Dr.Zanyar Aghal-د.زانیار ئاغال

07/04/2026

سوپاس بۆ بەڕێزان لە تەندرووستی کە ئەم ئاگاداریان بڵاوکردەوە لەسەر کرمی جگەر.

ئەوەبوو پێش ماوەیەک لەم پەیجەوە هۆشداریم بڵاوکردەوە لەسەر ئەم نەخۆشییە کە زۆرێک لە خەڵکی خۆمان هەر نەیان بیستبوو و بێ ئاگاش بوون لە مەترسی خواردنی کوزەڵە.

لینکی پۆستکەی ئێمە: https://www.facebook.com/share/p/1Fvh2V2Yk2/?mibextid=wwXIfr

05/04/2026

هەوکردنی میزەڵدان و میزەڕۆ

دوو خاڵ گرنگە لە بیرتان بێت:

۱ـ لە کچ و ژناندا، گەر هەوکردنەکە کێشەی دیکەی لەگەڵ نەبێت، باشترە دەرمانی دژە میکرۆب تەنها بۆ سێ ڕۆژ بەکار بێت نەک زیاتر.

۲ـ لە پیاواندا، گەر هیچ کێشەیەکیشی نەبێت، باشترە پشکنینی زیاتر بکرێت بۆ دۆزینەوەی هۆکار.

بۆ؟
لە ژناندا، بە هۆی کورتی ڕێڕەوی میزەڕۆ و هەندێک هۆکاری دیکە، ئاساییە جار جار و هەوکردنی میزەڵدان بگرن بە مەرجێک کێشەی دیکەیان لەگەڵ نەبێت.

لە پیاواندا، هەوکردنی میزەڵدان دەگمەنە، کە ڕوویدا ئەبێت پشکنین بکرێت هەتا نەوەک هۆکارێک هەبێت لە پشتی تووش بوون بەو هەوکردنە.

31/03/2026

اثار العادات الغذائیة علی صحة القولون.

29/03/2026

دەرزی شەکر (ئینسولین) ە نوێیەکە:
هەواڵەکان باس لە درووست کردنی جۆرێکی نوێی ئینسولین دەکەن کە هەفتەی یەک جار بەکار دەهێنرێت.

واتە ئەم دەرزی شەکرەیە پێوویست ناکات هەموو ڕۆژێک بەکار بهێنرێت وەکو ئەوانەی ئێستا لەبەردەستن و تەنها هەفتانە بەکار دێت.

بەمەش نەخۆش کەمتر دەرزی لە خۆی دەدات و دەریش کەوتووە کەمتر تووشی شەکر هاڕە کردن دەبێت.

بەڵام ئەم ئینسولینە نوێیە بەو شێوەیە نییە کە دەوترێت بە یەک جار شەکرەت ناهێڵێت.

لەوە زیاتر و دڵخۆشکەر، ئەوەیە کە تیایەتی درووست کراوە ئینسولینەکە تێکەڵە لەگەڵ دەرمانی (ئۆزەمپیک) بەمەش دوو قات سوودی هەیە بۆ چارەسەری نەخۆشیی شەکرە.

ئەم دەرمانانە تا ئێستا هەمووی بەردەست نین لە ڕۆژئاوا و لە سەرەتادان و بە ئەگەری زۆر تا کۆتایی ئەم ساڵ دەکەونە بازاڕەوە لەوێ!.

بەو هیوایەی لای خۆشمان بەردەست بکرێت و نرخیان گونجاو بێت، نەک ئەوەندە گران بن کە نەخۆشیی خۆمان نەتوانن بیکڕن.

26/03/2026

الحمدلله
ئەمڕۆ بە فەرمی نازناوی بوون بە هاوەڵی فیدراسیۆنی یەکێتی ئەوروپام وەرگرت.

نازناوەکە بۆ پزیشکانی هەناوییە کە فیدراسیۆنێکی تایبەتییان هەیە لە ئەوروپا.

بە داخەوە، بەهۆی ئەم شەڕەی کە ناوچەکەی گرتۆتەوە و نەبوونی ڕێگای ئاسمانیی نەمتوانی بەشدار‌بم لە کۆنفراسەکەدا، کە لە شاری ڤییەنای پایتەختی نەمسا ساز کرابوو، هەرچەندە ناوم لەوێ‌دانرابوو لە مەراسیمەکە.

هاوپیشە عەرەبە ئێراقییەکانم وێنەی ناوەکەم و شەهادەکەیان بۆ ناردم، کە بۆینباخ و نیشانەی تایبەتی فیدراسیۆنەکەشی لەگەڵ بووە.

خوای گەورە بیکاتە مایەی خزمەتی زیاتر بە نەخۆشەکانم و زانست بەخشینی زیاتر بە خوێندکارەکانم.

