Medved Health Clinic, Thadambattuthazham, Kozhikode

24/03/2024

March 24, ലോക ക്ഷയരോഗദിനമായി നമ്മൾ ആചരിച്ചു വരുന്നു. നൂറ്റാണ്ടുകളായി ലോകമെമ്പാടും ജനങ്ങളെ ബാധിച്ചു കൊണ്ടേയിരിക്കുന്ന ഈ മഹാമാരിയെ, ഇപ്പോഴും പൂർണ്ണമായും പിടിച്ച് കെട്ടാൻ മനുഷ്യർക്ക് സാധിച്ചിട്ടില്ല. എങ്കിലും നമ്മുടെ പരിശ്രമങ്ങളുടെ ഭാഗമായി, TB (Tuberculosis) അഥവാ ക്ഷയരോഗത്തെ കുറെയൊക്കെ നിയന്ത്രിക്കാൻ നമുക്ക് സാധിച്ചിട്ടുണ്ട്. അത്തരം പരിശ്രമങ്ങളിൽ ജനങ്ങളുടെ ബോധവൽക്കരണവും പങ്കാളിത്തവും ഏറ്റവും പ്രാധാന്യം അർഹിക്കുന്നു.
ഈ വർഷത്തെ ആശയം, തീം - "Yes! We can end TB " (അതെ! നമുക്ക് ക്ഷയത്തെ അവസാനിപ്പിക്കാം ) എന്നതാണ്. അതിനായി നമുക്ക് കൈ കോർക്കാം.

എന്താണ് Tuberculosis/TB / ക്ഷയം?

Mycobacterium tuberculosis എന്ന ഒരു തരം ബാക്ടീരിയ അണുബാധ മൂലം ഉണ്ടാകുന്ന ആരോഗ്യപ്രശ്നങ്ങളെയാണ് മൊത്തത്തിൽ ക്ഷയം അഥവാ Tuberculosis എന്ന് വിളിക്കുന്നത്. മനുഷ്യൻ പരിണമിച്ച് ഉണ്ടായ കാലത്തിനും എത്രയോ മുൻപേ തന്നെ ഈ രോഗാണുക്കൾ ഈ ലോകത്തുണ്ട്. മനുഷ്യരുടെ പൂർവ്വികരെയും ആധുനിക മനുഷ്യരെയും ഒക്കെ Mycobacterium tuberculosis ബാധിച്ചിരുന്നു എന്നതിന് ശാസ്ത്രീയമായ തെളിവുകൾ ലഭ്യമാണ്.
രോഗത്തിൻ്റെ കാഠിന്യം മൂലം രോഗി ശരീരഭാരം കുറഞ്ഞ്, ക്ഷീണിച്ച് ക്ഷയിക്കുന്നതായി കാണുന്നത് മൂലം ഈ രോഗത്തെ ക്ഷയം എന്ന് വിളിച്ച് പോരുന്നു. ക്ഷയരോഗം ദൈവങ്ങളെ പോലും വെറുതെ വിടാറില്ല എന്നാണ് വിശ്വാസം. ചന്ദ്രദേവനെ ക്ഷയം ബാധിക്കുന്നത് മൂലമാണ് ഒരോ ദിവസവും ചന്ദ്രൻ ക്ഷയിച്ച് പോകുന്നത് എന്നാണ് കഥ.
കഥ അവിടെ നിൽക്കട്ടെ, കാര്യത്തിലേക്ക് വരാം. Tuberculosis ഒരു മഹാരോഗത്തിന് ഇന്ന് മരുന്നുകൾ ലഭ്യമാണ്. നൂറ്റാണ്ടുകൾ മനുഷ്യരെ ദുരിതത്തിലും മരണത്തിലും എത്തിച്ചിരുന്ന ഈ രോഗം ഇന്ന് വളരെയധികം നിയന്ത്രിക്കാൻ സാധിച്ചത്, ഈ മരുന്നുകളുടെ കണ്ടുപിടുത്തങ്ങളോടെയാണ്. മരുന്നുകൾ ലഭ്യമായാൽ മാത്രം പോര എന്നുള്ള ബോധ്യമുള്ളത് കൊണ്ട് തന്നെ ക്ഷയ രോഗ നിർമ്മാർജനത്തിന് പ്രത്യേകം സംവിധാനങ്ങൾ തന്നെ സർക്കാരുകൾ ഒരുക്കിയിട്ടുണ്ട്. ഇന്ന് DOTS (Directly Observed Treatment Short Course ) എന്ന scheme ൻ്റെ ഭാഗമായി TB മരുന്നുകൾ സൗജന്യമായി രോഗികൾക്ക് ലഭ്യമാക്കുകയും,ആരോഗ്യ പ്രവർത്തകരുടെ മേൽനോട്ടത്തിൽ ഒരോ TB രോഗിയും മരുന്നുകൾ കഴിക്കുന്നുണ്ട് എന്ന് പൂർണ്ണമായും ഉറപ്പ് വരുത്തിയുമാണ്, നമ്മൾ TB ക്കെതിരെ പ്രതിരോധം സൃഷ്ടിക്കുന്നത്. അതിനെല്ലാം പുറമേ, TB അഥവാ ക്ഷയത്തിനായുള്ള പരിശോധനയും ടെസ്റ്റുകളും എല്ലാം അങ്ങേയറ്റം ചിലവ് കുറഞ്ഞ രീതിയിൽ ഇന്ന് ലഭ്യമാണ്.

