Dr Juily's Clinic

16/05/2026

माझी आई मला नेहमी सांगते, "जुईली, कुठलाच अनुभव कधीच वाया जात नाही बघ!!" आणि हे अगदी खरं आहे😃 त्याची प्रचिती मला नेहमीच येत असते...

साधारण पंधरा-सोळा वर्षांपूर्वीची गोष्ट आहे. नुकतच बीएचएमएस पूर्ण करून मी रुबी हॉल क्लिनिक मध्ये इमर्जन्सी मेडिकल ऑफिसर(intern) म्हणून जॉईन झाले होते. नाव जरी झकास असलं तरी सगळ्यांची बोलणी खायची कामच जास्त होती.
प्रत्येक नवीन केस आली की त्या पेशंटची थोडक्यात केस हिस्ट्री घेऊन योग्य त्या डिपार्टमेंटच्या रेसिडेंट डॉक्टरला बोलवावं लागायच. त्यांच्याकडे पेशंट दिला की मग पुढचा प्रोटोकॉल ठरायचा. तोपर्यंत आम्हाला मात्र दुसरी इमर्जन्सी केस आली की तिकडे पळावे लागायचं. त्यामुळे पेशंटचं पुढे काय झालं हे कधी समजायचं, कधी समजायचं नाही.!!

तर याच दरम्यान १७-१८ वर्षाचा मुलगा कॅज्युअल्टी म्हणजे इमर्जन्सी डिपार्टमेंट मध्ये आला. तो भयंकर किंचाळत होता. त्याला फिट/ convulsions आल्यासारखे वाटत होते. तो सगळा प्रकार पाहून मी थोडी घाबरले होते. मग रेसिडेंट डॉक्टर आले , त्यांनी पाहिलं. सीनियर फिजिशियन बरोबर चर्चा झाली. पण पुढे काय झालं ते कळलंच नाही 😟

मी दुसऱ्या पेशंट बरोबर बिझी झाले दोन-तीन दिवसांनी हा मुलगा परत आला. या वेळेस जास्त नातेवाईक आणि त्याचा गोंधळ अजूनच जास्त😟 "बाप रे! खूपच त्रास होतोय याला.." माझ्या मनात आलं.

आता काय करावं..?
मी लगेच रेसिडेंट डॉक्टरांना फोन केला. आजच्या डॉक्टर वेगळ्या होत्या. त्या दुसऱ्या इमर्जन्सी प्रोसिजर मध्ये व्यस्त होत्या. त्या बर्‍याच उशिरा आल्या. तोपर्यंत त्या पेशंटची आणि त्याला बघून माझी ही अवस्था जरा बिकट झाली होती😰
पण पेशंट लांबूनच पाहून त्या हळूच म्हणाल्या "त्याला कापसावर टाकून इथर चा वास द्या" त्याला मात्र सांगितलं की "औषध देतोय तुला हं" दोन मिनिटात तो मुलगा खडबडुन जागा झाला,उठून बसला😳
तो मुलगा हिस्टेरिया मुळे असं करत होता. त्याला मानसिक आजार होता. लक्ष वेधून घेण्यासाठी तो वारंवार तसं करत होता. त्याला थोडं समजावून सांगितलं आणि काउन्सिलिंग साठी रेफर करण्यात आलं. मला खूपच आश्चर्य वाटलं!! मी त्या मॅडमना विचारलं की कळलं कसं, मला कसं कळणार पेशंट खरं बोलतोय की नाटक करतोय!!!
त्या हसल्या आणि म्हणाल्या,
"अनुभवातून सगळे शिक्षण मिळेल" त्या दिवशी मी भयंकर अस्वस्थ होते की आपल्याला डिग्री तर मिळाली पण कळणार कसं की कोण खरे बोलतो आणि कोण खोटे😔
पण म्हणतात ना अनुभव हाच खरा शिक्षक...!!
अजुनही तो प्रसंग माझ्या मनात कोरला गेला आहे.🙂

