16/03/2025
१६ मार्च
राष्ट्रीय लसीकरण दिन
भारतात, दरवर्षी १६ मार्च हा दिवस राष्ट्रीय लसीकरण दिन म्हणून साजरा केला जातो. राष्ट्रीय लसीकरण दिन प्रथम १६ मार्च १९९५ रोजी साजरा करण्यात आला. १९९५ मध्ये या दिवशी पोलिओ लसीचा पहिला डोस भारतात देण्यात आला होता. सरकारने भारतातून पोलिओ निर्मूलनाची मोहीम पल्स पोलिओ मोहिमेच्या माध्यमातून सुरू केली होती.
या पोलिओ मोहिमेअंतर्गत ० ते ५ या वयोगटातील सर्व लहान मुलांना पोलिओच्या विरोधात लढण्यासाठी २ थेंब तोंडातून देण्यात आले. ही मोहिम नंतर यशस्वीपणे पार पडली, याचे साक्षीदार आपण सर्वजण आहोत. त्यानंतर, २०१४ मध्ये भारत पोलिओमुक्त देश म्हणून घोषित करण्यात आला असला, तरी आजपर्यंत ही पोलिओ लसीकरणाची मोहिम देशात सुरू आहे.
अलिकडच्या काळात कोरोनासारख्या घातक आजारापासून बचाव करण्यासाठी जगभरात लसीकरणाची मोहिम राबवण्यात आली. जागतिक आरोग्य संघटनेच्या मते लसीकरण केल्याने दरवर्षी सुमारे २-३ दशलक्ष लोकांचे जीवन वाचवण्यास मदत होते.
राष्ट्रीय लसीकरण दिनाचे महत्त्व :
• लसीकरणामुळे रोगप्रतिकारक शक्ती वाढते आणि गंभीर आजारांपासून बचाव होतो.
• लसीकरणामुळे अनेक धोकादायक आणि गंभीर आजारांपासून बचाव होतो आणि त्यावर उपचार देखील केले जातात.
• लसीकरणामुळे पोलिओ,चेचक, धनुर्वात, गोवर यासारख्या आजारांवर नियंत्रण मिळवता येते.
लसीकरण कुठे करावे :
तुम्ही सरकारी रुग्णालये, वैद्यकीय महाविद्यालये, शहरी दवाखाने, प्राथमिक आरोग्य केंद्रे, सामुदायिक आरोग्य केंद्रे, उपकेंद्रे आणि अंगणवाडी केंद्रांमध्ये लसीकरण करू शकता.
