03/08/2025
Fact of Today's Business
"१० पट व्यवसाय वाढवतो" म्हणणाऱ्यांच्या मोहजाळात अडकलेला मराठी व्यावसायिक – वास्तव आणि एक विनंती
आजच्या काळात एक वाक्य सतत कानावर पडतं – “तुमचा व्यवसाय १० पट वाढवतो!”
कधी वाटतं, खरंच हे शक्य आहे का? विशेषतः असा मराठी व्यावसायिक जो वर्षानुवर्षं कष्ट करत आहे, पण तरीही काहीतरी अडकून पडलंय असं वाटतं. मग तो विचार करतो – कदाचित आपण काहीतरी चुकतोय, कदाचित हा नवीन मार्गच यशाचं रहस्य असेल.
सिस्टीम, ऑटोमेशन, डिजिटल टेक्नॉलॉजी आणि बिझनेस कोचिंग…
हे शब्द ऐकले की उत्साह वाढतो. कारण ते चमकदार पद्धतीने सांगितले जातात. “तुम्ही नसताना देखील व्यवसाय चालेल!” किंवा “फक्त एका सिस्टीममुळे करोडपती व्हाल!” अशी वाक्यं आपण दरवेळी ऐकतो. पण प्रश्न असा आहे – हे सांगणाऱ्यांनी स्वतःचा व्यवसाय खरंच १० पट वाढवला आहे का?
जर त्यांनी स्वतः या सिस्टीम्स वापरून यशस्वी झाले असते, तर ते आज कोर्स विकण्याऐवजी स्वतःच्या व्यवसायातून संपत्ती आणि समाधान कमवत नसते का?
सरधोपट सल्ल्यांचं ओझं
गेल्या काही महिन्यांत मी अनेक व्यावसायिकांशी बोललो. कुणी २५ हजारांचा कोर्स केला होता, कुणी ७५ हजारांचा, तर कुणी लाखभर खर्च केला होता. सगळ्यांचं उत्तर एकच –
"सुरुवातीला वाटलं दिशा मिळाली. पण काही दिवसांनी कळलं – हे सगळं एकाच साच्यातलं आहे."
जिथे तुमच्या व्यवसायासाठी स्वतंत्र विश्लेषण हवं होतं, तिथे फक्त सरधोपट प्रेझेंटेशन्स मिळाली.
जिथे तुमचे मार्जिन्स, टीम स्ट्रक्चर आणि मार्केटचा अभ्यास करून सल्ला हवा होता, तिथे कॉपी-पेस्ट परदेशी मॉड्युल्स दिली गेली.
आणि जेव्हा खऱ्या समस्यांबद्दल विचारलं, तेव्हा समोर मौन.
सगळं एकच – ठरलेली vocabulary, ठरलेले टूल्स आणि ठरलेला फॉर्म्युला!
ऑटोमेशन – गरज की घाई?
आज सर्वत्र ऑटोमेशनचं वेड आहे – CRM, ERP, Sales Funnels… पण खरंच तुमच्या व्यवसायाला याची गरज आहे का?
ऑटोमेशनसाठी मोठा खर्च, तांत्रिक टीम, मेंटेनन्स लागतो. त्याचा व्यवसायावर नेमका काय परिणाम होणार, नफा खरंच वाढणार का – हे कोणी सांगत नाही. अनेकदा आपण अजून आपला व्यवसाय व्यवस्थित समजून घेण्याच्या टप्प्यात असतो, पण तरीही घाईघाईने मोठ्या सिस्टीम्स लावतो.
आणि मग… आपणच आपल्या व्यवसायाकडे एका तिऱ्हाईताच्या नजरेने पाहू लागतो. आपणच स्वतःचं मूल्य विसरतो.
"तुम्ही नसतानाही व्यवसाय चालेल" – धोकादायक कल्पना
या कोचिंगमध्ये एक गोष्ट मध्यवर्ती असते – तुम्हाला तुमच्या व्यवसायातून दूर करणं.
पण जर तुम्हीच बाजूला झालात, सगळी सूत्र बाहेरच्या सिस्टीम्स किंवा लोकांच्या हाती दिलीत, तर एके दिवशी तुम्हीच तुमच्या व्यवसायात irrelevant व्हाल.
जो व्यवसाय तुम्ही घाम गाळून उभा केला, त्यात तुम्हीच उरणार नाही – हा किती मोठा विरोधाभास आहे ना?
व्यवसाय म्हणजे तुमचं बाळ
व्यवसाय म्हणजे बाळच आहे.
त्याला लहानपण, मोठेपण, संघर्ष आणि वाढ – सगळं आहे.
त्याच्या अडचणी समजून घेणं, त्याला योग्य दिशा देणं हे काम फक्त तुमचं आहे.
कोणताही बाहेरचा कोच तुमच्यासारखा तुमच्या व्यवसायातला रस्ता चालून गेलेला नसतो. तो मार्ग तुम्हालाच चालायचा आहे, चुकायचं आहे, शिकायचं आहे.
शॉर्टकटने यश मिळत नाही – उलट गती हरवते.
कोचिंग चांगलं आहे, पण…
खरं कोचिंग तुम्हाला तुमचं उत्तर शोधायला मदत करतं. पण जर ते तुमच्या निर्णयांचा ताबा घेऊ लागलं, तर ते कोचिंग नाही, ती चुकीची गती आहे.
आज बिझनेस कोचिंगच्या नावाखाली फॅन्सी सॉफ्टवेअर, डॅशबोर्ड्स आणि कॉपी-पेस्ट टॅक्टिक्स शिकवल्या जातात. पण आर्थिक शिस्त, टीम बिल्डिंग, नातेसंबंध, ग्राहकांशी निष्ठा – यावर फारसं कोणी बोलत नाही.
खरी गोष्ट – स्वतःवर विश्वास ठेवा
या सर्व प्रक्रियेत जे सर्वात जास्त दुखतं ते म्हणजे – मेहनती, शिस्तप्रिय मराठी व्यावसायिक फॅन्सी सिस्टीम्सच्या नादात स्वतःलाच विसरतो. आणि तो विसरला की व्यवसायाचं खरं बळच हरवतं.
म्हणूनच एक मनापासून विनंती –
✅ व्यवसाय वाढवा, हो!
✅ सिस्टीम लावा, हो!
✅ टेक्नॉलॉजी घ्या, अगदी हवीच आहे!
पण या सगळ्यात स्वतःचं अस्तित्व हरवू नका.
यश म्हणजे टाळ्यांचे आवाज नाहीत.
यश म्हणजे – व्यवसाय चालताना अजूनही तुमचं नाव, तुमची भूमिका आणि तुमचं माणूसपण जिवंत राहणं.
"व्यवसायात यंत्रं लागतात, पण हृदय हरवून नाही.
टेक्नॉलॉजी हवीच, पण तुमच्या स्पर्शाशिवाय ती कोरडीच वाटते."
कृपया घाई करू नका.
विचार करा.
आणि सर्वात आधी – स्वतःवर विश्वास ठेवा.
कारण व्यवसाय तुमचाच आहे, आणि त्याचं नेतृत्वही तुमचंच असलं पाहिजे.
Writer: Anish Sahasrabudhe