എന്തെല്ലാമാണ് TBയുടെ ലക്ഷണങ്ങൾ ?
TB / Tuberculosis/ ക്ഷയം, പല അവയവങ്ങളെയും ബാധിക്കാറുണ്ട്. എങ്കിലും പ്രധാനമായും ശ്വാസകോശം, മസ്തിഷ്കം, ചർമ്മം, എല്ലുകൾ, കുടലുകൾ എന്നിവയെയാണ് ബാധിച്ച് കാണാറ്. പ്രധാനമായും വായുവിലൂടെ പകരുന്ന അസുഖം ആയതിനാൽ ഏറ്റവും കൂടുതൽ ശ്വാസകോശങ്ങളിലാണ് രോഗാണുകൾ ഏറ്റവും കൂടുതൽ പ്രശ്നം സൃഷ്ടിക്കാറുള്ളത്.

വിട്ടുമാറാത്ത ചുമ, കഫകെട്ട്, കഫത്തിൽ പഴുപ്പും ചോരയും കാണുക, വിശപ്പിലായ്മ, ക്ഷീണം, ശരീരം മെലിയുക, പനി, വേദനകൾ, മസ്തിഷ്ക ജ്വരം, ചർമ്മ പ്രശ്നങ്ങൾ മുതലായവ ലക്ഷണങ്ങളായി വരാറുണ്ട്.

ക്ഷയരോഗത്തിന് ചികിത്സ സൗജന്യമാണ്.

12/02/2024

*February 12, അന്താരാഷ്ട്ര അപസ്മാര ദിന* മായിട്ടാണ് ലോകം ആചരിക്കുന്നത്. *അപസ്മാരം അഥവാ Epilepsy* എന്ന രോഗത്തെ പറ്റിയുള്ള ബോധവൽക്കരണം, രോഗമുള്ളവരുടെ കൂട്ടാഴ്മകൾ സംഘടിപ്പിക്കുക, സഹകരണങ്ങൾ വർദ്ധിപ്പിക്കുക എന്ന ആശയങ്ങളോടെയാണ് എല്ലാവർഷവും അന്താരാഷ്ട്ര അപസ്മാര ദിനം ആചരിക്കുന്നത്. ഈ വർഷത്തെ ചിന്താവിഷയം- " *Milestones on my journey"* എന്നതാണ്. _അപസ്മാര രോഗവുമായുള്ള യാത്രയിലെ നാഴികകല്ലുകൾ_ , ഓരോ അപസ്മാരരോഗികൾക്കും വ്യത്യസ്തവും ബുദ്ധിമുട്ടേറിയതും തന്നെയാണ്. വളരെ സാധാരണമായ അസുഖമാണെങ്കിലും അപസ്മാരത്തെ പറ്റിയുള്ള ഒരു പാട് തെറ്റിദ്ധാരണകൾ സമൂഹത്തിലുണ്ട്. അത് കൊണ്ട് തന്നെയാണ് അപസ്മാരം എന്ന രോഗത്തെ പറ്റിയുള്ള ബോധവൽക്കരണം വളരെ പ്രാധാന്യമർഹിക്കുന്നത്.

*എന്താണ് അപസ്മാരം ( Epilepsy) ?*

വളരെ ലളിതമായി പറയുമ്പോൾ, തലച്ചോർ അഥവാ മസ്തിഷ്കത്തിലെ വൈദ്യുത തരംഗങ്ങൾ അനാവശ്യമായി ഉൽഭവിച്ച്, നിയന്ത്രണമില്ലാതെ ശരീരത്തിൽ പൂർണ്ണമായോ ഭാഗികമായോ ചലനങ്ങൾ സൃഷ്ടിക്കുന്ന അവസ്ഥയാണ് അപസ്മാരം. രോഗമെന്നതിനേക്കാൾ, തലചോറിനെ ബാധിക്കുന്ന പല രോഗങ്ങളിലെ ഒരു രോഗലക്ഷണമായാണ് അപസ്മാരത്തെ മനസ്സിലാക്കേണ്ടത്.

തലചോറിലെ ന്യൂറോൺ അഥവാ നാഡീകോശങ്ങളിൽ നിന്ന് തുടങ്ങുന്ന വൈദ്യുത തരംഗങ്ങളാണ് നമ്മുടെ ഓരോ ചലനങ്ങളും നിശ്ചയിക്കുന്നതും നിയന്ത്രിക്കുന്നതും. ചെറിയ വോൾട്ടേജിലുള്ള ഈ വൈദ്യുത തരംഗങ്ങൾ സാധാരണ ഗതിയിൽ ഒരിക്കലും ഷോക്കടിപ്പിക്കുന്ന അളവിലേക്ക് എത്താറില്ല. മാത്രമല്ല ഒരു പാട് നിയന്ത്രണങ്ങൾക്ക് വിധേയമാണ് താനും. ചില ഘട്ടങ്ങളിൽ ഈ വൈദ്യുത തരംഗങ്ങൾ അനിയന്ത്രിതമായ നിലയിലുണ്ടാവുമ്പോൾ നമ്മുടെ ചലനങ്ങളെല്ലാം നമ്മുടെ നിയന്ത്രണത്തിൽ നിന്ന് വിട്ടുപോകും. ഇതാണ് അപസ്മാരമെന്നും ചുഴലി എന്നുമൊക്കെ വിളിക്കപ്പെടുന്ന അസുഖത്തിന്റെ അടിസ്ഥാനം.