आता इतक्या वर्षांनंतर कुठला आजार पूर्णपणे शारीरिक आहे आणि कुठे मानसिक आहे हे बर्‍यापैकी लक्षात येतात. पेशंटची बॉडी लँग्वेज सांगून जाते की नेमका त्रास काय आहे. त्यांचा चेहरा, डोळे, आवाज खूप काही बोलतात. मला कळून जातं की मला नेमकं काय बरं करायचं आहे.
मला अजून खूप शिकायचं आहे पण मला खात्री आहे की माझे रोजचे अनुभव नकळत मला खूप काही शिकवत आहेत, आणि माझ्यातली एक चांगली व्यक्ती, चांगली डॉक्टर यातून घडते आहे.😇







डॉ जुईली कुलकर्णी
श्री होमिओपॅथी क्लिनिक
रावेत, पुणे
97669 02124

16/05/2026

सस्नेह नमस्कार
मी पूजा कुलकर्णी रा.दिघी पुणे
मी मॅडम आपणाकडे माझ्या मुलाला म्हणजे शौनकला घेऊन आले ते खूप आजार घेऊनच तेव्हा त्याचे वय सहा वर्षे होते. त्याला खूप वेगवेगळे त्रास होते. पण मॅडम आपले मार्गदर्शन आणि औषध यामुळे खूपच फरक पडला. त्याला प्रत्येक महिन्यामध्ये एकदा ताप यायचा आणि तो असा असायचा की त्याचे अंगाचे टेंपरेचर 103,104 डिग्री असायचे आणि तो कंटिन्यू तीन ते चार दिवस असायचा पण मॅडम जेव्हापासून आपलं औषध चालू केलं तेव्हापासून त्याला या प्रकारचा ताप नाही आला. दुसरा त्रास म्हणजे डायजेशनचा जेवण करायचं नाही त्यामुळे त्याला संडास चा पण त्रास व्हायचा. हा त्रास तर त्याचा पूर्णपणे बरा झालाय.
तिसरा म्हणजे त्याला डोळ्याची एलर्जी आहे त्याचे डोळे धुळीमुळे लाल व्हायचे आणि बघायला खूप त्रास व्हायचा हा त्रास पण त्याचा दूर झालाय.
डायजेशनच्या त्रासामुळे त्याचे वजन पण खूप कमी होते. आता वजन पण खूप छान वाढले आहे.
तसेच एवढ्या लहान वयात त्याला ऍसिडिटीचा सुद्धा त्रास व्हायचा तो सुद्धा पूर्णपणे कमी झालाय.
या सर्व आजारांसाठी आम्हाला कंटिन्यू त्याला औषधी द्यावी लागायची. पण जेव्हापासून आपली होमिओपॅथीची औषध चालू केली तेव्हापासनं त्याला कुठलीच ऍलोपॅथी औषध द्यावयाची गरज भासली नाही.
आता मला तुमची औषधे सुरू करून एक वर्ष पूर्ण झाले आहे. आणि माझ्या मुलाच्या तब्येतीमध्ये 90% फरक पडला आहे.
त्यासाठी मॅडम आपले खूप खूप धन्यवाद.🙏🏻🙏🏻

15/05/2026

प्रत्येक केस हा एक वेगळा अनुभव असतो. प्रत्येक पेशंटची एक वेगळीच कहाणी असते. खरंतर डॉक्टरने कायम स्थिर राहायचं असतं, तरीसुद्धा प्रत्येक केस नुसार वेगवेगळ्या भावना मनात येतातच. कधी संताप येतो,😠 कधी रडू येतं😢 कधी हसायला येतं.😄 काही प्रसंग खूप दुःख😔 तर काही आनंद देतात😊. या सगळ्या भावनांना बाजूला सारून पेशंटची मदत करण्याकडे पूर्णपणे लक्ष द्यावं लागतं.☺️

मला माझं काम मनापासून आवडतं. मोकळेपणे बोलल्याने कितीतरी भावनांचा निचरा होऊन जातो आणि एक नव आयुष्य होमिओपॅथीमुळे मी माझ्या पेशंटना देऊ शकते.🌱

लताताई (नाव बदललेलं आहे) वय 60 वर्षे. लताताई माझ्या जुन्या पेशंट..
त्यांच्या कितीतरी तक्रारींना होमिओपॅथीने खूप छान फरक पडायचा.

