂടെ കുഷ്ഠരോഗം പൂർണ്ണമായും ചികിത്സിച്ചു ഭേദമാക്കാം. രോഗലക്ഷണങ്ങൾ നേരത്തെ കണ്ടെത്തി ചികിത്സിക്കുക എന്നത് രോഗ പകർച്ച തടയുന്നതിന് ഏറെ പ്രധാനമാണ്. മറ്റേതൊരു രോഗം പോലെ തന്നെ ചികിത്സിച്ചു ഭേദമാക്കാൻ സാധിക്കുന്ന ഒരു രോഗമാണ് കുഷ്ഠരോഗം. അതുകൊണ്ടു തന്നെ രോഗത്തെ പറ്റി അനാവശ്യമായ ഭയമോ ആശങ്കയോ, രോഗ ബാധിതരോട് വിവേചനമോ വേണ്ടതില്ല. ചികിത്സ ആരംഭിച്ച ആഴ്ചകൾക്കുള്ളിൽ തന്നെ മറ്റുളവരിലേക്ക് രോഗം പകരുന്നത് തടയാൻ സാധിക്കും. രോഗം മൂലം അംഗവൈകല്യം സംഭവിക്കുന്നതും ഒഴിവാക്കാം. പ്രധാനമായും ചികിത്സ തുടങ്ങാത്തവരിൽ നിന്ന് മാത്രമെ രോഗം പകരുകയുള്ളു. എല്ലാ സർക്കാർ ആരോഗ്യ കേന്ദ്രങ്ങളിലും കുഷ്ഠ രോഗത്തിനുളള ചികിത്സ സൗജന്യമായി ലഭ്യമാണ്.

08/01/2026

ആരോഗ്യപൂർണ്ണമായ ജീവിതത്തിലേക്ക് ഒരു സ്മാർട്ട് ചുവടുവെപ്പ്: 'health.kerala.care' പോർട്ടൽ ഇപ്പോൾ നിങ്ങളുടെ വിരൽത്തുമ്പിൽ! 🖱️✨

കേരളം ഏറ്റെടുത്ത 'ആരോഗ്യം ആനന്ദം - വൈബ് 4 വെൽനെസ്സ്' ക്യാമ്പയിന്റെ ഭാഗമായി, ഓരോ വ്യക്തിക്കും സ്വന്തം ആരോഗ്യസ്ഥിതി വിലയിരുത്താൻ സഹായിക്കുന്ന ഡിജിറ്റൽ സംവിധാനമാണ് https://health.kerala.care പോർട്ടൽ. വെറുമൊരു വെബ്സൈറ്റ് എന്നതിലുപരി, നിങ്ങളുടെ ആരോഗ്യ സംരക്ഷണത്തിനായുള്ള ഒരു പേഴ്സണൽ അസിസ്റ്റന്റായി ഇതിനെ ഉപയോഗിക്കാം.

ഈ പോർട്ടലിൽ നിങ്ങൾക്കായി എന്തൊക്കെയാണുള്ളത്? 🌟

BMI കാൽക്കുലേറ്റർ: നിങ്ങളുടെ ഉയരത്തിനും തൂക്കത്തിനും അനുസരിച്ചുള്ള ശരിയായ ശാരീരിക അവസ്ഥ (BMI) തിരിച്ചറിയാനും അത് നൽകുന്ന സൂചനകൾ മനസ്സിലാക്കാനും സഹായിക്കുന്നു.

BP ഇന്റർപ്രെറ്റർ: നിങ്ങളുടെ രക്തസമ്മർദ്ദത്തിന്റെ (Blood Pressure) അളവ് രേഖപ്പെടുത്തിയാൽ, അത് നോർമൽ ആണോ അതോ വിദഗ്ദ്ധ പരിശോധന ആവശ്യമാണോ എന്ന് ഉടനടി അറിയാം.