*എന്തൊക്കെയാണ് വിവിധ തരത്തിലുള്ള അപസ്മാരങ്ങൾ ? '*

പൊതുവായി *_ജനറൽ എപിലെപ്സി എന്നും പാർഷ്യൽ എപിലെപ്സി_* എന്നും രണ്ട് തരമായി അപസ്മാരത്തെ തരം തിരിക്കാം.
അപസ്മാരം തലച്ചോറിനെ പൊതുവായി ബാധിക്കുകയും ശരീരമാസകലം വൈദ്യുത തരംഗങ്ങൾ വ്യാപിച്ച്, കൈകാലുകൾ ഉടലുൾപ്പടെ ചലിക്കുന്ന അവസ്ഥയാണ്-ജനറൽ എപിലെപ്സി ( General Epilepsy) . എന്നാൽ ശരീരത്തിൻ്റെ ചില ഭാഗങ്ങളെ മാത്രം ബാധിക്കുന്ന അപസ്മാരമാണ് ഫോക്കൽ അല്ലെങ്കിൽ പാർഷ്യൽ എപിലെപ്സി (Focal/ partial Epilepsy) .
ജനറൽ എപിലെപ്സിയിൽ, അപസ്മാരം ഉണ്ടാകുമ്പോൾ കൈകാലുകൾ അതിശക്തമായി വിറയ്ക്കുകയും കണ്ണ് മുകളിലേക്ക് പോകുകയും ചെയ്യും, ബലം പിടിക്കും, വായിൽ നിന്ന് നുരയും പതയും വരും. അറിയാതെ മലമൂത്ര വിസർജ്ജനം നടക്കാം, നാവു കടിച്ചു മുറിക്കാം. ഇത് തന്നെയാണ് പൊതുവായി എല്ലാവർക്കും പരിചയമുള്ള അപസ്മാരം.
ചുണ്ടുമാത്രമോ അല്ലെങ്കിൽ കൈയ്യുടേയോ കാലിൻ്റെയോ അല്ലെങ്കിൽ ശരീരത്തിന്റെ ഒരു ഭാഗം മാത്രം നിയന്ത്രണമില്ലാതെ ചലിക്കുക എന്നതാണ്, ഭാഗികമായ അപസ്മാരം അഥവാ പാർഷ്യൽ എപിലെപ്സിയിൽ കണ്ടു വരാറുള്ളത്.
ജനറൽ , പാർഷ്യൽ എന്നല്ലാതെ മറ്റ് വിധങ്ങളിലും അപസ്മാരം വളരെ ചുരുക്കമായി കാണാറുണ്ട്.
*കോംപ്ലക്സ് പാർഷ്യൽ എപിലെപ്സി* - ചുറ്റുപാടുകളിൽ നിന്ന് കുറച്ചു സമയത്തേക്ക് പൂർണ്ണമായി വിട്ടുപോകുകയും പിന്നീട് അതേക്കുറിച്ച് ഒന്നും ഓർമ്മയില്ലാതെ വരികയും ചെയ്യുന്നതാണ് കോംപ്ലക്സ് പാർഷ്യൽ സീഷർ.
*ആബ്സന്റ് സീഷർ* -ചില ഘട്ടങ്ങളിൽ കുട്ടികളിൽ കണ്ടുപിടിക്കപ്പെടാതെ പോകുന്ന രോഗാവസ്ഥയാണ് ആബ്സന്റ് സീഷർ. പഠിത്തത്തിൽ പിറകോട്ടു പോകുക, പറയുന്നത് കേൾക്കാതെ തുറിച്ചു നോക്കിക്കൊണ്ടിരിക്കുക, ചോദ്യങ്ങൾക്ക് പ്രതികരണം ഉണ്ടാവാതിരിക്കുക തുടങ്ങിയ ലക്ഷണങ്ങളാണ് ഈ അവസ്ഥയിൽ കാണാറുള്ളത്.
*
*എന്തൊക്കെയാണ് അപസ്മാരത്തിനുള്ള കാരണങ്ങൾ ?**