कंबर ,डोकेदुखी, पित्त, निद्रानाश खोकला,थकवा, डायबेटीस अशा छोट्या-मोठ्या कितीतरी तक्रारींसाठी लताताई कायमच माझ्याकडून औषध मागवायच्या.

एक दिवस लताताईंच्या मुलीचा फोन आला," मॅडम आई जरा वेगळीच वाटते, वेगळीच वागतीये..
तुमची वेळ कळवा ना म्हणजे मी तिला घेऊन येते."
दिलेल्या वेळेला लताताईंची मुलगी त्यांना घेऊन आली.
लताताईंचा मुळातच स्वभाव थोडा रागीट होता. त्यांच्या मनाविरुद्ध वागलेलं त्यांना सहन व्हायचं नाही. त्यांच बोलणं एकदम रोखठोक होतं..🤨

त्यांची मुलगी त्यांना माझ्या कन्सल्टिंग रूममध्ये सोडून बाहेर जाऊन बसली आणि मी लताताईंशी गप्पा मारायला सुरू केली. लताताई सगळ्या जगावरच रागावलेल्या होत्या.. हिस्टेरिया सारख्या प्रकारचं त्यांचं वागण होत. सगळ्या लोकांबद्दल त्या वाईटच बोलत होत्या. त्यांची बॉडी लँग्वेज पण खूप ॲग्रेसिव्ह होती. एक प्रकारचा आक्रस्ताळेपणा त्यांच्या वागण्यात होता. त्यांच्या नवर्‍याबद्दल त्या खूपच वाईट बोलत होत्या. त्यांनी दिलेल्या शिव्या आणि इतर शब्द ऐकून मला धक्काच बसला. लताताई एका सुसंस्कृत कुटुंबातल्या व्यक्ती होत्या. त्यांच्याकडून अशा प्रकारची भाषा खूपच अनपेक्षित होती. त्यांचं ते वागणं बघून हसू येत होतं आणि त्यांच्यासाठी वाईटही वाटत होतं.
स्वतःचा कौतुक करत इतरांना शिव्या देणं चालू होतं.

त्यांच्या तरुणपणात त्यांच्याबरोबर खूप काही वाईट गोष्टी घडल्या होत्या. नातेवाईक खूप चुकीचे वागले होते. त्यांचं मन दुखावलं गेलं होतं, अन्याय झाला होता.

सततच्या आजारपणामुळे जास्त वेळ त्या अंथरुणावरच असायच्या. ते जुने दिवस आठवून तेच विचार सतत त्यांच्या मनात यायचे. ते त्रास दिलेले नातेवाईक दिसले की त्या खूप आक्रमक व्हायच्या, खूप वेळ बडबडत राहायच्या. त्यांच्या मनात कितीतरी गोष्टींबद्दल राग,द्वेष भरलेला होता.😡🤬

याशिवाय त्यांची ब्लड शुगर लेवल सुद्धा सतत जास्त असायची. त्यांची कंबर खूप दुखायची, पायावर सूज होती, नीट झोप लागायची नाही. सतत खोकला यायचा.😐

त्यांच्या मुलीशी पण मी त्यांच्या केस बद्दल सविस्तर चर्चा केली आणि घरात बाकीच्यांनी त्यांच्याशी कसं वागावं याबाबत काही सल्ले दिले.

