Zhianawa Cancer Center سەنتەری ژیانەوە بۆ چارەسەری شێرپەنجە

15/04/2026

بەردەوامی خزمەت و چارەسەر لە ڕۆژانی پشوو لە سەنتەری ژیانەوە.
١٥/٠٤/٢٠٢٦

21/03/2026

ئاگادارییەک لە سەنتەری ژیانەوەوە
​پێتان ڕادەگەیەنین؛ لە سبەینێوە ٢٢ / ٣، ئەو نەخۆشە ئازیزانەی لە ماوەی وەرگرتنی چارەسەریدان، پێویستە سەردانی سەنتەر بکەن. پرۆسەی چارەسەرییەکان وەک خۆی ڕۆژانە بەردەوام دەبێت.
بەهیوای شیفا

21/03/2026

جەژنی نەورۆز و جەژنی ڕەمەزان لە گەلی کوردستان و نەخۆشانی ئازیزمان پیرۆز بێت.
​سەنتەری ژیانەوە، هیوای تەندروستییەکی باش و ژیانێکی پڕ لە ئارامی بۆ هەمووان دەخوازێت. هەمیشە شاد و جەژنتان پیرۆز بێت.

10/03/2026

سەرەڕای پشووی فەرمیی تەواوی دامودەزگاکانی حکومەتی هەرێمی کوردستان، (سەنتەری ژیانەوە بۆ چارەسەری شێرپەنجە بە تیشک) لە ڕۆژانی چوارشەممە و پێنجشەممەدا لە پێشکەشکردنی خزمەتگوزاری بە نەخۆشە ئازیزەکان بەردەوام دەبێت؛ ئەمەش لەپێناو ڕێگریگرتن لە هەر دابڕانێک لە پڕۆسەی چارەسەری و کەمکردنەوەی کاریگەرییە نەرێنییەکان.
​خوای گەورە کوردستان بپارێزێت و شیفا و تەندروستی بۆ هەموو نەخۆشەکانمان بنێرێت.

17/02/2026

🌙 ڕەمەزانتان پیرۆز بێت
​بۆنەی هاتنەوەی مانگی پیرۆزی ڕەمەزان، گەرمترین پیرۆزبایی ئاراستەی هەموو موسڵمانان و بەتایبەت نەخۆشە ئازیزەکانمان دەکەین.
​لە خوای گەورە داواکارین ئەم مانگە ببێتە مایەی خێر و بەرەکەت و چاکبوونەوەیەکی خێرا بۆ هەموو ئەو ئازیزانەی کە لە سەنتەرەکەمان و لە هەر شوێنێکی تر لە جەنگی چاکبوونەوەدان.
​ئێمە لە سەنتەری ژیانەوە، لەم مانگە پیرۆزەشدا بەردەوامین لە کار و خزمەتکردنی نەخۆشەکانمان بۆ گەڕاندنەوەی هیوا و تەندروستی بۆ ئێوە.
​ڕەمەزانتان پیرۆز و هەر ساغ و سەلامەت بن.

