01/03/2026
സോഷ്യൽ മീഡിയ തെരെഞ്ഞെടുപ്പ് യുദ്ധങ്ങൾ ആന്റി സോഷ്യലാകരുത്!
ഡോ.സി .ജെ .ജോൺ
________________________________
THREE MINUTES READ
തെരെഞ്ഞെടുപ്പ് രാഷ്ട്രീയത്തിൽ ഡിജിറ്റൽ മാർക്കറ്റിങ് പ്രചരണ തന്ത്രങ്ങൾ കൊടുമ്പിരി കൊള്ളുന്ന നാളുകളാണിത്. കാലം മാറുമ്പോൾ തെരെഞ്ഞെടുപ്പ് പ്രചരണത്തിന്റെ കോലവും മാറണമല്ലോ? ഇക്കുറി നിയമ സഭാ തെരെഞ്ഞെടുപ്പിൽ സംഭവിക്കാൻ പോകുന്നത് ഡിജിറ്റൽ സ്പേസ് ഉപയോഗിച്ചുള്ള സൈക്കോളജിക്കൽ യുദ്ധമായിരിക്കും .മുഖം കാണിക്കാതെ ഒളിപ്പോരാളികളായി എന്തും പടച്ചു വിടാമെന്ന സൗകര്യം വല്ലാതെ ദുരുപയോഗപ്പെടുത്തുന്നുണ്ട്. ഡിജിറ്റൽ മതിലുകളിലെ എഴുത്തുകളിൽ നൈതീകത സൂചിക തീരെ ഇല്ല.
നിർമ്മിത ബുദ്ധിയിൽ പടച്ചു വിടുന്ന അസത്യങ്ങളും ,സോഷ്യൽ മീഡിയ സാഹിത്യങ്ങളും ,ഇൻസ്റ്റാ വാട്സാപ് പ്രതിച്ഛായ ബിംബങ്ങളുമൊക്കെ തലങ്ങും വിലങ്ങും വന്ന് നിറയും. ഇൻഫ്ലുവെൻസറുകളും സെലിബ്രിറ്റികളും വലിയ നേതാക്കളെ അഭിമുഖം നടത്തി പുതു പ്രതിച്ഛായകൾ എഴുതി ചേർക്കും. അസ്സലേത് കെട്ടി പൊക്കിയത് ഏതെന്ന് അറിയാതെ ജനം വിഷമിക്കും.
ജനങ്ങൾക്ക് രാഷ്ട്രീയക്കാരെ പണ്ടത്തെ പോലെ വിശ്വാസമാണോയെന്ന കാര്യത്തിൽ പൊതുവിൽ അവർക്ക് തന്നെ ഒരു സംശയമുണ്ട് .സ്വന്തം പ്രവർത്തനങ്ങളെ കുറിച്ച് ആളുകൾക്ക് വേണ്ടത്ര ബോധ്യമുണ്ടോയെന്നതിലും ആശങ്കയുണ്ട് . പണ്ടത്തെ പോലെ പലർക്കും ജനവുമായി സമ്പർക്കം പുലർത്താനാകുന്നില്ലെന്നത് സത്യമാണ്.. എല്ലാവരും വാഹനങ്ങളിൽ ചീറി പാഞ്ഞു നടക്കുകയാണ് .നിയമസഭാ സാമാജികനെയോ , മന്ത്രിമാരെയോ നേരിട്ട് കാണൽ ക്ലേശകരം.പാർട്ടി അണികളുടെ വലയത്തിൽ നിന്നും പുറത്ത് കടന്ന് നിഷ്പക്ഷ ജനങ്ങളുമായി ഇടപഴകാൻ പണ്ടത്തെ പോലെ കഴിയുന്നുമില്ല .സാധാരണ ജനം വല്ല കല്യാണത്തിനോ ഉദ്ഘാടനത്തിനോ കണ്ടാലായി. അത്ര മാത്രം. സ്വന്തമായി സോഷ്യൽ മീഡിയ പേജുണ്ടാക്കി ആളുകളുമായി അടുക്കാൻ നോക്കുന്നവരാണ് അധികവും.
എന്നാൽ തെരെഞ്ഞെടുപ്പ് വേളയെത്തുമ്പോൾ എന്തൊക്കെ നേരിട്ട് ചെയ്തുവെന്ന് ജനത്തെ ബോധ്യപ്പെടുത്തേണ്ടേ ? ഇവിടെയാണ് പ്രതിച്ഛായ വിപണനത്തിന്റെ പ്രസക്തി. ഇത് തെറ്റല്ല .ഈ വക കലാ പരിപാടികൾ കാലം ആവശ്യപ്പെടുന്നുമുണ്ട്. നാടോടുമ്പോഴുള്ള നടുവേയുള്ള ഓട്ടത്തിൽ പ്രതിപക്ഷ നേതാവും മുഖ്യമന്ത്രിയും ചേരാതെ എന്ത് ചെയ്യും ?രാഷ്ട്രീയത്തിന് അപ്പുറമുള്ള അവരുടെ വർത്തമാനങ്ങൾ ജനത്തിന് കേൾക്കാനുള്ള അവസരവും കിട്ടും.പാർട്ടി അണികൾ എന്തായാലും അവരുടെ ഉദ്ധരണികൾ കേൾക്കാൻ വിധിക്കപ്പെട്ടവർ. .എന്നാൽ സെലിബ്രിറ്റി സാന്നിധ്യം കൊണ്ട് വ്യത്യസ്തരായ മറ്റൊരു കേൾവിക്കാരെയാണ് അവർ ലക്ഷ്യം വയ്ക്കുന്നത് .അത് തെരെഞ്ഞെടുപ്പ് കാലത്തിലേക്ക് മാത്രം ഒതുങ്ങരുത്. ആശയ പരമായ ചർച്ചകളുമാകണം .