त्यांच्या केसचा अभ्यास केल्यावर पुढील काही गोष्टी समोर आल्या. त्यांचा रागीट आणि रोखठोक दुसऱ्याचा चुका काढण्याचा स्वभाव, मनात असलेल्या जुन्या गोष्टींबद्दलचा राग, हट्टीपणा, इतरांवर अविश्वास किंवा संशयी वृत्ती, असंबद्ध बडबड, आक्रस्ताळेपणा, मीपणा, सतत तक्रारीचा सूर आणि अतिशय वाईट पद्धतीची भाषा.😠😣

त्यांचा हा स्वभाव आणि त्यांच्या शारीरिक तक्रारी या सगळ्या गोष्टींचा विचार करून योग्य होमिओपॅथिक औषधाचे काही डोस लताताईंना दिले.🙂

पुढच्या काही दिवसातच दिलेल्या औषधांचा परिणाम दिसू लागला. लताताई बऱ्याच शांत झाल्या. त्यांचा आक्रस्ताळेपणा करणं, असंबद्ध बडबड करणं खूप कमी झाले. त्या शांतपणे बोलू लागल्या. त्यांच्या आवडत्या देवांच्या पोथी ग्रंथ वाचनात मन रमवू लागल्या. नातेवाईकांशी न चिडता बोलू लागल्या. छोट्या छोट्या गोष्टींवर चिडणं, रडणं कमी झालं.😊

त्यांचा सतत असणारा खोकला कंबरदुखी , निद्रानाश,थकवा आणि इतर शारीरिक तक्रारींमध्येही उत्तम फरक पडला. त्यांची ब्लड शुगर लेवल सुद्धा नॉर्मल राहू लागली.🙂

काही महिन्याच्या नियमित होमिओपॅथिक उपचारानंतर लताताई या आजारातून पूर्णपणे बऱ्या झाल्या.😇

लक्षात घ्या होमिओपॅथीने कुठल्याही व्यक्तीचा स्वभाव पूर्णपणे बदलत नाही, पण स्वभावातल्या ज्या गोष्टीचा अतिरेक झाला आहे ज्यांनी Dis ease म्हणजेच जगण्यातली सहजता नष्ट झालेली आहे त्या बदलायला, ती गोष्ट कमी करायला होमिओपॅथी मदत करते.

योग्य होमिओपॅथिक औषधोपचारानंतर सकारात्मकतेने आयुष्य जगायला मदत मिळते.
😀😇






डॉ जुईली कुलकर्णी
श्री होमिओपॅथिक क्लिनिक
रावेत पुणे
9766902124
9890702341

11/05/2026

📢 *CLINIC NOTICE*

This is to inform all patients that due to my foot surgery scheduled on *26th May 2026*, I will not be available for *offline consultations* at the clinic from *25th May to 25th June 2026*.

✅ *Online consultations* (by appointment only) will begin from *2nd June 2026*.

🕘 The clinic will remain open on regular timings till *24th May 2026*.

We regret the inconvenience caused and appreciate your understanding and support.