തലച്ചോർ അഥവാ മസ്തിഷ്ക്കത്തിനെ ബാധിക്കുന്ന ഏത് അസുഖത്തിലും അപസ്മാരം ഒരു ലക്ഷണമായി വരാം. പിറന്നു വീണ കുഞ്ഞു മുതൽ ഏതു പ്രായത്തിലും അപസ്മാരം ഉണ്ടാകാം. ജൻമനാൽ തന്നെ തലച്ചോറിന് വളർച്ച ലഭിക്കാത്ത ജനിതക രോഗങ്ങളിൽ അപസ്മാരം ഒരു പ്രധാന ലക്ഷണമാവാറുണ്ട്. നവജാത ശിശുക്കളിൽ ജനന സമയത്തെ പ്രശ്നങ്ങളാൽ ഓക്സിജൻ, ഷുഗർ, സോഡിയം, കാത്സ്യം എന്നിവ കുറഞ്ഞാൽ അപസ്മാരം ഉണ്ടാകാം.
തലച്ചോറിനെ ബാധിക്കുന്ന അണുബാധകൾ, വിരകൾ, മസ്തിഷ്ക്കാഘാതം അഥവാ stroke , തലച്ചോറിലെ ക്യാൻസറുകൾ, ആക്സിണ്ടൻ്റും മറ്റും കാരണമുണ്ടാകുന്ന തലച്ചോറിനുണ്ടാകുന്ന പരുക്കുകൾ തുടങ്ങിയവയെല്ലാം തന്നെ ഗുരുതരമായ അപസ്മാരത്തിന് കാരണമാവാറുണ്ട്. ഇവയുടെ ചികിത്സയും പരിചരണവും പ്രയാസമേറിയതാവാറുണ്ട്.
കുട്ടികളിലെ ചിലപ്പോൾ *പനിയോട് കൂടി ഉണ്ടാകുന്ന അപസ്മാരം (Febrile Seizure)* അത്ര ഗുരുതരമായതല്ല. കുട്ടികളിൽ തലച്ചോറിലെ ഊഷ്മാവ് നിയന്ത്രിക്കാനുള്ള ശേഷി കുറയുന്നതിനാൽ ഉണ്ടാകുന്ന നിസ്സാരമായ അവസ്ഥയാണ് മേൽ പറഞ്ഞ Febrile Seizure. വളരെ എളുപ്പത്തിൽ ചികിത്സയും സാധ്യമാവാറുണ്ട്.
വൃക്കയുടെ പ്രവർത്തനം കുറഞ്ഞാൽ, ക്രിയാറ്റിൻ അളവ് കൂടിയാൽ, പഞ്ചസാരയുടെ അളവ് കുറഞ്ഞാൽ, സോഡിയത്തിന്റെ അളവ് കുറഞ്ഞാൽ, കരളിന്റെ പ്രവർത്തനം കുറഞ്ഞാൽ, തലയ്ക്കകത്ത് രക്തസ്രാവമുണ്ടെങ്കിൽ, ഒക്കെ അപസ്മാരം വരാം. പല അസുഖങ്ങളുടെയും മുന്നോടിയായി, അതിന്റെ ലക്ഷണമെന്ന നിലയിൽ അപസ്മാരം വരാൻ സാധ്യതയുണ്ട്. .
പ്രത്യക്ഷമായി ഒരു കുഴപ്പവുമില്ലാത്തവർക്കും പലപ്പോഴും അപസ്മാരം വന്ന് പോകുന്നത് കാണാറുണ്ട്. അത്തരം സന്ദർഭങ്ങളിൽ പരിശോധനങ്ങൾക്ക് ശേഷം മാത്രമാണ് രോഗകാരണം കണ്ടെത്താൻ കഴിയാറുള്ളു. രക്തം പരിശോധന, സോഡിയം, കാൽസ്യം, മെഗ്നീഷ്യം,പഞ്ചസാര എന്നിവയുടെ അളവ്, CT സ്കാൻ, MRI സ്കാൻ EEG തുടങ്ങിയ ടെസ്റ്റുകൾ അപസ്മാരത്തിൻ്റെ കാരണം കണ്ടെത്താൻ സഹായമാവാറുണ്ട്.
പല കേസുകളിലും സ്കാനിംഗ് നടത്തുമ്പോൾ മാത്രമാണ് തലച്ചോറിലെ ട്യൂമർ പോലുള്ള രോഗങ്ങൾ തിരിച്ചറിയുന്നത്. അതുകൊണ്ടാണ് അപസ്മാരം രോഗമല്ല, രോഗലക്ഷണമാണ് എന്നു പറയുന്നത്.

*അപസ്മാരം ഉണ്ടാകുമ്പോൾ പ്രാഥമികമായി എന്തൊക്കെയാണ് ചെയ്യേണ്ടത്?*

അപസ്മാരം ഉണ്ടാകുന്ന രോഗിയുടെ കയ്യിൽ ഇരുമ്പ് വസ്തുക്കൾ പിടിപ്പിക്കുന്നത് വളരെ കാലങ്ങളായി ചെയ്ത് പോരുന്ന ഒരു സംഗതിയാണ്. സത്യത്തിൽ ഇതുകൊണ്ട് പ്രത്യേകിച്ച് ഒരു പ്രയോജനവും ഉണ്ടാകാറില്ല. ഭൂരിഭാഗം അപസ്മാരങ്ങളും പരമാവധി ഏതാനും സെക്കന്റുകളോ, അല്ലെങ്കിൽ ഒന്നോ രണ്ടോ മിനുട്ട് കൊണ്ട് അവസാനിക്കുന്ന രോഗാവസ്ഥയാണ്. ഇരുമ്പ് തേടി പിടിച്ച് അപസ്മാര രോഗിയുടെ കയ്യിൽ പിടിപ്പിക്കുന്ന സമയത്തിനുള്ളിൽ അപസ്മാരം സ്വയം തന്നെ പതിയെ അടങ്ങി മാറി വന്നു കഴിഞ്ഞു കാണും. ഇരുമ്പിന് പ്രത്യേകിച്ച് കഴിവില്ല എന്നർത്ഥം. കൂടുതൽ സമയം അപസ്മാരം അനുഭവപ്പെടുന്ന പക്ഷം ഇത്തരം ഇരുമ്പോ താക്കോലോ മറ്റോ കയ്യിൽ പിടിപ്പിക്കുന്നത് ബലം പിടിക്കുമ്പോൾ മുറിവുകളുണ്ടാക്കാനും സാധ്യതയുണ്ട്.

അപസ്മാരം വരുന്നത് കണ്ടാൽ അയാളെ തുറസ്സായ സ്ഥലത്ത് കടത്തുക, കയ്യും കാലും അടിക്കുമ്പോൾ മുറിവുണ്ടാകാൻ സാധ്യതയുള്ള വസ്തുക്കൾ അവിടെ നിന്ന് മാറ്റുക എന്നീ കാര്യങ്ങളാണ് ശ്രദ്ധിക്കേണ്ടത്. കിടത്തുമ്പോൾ എപ്പോഴും ഒരു വശത്തേക്ക് ചരിച്ചു കിടത്തുക, കാരണം നുരയും പതയും വരാനും ഛർദ്ദിക്കാനുമുള്ള സാധ്യത കൂടുതലാണ്, ഇങ്ങനെ ഛർദ്ദിക്കുന്നതും മറ്റും ശ്വാസകോശത്തിലേക്ക് പോകാനും ശ്വാസതടസ്സത്തിനും മരണം വരെ ഉണ്ടാകാനും സാധ്യതയുണ്ട്.

