03/12/2025
കാസർഗോഡ്, ഡിസംബർ 3, 2025:
ലോക വൈകല്യദിനാചരണത്തിന്റെ ഭാഗമായി മനഃശാസ്ത്ര സേവന രംഗത്ത് മുൻപന്തിയിലുള്ള വെദ ഹാപ്പിനസ് സെന്റർ ബോധവത്കരണ പരിപാടി നടത്തി. ഉൾക്കൊള്ളലും ശക്തീകരണവും ലക്ഷ്യമാക്കി സംഘടിപ്പിച്ച പരിപാടിയിൽ സ്പീച്ച് തെറാപ്പിസ്റ്റുകൾ, സ്പെഷ്യൽ എജുക്കേറ്റേഴ്സ്, സൈക്കോളജിസ്റ്റുകൾ എന്നിവരോടൊപ്പം 50-ൽ പരം യുവജനങ്ങളും സജീവമായി പങ്കെടുത്തു. വൈകല്യത്തെക്കുറിച്ചുള്ള ചർച്ചകളിൽ അവർ ഉത്സാഹത്തോടെ പങ്കാളികളായി, ഭാവിയിൽ സമൂഹത്തിനായി എന്തുചെയ്യാൻ കഴിയുമെന്നതിനെക്കുറിച്ചും ആലോചനകൾ പങ്കുവച്ചു.
പരിപാടിയുടെ ഭാഗമായി സെന്റർ ഡയറക്ടർ ശ്രീമതി പ്രിയങ്ക പി പറഞ്ഞു: വൈകല്യം ശാരീരിക പരിമിതികൾ മാത്രമല്ല, മാനസികവും മാനശ്ശാസ്ത്രപരവുമായ ബുദ്ധിമുട്ടുകളും സമൂഹം ഗൗരവത്തോടെയാണ് കാണേണ്ടത്. ഉൾക്കൊള്ളുന്ന സമീപനം വളർത്താനും ശരിയായ ബോധവത്കരണം സമൂഹത്തിലേക്ക് പടർത്താനും ഓരോരുത്തരും ഉത്തരവാദിത്തത്തോടെ മുന്നോട്ട് വരണമെന്ന് അവർ അഭ്യർത്ഥിച്ചു.
‘Resilience, Inclusion, Action’ എന്ന വിഷയത്തിൽ ഇന്ക്ലൂസീവ് ആക്ടിവിസ്റ്റ് ശ്രീ അനുശ് നടത്തിയ സെഷനും, “Ability in Every Soul” എന്ന വിഷയത്തിൽ ജെ.സി.ഐ നാഷണൽ ട്രെയ്നർ ശ്രീ യതീഷ് ബാലാളിന്റെ പ്രഭാഷണവും പങ്കെടുത്തവരെ ആഴത്തിൽ സ്വാധീനിച്ചു.
പരിപാടിക്ക് ഊർജം പകരുന്നത് പോലീസ് സബ് ഇൻസ്പെക്ടർ ശ്രീ രാമകൃഷ്ണന്റെ സാന്നിധ്യവും അദ്ദേഹത്തിന്റെ പ്രചോദനാത്മകമായ സന്ദേശവുമായിരുന്നു. വൈകല്യമുള്ളവർക്ക് സമൂഹത്തിന്റെ കരുതലും ചുമതലയോടെയുള്ള ഇടപെടലും അനിവാര്യമാണെന്ന് അദ്ദേഹം ഊന്നിപ്പറഞ്ഞു.
സെന്ററിന്റെ ജോയിന്റ് ഡയറക്ടർ വിനീത് v.ജി UDID കാർഡിനെയും അതുമായി ബന്ധപ്പെട്ട സർക്കാർ പദ്ധതികളെയും പരിചയപ്പെടുത്തി. ഇത്തരം ആനുകൂല്യങ്ങൾ ലഭ്യമാക്കുന്നതിൽ വെദ ഹാപ്പിനസ് സെന്റർ നൽകുന്ന പിന്തുണയെക്കുറിച്ച് അദ്ദേഹം വിശദീകരിച്ചു.
സർട്ടിഫിക്കറ്റ് വിതരണം നടത്തി പരിപാടി സമാപിച്ചു. ഉൾക്കൊള്ളലും സഹാനുഭൂതിയും സാമൂഹിക പിന്തുണയും ചേർന്നാൽ മാത്രമേ യഥാർത്ഥ മാറ്റങ്ങൾ സൃഷ്ടിക്കാനാകൂ എന്ന സന്ദേശമാണ് ഈ വേൾഡ് ഡിസബിലിറ്റി ഡേ ആഘോഷം ശക്തമായി ഉയർത്തിക്കാട്ടിയത്.