തമ്മിലടിക്കാതെയും സ്വയം പൊക്കാതെയും നാടിനായി സംവാദങ്ങൾ ഉണ്ടാകട്ടെ . കേന്ദ്ര അവഗണനയുടെ നാളുകളിൽ ഇതൊക്കെ അല്ലേ വേണ്ടത് ?
പ്രതിച്ഛായ നിർമ്മിതി പോലെ പ്രധാന ഇനമായി മാറിയിരിക്കുന്നു പ്രതിച്ഛായ തകർക്കലും.ഇന്ത്യൻ രാഷ്ട്രീയം വിഗ്രഹങ്ങളെ മുൻ നിർത്തിയുള്ള അങ്കങ്ങളായും പരിണമിച്ചിട്ടുണ്ട് . അതിനായി തിളക്കമുള്ള വിഗ്രഹങ്ങൾ വേണം.തിളങ്ങി വരുന്നവയിൽ ചെളി വാരി എറിയുകയും വേണം.
ഇതിനൊക്കെയായി സോഷ്യൽ മീഡിയ പേജുകളും റീലുകളും കാർഡുകളുമൊക്കെ ധാരാളമായി ഇറങ്ങുന്നുണ്ട് .
സാക്ഷര കേരളം ഇതിലൊക്കെ വീഴുമോയെന്നതിന്റെ പരീക്ഷണം കൂടിയാകാം നിയമസഭാ
തെരെഞ്ഞെടുപ്പ് .
രാഷ്ട്രീയത്തിൽ മാത്രം ഒതുങ്ങി നിൽക്കുന്നതിൽ ഇപ്പോൾ പലർക്കും അപൂർണ്ണത തോന്നുന്നുണ്ടെന്നത് നല്ല കാര്യം. രാഷ്ട്രീയേതര കാര്യങ്ങളിൽ കൂടി താല്പര്യമുള്ളവരെയാണ് ജനത്തിന് ഇഷ്ടമെന്ന ധാരണ വന്നപ്പോൾ രാഷ്ട്രീയക്കാർ പുസ്തക രചനയിലേക്ക് ഇറങ്ങി .വായന തുടങ്ങി .യൂട്യൂബർ മാർക്കും ഇഫ്ലുവെൻസർമാർക്കും
അഭിമുഖം നൽകി തുടങ്ങി. കേരളം അഭിമുഖീകരിക്കുന്ന കാര്യങ്ങളെ പറ്റി വ്യത്യസ്തങ്ങളായ വീക്ഷണങ്ങൾ കണ്ടെത്താൻ ആരംഭിച്ചു .
ഇത്തരം പ്രവർത്തനങ്ങളിലൂടെ രാഷ്ട്രീയക്കാർ വിശാലമനസ്കരാകട്ടെ. എതിർ വാക്കുകളെ ആദരവോടെ കേൾക്കുന്നവരുമാകട്ടെ. മുഖ്യ മന്ത്രിയും പ്രതിപക്ഷ നേതാവും അവരുടെ ടീമും കണ്ടും മിണ്ടിയും തമ്മിൽ തമ്മിൽ സൗഹാർദ്ദത്തോടെ ഇടപെട്ട് കേരളം നന്നാക്കാനുള്ള ചർച്ച ചെയ്യുന്ന വിഡിയോയാകട്ടെ മലയാളിയുടെ സ്വപ്നം. കേരളത്തിനെ സ്നേഹിക്കുന്ന സോഷ്യൽ മീഡിയ താരങ്ങളും മറ്റ് സാംസ്കാരിക പ്രമുഖരും അത്തരമൊരു പരിസരം സൃഷ്ടിക്കട്ടെ .തെരെഞ്ഞെടുപ്പ് കാല ഹൈ വോൾട്ടേജ് വെറുപ്പുകൾ കുറയട്ടെ .കേരളം അങ്ങനെയേ വളരൂ. ദുരന്ത വേളകളിൽ സാർത്ഥക കൂട്ടായ്മകൾ ഒരുക്കിയ സോഷ്യൽ മീഡിയകളെ കൊണ്ട് രാഷ്ട്രീയക്കാർ തെരെഞ്ഞെടുപ്പ് നേട്ടത്തിനായി സ്പർദ്ധ ഉൽപ്പാദിപ്പിക്കാതിരിക്കാനുള്ള വിവേകം പ്രകടിപ്പിക്കണം. യുദ്ധവെറിയുടെ മറ്റൊരു പകർപ്പല്ലേ ഇത്തരം സോഷ്യൽ മീഡിയ ആക്രമണങ്ങളും?സാമൂഹിക പരിസരത്തിൽ ആശയക്കുഴപ്പം വിതച്ചും ,വിഷം കലക്കിയുമുള്ള സോഷ്യൽ മീഡിയ ഇടപെടലുകൾക്ക് വിരാമമിട്ട് മാതൃക കാട്ടട്ടെ .പിള്ളേർ ജനനായകരുടെ സൈബർ ബുള്ളിയിങ്ങ് കാണുന്നുണ്ട് . കാണുന്നുണ്ട് .നാടോടി കാറ്റിലെ ദാസന്റേയും വിജയന്റേയും പോലെ നടക്കാത്ത മനോഹര സ്വപ്നമായി പൊലിഞ്ഞാലും വേണ്ടില്ല.കാണാം ഈ സ്വപ്നം.
(ഡോ.സി .ജെ .ജോൺ)
Drcjjohn Chennakkattu fans