15/02/2026

بۆ ١٥ی ٢، ڕۆژی جیهانیی شێرپەنجەی منداڵان و مێردمنداڵان
شێرپەنجەی منداڵان تەنیا نەخۆشییەک نییە؛ گەشتێکە پڕ لە ئازایەتی، گەشتێک کە نە خۆت و نە خێزانەکەت پلانتان بۆ دانەناوە... لە عەدەمەوە بلیتێکی گەشت بۆ کوێ؟ تا کەی؟ کێ هاوسەفەرت دەبێت؟
هەر منداڵێک کە ڕووبەڕووی شێرپەنجە دەبێتەوە، ئازایەتییەک پیشان دەدات کە هەموومان سەرسام دەکات. ئەوان بەرگەی چەندین بینینی پزیشک و پەرستار و بەرگی سپی دەگرن، چیتر نەترسان لە دەرزی، زنجیرەیەکی دوورودرێژ لە پشکنین، چارەسەر و شەو و ڕۆژانی درێژی نەخۆشخانە دەگرن، بە هێزێک کە زۆرجار تێگەیشتنی ئەستەمە و بە توانایەک کە لە تەمەنیان زیاترە. بێ ئەوەی خۆیان بزانن یان درکی پێ بکەن، فێرمان دەکەن چۆن ئێمەش بەردەوام بین و چۆن بەهێز بمێنینەوە.
ڕاستە منداڵێک تووشی شێرپەنجە دەبێت، بەڵام شێرپەنجەکە تەنیا یەک منداڵ ناگرێتەوە، بەڵکوو دەچێتە ناو هەموو ماڵەکەوە.
دایکێک ترسێکی نهێنی لە دڵیدا هەڵدەگرێت، بەڵام هەوڵ دەدات بەهێز بێت، ئاخر ئەو ڕووگەیەکە کە خۆشی و ناخۆشیی خێزانی پێ دەپێورێت. باوکێک لەنێوان هیوا و بەرپرسیارێتییەکاندا هاوسەنگی دەپارێزێت؛ خەندەی هەموو هەستانەوەیەکی پاش کەوتنێک، وانەیەکە بۆ هەموو خێزانەکە. برا و خوشکەکانی زووتر و خێراتر لە پێویست گەورە دەبن، فێری ئارامی و قوربانیدان دەبن، چیتر وەک جاران خەو و خۆراک و چوونەدەرەوەیان ویست و کات بە تەنیا دیاری ناکات. باپیر و داپیر، خزم و دۆست و هاوڕێ؛ بازنەیەکی گەورەتر و بەرپرسیارێتیی هەر یەکە و بە جۆرێک لەم گەشتەدا ڕۆڵی خۆی ئەگێڕێت.
شێرپەنجەی منداڵان نەخۆشییەکی خێزانییە. وەک کۆمەڵگە، وەڵامدانەوەمان زۆر گرنگە؛ دڵسۆزی گرنگە، پشتگیرییە ڕاستەوخۆکان پێویستن. ژەمێک خواردن، مامەڵەیەکی مرۆیانەی بەڕێوەبەر و سەرکار بۆ باوانی منداڵەکە، پەیامێکی دڵنەواز، یارمەتیی دارایی، ڕێگەدان بە منداڵ بۆ بەشداری لە قوتابخانە کاتێک دەتوانێت، دروستکردنی تیمی لێپرسینەوە و هەواڵزانین و پشتگیری، نامەیەک، خولەکێک لە دەنگێکی دۆستانەت؛ هەر هەنگاوێک بیسەلمێنێت تۆ تەنیا بینەر نیت، گرنگ و پێویستە…
وەک پزیشکێک یان کارمەندێکی تەندروستی کە لە بواری شێرپەنجەدا خزمەت دەکەین، بەرپرسیارێتیمان زیاترە لە تەنیا پلانی چارەسەر و بەدواداچوون. ڕاستە ئێمە بۆ چاکبوونەوە دەجەنگین... بەڵام بۆ بەخشینی ژیانێکی باش لەڕووی چۆنێتییەوە خۆمان ساز دەکەین. ئامانجمان تەنیا نەهێشتنی نەخۆشییەکە نییە، بەڵکوو پاراستنی گەشە، فێربوون، کەرامەت و بەخشینەوەی داهاتوویانە.
ئامانجمان تەنیا مانەوەیان نییە بۆ ژیان، بەڵکوو ئامانجمان ئەوەیە منداڵێکی بەهێز، فێربوو و پشتگیریکراو بگەڕێنینەوە بۆ ناو کۆمەڵگە؛ مرۆڤێکی بەرهەمهێن کە بتوانێت بەشدار بێت، داهێنەر بێت و هیوابەخش بێت؛ نموونەیەک بێت خەڵکی چاوی لێ بکەن.
لە پشت هەر منداڵێکی چاکبووەوە، خێزانێک هەیە کە هەرگیز هیوا لەدەست نادات. لە پشت هەر پلانی چارەسەرێکەوە، تیمێک هەیە کە کۆڵنەدان ئامانجێتی و لەپاڵ زانستەکەیدا چاودێرێک (رقیب) بەسەر خۆیەوە دادەنێت تا دڵسۆزانەتر بجەنگێت.
کۆمەڵگەیەک دروست دەکەین کە بەخشین، کۆمەک، دەستگیرۆیی و خەمی دەستەجەمعی بونیادیان دەکات
با بیرمان بێت: کاتێک پشتگیریی منداڵێک دەکەین کە شێرپەنجەیەکی هەیە، پشتگیریی هەموو خێزانەکە دەکەین. و کاتێک منداڵێک چاک دەکەینەوە، داهاتووی هەموو کۆمەڵگەکەمان بەهێز دەکەین.
ئامارە جیهانییەکان پێمان دەڵێن کە ٨٠-٨٥ لە سەدی ئەوانەی بەشداریی ئەم جەنگە دەکەن سەردەکەون... دەبن بە پاڵەوان …
بە هیوای تەندروستیی باش بۆ منداڵانی هەموومان و چاکبوونەوەی نەخۆشەکانمان و چاوڕوونی و دڵئارامی بۆ باوانیان