*Regards,*
*Dr. Juily Kulkarni*
Shri Homoeopathic Clinic, Ravet

📞 To book your appointment please contact: *97669 02124*

09/05/2026

09/05/2026

त्यादिवशी सुषमा जेंव्हा माझ्या दवाखान्यात आली, खूपच वैतागली होती. तिच्या कडेवर तिची एक दीड वर्षाची मुलगी स्पृहा होती.
" काय झाल?" असं विचारताच रडकुंडीला आलेली सुषमा म्हणाली,
" या स्पृहाने अगदी वैतागून सोडले बघ! एक मिनिट तिला खाली ठेवायची सोय नाही, सतत किरकिर- चिडचिड!!! मला सोडून कोणाकडे जात नाही, मनाविरुद्ध झालं की अशी भयंकर रडते, ऐकवत नाही..😠
नीट खात पित सुद्धा नाही. चालता येत आहे चांगलं तिला, तरी माझ्या कडेवरच बसून राहायचं आहे.
साधं टॉयलेटमध्ये जाणं पण अवघड झालय ग" 😢
छोट्या मुलांचा बद्दल हे संवाद बऱ्यापैकी ऐकले जातात नाही का? तुमच्या आजूबाजूला पण अशी एखादी स्पृहा किंवा सर्वेश नक्की असेल.
"आता असतात काही काही मुलं हट्टी थोडा पेशन्स ठेवा"
"फेज आहे, होईल कमी!!" पासून ते "तुम्हाला मुलांना नीट सांभाळताच येत नाही" असं काहीही लोक बोलत राहतात.
पण खरंच असतं का असं प्रत्येक वेळी???
मुलांच्या वाढीच्या वेगवेगळया अवस्था, टप्पे असतात. त्यात मुलं वेगळी वेगळी पण कधीकधी खूपच त्रासदायक वागतात.

कधी इतकी त्रासदायक वागतात की आई-वडिलांना स्वतःच्या मुलांचा तिटकारा वाटायला लागतो.

मग यावर काहीच उपाय नाही का?

तर नक्कीच आहे 😊

होमिओपॅथी आणि योग्य प्रकारचं समुपदेशन अशा मुलांना आणि त्यांच्या पालकांना मदत करणारे ठरू शकते.

त्यांच्या अशा वागण्यामागचे कारण शोधणे ही तितकेच आवश्यक आहे. बर्‍याचदा त्यामागे अटेन्शन सिकिंग किंवा लक्ष वेधून घेणे असू शकते. मग का त्यांना लक्ष वेधून घ्यायचं आहे, यामध्ये घरातलं वातावरण ही समजून घेण आवश्यक असतं.
कधीकधी घरातील वादावादी मुलांसमोर होत असते. आई वडील कामात जास्त वेळ गुंतलेले राहत असतात.
कधी मुलांना खूप लाडवल्यानी ती अशी वागतात.
कधी काही दुखत असल्याने अशी वागतात.
एखादी भीती देखील यामागे असू शकते.
यामागची मुलांची मनस्थिती लक्षात आली आणि घरचं वातावरण लक्षात आलं की पुढील उपचार सोपे होतात.

ही फक्त काही उदाहरणे आहेत. या पलीकडेही बरीच कारणं मुलांच्या अशा वागण्यामागे असू शकतात.

स्पृहाच्या केसचा व्यवस्थित अभ्यास करून तिला योग्य होमिओपॅथिक औषध दिलं गेलं.
दात येत असल्याने तिचं वागणं बदललं होतं. काही दिवसातच दिलेल्या औषधांचे योग्य परिणाम दिसून आले. स्पृहाची चिडचिड कमी झाली. ती मोकळी खेळायला लागली, हसायला लागली आणि त्याच बरोबर तिची आई सुषमा पण आनंदी झाली.







डॉ जुईली कुलकर्णी
MD Homoeopath
श्री होमिओपॅथिक क्लिनिक रावेत
9766902124

07/05/2026

एक दिवशी सकाळी सकाळी एक आजी माझ्या दवाखान्यात आल्या. 70 ते 80 च्या दरम्यान त्यांचे वय असावं. अतिशय कृश अशक्त अशा त्या आजी कशा तरी चालत तिथपर्यंत पोहोचल्या होत्या.
"लेकरा, मला अजिबात बरं वाटत नाहीये. माझी मदत कर." त्या म्हणाल्या.
त्यांना चक्कर येत होती, अशक्तपणा होता. त्यांची तपासणी केल्यावर लक्षात आलं की त्यांचं बीपी खूप कमी होतं. लवकर उपचार केले नाही तर त्यांची तब्येत अजून बिघडली असती आणि त्यांना ऍडमिट करावा लागलं असतं. त्यांच्याकडे पुरेसे पैसे पण नव्हते. त्यांना योग्य होमिओपॅथिक औषधाचे काही डोस दिले. खाण्या पिण्या बाबत सूचना दिल्या आणि संध्याकाळी परत यायला सांगितले.

