02/09/2025
#কিছুমান গাড়ী চালকে কৰা ডাঙৰ ভুল...
পানীয়ে প্ৰাণ।
সাধাৰণতে আজিকালি দীৰ্ঘ ভ্ৰমণলৈ যাবলগীয়া হ'লে আমাৰ পানী বটলসমূহ বেছিকৈয়ে গাড়ীত ভৰাই লোৱা এটা অভ্যাস গঢ়ি উঠিছে।বহুতো চালকে ভ্ৰমণৰ সময়ত সহজে পাব পৰা হিচাপত এই পানীৰ বটলসমূহ চালকৰ ছিটৰ তলত বা কাষতে থোৱা দেখা যায়।এইটো এটা ভয়ংকৰ আৰু বিপদাপন্ন অভ্যাস।
গাড়ী এখন চলি থকা অৱস্থাত হোৱা জোঁকাৰণি আৰু ব্ৰেকিংৰ ফলত কেতিয়াবা এনেকৈ ছিটৰ তলত বা কাষত থোৱা বটলসমূহ বাগৰি আহি চালকৰ ব্ৰেকপেডেলৰ তলত সোমাই গৈ অতি ভয়ংকৰ অৱস্থাৰ সৃষ্টি কৰা দেখা যায়।কেৱল পানীৰ বটলেই নহয়,বহুতো চালকে বেছি দীঘলীয়া যাত্ৰাত কেতিয়াবা ভৰিৰ জোতা-চেণ্ডেল খুলি থৈ আৰামেৰে গাড়ী চলোৱা দেখা যায়।বিশেষকৈ আজিকালি ক্লাটছপেডেল নথকা অট'মেটিক গাড়ীমূহৰ চালকসকলে দীঘলীয়া যাত্ৰাত সততে এনেকৈ গাড়ী চলোৱা দেখা যায়।পানীৰ বটল যেনেকৈ বাগৰি আহি ব্ৰেক পেডেলৰ তলত সোমাই গৈ আহুকালৰ সৃষ্টি কৰে,ঠিক তেনেকৈ খুলি থোৱা জোতা-চেণ্ডেলত সেই একেই সমস্যা সৃষ্টি কৰি দুৰ্ঘটনা সংঘটিত কৰাব পাৰে।এনেকুৱাকৈ ব্ৰেকপেডেলৰ তলত পানীৰ বটল/জোতা-চেণ্ডেল আদি সোমাই গ'লে চালকে যিমান জোৰেৰে ব্ৰেকপেডেলত হেঁচা নিদিয়ক কিয়,গাড়ীখনৰ ব্ৰেক নধৰা হৈ পৰিব।গাড়ীখন একপ্ৰকাৰ ব্ৰেকফেইল হৈ পৰিব।গাড়ীখন যদি অলপ বেছি গতিত থাকে, তেনেহলে দুৰ্ঘটনা হোৱাটো খাটাং।
গতিকে পানীও খাওক আৰু সুৰক্ষিত হৈও থাকক।পানীৰ বটলসমূহ বাগৰি ফুৰিব নোৱাৰাকৈ সুৰক্ষিত স্থানত ৰাখক আৰু সদায় জোতা পিন্ধিহে গাড়ী চলাওক।
(পূৰ্বতে প্ৰকাশিত।প্ৰাসংগিকতা থকাৰ বাবে পুনৰ আজি লিখিলোঁ।আচলতে দৈনিক যিবোৰ পথ দূৰ্ঘটনা হ'বলৈ আৰম্ভ কৰিছে বা হৈছে,তাৰে কম-বেছি পৰিমাণে ওপৰত উল্লেখ কৰা সেই সাধাৰণ যেন লগা পানীৰ বটলসমূহ সুৰক্ষিত স্থানত নৰখা বাবেই হৈছে)
উৎসঃ দিতুল গোহাঁই
