24/04/2026
जागतिक ग्रंथदिन स्क्रीन टाईम टू ग्रीन टाईम हा मूलमंत्र घेऊन साजरा
सोलापूर : जागतिक ग्रंथदिनानिमित्त शेठ गोविंदजी रावजी आयुर्वेद महाविद्यालयात विविध उपक्रमांच्या माध्यमातून हा दिवस उत्साहात साजरा करण्यात आला.
यावेळी ग्रंथ प्रदर्शन तसेच ग्रंथ विवेचनाचा कार्यक्रम आयोजित करण्यात आला होता.
कार्यक्रमाच्या निमित्ताने महाविद्यालयाच्या ग्रंथालयात विविध विषयांवरील संदर्भग्रंथ, आयुर्वेद विषयक पुस्तके, मूळ संहिता ग्रंथ, मॉडर्न पुस्तके, संशोधनपर उपयुक्त ग्रंथांचे आकर्षक प्रदर्शन मांडण्यात आले होते.
या कार्यक्रमाच्या उद्घाटनपर भाषणात उपप्राचार्य डॉ. शांतीनाथ बागेवाडी यांनी विद्यार्थ्यांना मार्गदर्शन करताना “स्क्रीन टू ग्रीन” ही संकल्पना मांडली. त्यांनी सांगितले की, आजच्या डिजिटल युगात मोबाईल, टीव्ही व इतर इलेक्ट्रॉनिक साधनांचा वापर मोठ्या प्रमाणावर वाढला आहे. त्यामुळे विद्यार्थ्यांचा स्क्रीन टाइम वाढत असून त्याचा परिणाम डोळ्यांच्या आरोग्यावर व एकाग्रतेवर होत आहे.
यासाठी “स्क्रीन टू ग्रीन” म्हणजेच स्क्रीनपासून दूर जाऊन पुस्तकांच्या सहवासात वेळ घालवणे आवश्यक आहे, असे त्यांनी स्पष्ट केले. दररोज नियमित वाचन केल्यास ज्ञान वाढते, विचारांची दिशा सकारात्मक होते आणि व्यक्तिमत्त्व विकासास मदत होते.
विद्यार्थ्यांनी ग्रंथांचे वाचन करण्याची सवय लावून घ्यावी, ग्रंथालयाचा अधिकाधिक उपयोग करावा आणि स्क्रीन टाइम कमी करून वाचनाकडे वळावे, असा मौलिक मूलमंत्र त्यांनी आपल्या मनोगतातून दिला.
यावेळी व्यासपीठावर डॉ. अविनाश चव्हाण, डॉ. विवेक चांदुरकर, डॉ. आनंद मादगुंडी, डॉ. सविता चौगुले, ग्रंथपाल महावीर लाळे, डॉ. सीमा शहा, डॉ. स्नेहल धायफुले यांची प्रमुख उपस्थिती होती.
यावेळी समृद्धी देसाई या विद्यार्थिनीने औषधी गुणधर्म शास्त्र, अपूर्वा धोंडलकर हिने प्रेरणादायी व्यक्तिमत्व असणाऱ्या लेडी डॉक्टर्स, प्रथमेश पाटील यांनी अग्नी कर्म व विद्धकर्म या ग्रंथाचे मार्मिक विवेचन सादर केले.
जागतिक ग्रंथदिनाचे व वाचनाचे महत्त्व यशराज तातेड यांनी आपल्या भाषणातून विशद करून तंत्रज्ञान हे आपल्याला माहिती देते तर पुस्तके हे आपल्याला ज्ञान देतात याबद्दल माहिती सांगितली.
कार्यक्रमाच्या प्रास्ताविकात ग्रंथपाल महावीर लाळे यांनी या कार्यक्रमा मागील उद्देश व रूपरेषा सांगून वाचनाने होणारे फायदे, वाचन संस्कृती जोपासण्यासाठी ग्रंथालया मार्फत राबवित असलेले विविध उपक्रमांची माहिती करून दिली.
यावेळी प्रत्येक महिन्याला ग्रंथालयाच्या वतीने बेस्ट टॉप टेन ग्रंथालय वाचक निवडले जातात त्यातील दिनेश जैन व कोमल साजणे या विद्यार्थ्यांना ग्रंथरूपी बक्षीस देऊन मान्यवरांच्या हस्ते गौरविण्यात आले.
या कार्यक्रमाची सुरुवात दिव्याणी महाजन हिच्या सुमधुर आवाजात नमोकार महामंत्र व धन्वंतरी स्तवनाने झाली.
या कार्यक्रमाचे सूत्रसंचालन सूर्यांक जैन यांनी तर आभार प्रदर्शन ऋतुजा पाटील हिने केले.
या कार्यक्रमासाठी धीरज जैन, श्रुती गोयल, सुजल संघवई, पारस दोशी, अनिश जैन, छवी जैन आदी विद्यार्थ्यांनी परिश्रम घेतले.
यावेळी विद्यार्थी व प्राध्यापकांनी या प्रदर्शनाला उत्स्फूर्त प्रतिसाद देत ग्रंथसंपदेची पाहणी केली.
या कार्यक्रमाच्या आयोजनासाठी महाविद्यालयाच्या प्राचार्या डॉ. वीणा जावळे, प्रशासकीय अधिकारी श्री अनुप दोशी, डॉ गायत्री देशपांडे, विद्यार्थी कल्याण मंडळ यांचे मार्गदर्शन व सहकार्य लाभले.
