22/06/2020
# Corona Care in Ayurved.
घरगुती उपाय करण्या पूर्वी आयुर्वेद तज्ञाचे मत घ्या.
आजकाल कोरोनाच्या परिस्थिती मध्ये घरगुती उपाय म्हणून अनेक जण आयुर्वेद औषधांचा उपयोग करत आहेत. फेसबुक आणि वाॅटसअप वरुन अशा अनेक गोष्टींविषयी माहिती घेत असतात. पण ह्याचा वापर करण्यापूर्वी आपल्या आयुर्वेद डाॅक्टरांना आवश्य सल्ला विचारावा..आयुर्वेद हे subjective ( रुग्णाप्रति भिन्न स्वरुपाचे) आहे. त्या मध्ये रुग्णाची प्रकृती, वय, त्याची लक्षणे, त्याचा आहार, ॠतूचर्या या सारख्या अनेक गोष्टीचा विचार करुन वैद्य रुग्णास औषध देत असतो आणि मगच ते रुग्णास गुणकारी ठरते. आपल्या आयुर्वेद डाॅक्टरांना आपल्या विषयी वरील सर्व माहिती असल्याने ते आपणास काय योग्य आणि काय अयोग्य हे चांगले जाणतात. आजकाल सोशल मिडियावर घरगुती औषधाच्या नावाखाली अनेक गोष्टी सांगितल्या जातात. पण सर्वच गोष्टी प्रत्येकास लागू पडत नाही. यास कारण देखील आयुर्वेदाचे मूळ स्वरुपच आहे. सध्याच्या कोरोना काळात आयुर्वेद या कोरोना काळात कसा उपयुक्त आहे हे सांगण्याच्या गडबडीत काही objective ( common to all) अशी औषधे आणि आहार कल्पना सांगितल्या जातात. पण त्या आपणास उपयोगी पडतील की नाही याची पडताळणी आपल्या आयुर्वेद डाॅक्टर करुन घेणे गरजेचे आहे. उदाहरणच द्यायचे झाले तर अनेक पित्ताचे त्रास असणारे रुग्ण तुळस, मिरे, दालचिनी, तमालपत्र, या सारख्या औषधांचे काढे घेऊन मुखपाक, गळ्यात आणि छातीत जळजळ होणे, गुददाह, उलटी होणे, सर्वांगाची आग होणे या सारखी लक्षणे घेऊन चिकित्सालयात येतात. याचाच अर्थ एवढ्या उष्ण काळात पित्ताचे त्रास असणा-या रुग्णासाठी ही औषधे उपयोगी ठरत नाहीत.अशा व्यक्तीसांठीही आयुर्वेदात अनेक औषधे उपलब्ध आहेत त्यायोगे कोरोना होऊ नये म्हणून प्रतिकार शक्ती निर्माण करता येते. तेव्हा कोरोनासाठी कोणताही उपाय करण्यापूर्वी आपल्या आयुर्वेद डाॅक्टरांचा सल्ला आवश्य घ्या....
(या सारखी सर्वासाठी उपयुक्त माहिती पुढच्या लेखात)
सर्वे सुखिनः सन्तु सर्वे सन्तु निरामय:|
वैद्य अनिश अनिल पंडित MD( आयुर्वेद)
फलटण व पुणे
8446550734