നേരത്തേ തന്നെ അപസ്മാര രോഗമുള്ള വ്യക്തികൾക്ക്, ഉറക്കക്കുറവ്, മരുന്ന് കഴിക്കാൻ മറന്നു പോകുക, മാനസിക സമ്മർദ്ദം തുടങ്ങിയ കാരണങ്ങൾ കൊണ്ട് അപസ്മാരം വീണ്ടും ഉണ്ടാകുന്നതായി കണ്ടു വരാറുണ്ട്. അതിനാൽ അപസ്മാരം ഉള്ള ആളുകൾക്ക് മരുന്നുകൾ കൃത്യമായി കഴിക്കുക എന്നതും, മാനസിക സമ്മർദ്ദങ്ങൾ ഉണ്ടാകാതെ നോക്കുക , നല്ല ഉറക്കവും വിശ്രമവും ലഭിക്കുക എന്നതും വളരെ പ്രധാനമാണ്.

*എന്താണ് അപസ്മാര ചികിത്സ ?*

അപസ്മാര രോഗം EEG , സ്കാനുകൾ മുഖാന്തരം തിരിച്ചറിഞ്ഞു കഴിഞ്ഞാൽ, ഉചിതമായ മരുന്നുകൾ ഡോക്ടറുടെ നിർദേശാനുസരണം ഉപയോഗിക്കുക എന്നതാണ് ഉത്തമം. ഡോക്ടറുടെ നിർദ്ദേശമില്ലാതെ, മരുന്നുകൾ നിർത്തുകയോ മാറ്റം വരുത്തുകയോ ചെയ്യരുത്.
വളരെ അപൂർവമായി മരുന്നുകൾ പൂർണഫലം ചെയ്യാത്ത സാഹചര്യങ്ങളിൽ ശസ്ത്രക്രിയകളും അപസ്മാര രോഗത്തിൽ ചെയ്യാറുണ്ട്. ഏറ്റവും അനുയോജ്യമായ രോഗികളിൽ മാത്രമേ അത്തരം ശസ്ത്രക്രിയ ചെയ്യാറുള്ളൂ. തലച്ചോറിന്റെ രോഗം ഉണ്ടാകുന്ന ഭാഗം മാത്രം ശസ്ത്രക്രിയയിലൂടെ എടുത്ത് മാറ്റുകയാണ് ചെയ്യുന്നത്.

അപസ്മാരം വളരെ ശ്രദ്‌ധിക്കേണ്ട രോഗമാണ്. രോഗികൾക്ക് മാത്രമല്ല അവരുടെ കുടുംബത്തിനും അങ്ങേയറ്റം മാനസിക ബുദ്ധിമുട്ട് ഉണ്ടാക്കുന്ന സാഹചര്യമാണ്, അപസ്മാരം സൃഷ്ടിക്കാറുള്ളത്. നമ്മളോരോരുത്തരും സമൂഹമെന്ന നിലയിൽ അവരുടെ ബുദ്ധിമുട്ടുകൾ മനസ്സിലാക്കുകയും അവരുടെ പ്രശ്നങ്ങൾ ലഘൂകരിക്കാൻ കഴിയുന്ന രീതിയിൽ ഇടപെടലുകൾ നടത്തുകയും വേണം.

Dr സുജേഷ് വി എസ്
മെഡിക്കൽ ഓഫീസർ
മെഡ് വേദ് ഹെൽത്ത് ക്ലിനിക്ക്
തടമ്പാട്ട്ത്താഴം, വേങ്ങേരി
കോഴിക്കോട്.

04/02/2024

world Cancer day - Feb 4
അർബുദം അഥവാ ക്യാൻസറിനെ പറ്റി ഒരു പാട് തെറ്റിദ്ധാരണകൾ നമ്മുടെ സമൂഹത്തിലുണ്ട്. അത് തിരുത്തേണ്ടത് വളരെ അത്യാവശ്യമാണ് എന്ന് തോന്നിയത് കൊണ്ടാണ്, ലോക അർബുദ ദിനത്തിൽ, അർബുദം അഥവാ cancer നെ പറ്റി പറയാമെന്ന് വിചാരിച്ചത്.

എന്താണ് ക്യാൻസർ ?

ഏറ്റവും ലളിതമായി പറഞ്ഞാൽ, കോശങ്ങൾ അനാവശ്യമായി അനിയന്ത്രിതമായി വളർന്ന്,ഭിന്നിച്ച്, പെരുകി അവയവങ്ങളുടെ പ്രവർത്തനം താറുമാറാക്കുന്ന അസുഖമാണ്, അർബുദം അഥവാ ക്യാൻസർ.
നമ്മുടെ ശരീരത്തിൽ കോടാനുകോടി കോശങ്ങൾ ഉണ്ട് എന്നറിയാമല്ലോ. ഈ കോശങ്ങൾ കാലപഴക്കം മൂലമോ പരുക്കോ അസുഖങ്ങൾ മൂലമോ നശിക്കുകയും ആ സ്ഥാനത്ത് പുതിയ കോശങ്ങൾ ഉണ്ടായി വരുകയും ചെയ്യുന്നു. ഈ പ്രക്രിയ മനുഷ്യനുൾപ്പടെ, എല്ലാ ബഹുകോശ ജീവികളിലും നടക്കുന്നുണ്ട്.