थोड्या वेळानी त्यांचा नातू तिथे आला त्यांनी माझे पैसे दिले आणि त्यांना मी आजींची काळजी कशी घ्यायची याबद्दल सूचना दिल्या.
त्या संध्याकाळी आजी काही आल्याच नाहीत.

आपण जेव्हा एखाद्या डॉक्टर कडून ट्रीटमेंट घेतो तेव्हा त्या डॉक्टरला तुम्हाला बरं वाटलं का नाही जे काही आहे ते कळवणे आवश्यक असतं. त्याचा डॉक्टरांना आणि तुम्हालापण फायदाच होतो पण बऱ्याचदा रुग्ण डॉक्टरला काहीही कळवत नाहीत.
असो तर दोन दिवसांनी त्या आजी मला भेटायला आल्या. त्यांना दुसऱ्या दिवशीच बरं वाटलं होतं त्यामुळे त्या नातवाच्या मागे बाईकवर बसून आळंदीला जाऊन आल्या होत्या.🤦🏻‍♀️
त्यांनी माझ्या डोक्यावरून हात फिरवला, माझे आभार मानत त्या म्हणाल्या,
"लेकरा, गुण आहे बघ तुझ्या हाताला!!"😊




डॉ. जुईली कुलकर्णी
श्री होमिओपॅथी क्लिनिक, रावेत, पुणे
9766902124

05/05/2026

नवीन क्लिनिक सुरू केल्यावर लोकांचा डॉक्टरवर विश्वास बसायला वेळच लागतो....🙏🏻🙂

आजचा हा अनुभव जो मी शेअर करते आहे, तो रावेत मध्ये प्रॅक्टिस सुरू केल्यानंतरच्या पहिल्या आठवड्यातला आहे.😊
हैदराबादला माझ्याकडे पेशंट कमी होते पण लोकं डॉक्टर म्हणून आदराने वागत होते.....
तसं इथे मात्र मला अजून स्वतःला सिद्ध करायचं होतं.

तर लक्ष्मीबाई( नाव बदललेलं आहे) त्यादिवशी माझ्या क्लिनिकमध्ये आल्या. वय 40-45 च्या दरम्यान असावं🙂

लक्ष्मीबाई जवळच कुठेतरी राहत होत्या. उन्हाळ्याचे दिवस होते. सकाळी दहा-अकरा वाजता त्या माझ्याकडे आल्या. लक्ष्मीबाईंच्या दोन्ही हातावर खूप खाज सुटत होती आणि भयंकर आग होत होती.😐 उन्हात गेल्यावर त्यांचा त्रास वाढत होता. त्या जागी खाजवल्यावर पुरळ येत होतं. त्यांचं कधी कधी डोकं दुखायचं आणि त्यांच्या चेहऱ्यावर सूज देखील होती.

मी लक्ष्मीबाईंना तपासलं आणि त्यांच्या लक्षणांनुसार योग्य होमिओपॅथिक औषध दिलं.
एक आठवड्याने त्यांना परत दाखवायला या असं सांगितलं.
त्यांची एकंदर परिस्थिती बघून मी त्यांना शंभर रुपये फीस सांगितली.