ബ്ലഡ് ഷുഗർ ചെക്കർ: ഫാസ്റ്റിംഗ് (FBS), പോസ്റ്റ് പ്രാണ്ടിയൽ (PPBS) തുടങ്ങിയ ഷുഗർ റീഡിംഗുകൾ നൽകുന്നതിലൂടെ നിങ്ങളുടെ പ്രമേഹ സാധ്യതകൾ സ്വയം വിലയിരുത്താം.

ക്യാൻസർ ലക്ഷണ പരിശോധന: രോഗലക്ഷണങ്ങൾ നേരത്തെ തിരിച്ചറിയുന്നതിനായി ലളിതമായ ചോദ്യാവലികളിലൂടെ സ്ക്രീനിംഗ് നടത്താനുള്ള സൗകര്യം.

സമഗ്ര ആരോഗ്യ റിസ്ക് അസസ്‌മെന്റ് (CBAC): വെറും 5 മിനിറ്റുകൊണ്ട് നിങ്ങളുടെ ജീവിതശൈലീ രോഗസാധ്യതകൾ (NCD Risk) അളക്കാനും അതിനനുസരിച്ചുള്ള പേഴ്സണലൈസ്ഡ് ഡയറ്റ്, വ്യായാമ നിർദ്ദേശങ്ങൾ നേടാനും സാധിക്കും.

അടുത്തുള്ള ജനകീയ ആരോഗ്യകേന്ദ്രം കണ്ടെത്താം: നിങ്ങളുടെ വീടിന് ഏറ്റവും അടുത്തുള്ള ജനകീയ ആരോഗ്യ കേന്ദ്രം (Janakeeya Arogya Kendram) എവിടെയാണെന്ന് എളുപ്പത്തിൽ കണ്ടെത്താം.

UHID ജനറേറ്റ് ചെയ്യാം: കേരളത്തിലെ ഡിജിറ്റൽ ഹെൽത്ത് മിഷന്റെ ഭാഗമായ യൂണിക് ഹെൽത്ത് ഐഡി (UHID) ലഭിക്കുന്നതിനായുള്ള മാർഗ്ഗനിർദ്ദേശങ്ങൾ ഇവിടെ ലഭ്യമാണ്.

ജീവിതശൈലീ രോഗങ്ങളെ പ്രതിരോധിക്കാൻ ഈ പോർട്ടലിലെ ടൂളുകൾ ഉപയോഗിച്ച് ഒരു ചെറിയ ചുവടുവയ്പ്പ് എടുക്കാം. ഇന്നുതന്നെ സന്ദർശിക്കൂ: https://health.kerala.care 🔗

ആരോഗ്യ ശീലങ്ങൾ വളർത്താം, ആരോഗ്യകരമായ ഒരു നവകേരളം പടുക്കാം!

Check your health risks in 5 minutes. Free, private health risk assessment tool. Eat well · Act well · Sleep well · Care well

07/01/2026

കുഷ്ഠരോഗം കണ്ടെത്തുന്നതിൽ സ്വയം പരിശോധനയക്ക് വലിയ പങ്ക്: ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ

