Dr Kalesha basha

27/04/2023

అనంత సాహితీ వేదిక 20-4-2023 పోటీలో ఎంంపిక చేసిన కవిత

అంశం: ప్రాణం ఖరీదు
------------------------------

గొడ్డలి స్నానం చేసింది...
పాత నేత చచ్చి పడున్నాడు...
నేరస్థుడు నేతయ్యాడు.

* * *

జైలు తలుపు కిర్రుమంది...
జయజయ ధ్వానాలు దద్దరిల్లాయి...
పూలు చినుకులైనాయి...
రక్తం మరకలు ఎండి రాలిపోయిన
నాయకుడి రథోత్సవం సాగుతోంది...
వాకిట్లో బిక్కుబిక్కుమంటూ
హతుడి కుటుంబం.

* * *

ఓ అగ్గి పుల్ల
మతానికి మంటపెట్టింది...
కిరాయి మూకల
కత్తుల దాహం తీరింది...
కళ్ళు తెరిచిన చట్టం
హంతకులని కటకటాల్లోకి నెట్టింది...
ప్రజలెన్నుకున్న ప్రభుత్వం
పెద్ద మనసుతో క్షమించేసి
జైలు తాళం తీసింది...
ఆరిపోయిన చితిముందు
బేలగా బాధిత కుటుంబాలు.

ప్రజాస్వామ్యం
కొత్త ముఖమేసుకొని
ప్రాణాలకి ఖరీదు కట్టేస్తుంటే
కాలం కాళ్ళీడ్చుకుంటూ పోతోంది
చేవచచ్చిన జనాలని
చీదరించుకుంటూ.

___ రామిశెట్టి భాస్కర్ బాబు
9849166103.

02/05/2022

“Traditionally Surgeons are Physicians who hope to make the patient well by making them sick. To embark on such an experience the patient enters into a remarkable contract. A permit is given to administer the most powerful drugs, followed by the license to cut up one’s body. When we as surgeons accept this profound act of faith, it is appropriate that we view our responsibility seriously. To make a patient sick in order to make him well, requires a finely tuned skill at risk, benefit analysis. Clearly the benefit must outweigh the risk, and every effort must be made to increase the therapeutic index of an operation”

Read this somewhere, I don’t remember, hence could not acknowledge the owner of these words.

16/07/2021

My princess wedding is an ecstacy

17/02/2021

01/05/2020

24/04/2020

తస్మాత్ జాగ్రత్త!!

₹₹₹₹₹₹₹₹₹₹₹₹

మిత్రమా,
ఇంటికెళ్లు...
నీకోసం భార్యాపిల్లలు
కనులలో ఆశల దీపాలతో
ఉద్విగ్నభరిత వెలుగులతో ఎదురుచూస్తున్నారు!

మిత్రమా,
ఏకబిగిన వీధులలో తిరుగకు....
పని ముగించుకుని
త్వరగా ఇంటికెళ్లు...
అమ్మానాన్నలు నీ అడుగుల సవ్వడికై
నడివాకిట నిలబడి నిరీక్షిస్తున్నారు!

అమ్మా,
త్వరగా ఇంటికెళ్లు...
జీవనపోరాటంలో అలసిసొలసి
నీరసించి ఉన్నావు...
నీ కమ్మని పిలుపుకై
చల్లని చూపుకై
నీవాళ్లూ,పిల్లలు వేచిచూస్తున్నారు!

జీవితంలో ప్రశాంతతనొంది,
అలసట నుండి విశ్రాంతిని పొంది,
సంఘర్షణ నుండి శాంతిని జయించి
ఎంతో కాలమైంది!

కరోనా రూపంలో
కాలగమనం కాసింత భాగం
మన సాంత్వన కోసం విభజించింది!
సంతోషాలను ఆస్వాదిస్తూ
ఆనందాలను పంచుకుందాం!!
గృహాలను స్వర్గసీమలుగా మార్చుకుందాం!

కానీ
అదిగో....చూశారా!
విధ్వంసక కరోనా
నిర్మానుష్య వీధుల్లో
మృత్యు నర్తనంతో
విర్రవీగుతూ విహరిస్తూ ఉంది!
అహంకారాన్ని పోతపోసుకుని
విశృంఖలంగా ఊగిపోతూ ఉంది!
ప్రళయ విలయాన్ని సృష్డించేందుకు పన్నాగం రచిస్తూ ఉంది!
శవాలను పరిచేందుకు సిధ్ధంగా ఉంది!