मग मात्र त्या माझ्यावर भयंकर चिडल्या.😡 "तुम्ही तर सुई पण नाही लावली तरी एवढे पैसे घेता का?"
माझ्यासाठी हा आश्चर्याचा धक्का होता. 😨

पण तरी मी त्यांना समजावून सांगितलं की मी तुम्हाला तपासलं आणि औषधे दिलेत, त्याचे हे पैसे आहेत. तसे माझे चार्जेस जास्त आहेत पण मी तुमच्याकडून कमीच घेतले आहेत.
तरी त्या थोड्या नाराजच होऊन पैसे देऊन तिथून निघून गेल्या.😐😥

माझं क्लिनिक नवीन असलं तरी लोकांसाठी क्लिनिकच्या समोरची मोकळी जागा जुनीच होती. संध्याकाळच्या वेळेला आजूबाजूचे बरेच लोक तिथे असंच येऊन बसायचे. त्यातच शॉप मालक जे होते त्यांच्या आई सुद्धा तिथे येऊन बसायच्या. या काकू स्वभावाने खूप छान होत्या. बाहेर इतके सगळे लोक असल्याने, मला थोडं awkward वाटायचं तरी मी आपलं माझं माझं काम करत बसायचे.😅

लक्ष्मीबाई सकाळी येऊन गेल्यानंतर संध्याकाळी मी रोजच्या वेळेला क्लिनिक उघडले

बर सकाळी औषध घेऊन गेलेल्या या लक्ष्मीबाई संध्याकाळी माझ्याकडे बोट दाखवत या काकूंना म्हणाल्या," कसल्या डॉक्टर आहेत या सुई लावली नाही तरी शंभर रुपये घेतले आणि मला काहीच फरक नाही अजून.."
काकूंनी त्यांना विचारलं, "कधी औषध घेतले तुम्ही?"
"आज सकाळीच"
लक्ष्मीबाई म्हणाल्या.

"अहो आजच औषध घेतलेत ना मग थोडासा धीर धरा. दोन-तीन दिवसात पडेल फरक तुम्हाला" काकू म्हणाल्या.

मी तिथेच बसलेले, माझ्यासमोरच हा सगळा संवाद चालू होता.🫣

मला तर खूप टेन्शन आलं होतं. तरी मी गप्प बसले. मी दिलेलं औषध बरोबर आहे, याची मला खात्री होती.🙂

दुसऱ्या दिवशी संध्याकाळी लक्ष्मीबाई त्यांचा हात दाखवत आल्या म्हणल्या, "मला आता बरं वाटतंय. खाज आणि आग पुष्कळ कमी झाली. चेहऱ्यावरची सूजही उतरली.
तुम्ही बरोबर सांगत होता सुई शिवाय पण फरक पडतो."

त्यानंतर मात्र लक्ष्मीबाईंचा माझ्यावर विश्वास बसला. त्या त्यांच्या तक्रारींसाठी तर येतच राहिल्या याशिवाय त्यांच्या ओळखीतले बरेच लोक माझ्याकडे उपचारासाठी यायला लागले. 😊😇





डॉ. जुईली कुलकर्णी
श्री होमिओपॅथिक क्लिनिक
रावेत
9766902124

30/04/2026

आपल्या प्रत्येकालाच कसले ना कसले नवीन अनुभव येत असतात.
असेच माझ्या क्लिनिकच्या प्रवासातले काही खास अनुभव मी कायमच सगळ्यांबरोबर शेअर करत असते.
गेले काही दिवस झाले रावेतच्या क्लिनिक मधले सुरुवातीचे काही अनुभव मी सगळ्यांबरोबर शेअर करते आहे.

त्यातलाच हा एक वेगळा अनुभव....

मी जेंव्हा रावेतच क्लिनिक चालू केलं, ती एक छोटीशी जागा होती. आजूबाजूला छोटी छोटी दुकानं आणि घर होती.जवळ एकच मोठी सोसायटी होती,क्लिनिकला जाण्यासाठी एक कच्चा रस्ता होता आणि रस्त्याच्या पलीकडे शेती होती...🌱

सुरुवातीच्या दिवसांमध्ये शटर उघडलं की क्लिनिक ओपनच असायचं, तिथे दरवाजा लावणं किंवा ग्लास पार्टिशन बसवणं त्या वेळेला तरी मला शक्य नव्हतं.😅

