25/03/2026
📰 खोपोलीत आम आदमी पार्टीचे आमरण उपोषण यशस्वी — 30 दिवसांत ठेकेदारावर कारवाईचे आश्वासन
खोपोली : आम आदमी पार्टी तर्फे खोपोली शहरातील मलनिस्सारण योजनेतील कथित गैरव्यवहार आणि विलंबाच्या निषेधार्थ सुरू करण्यात आलेले आमरण उपोषण अखेर यशस्वी ठरले आहे. डॉ. रियाज पठाण (महाराष्ट्र संघटन सचिव, आम आदमी पार्टी) यांनी प्रशासनाकडून ठोस आश्वासन मिळाल्यानंतर आपले उपोषण मागे घेतले.
खोपोली नगरपरिषदेकडून उपोषणकर्त्यांशी चर्चा करण्यात आली. या चर्चेदरम्यान नगराध्यक्ष कुलदीप रामदास शेंडे यांनी सदर मलनिस्सारण योजनेतील कामांमध्ये झालेल्या विलंबाबाबत संबंधित ठेकेदारावर 30 दिवसांच्या आत चौकशी करून आवश्यक दंडात्मक कारवाई करण्यात येईल, असे लेखी आश्वासन दिले.
नगराध्यक्षांनी दिलेल्या आश्वासनानुसार —
*कामाच्या गुणवत्तेची तांत्रिक तपासणी केली जाणार
*विलंबाबाबत चौकशी समिती नेमली जाणार
*दोषी आढळल्यास ठेकेदारावर दंडात्मक कारवाई
*30 दिवसांत संपूर्ण प्रक्रिया पूर्ण करण्याचे आश्वासन
या आश्वासनानंतर डॉ. रियाज पठाण यांनी उपोषण मागे घेतले.
या दरम्यान खोपोली पोलीस स्टेशन चे अधिकारी सचिन हिरे, तसेच खोपोली नगर परिषद चे अधिकारी, पदाधिकारी आणि कार्यकर्ते मोठ्या संख्येने उपस्थित होते.
डॉ. रियाज पठाण यांनी यावेळी सांगितले की,
"नागरिकांच्या पैशातून सुरू असलेल्या विकास कामांमध्ये कोणत्याही प्रकारचा भ्रष्टाचार किंवा हलगर्जीपणा सहन केला जाणार नाही. प्रशासनाने दिलेले आश्वासन 30 दिवसांत पूर्ण झाले नाही तर पुन्हा तीव्र आंदोलन छेडण्यात येईल."
दरम्यान, या आंदोलनामुळे खोपोली शहरातील मलनिस्सारण योजनेतील त्रुटींबाबत प्रशासनाला दखल घ्यावी लागली असून नागरिकांनी या आंदोलनाचे स्वागत केले आहे.