وەك یەکەم پزیشکی کورد لە ئێراق، کە ئەم نازناوەم وەرگرتووە، بە گوتەی ئەوروپییەکان خۆیان.

25/03/2026

قاچ ئاوسان بە حەبی فشاری خوێن (زەغت)

هەندێک لە دەرمانەکان کە حەبن و بۆ کۆنترۆڵ کردنی نەخۆشیی بەرزەفشاری خوێن (زەغت) بەکار دێت ئەم حاڵەتە درووست دەکەن

مەرج نییە هەموو قاچ ئاوساندنێک هۆکارەکەی ئەو حەبە بێت، بەڵکو وەکو هەموو حاڵەتێکی دیکە سەردانی پزیشک بکە هەتا بۆت یەکلا بکاتەوە.

حاڵەتی قاچ ئاوسان جگە لە حەب هۆکاری زۆر سادەی هەیە و هۆکای مەترسیداریشی هەیە وەکو سستی دڵ، بۆیە سەردانی پزیشک گرنگە

خودی قاچ ئاوسانەکە خۆی مەترسیدار نیە کاتێک بە هۆی حەبەوە بێت، زۆرجار نەخۆش ئەمە بە هەڵە تێ گەشتووە و ترسێنراوە.

22/03/2026

کەم خوێنی بە هۆی کەمی ئاسن

ماددەی ئاسن یەکێکە لە سەرەکیترین ماددە لە ناو پێکهاتەی خڕۆکە سوورەکان، بەمەش ماددەیەکی گرنگە بۆ ڕاگرتنی ئاستی خوێن لە جەستەدا.

ئەوەی گرنگە تۆ بیزانیت:
۱ـ مەرج نییە هەموو کەم خوێنیەک هی کەمی ئاسن بێت، گرنگە پزیشک ببینیت هەتا بۆت یەکلا بکاتەوە هۆکارەکەی چییە. دەیان هۆکاری دیکە هەن بۆ کەم خوێنی، هەیانە نەخۆشی ئاسانن، هەشە مەتسیدارە لەسەر ژیان.

۲ـ کەمی ئاسن سێ هۆکاری سەرەکی هەیە:
کەم خواردنی ماددەی ئاسن لە ناو خۆراکدا
لێ چوونی زیادەی خوێن بە هۆی سووڕی مانگانە یان هەر خوێن بەربوونێکی دیکە
کەم هەڵمژینی ئاسن لە ڕیخۆڵەدا

۳ـ خۆراکە تێرەکان بە ئاسن بریتین لە گۆشتی سوور بە تایبەتی. چەوەندەر و مێووژ ئاسنی تێدا نییە بەو شێوەیە و زۆر خواردنیان زەرەری زیاترە.

٤ـ ئەوەی لە خۆراکدا دژی ئاسن بێت، چا و قاوەیە. چا خواردنەوەی زۆر تووشی کەم خوێنیت دەکات و زۆرجار بە خشکەیی دەیکات و نەخۆش هەستی پێ ناکات.

20/03/2026

19/03/2026

جەژنی ڕەمەزانتان لێ پیرۆز بێت.

خوای گەورە پاداشتی پەرستش و ڕۆژوو گرتنی هەمووان بداتەوە.

ئەم جەژنە ببێت بە مایەی خێر و دڵخۆشی و شیفا هاتنی هەمووان و نەخۆشەکانمان.

ئینشاللە، ڕێکەوتی ۲٤ ی ۳ دەوامی کلینیکمان دەست پێ دەکاتەوە.

16/03/2026

پزیشکی پایە بڵندی هەناویی بووم، بەدەر لە دەوامی فەرمی خۆم کە بە سەروو زیادەوە دەمان کرد، ووتیان ئەبێت هەفتەیەک دەوامی نەخۆشخانەی هەڵەبجە بکەن.

یەکەم ناو من بووم. لە سەرەتادا بابەتەکە ناخۆش بوو بۆم، چوونکە خۆم ماڵم لە سلێمانی بوو، پلانی مانگانەی خۆمم دانابوو بۆ خوێندنەوە و نەخۆش بینین چوونکە ئەو کاتە خوێندکاری بۆرد (دکتۆرا) بووم.

یەک دوو هاوڕێش بە تەنزەوە پێیان دەوتم دەورە بشتنێرن بۆ هەڵەبجە، خەڵکەکەی هەمووی بە نازن و داواکارییان زۆرە و هەرگیز ددانی خێر بە دکتۆردا نانێن لە کاتێکدا بە خۆڕایی دەوامیش دەکەین.

دوو پزیشک بووین، لە ڕێگا یەکێکیان پەشیمان بووە وە، ووتی دەوامەکە خۆی نافەرمییە و دۆخی ئەوێش ئاوا بێت ئەوە من ناچم.