15/02/2026

لە ساڵی ٢٠٢٥دا، کۆمەڵەی ئەورووپی بۆ نەخۆشیی شێرپەنجە لە بەرلین کۆمەڵێک توێژینەوەی نوێ و گرنگی بڵاوکردەوە. لە هەمان کاتدا بڕیاردرا بۆ یەکەم جار باشترینی ئەم توێژینەوانە دووبارە بکرێنەوە لەژێر ناوی لیڤانت، کە ئاماژەیە بۆ وڵاتانی (سووریا، شانشینی ئەردەن، میسر، لوبنان، فەڵەستین و تورکیا).
​دوای وەرگرتنی ڕەزامەندی بۆ ئەنجامدانەوەی ئەم کۆنفرانسە، کۆمەڵەی عێراقی بۆ شێرپەنجە شاری سلێمانیی هەڵبژارد بۆ لەئامێزگرتنی ئەم چالاکییە زانستییە.
سوپاس بۆ خودا پاش دوو ڕۆژی چڕوپڕ، سەرکەوتووانە چالاکییەکە کۆتایی پێ هات.
بە خۆشحاڵییەوە پزیشکانی سەنتەرەکەمان وەک لیژنەی ئامادەکار، بەڕێوەبردنی سێشنە زانستییەکان و پێشکەشکردنی بابەت، نوێنەرایەتیی ژیانەوەیان کرد.
بەو ئومێدەی هەموو چالاکییەکی نوێی زانستی، هەنگاوێکی تر بێت بۆ بەرزکردنەوەی ئاستی چاکبوونەوەی نەخۆشەکانمان و نزیکبوونەوەمان لە ئامارە جیهانییەکان.

12/02/2026

🌹 چرۆیەک لە میهرەبانی: دیارییەکانی "میلان تاڵەبانی" بۆ منداڵانی ژیانەوە
​لە پەیامێکی پڕ لە جوانی و هیوا، منداڵی چاوگەش "میلان ئالان تاڵەبانی" بە دڵێکی پڕ لە خۆشەویستییەوە، کۆمەڵێک دیاری قەشەنگ و نایابی پێشکەش بە منداڵانی چاوەڕێی چارەسەر لە سەنتەری ژیانەوە کرد.
​🌟 ئامانجی ئەم کارە جوانە:
​بەخشینی زەردەخەنە: گۆڕینی کەشی سەنتەرەکە بۆ شوێنێکی پڕ لە شادی بۆ منداڵان.
​پشتیوانی دەروونی: نیشاندانی ئەوەی کە ئەم منداڵە ئازایانە بە تەنیا نین لە ململانێی نەخۆشیدا.
​چاندنی تۆوی بەخشین: میلان وەک نموونەیەکی جوانی منداڵی کورد، پەیامی هاوکاری و مرۆیی گەیاندە هەمووان.
​"هیچ شتێک لەوە جوانتر نییە کە منداڵێک، هیوایەک بداتە هاوتەمەنەکانی خۆی."
​دەستخۆشی بۆ میلان گیان و خێزانە بەڕێزەکەی بۆ پەروەردەکردنی ئەم ڕۆحە بەرزە. هیوای چاکبوونەوەی خێرا بۆ هەموو منداڵانی سەنتەری ژیانەوە دەخوازین.

12/02/2026

سوپاس و پێزانین
​ڕێکخراوی لاوانی سۆشیال دیموکراتی کورد سەردانی «سەنتەری ژیانەوە»ی کرد؛ لەگەڵ کۆمپانیای دەرمانی LOTUS بە هەماهەنگی، بڕێک دەرمانیان گەیاندە دەستمان. هەروەها کار و خزمەتکردنی پزیشکان و کارمەندانیان بەرز نرخاند و لەپای ئەو خزمەتە، چەپکەگوڵ و سوپاس و پێزانینیان گەیاندە سەنتەری ژیانەوە.

