26/05/2024
এইকেইদিন প্ৰচণ্ড গ্ৰীষ্মপ্ৰবাহৰ কবলত পৰিছে আমাৰ ৰাজ্যখন৷ তাপমাত্ৰা ৪০° পাৰ কৰিছে৷ আমাৰ ইয়াত বায়ুৰ আৰ্দ্ৰতা বেছি বাবে ঘাম বেছিকৈ ওলায়৷ ঘামৰ লগতে বিভিন্ন মিনাৰেল শৰীৰৰ পৰা বাহিৰ হৈ যায় বাবে শৰীৰ শুকান হৈ পৰে আৰু দুৰ্বল অনুভৱ হয়৷ ইয়াৰ পৰা পৰিত্ৰাণ পাবলৈ আমি যথেষ্ট পৰিমাণে বিশুদ্ধ পানী সেৱন কৰিব লাগে৷ বজাৰৰ সস্তীয়া শীতল পানীয়তকৈ নেমু,থেকেৰা,বগৰী,বেল আদিৰ চৰৱত বেছি লাভজনক৷ ডাব নাৰিকলৰ পানী আৰু কুহিয়াৰৰ ৰসও শৰীৰৰ বাবে যথেষ্ট উপকাৰী৷ সূৰ্যৰ প্ৰখৰ ৰশ্মিৰ ঋণাত্মক প্ৰভাৱ ছালৰ ওপৰতো পৰে৷ এনে দিনবোৰত শৰীৰ নিৰোগী কৰি ৰাখিবলৈ আৰু ৰোগ প্ৰতিৰোধী ক্ষমতা বৃদ্ধি কৰিবলৈ আমি কিছু ফলমূল,পাচলি বা অন্য খাদ্য নিয়মীয়াকৈ খাব পাৰিলে ভাল৷ অকণমান বিতংকৈ আলোচনা কৰো আহক৷
ক) এনেকুৱা গৰমৰ দিনৰ বাবে দৈ এবিধ উত্তম খাদ্য৷ দৈত আমাৰ স্বাস্থ্যৰ বাবে উপকাৰী বেক্টেৰিয়া (Probiotics) থাকে, যিবোৰে অন্ত্ৰৰ সক্ৰিয়তা বৃদ্ধি কৰে আৰু পাচনত সহায় কৰে। দৈয়ে পাচন নলীত হ’ব পৰা বিষ, বেদনা আদিৰ উপশম ঘটায়। গাখীৰতকৈ দৈ সহজে হজম হয়। তদুপৰি দৈয়ে প্ৰাকৃতিকভাৱে গাৰ শুকান ছাললৈ আৰ্দ্ৰতা আনে। দৈত থকা কেলচিয়ামে হাড়ৰ ঘনত্ব বঢ়ায় আৰু ইবোৰক শক্তিশালী কৰে। গৰমৰ দিনত বহুতে দৈৰ চৰবত (লচ্চী) বনাই ৰাখে। অতিপাত গৰমত দৈৰ ব্যৱহাৰে আমাৰ শৰীৰলৈ শীতলতা আৰু সজীৱতা আনে।
খ)অতিপাত গৰমত তৰমুজ খোৱাটো শৰীৰৰ বাবে উপকাৰী। তৰমুজত ৯২ শতাংশ পানী থাকে। গতিকে দেহৰ জলযোজনৰ বাবে অতি উপযোগী। গৱেষণাৰ পৰা জানিব পৰা গৈছে যে তৰমুজত থকা লাইকোপেনৰ কেন্সাৰ প্ৰতিৰোধত বিশেষ ভূমিকা আছে।
তদুপৰি লাইকোপেনে কলেষ্টেৰল আৰু ৰক্তচাপ কমোৱাত সহায় কৰে। তৰমুজত যথেষ্ট পৰিমাণৰ ভিটামিন-চি আৰু ভিটামিন এ থাকে। এই দুবিধ ভিটামিনে গাৰ ছাল আৰু চুলিৰ যতন লয়৷ তৰমুজৰ প্ৰচুৰ পৰিমাণৰ পানী আৰু কম পৰিমাণৰ আঁহবোৰে খাদ্য পাচনত সহায় কৰে আৰু কোষ্ঠকাঠিন্য দূৰ কৰে। তাৰোপৰি তৰমুজত কেলৰিৰ পৰিমাণ কম (একাপত মাত্ৰ ৪৬ কেলৰি) সেইবাবে ই আমাৰ শৰীৰৰ বাবে অতি লাভজনক।
