07/01/2026
മതപരമായ ബിംബങ്ങളും അവ പ്രചരിപ്പിക്കുന്ന മാനവികതയും ഒരു ലോട്ടറി ടിക്കറ്റ് കൊണ്ടോ, സിനിമയിലെ പരാമർശം കൊണ്ടോ, ഒരു ചിത്രകാരന്റെ പെയിന്റിങിലെ വര കൊണ്ടോ തകർക്കപ്പെടുമെന്ന വിധത്തിൽ ചിലരുടെ മനസ്സിൽ അരക്ഷിത ബോധം പടരുന്നുണ്ട്. ഇതിനൊക്കെ എതിരെയുള്ള പ്രതിഷേധങ്ങൾ വികലമായ വിശ്വാസം ഉള്ളിൽ പേറുന്ന ഒരു കൂട്ടം മനുഷ്യരുടെ ആശങ്കളോ, കുഴപ്പം വരുമെന്ന പ്രതീതി ഉണ്ടാക്കി ചില വേർതിരിവുകൾ ഉണ്ടാക്കാനുള്ള തന്ത്രങ്ങളോ ആകാം. ഒരു കൂട്ടർ ഇമ്മാതിരി കോപ്രായം കാട്ടുമ്പോൾ മറ്റേ കൂട്ടർ വെറുതെ ഇരുന്നാൽ പ്രശ്നമാകില്ലേയെന്ന വിചാരവും ഈ വിവാദങ്ങൾക്ക് ഇന്ധനം നൽകുന്നുണ്ട് .യഥാർത്ഥ വിശ്വാസിയുടെ മനസ്സിലെ ദൈവങ്ങളും, മതം നൽകുന്ന മനുഷ്യത്വവും ഇത് കൊണ്ടൊന്നും വീണ് പോകില്ല. തുമ്മിയാൽ തെറിക്കുന്ന മൂക്കുകളല്ല ഇതൊന്നും. ഇമ്മാതിരി ആവിഷ്കാരങ്ങൾ കൊണ്ട് രാഷ്ട്രീയ പ്രസ്ഥാനങ്ങൾ ആടി ഉലഞ്ഞേക്കാം. എന്നാൽ മനുഷ്യ ജന്മത്തിന്റെ അരക്ഷിതാവസ്ഥകളിലേക്കും ശക്തമായ വേരോട്ടം ഉള്ള ഭക്തി പ്രസ്ഥാനങ്ങൾ ഇത് കൊണ്ടൊന്നും കുലുങ്ങാൻ പോകുന്നില്ല.
(സി ജെ ജോൺ)
Drcjjohn Chennakkattu