03/02/2026

٤ی شوبات
​ڕۆژی جیهانیی شێرپەنجە
​ئەمە تەنیا یەک ڕۆژ نییە لە ڕۆژژمێری بەرەنگاربوونەوەی شێرپەنجەدا، بەڵکوو هەوڵدانە بۆ کۆکردنەوەی تواناکان؛ لە تاکەوە بۆ ڕێکخراو و دەسەڵاتی حوکمڕان و گشت کۆمەڵگە. تووشبووانی نەخۆشیی شێرپەنجە مرۆڤگەلێکی بەهێز و بەئیرادەن و پێویستییان بە هاوکاریی هەمووانە.
​بە هەموومان پێکەوە دەتوانین ئاستەنگەکان ببڕین و ڕێگاکانی ڕێگریکردن لە تووشبوون، یاخود زوو دەستنیشانکردن بەهێز بکەین. پێکەوە شێرپەنجە ببەزێنین و مرۆڤێکی تەندروست بە خێزان و کۆمەڵگە ببەخشینەوە.
​شێرپەنجە تەنیا کاریگەریی جەستەیی لەسەر کەسی تووشبوو دروست ناکات، بەڵکوو کاریگەریی دەروونی، هزری، دارایی و کۆمەڵایەتیی دەبێت. بۆ شکاندنی ئەم بەربەست و کاریگەریانە پێویستمان بە یەکترە و پێکەوە بەهێزترین.
​هەموو داتا جیهانییەکان ئاماژە بۆ زیادبوونی ڕێژەی تووشبوون دەکەن، بەڵام هاوتەریب ڕێژەی چاکبوونەوە لە هەڵکشاندایە. ماوەیەک لەمەوبەر لێرەوە و بە داتا نیشانی جیهانمان دا، کە ڕێژەی چاکبوونەوە بۆ نموونە لە شێرپەنجەی مەمکدا لە سلێمانی، هاوتای داتاکانی ئەمریکا و ڕۆژئاوایە.
​بەهیوای لەشساغی و سەلامەتی بۆ هەمووان.

11/01/2026

ئامار و چارەسەریەکانی ساڵی ڕابردوو لە سەنتەری ژیانەوە، داواکارین لە خوای گەورە شیفای هەموو نەخۆشانی شێرپەنجە بدات.

ساڵی ڕابردوو زیاتر لە 26 هەزار ژەمە تیشك بۆ تووشبووانی شێرپەنجە لە سەنتەری ژیانەوە ئەنجامدراوە ..

بەپێی ئاماری بەڕێوبەرایەتی گشتی تەندروستی سلێمانی لە ماوەی ساڵی ڕابردوو 2,505 نەخۆش سەردانی سەنتەری ژیانەوە بۆ چارەسەری شێرپەنجە بە تیشك یان كردووە و چارەسەری پێویست بۆ 1,210 نەخۆش کراوە.
ئەو كەسانەی ساڵی ڕابردوو سەردانی سەنتەری ژیانەوەیان كردووە 1,040 یان لە ڕەگەزی نێر بوون و 1,465 یان لە ڕەگەزی مێ بوون و هەروەها 1,862 نەخۆش خەڵكی سلێمانی و هەڵەبجە بوون و 643 نەخۆش خەڵكی شارەكانی تری هەرێمی كوردستان و عێراق بوون.
هاوكات ساڵی ڕابردوو لە سەنتەری ژیانەوە بۆ چارەسەری شێرپەنجە بە تیشك 26,238 ژەمە تیشك بۆ تووشبووانی شێرپەنجە كراوە، پشكنینی سیتی سكان بۆ 2,780 نەخۆش كراوە و 62 نەخۆش چارەسەری ناوەكیان وەرگرتووە.

07/01/2026

نەخۆشخانەی هیوا
بەناوی سەرجەم پزیشک و کارمەندانی سەنتەری ژیانەوە پیرۆزباییەکی گەرمی خۆمان ئاراستەی بەڕێوەبەر و سەرجەم پزیشک و کارمەندانی نەخۆشخانەی هیوا دەکەین لەدوای هەلبژاردنیان وەکو باشترین نەخۆشخانە.
هیوادارین دەست لە ناو دەست بتوانین زیاتر ئاستی خزمەتگوزاری بۆ تووشبوانی شێرپەنجە لە پارێزگای سلێمانی و سەرجەم کوردستان و عێراق بەرەوپێش بەرین و بتوانین ببینە ساڕێژ بۆ چارەخوازانی خۆشەویستمان.
دووبارە پیرۆزتان بێت و هەر سەرکەوتوو بن.

https://www.facebook.com/share/1GRNRjvHvJ/