গ)গৰমৰ দিনৰ বাবে আমাৰ চিৰপৰিচিত তিঁয়হ বেছ উপকাৰী। ইয়াতো পানীৰ পৰিমাণ যথেষ্ট। সেইবাবে দেহৰ হাইড্ৰেচনত সহায় কৰে।তিঁয়হ পটাছিয়ামৰো ভাল উৎস। তিঁয়হ কেঁচাই খাবলৈ ভাল। গতিকে চালাডত ইয়াৰ ব্যৱহাৰ বেছিকৈ হয়। অৱশ্যে ইয়াক আঞ্জা হিচাপেও খোৱা হয়।
ঘ)সকলোৱে ভাল পোৱা আম এবিধ সুস্বাদু ফল। আমক ‘ফলৰ ৰজা’ বুলি কোৱা হয়। এইবিধ ফল আমাৰ স্বাস্থ্যৰ বাবে অতি উপযোগী। ইয়াত প্ৰচুৰ পৰিমাণৰ এণ্টিঅক্সিডেণ্ট (Antioxidant) থাকে। সেইবাবে আম কেন্সাৰ প্ৰতিৰোধী। ই শৰীৰত কলেষ্টেৰলৰ পৰিমাণ হ্ৰাস কৰে আৰু খাদ্যৰ পাচনতো সহায় কৰে। তদুপৰি ই দেহৰ ইমিউনিটি (Immunity) বৃদ্ধি কৰে।
ডায়েবেটিছ নথকাসকলে এবাৰত ১০০ গ্ৰাম আম (মধ্যমীয়া জোখৰ এটা) খাব পাৰে। ডায়েবেটিছ থকাসকলেও সীমিত পৰিমাণৰ আমৰ সোৱাদ ল’ব পাৰে(৫০ গ্ৰামতকৈ কম)। সাধাৰণভাৱে আম খোৱাৰ উপৰি আম চালাড হিচাপেও ব্যৱহাৰ কৰা হয়। গৰমৰ দিনকেইটাত শৰীৰ শক্তিশালী কৰি ৰাখিবলৈ আমক আহাৰৰ তালিকাত নিচিন্তমনে অন্তৰ্ভুক্ত কৰিব পাৰে৷
ঙ)আমাৰ দেশত প্ৰচুৰ পৰিমাণে বিলাহী উৎপাদন হয়। সেইবাবে ই সহজে উপলব্ধ। আমাৰ শৰীৰৰ বাবে বিলাহী বেছ উপকাৰী। ইয়াত লাইকোপেন (Lycopane) নামৰ এবিধ এণ্টিঅক্সিডেণ্ট থাকে যি কেন্সাৰ প্ৰতিৰোধী আৰু আমাৰ হৃদযন্ত্ৰৰ বাবেও দৰকাৰী।
তদুপৰি আমাৰ ছালৰ বাবেও ই উপকাৰী। বিলাহী বিভিন্ন ব্যঞ্জনত ব্যৱহাৰ কৰা হয়। এইবিধ পাচলিক চালাড হিচাপেও খোৱা হয়। বিলাহী ভিটামিন-চি, ভিটামিন- কে আৰু পটাছিয়ামৰ ভাল উৎস। বিলাহীয়ে আমাৰ দেহক সতেজ কৰাত সহায় কৰে।
এই গৰমৰ দিনকেইটাত সতৰ্ক হৈ থাকক৷ পৰাপক্ষত গুৰুপাকী খাদ্য গ্ৰহণ নকৰিব৷ পৰ্যাপ্ত পৰিমাণে পানী খাব৷ বিশেষকৈ শিশু আৰু বয়োজ্যেষ্ঠ সকলৰ স্বাস্থ্যৰ বিশেষ যতন ল’ব৷