മാതൃ കോശങ്ങളിൽ നിന്ന് പുതിയ കോശങ്ങൾ ഉണ്ടാകുന്ന പ്രക്രിയ വളരെ സങ്കീർണമാണ്. ആരോഗ്യമുള്ള ശരീരത്തിൽ കോശങ്ങൾ പെരുകുന്നത് നിയന്ത്രിച്ച് നിർത്തുന്ന അനവധി സംവിധാനങ്ങൾ ഉണ്ട്. ഈ സംവിധാനങ്ങൾ വളരെ ശ്രദ്ധയോടെ കോശ നിർമ്മാണത്തിൽ ഇടപെടുകയും, ആവശ്യത്തിന് മാത്രം കോശങ്ങൾ ഉണ്ടാകുന്നു എന്ന് ഉറപ്പ് വരുത്തുകയും ചെയ്യുന്നു.

എന്നാൽ ചിലപ്പോഴൊക്കെ ഈ നിയന്ത്രണ സംവിധാനങ്ങളിൽ പാകപ്പിഴകൾ ഉണ്ടാവുകയും, അതിനാൽ കോശങ്ങൾ അനിയന്ത്രിതമായി വളർന്ന്, പെരുകി, ശരീരത്തിൻ്റെ അവയവങ്ങളിലോ ഭാഗങ്ങളിലോ നിറഞ്ഞ് മുഴയായോ മറ്റോ മാറുന്നു. ഈ അവസ്ഥയാണ് പൊതുവേ ക്യാൻസർ അഥവാ അർബുദം എന്നറിയപ്പെടുന്നത്.

എന്താണ് ക്യാൻസറിൻ്റെ ലക്ഷണങ്ങൾ ?

ക്ഷീണം, ഭാരം കുറയുക, വിശപ്പിലായ്മ, വിളർച്ച തുടങ്ങിയ ലക്ഷണങ്ങൾ പൊതുവായി എല്ലാ ക്യാൻസർ അഥവാ അർബുദങ്ങളിലും ഏറിയും കുറഞ്ഞും കാണാമെങ്കിലും, വിവിധ അവയവങ്ങളെ ബാധിക്കുന്ന ക്യാൻസർ എന്ന അസുഖത്തിൻ്റെ ലക്ഷണങ്ങൾ, അത് ബാധിക്കുന്ന അവയവത്തെ തന്നെ ആശ്രയിച്ചാണ് ഇരിക്കുന്നത്. അത് കൊണ്ട് തന്നെ പല തരം ക്യാൻസറുകളിൽ വ്യത്യാസമുള്ള ലക്ഷണങ്ങൾ കാണാറുള്ളത്..
ഉദാഹരണത്തിന്, തൊണ്ടയിലെ ക്യാൻസറിൻ്റെ കാര്യമെടുത്താൽ, ഭക്ഷണം കഴിച്ചിറക്കാൻ പ്രയാസം, ശബ്ദം കുറയുക, ശ്വാസതടസ്സം, ചുമ, ചുമച്ച് തുപ്പുന്നതിൽ രക്തം കാണുക തുടങ്ങിയ ലക്ഷണങ്ങൾ കണ്ടേക്കാം. പക്ഷേ പലപ്പോഴും തുടക്കത്തിൽ വലിയ നിസ്സാരമായ ലക്ഷണങ്ങൾ മാത്രമേ കാണാറുള്ളൂ.
ഉദരത്തിലെയോ കുടലിലേയോ അർബുദങ്ങളിൽ തുടക്കത്തിൽ നെഞ്ചെരിച്ചിൽ, പുളിച്ച് തികട്ടൽ, വയറ് നിറഞ്ഞത് പോലെയുള്ള അവസ്ഥ, വിശപ്പില്ലായ്മ പോലെ വളരെ നിസ്സാരമായ ലക്ഷണങ്ങൾ മാത്രമേ ഉണ്ടാകാറുള്ളൂ. വേദനയും രക്തം ചർദ്ധിക്കുക മലത്തിൽ രക്തമയം ഉണ്ടാവുക എന്നതൊക്കെ അസുഖത്തിൻ്റെ കൂടിയ അവസ്ഥയിലാണ് കാണാറ്.
മറ്റ് ചില ക്യാൻസറുകളിലെ ലക്ഷണങ്ങൾ താഴേ കൊടുക്കുന്നു.
രക്താർബുദം - വിളർച്ച, നിരന്തരമായ അണുബാധ, ശരീരത്തിൽ നിന്ന് രക്തം വാർന്ന് പോകുക മുതലായവയാണ് പ്രധാന ലക്ഷണങ്ങൾ.
ശ്വാസകോശാർബുദം - ചുമ, ശ്വാസതടസ്സം, നെഞ്ച് വേദന, കിതപ്പ്, ക്ഷീണം മുതലായവ.
അസ്ഥിയിലെ ക്യാൻസർ - അസ്ഥികളിലും സന്ധികളിലും മുഴകൾ, വേദന, നിസ്സാരമായ കാരണങ്ങളാൽ പൊട്ടലുണ്ടാവുക.
ലിവർ ക്യാൻസർ - മഞ്ഞപിത്തം, വയർ വീർപ്പ്, വേദന, മലബന്ധം മുതലായവ
വൃക്കയിലെ ക്യാൻസർ - വയർ വേദന, മൂത്രതടസ്സം, മൂത്രത്തിൽ രക്തം കാണുക മുതലായവ.
ഗർഭാശയ അർബുദം - അടിവയറ്റിൽ വേദന, അമിതമായ രക്തസ്രാവം, വയർ വീർപ്പ്, മൂത്രതടസ്സം, മലബന്ധം മുതലായവ.
ഇത് പോലെ മറ്റ് അവയവങ്ങളെ ബാധിക്കുന്ന വേറെയും ക്യാൻസറുകൾ ഉണ്ട്. അവയുടെ എല്ലാ ലക്ഷണങ്ങൾ എഴുതാൻ പ്രയാസമുള്ളതാനാൽ ഇത്രയും കൊണ്ട് ചുരുക്കുന്നു.
അത് കൊണ്ട് തന്നെ ഓരോ അർബുദങ്ങളെയും പ്രത്യേകം പ്രത്യേകം അസുഖങ്ങളായി മാത്രമാണ് കണക്കാക്കാറ്. ചികിത്സയും ഒരോ ക്യാൻസറിലും വ്യത്യാസമായിരിക്കും.