കുഷ്ഠരോഗം നിവാരണം: അശ്വമേധം 7.0 ഭവന സന്ദർശന പരിപാടിക്ക് ജില്ലയിൽ തുടക്കം

കുഷ്ഠരോഗം കണ്ടെത്തുന്നതിൽ സ്വയം പരിശോധനയക്ക് വലിയ പങ്കുണ്ടെന്ന് ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ പറഞ്ഞു. കുഷ്ഠരോഗ നിർണ്ണയ ഭവന സന്ദർശന പരിപാടിയായ ആശ്വമേധം 7.0 യുടെ ജില്ലാതല ഉദ്ഘാടനം നൂറനാട് ലെപ്രസി സാനിറ്റോറിയത്തിൽ നിർവഹിച്ച് സംസാരിക്കുകയായിരുന്നു അദ്ദേഹം. ഭവന സന്ദർശനത്തിനെത്തുന്ന സന്നദ്ധപ്രവർത്തകരോടു സഹകരിച്ച് ‘പാടുകൾ നോക്കാം, ആരോഗ്യം കാക്കാം’ എന്ന ഭവന സന്ദർശന പരിപാടിയുടെ സന്ദേശം പ്രാവർത്തികമാക്കാൻ എല്ലാവരുടെയും സഹകരണം ആവശ്യമാണെന്നും ജില്ലാ പഞ്ചായത്ത് പ്രസിഡന്റ് പറഞ്ഞു. ലോക എ.എം.ആർ. വാരാചരണം, ലോക എയിഡ്സ് ദിനാചരണം എന്നിവയുടെ ഭാഗമായി ആരോഗ്യവകുപ്പ് ജില്ലാതലത്തിൽ നടത്തിയ വിവിധ മത്സരവിജയികൾക്കുള്ള സമ്മാനങ്ങളും പരിപാടിയിൽ വിതരണം ചെയ്തു.

കുഷ്ഠരോഗം നിവാരണമെന്ന ലക്ഷ്യത്തോടെ സമൂഹത്തിൽ ഒളിഞ്ഞിരിക്കുന്ന കുഷ്ഠരോഗം കണ്ടെത്തുന്നതിന് ജനുവരി 20 വരെയാണ് ആരോഗ്യ വകുപ്പിൻ്റെ നേതൃത്വത്തിൽ അശ്വമേധം 7.0 കാമ്പയിൻ സംഘടിപ്പിക്കുന്നത്. ഭവൻ സന്ദർശന പരിപാടിയുടെ ഭാഗമായി ജില്ലയിൽ 3914 സന്നദ്ധപ്രവർത്തകർ 608769 വീടുകൾ സന്ദർശിച്ച് കുഷ്ഠരോഗ നിർണ്ണയം നടത്തും. കാമ്പയിനിന്റെ ഭാഗമായി വിപൂലമായ ബോധവത്കരണ പ്രവർത്തനങ്ങളാണ് നടപ്പിലാക്കുന്നത്. ജില്ലാ ഭരണ കൂടത്തിന്റെ സഹകരണത്തോടെ, വിവിധ വകുപ്പുകളുടെ പങ്കാളിത്തത്തോടെ വിദ്യാഭ്യാസ സ്ഥാപനങ്ങൾ, ഓഫീസുകൾ, സ്ഥാപനങ്ങൾ, അങ്കണവാടികൾ, കുടുംബശ്രീ അയൽക്കൂട്ടങ്ങൾ എന്നിവ കേന്ദ്രീകരിച്ച് ബോധവത്കരണ പ്രവർത്തനങ്ങൾ നടത്തും.

ചടങ്ങിൽ ഭരണിക്കാവ് ബ്ലോക്ക് പഞ്ചായത്ത് പ്രസിഡന്റ് സി അനു അധ്യക്ഷയായി. കാമ്പയിൻ പോസ്റ്റർ പ്രകാശനം മാവേലിക്കര-താമരക്കുളം ഗ്രാമപഞ്ചായത്ത് പ്രസിഡന്റ് പി എസ് ഷീജാദേവി നിർവഹിച്ചു. ഗ്രാപഞ്ചായത്തംഗം ശ്രീകുമാർ അളകനന്ദ, ഡെപ്യൂട്ടി ഡി.എം.ഒ. ഡോ. എം അനന്ത്, ഡോ. വിപിൻ കെ രവി, ജില്ലാ ഡെപ്യൂട്ടി എജ്യൂക്കേഷൻ മീഡിയ ഓഫിസർമാരായ ഡോ. ഐ ചിത്ര, ഡോ. ആർ സേതുനാഥ്, മറ്റു ജില്ലാതല ഉദ്യോഗസ്ഥർ, ആരോഗ്യ പ്രവർത്തകർ, നേഴ്സിംഗ് വിദ്യാർഥികൾ, ലെപ്രസി സാനിറ്റോറിയത്തിലെ അന്തേവാസികൾ തുടങ്ങിയവർ പങ്കെടുത്തു.