तर रावेतमध्ये क्लिनिक सुरू केल्याचा हा पहिलाच दिवस होता. बाहेर नुसताच बोर्ड लागला होता सामान अजून लागत होतं...🙂

मी आत सामान लावत असताना त्याच वेळेला एक जोरात आवाज आला. मी बाहेर गेले तर एक काकू जोर जोरात आरडा ओरडा करत होत्या...😨
विचार करा हा माझा पहिलाच दिवस होता. हैदराबादला चालणार चांगलं क्लिनिक बंद करून मी रावेतला आले होते. माझ्या मनातही भीती आणि शंका होतीच त्याचवेळी हा आवाज😥

मी बाहेर गेले. अत्यंत घाणेरडे तोंड करत त्या काकू मला म्हणल्या," का हो ?का दवाखाना चालू करता आहात इथे तुम्ही ?"

मी एकदम भांबावून गेले😰
कोण आहेत तरी कोण या काकू😒
"अहो इथे कुठलाच व्यवसाय नीट चालू शकत नाही...
इथले आजूबाजूचे लोक कंजूस आहेत, पैसे देत नाहीत ते आणि आदराने वागतही नाहीत कोणाशीच😡 इथे तुमचा दवाखाना चालणं अशक्य गोष्ट आहे. बंद करा इथे चालणारच नाही".😠😡

त्यांची चौकशी केल्यावर मला कळालं की त्या जवळच क्लासेस घेतात.

मी घाबरले होते पण तरी शांतपणे मी त्यांना म्हणाले, "अहो मी यापूर्वीसुद्धा दीड वर्ष हैदराबादसारख्या ठिकाणी क्लिनिक चालवलं आहे.
कुठलाही बिजनेस करायचा तर त्याला सेट व्हायला वेळच लागतो. वाट बघायची माझी तयारी आहे. स्वतःवर, होमिओपॅथीवर विश्वास आहे. मी नक्कीच यशस्वी होईन.🙂
तुम्ही पण प्रयत्न करा तुमचे क्लासेस नक्कीच चांगले चालतील." ते चांगलेच चालावे यासाठी मी त्यांना शुभेच्छा दिल्या...🙏🏻🙂
मग जोरजोरात आरडाओरडा करणाऱ्या त्या काकू माझ्याकडे सहानुभूतीने बघत निघून गेल्या🥺

अशा वेळेला स्वतःला शांत ठेवणं सोपं नसतं. त्यानंतर सुद्धा काही छोट्या कुरबुरी घडल्या. पण मी वाद घालण्यात वेळ घालवला नाही.

बऱ्याचदा पुढे का घडेल हे आपल्याला माहिती नसते. आपण फक्त प्रामाणिकपणे आपलं काम करायचं असतं.
काही दिवसांनी त्यांच्या तब्येतीच्या तक्रारीसाठी त्या माझ्याकडे उपचार घेण्यासाठी यायला लागल्या..
त्यांच्या आत्तापर्यंतच्या भेटीमध्ये त्यांच्या स्वभावाचा अंदाज मला आलाच होता. त्यांच्यावर उपचार करणं त्यामुळे मला जरा सोपं गेले😅
नंतर छोट्या मोठ्या तक्रारींसाठी कायमच त्यांनी माझ्याकडून होमिओपॅथिक ट्रीटमेंट घेतली आणि अर्थातच त्यांना त्याच्याने खूप छान फायदा झाला

जो प्रयत्न करतो तो नक्कीच यशस्वी होतो. मी शांतपणे माझं काम करत राहिले. माझ्या चिकाटीवर, होमिओपॅथीच्या प्रॅक्टिस वर त्या काकूंचाही विश्वास बसला.😀😇




डॉ. जुईली कुलकर्णी
श्री होमिओपॅथिक क्लिनिक रावेत
97669 02124