గడపదాటితే కబళించాలని,
ప్రాణాలను పెకిలించాలని,
విషపుదృక్కులతో
దారికాస్తూ,
వేచిచూస్తూ,
మృత్యువును మనకోసం ఆవాహన చేస్తూఉంది!

మిత్రమా,
కపటనాటక కరాళ కరోనా
కబంధహస్తాల్లో బందీ అవకుండా,
మృత్యుదంష్ట్రలలో జీవితం ముగిసిపోకుండా...
స్వీయనిర్బంధ కవచధారణతో
కరోనాను ఎదిరిద్దాం!
మహారణంలో గెలిచితీరుదాం!

మనమెవరం కనబడక,
వేచిచూచినా దొరకక,
జాతి వృధ్దికి ఆధారం లేక,
విసిగి, వేసారి,
కలత చెంది,
నలత పొంది
కృశించి,నశించి,
మృత్యుశయ్యను చేరుకుంటుంది....
హాహాకారాలతో అంతమౌతుంది!

కరోనాకు దొరికారో...
ఆరుబయట విహరించారో...
గొంతులో విషకోరలతో డస్సి,
ఊపిరితిత్తులలో విషాన్ని చిమ్మి,
మననూ,కుటుంబాన్నీ కబళిస్తుంది!
తస్మాత్ జాగ్రత్త!
తస్మాత్ జాగ్రత్త!!

# # # # డా. కాలేషా బాషా

17/04/2020

ఓయ్ కరోనా...!
( ఓ సర్జన్ అంతరంగం)
# # # # # # # #₹ # #

మా కత్తులు మొద్దువారుతున్నాయి....
మా చేతులు బండబారుతున్నాయి.....
నైపుణ్యాలు మూగవీణలు పలుకుతున్నాయి.....
కత్తులతో లాఘవంగా రోగి శరీరంపై నర్తించే మా సున్నిత హస్తాలు విరహవేదన చెందుతున్నాయి.‌...

నీవైనా దొరికితే
కంటికి కనబడితే..‌‌.
నీ పైనే మా చిరు కరవాలాన్ని ఝుళిపించాలని ఉంది...!

నీ శరీరంపై ఒయ్యారంగా లేచిన ఇనుపచువ్వల్లాటి
ప్రొటీన్ తంతువులను
స్కాల్పెల్ తో సుందరంగా ఖండించాలనుంది...
నీ దేహాన్ని చదును చేసి
మృదువుగా,సున్నితంగా చూడాలని ఉంది.‌‌.‌‌.

అపురూప సౌందర్యవతుల
మతిపోగొట్టే
నీ సుందర శరీరాన్ని కప్పిన కొవ్వు పొరపై చిన్ని చిన్ని గాట్లు పెట్టి వలువగా తొలగించి నీ లోపల నిర్మాణాన్ని నిర్వచించాలనుంది....!

నీ ఆయుపట్టు అయిన
ఆర్.ఎన్.ఏ శృంఖలాన్ని
సూక్ష్మ ఖడ్గంతో ఛేధించి
కోడాన్ల ఖండికలను అటూ ఇటూ మార్చేయాలని ఉంది....

సార్స్ నుండి నావెల్ గా నిన్ను మార్చిన ఉత్పరివర్తనా కేంద్రాలను ఖండించి,విభజించి,
తొలగించి నిను సాధుస్వభావినిగా పరివర్తన చేయాలనుంది!

మానవకణాలపై నువు కూర్చున్నా నీ జన్యు పదార్ధం కణాంతరాల్లోకి చొచ్చుకుపోకుండా
దళసరి చర్మాన్ని
నీ శరీరంపై గ్రాఫ్టింగ్ చేయాలనుంది!

ఏదిఏమైనా
నువు చేతికి దొరికితే
నీకు ఆపరేషన్ చేయాలనుంది....!!!

**"""" డా. కాలేషా బాషా

17/04/2020

CORONA TIMES

15/04/2020

అయ్యో.....!

# # # # #₹₹₹ #
అధికార వాంఛతో
ఆటవిక న్యాయంతో
అసువులను తోడేసే
ఆయుధ సంపదలను అనంతంగా కూడబెట్టిన అపురూప ఏలికలారా!
దాచిపెట్టిన ఆయుధాలను
వెలికితీసి,
ముక్కలు, ముక్కలుగా చేసి,
అఖండభారత అన్నార్తులకు అన్నం ముద్ధలుగా పెట్టండి!

రాజధానుల నడిబొడ్డులో
ఆకలితో అలమటిస్తున్న అనాధలకు,
పతితులకు,భ్రష్టులకు,
నిలువనీడలేని బాధా సర్పదష్టులకు,
మందుగుండునూ,
అగ్ని క్షిపణులను ఆబగా తినిపించండి!