لەگەڵ شۆفێری نەخۆشخانەی هەڵەبجە کە هاتبوو بە شوێنماندا هەر ڕۆشتم. بۆ دەوامی ناوچەی دیکەش ئەو قسانە دەووترا، هەرگیز گوێم نەداوە پێی.

بە پێچەوانەوە، ئەو هەفتەیە، یەکێک بوو لە هەفتە خۆشەکانی دەوام کردنم وەکو پزیشکی پایە بڵند. خەڵکەکەی ئەسڵەن زۆر بە ئینساف و تێگەشتوو و بەڕێزیش بوون.

لەکۆتایی هەفتەکە، چووم بۆ دەستبەرداربوون (ئینفیکاک) لە دەوامەکە، بەڕێوبەری ئەو کاتەی تەندرووستی (کاک دکتۆر عادل) ووتی حەز ئەکەم بمێنیتەوە زیاتر و ووتویانە دڵخۆش بوویت لە دەوامەکە.

هەموو کات ووتومە، میلەت نییە بە قەدەر کورد دڵ پاک بێت. خەڵکی هەڵەبجەی خۆشەویست سەرپای ئەو کارەساتە گەورەیەی بەسەریاندا هات و بەو یادەوەری بریندارەکان و منداڵی بە جێ ماو و خاپوور بوونی شارێک بەو شێوەیە، بەڵام هەستانەوە سەرپێی خۆیان و هەموو کاتێک ڕەفتاری جوانم لێ بینیوون.

خوای گەورە هەموو کوردستان بە دوور بگرێت لە ناخۆشیی.

15/03/2026

کرمی فاشیۆلا

کە خوێدکار بووم لە کۆلێژی پزیشکی و بۆ یەکەم جار ناوی ئەم کرمەم بیست کە تووشی مرۆڤ دەبێت، وام زانی مامۆستاکەم ئەڵێت کرمی فاسۆلیا!

دوواتر بۆم دەرکەوت هەر من نەبوم، زۆرێک لەهاوڕێکانیشم هەروایان زانیبوو.

نەخۆشێکی بەڕێز لە ماوەی ڕابردوو سەردانی کردین بە تا و لەرز و بەرزبوونەوەی ئەنزیمەکانی جگەر. سۆنار بۆی کرابوو کە هەوکردنێکی زۆری جگەری تیابوو.

پاش هەڵسەنگاندن و پشکنینی زیاتر، دەرکەوت تووش بووە بە کرمی فاشیۆلا.

ئەم کرمە تووشی جگەری مرۆڤ دەبێت، لە ئەنجامی خواردنی سەوزەی نەشۆراوە بە تایبەت کوزەڵە.

کرمەکە وەکو لە وێنەکەدا دیارە بەچکەکەی خۆی دەگرێت لە ناو جگەری مرۆڤ و هەوکردنی درووست دەکات.

الحمدللە، بە هۆی چارەسەر و کۆڵ نەدانی نەخۆشەکەش لە بە دوواداچوون لە پاش هەفتەیەک بە تەواوی چاک بووەوە.

لە هەموو نەخۆشییەکدا، گرنگترین هەنگاو بۆ چارەسەر، دەستنیشان کردنە، پاشان ئامادەبوونی نەخۆش بۆ بە دوواداچوون.

12/03/2026

ڕۆژی جیهانیی نەخۆشییەکانی گورچیلەیە

نەخۆشییەکانی گورچیلە فرەجۆرن، بەڵام لە هەموویان گرنگتر سست بوونی گورچیلەیە، لە نێو ئەمانەش، سست بوونی گورچیلە بە هۆی نەخۆشیی شەکرەوە هەرە گرنگیانە.

لە سەدا چلی نەخۆشانی شەکرە تووشی سست بوونی گورچیلە دەبن. ئەم ژمارەیە زۆر زۆرە، لە کاتێکدا دەکرێت ڕێی پێ بگیرێت.

نەخۆشیی شەکرە بە چەند شێوەیەک لە گورچیلە دەدات، هەرە باوەکەی بە داخەوە بە خشکەییە و نەخۆش هیچ هەستی پێ ناکات هەتا دەگاتە ئاستێکی خراپ لە گورچیلە سست بوون.

هەموو جارێک ووتومانە، چارەسەری نەخۆشیی شەکرە هەر دابەزاندنی شەکرە و کۆنترۆڵکردنی شەکرەی سێ مانگیی نییە، بەڵکو پاکێجێکە کە کۆنترۆڵی شەکری خوێن تەنها سەرەتاکەیەتی.

خوای گەورە هەمووان سەلامەت بکات.