എന്താണ് ക്യാൻസറുണ്ടാവുന്നതിനുള്ള കാരണങ്ങൾ?

ജനിതകമായ കാരണങ്ങൾ, പ്രായം കൂടുന്നത്, പുകവലിയും, പുകയില ഉപയോഗം, മുറുക്ക്, കെമിക്കലുകളുടെ ഉപയോഗം, അമിതമായ വെയിലേൽക്കൽ, റേഡിയേഷനുകൾ, ക്യാൻസറുണ്ടാക്കുന്ന കാർസിനോജനിക്ക് വസ്തുക്കളുടെ സാന്നിധ്യം ഉപയോഗം മുതലായവ ക്യാൻസറുകൾക്ക് കാരണങ്ങളായി പറയാറുണ്ട്.
പാരമ്പര്യമാണ് പ്രധാന കാരണമെങ്കിലും, ക്യാൻസർ ഉണ്ടാക്കുന്ന കാർസിനോജെനിക്ക് വസ്തുക്കളുടെ സാന്നിധ്യം ഉണ്ടെങ്കിൽ ക്യാൻസർ ഉണ്ടാകാനുള്ള സാധ്യത വർദ്ധിക്കും. എന്ത് തന്നെ ആയാലും പുകവലിയും പുകയില ഉൽപന്നങ്ങളും തന്നെയാണ് വലിയ കാരണങ്ങളായി പറയാറ്.

ക്യാൻസർ വരുന്നത് എങ്ങനെ തടയാം?

പാരമ്പര്യമായി ക്യാൻസറുള്ള കുടുംബങ്ങളിലെ വ്യക്തികൾ, ക്യാൻസറുണ്ടാകാനുള്ള സാധ്യത മുന്നിൽ കണ്ട് അതിനുള്ള നടപടികൾ സ്വീകരണിക്കണം.
പുകവലി, മദ്യപാനം, റേഡിയേഷൻ ഉണ്ടാകാൻ ഇടയുള്ള സാഹചര്യങ്ങൾ, ഫാസ്റ്റ് ഫുഡ്, Junk foods എന്നിവ ഒഴിവാക്കുന്നതാണ് ഉചിതം.
ധാരാളം വെള്ളം, വ്യായാമം, നല്ല വിശ്രമം, നല്ല പോഷകങ്ങളുള്ള ഭക്ഷണം, പഴവർഗ്ഗങ്ങൾ, പച്ചക്കറികൾ, നല്ല മത്സ്യങ്ങൾ എന്നിവ ക്യാൻസറിൽ നിന്ന് മാത്രമല്ല മറ്റ് പല അസുഖങ്ങളിൽ നിന്നും സംരക്ഷിച്ച് നിർത്തുന്നു.

എങ്ങനെയാണ് ക്യാൻസറിന് ചികിത്സിക്കേണ്ടത്?

എത്ര വേഗം ക്യാൻസറിൻ്റെ സാന്നിധ്യം തിരിച്ചറിയുന്നു എന്നത് ചികിത്സയിൽ വളരെ പ്രധാനമാണ്. പലപ്പോഴും ക്യാൻസറിൻ്റെ കൂടിയ സ്റ്റേജിലാണ് രോഗികൾ ചികിത്സക്കായി എത്താറുള്ളത്. ഇപ്പോൾ ക്യാൻസർ ചികിത്സ മുൻപുള്ളതിനേക്കാൾ ചിലവ് വളരെ കുറഞ്ഞിട്ടുണ്ടെന്ന് യാഥാർത്ഥ്യമാണ്. എന്നാൽ കൂടിയ സ്റ്റേജിൽ രോഗം കണ്ടെത്തി കഴിയുമ്പോൾ ചികിത്സാ ചിലവും വർദ്ധിക്കും.
തുടക്കത്തിൽ നിസ്സാരമായ ലക്ഷണങ്ങൾ മാത്രം കാണുന്നത് കൊണ്ട് രോഗികൾ പലരും അതിനെ അവഗണിച്ച് അവരുടെ ജീവിതവുമായി മുന്നോട്ട് പോകാറാണ് പതിവ്. നമ്മളിൽ പലരും നിസ്സാരമെന്ന് കരുതി, വേദനകൾ, ക്ഷീണം, വിശപ്പില്ലായ്മ, ഭാരം കുറയൽ അങ്ങനെ പലതും മാസങ്ങളോളം കൊണ്ട് നടക്കാറുണ്ട്. അതിൽ ചിലതെങ്കിലും ക്യാൻസറാവാനുള്ള സാധ്യതകളുണ്ട്. അത് കൊണ്ട് തന്നെ ദീർഘനാൾ മാറാതെ ഇരിക്കുന്ന ആരോഗ്യപ്രശ്നങ്ങൾ ഉള്ളവർ ഡോക്ടറുടെ സേവനം തേടുകയും ആവശ്യമുള്ള പരിശോധനകൾ നടത്തി, ക്യാൻസറുണ്ടാകാനുള്ള സാധ്യതകൾ അന്വേഷിക്കുക അത്യാവശ്യമാണ്.