మహా నగరాల మురికివాడల్లో
మహాద్భుతంగా,
విలయకాల నర్తనంతో
విర్రవీగుతూ తిరుగుతున్న
ఆకలి పిశాచంపై
లోహ యుధ్ధవిహంగాలతో
అణుబాంబులు అణువణువునా వెదజల్లండి!

అనంత ప్రజాధనంతో
అజేయభారతం కోసం
అహరహం బేరసారాలతో
అమేయంగా సేకరించిన,
ఆయుధాగారాలలో
మ్రగ్గిపోతున్న మారణాయుధాల మృష్టాన్న ప్రసాదాలను కడుపారా
పంచిపెట్టండి!

ఈ దేశం నాకొద్దుపొమ్మని వీధుల్లో విసిరేసిన నిరాశ్రయులకు,
నిర్జీవ దేహాలకు,
నేలమాళిగలలో
చెదలుపట్టి,
కుళ్లిపోతున్న
అపార ఆయుధ సంపత్తిని
ఆకలి తీరేవరకూ మూడుపూటలా
మురిపెంగా పంచిపెట్టండి!

అయ్యో....!

ఈ నేలను పాలించిన,
పాలిస్తున్న పాలకులారా!
దేశాన్నేలే నేతల్లారా!
ఈ దేశపు దుర్గంధభరిత నేలపై కకావికలమైన శకలాలై
పూటగడిచేందుకు
పొట్టచేతబట్టి ద్రిమ్మరులై తిరుగుతున్న
ఎండిపోయిన,
చితికిపోయిన శరీరాలకూ,
జీవచ్ఛవాలకూ కావలసింది
పెట్టెలలో తుట్టెలు తుట్టెలుగా,
కట్టలు కట్టిన ఆయుధాలుకాదు ....
క్షుద్బాధను తీర్చే
పిడికెడు అన్నం అని గ్రహించండి!!!
........డా. కాలేషా బాషా

26/03/2020

ఎక్కడున్నారు?

@@@@@@@@@@

ఏరీ...
ఎక్కడ?
ఎవరూ కనపడరేం....?
పోయిన సంవత్సరం పంచాంగం వినిపించిన వారందరూ ఎక్కడ?
మనిషి జాతకాన్ని ,భవిష్యత్తును చదివిన వారందరూ ఎక్కడ?
పంచాంగ ప్రవచనా పండితులెక్కడ?
జాతక నిర్ణయ ఉద్ధండ పిండాలెక్కడ?
రాశులనూ,గ్రహాలనూ గుప్పెట పట్టి ఆడించగల
అఖండులెక్కడ?
ఒక సంవత్సరం పాటు
మనిషి భవిష్యత్తునూ ,
గమనాన్నీ,గ్రహపాటునూ
నిర్ణయించగల ద్రష్టలూ,మహాద్రష్టలూ ఎక్కడ?
ఏరీ....ఎక్కడా కనపడరేం?

పంతొమ్మిది వేల ప్రాణాలను బలిగొన్న కరోనా జాతకాన్ని చెప్పలేదేం...?
చిన్న ప్రాణికి భయపడి
ప్రపంచం మొత్తం
అష్ట దిగ్బంధనం లోకి వెళ్లిపోతుందని చెప్పలేదేం?

ఒక్కోరోజు వేలమంది ఆయువులు గాలిలో కలుస్తాయని చెప్పలేదేం?

వారిని నమ్ముకున్నవాళ్లు అనాథలైపోతారని చెప్పలేదేం?

మానవాళి మొత్తం భయం గుప్పిట్లో బతుకుతారని ప్రవచించలేదేం?

జగద్ గమనం మొత్తం ఒక్కసారిగా ఆగిపోతుందనీ,
రహాదారులు నిర్మానుష్యమౌతాయనీ,
గాలి కూడా స్థంభిస్తుందనీ
నొక్కి వక్కాణించలేదేం?

ఎందుకీ మిథ్యా ప్రవచనాలు?
ఎవరి బాగుకోసం?
ఎవరి సంతృప్తి కోసం?
ఏ వెలుగుల కోసం?

మేథస్సు ఉన్న మానవులారా.....
వీటిని నమ్ముతారా?
మన భవితను ఒకరు చెప్పేదేంటి?
ఆయువులను నిలబెట్టే
విజ్ఙానాన్ని నమ్మాలి!
మన భవితను ఖరాఖండిగా చెప్పే శాస్త్ర విజ్ఙాన వెలుగుల్లో నడవాలి!!
. .....డా. కాలేషా బాషా