ഓരോ ക്യാൻസറിനും വ്യത്യസ്തമായ ലക്ഷണങ്ങൾ ഉള്ളതിനാൽ തന്നെ ചികിത്സയും വ്യത്യാസമുള്ളതായിരിക്കും.

NB: ഒറ്റമൂലി പ്രയോഗങ്ങൾക്കൊന്നും ക്യാൻസർ ചികിത്സയിൽ സാധ്യതയില്ല.

Dr സുജേഷ് വി. എസ്,
BAMS, MBBS,
മെഡിക്കൽ ഓഫീസർ
മെഡ് വേദ് ഹെൽത്ത് ക്ലിനിക്ക്,
തടമ്പാട്ട്ത്താഴം.

07/12/2023

ചേട്ടാ .. ചേട്ടൻ എത്രയാ സ്ത്രീധനം വാങ്ങിയത് ?

കേട്ട ചോദ്യം ഇഷ്ടപെട്ടില്ലെങ്കിലും, നീരസം പുറത്ത് കാണിക്കാതെ ഞാൻ മറുപടി പറഞ്ഞു.

സ്ത്രീധനം ഒന്നും വാങ്ങിയിട്ടില്ലടോ.

അതെന്താ ചേട്ടാ, ലൗ മാര്യേജാണോ ?

അല്ല. അറേഞ്ച്ഡ് തന്നെയാണ്. പക്ഷെ സ്ത്രീധനം വാങ്ങില്ല എന്നത് ഞാൻ സ്കൂൾ പ്രായത്തിൽ എടുത്ത തീരുമാനമാണ്. അല്ലെങ്കിലും സ്ത്രീധനം ഒരു മോശം ഏർപ്പാടല്ലെ ?

ഒരു മോശവുമില്ല. എന്റെ ഫാമിലിയിലൊക്കെ എല്ലാവരും വാങ്ങുന്നുണ്ട്.

നീ വാങ്ങുമോ ?

ഞാൻ വാങ്ങില്ല. പക്ഷെ വീട്ടുകാർ വാങ്ങും.

നിനക്ക് വേണ്ട എന്ന് പറയാമല്ലോ.

ഓ എന്തിനാ കിട്ടുന്നത് ഒഴിവാക്കുന്നത് ?

എടാ. സ്ത്രീധനം ഒരു സാമൂഹിക വിപത്താണ് എന്നൊക്കെ നമ്മൾ സ്കൂളിൽ വച്ച് തന്നെ പഠിക്കുന്നതാണല്ലോ. വിദ്യാഭ്യാസമുള്ള, പ്രത്യേകിച്ച് ഡോക്ടർ ആകാൻ പഠിക്കുന്ന നമ്മൾ ഇതൊക്കെ ശരിയായി മനസ്സിലാക്കി പ്രവർത്തിക്കണ്ടേ.

ചേട്ടാ, അതൊന്നും പ്രാക്ടിക്കലല്ല. ഞങ്ങളുടെ ഫാമിലിയിൽ സ്ത്രീധനം വാങ്ങാതെ കല്യാണം നടക്കാറില്ല.
..........................................

എന്റെ വിവാഹം നടക്കുമ്പോൾ ഞാൻ കോട്ടയം മെഡിക്കൽ കോളേജിൽ MBBS ഒന്നാം വർഷ വിദ്യാർത്ഥിയാണ്. എനിക്ക് 29 വയസ്സ് കൂടെയുള്ളവർക്ക് 19 വയസ്സ്. അതിലൊരാളുമായി നടന്ന സംഭാഷണം ആണ് മുകളിൽ ഉള്ളത്.

സ്ത്രീധനം എന്ന സമ്പ്രദായം മോശമാണ് എന്ന് പലയിടത്തു നിന്നും, പ്രത്യേകിച്ച് വിദ്യാലയങ്ങളിൽ നിന്ന് തന്നെ നമ്മളെല്ലാവരും മനസ്സിലാക്കാറുള്ളതാണ്. എന്നാലും ഇതെല്ലാം തുടർന്ന് പോരുന്നത് എന്ത് കൊണ്ടാവും ?. ഒരു പക്ഷെ ഇത്തരം ദുഷ്പ്രവണതകൾക്ക് വിദ്യാലയങ്ങളേക്കാൾ കൂടുതൽ സ്വാധീനം കുടുംബം നാട്ടുനടപ്പുകൾക്ക് ചെലുത്താൻ കഴിയുന്നത് കൊണ്ടാവും ഇതെല്ലാം തുടരുന്നത്.

മെഡിക്കൽ പ്രൊഫഷണലിൽ ഉള്ള ഏതാനും ചിലർ ഇത്തരം സ്വാധീനത്തിന് വശപ്പെടുന്നു എന്നത് വളരെ നിരാശ ഉണ്ടാക്കുന്നു.

01/12/2023

24/11/2023

No more violence against women

23/11/2023

ആധുനിക വൈദ്യവും ആയുർവേദവും ഒരുമിക്കുന്ന ഇടം. integrating modern medicine and Ayurvedic treatments.