عيادة الدكتور حيدر محمد العامري التخصصية-Haidar Alameri Speciality clinic

16/12/2025

15/12/2025

شكد تفرح من تشوف مراجعة السكر عدها من النوع الاول وصارله ١٧ سنة
طولها ماشاء الله شوية وتصير بطولك
الشبكية مثل الورد
الاعصاب مثل الورد
الكلى مثل الورد
الشرايين والقلب مثل الورد
وفوكاها صارلها حافز من صار بيها السكر وصارت صيدلانية 🙏🙏
هذا مثال لكل اهالي والمصابين بالسكر
تكدر تعيش حياتك مثل الورد

14/12/2025

13/12/2025

11/12/2025

التوصيات الجديدة 2026 للعناية بالسكري
الحمد لله
الي متابع الفديوات الموجودة بالصفحة يدرك ان احنا ماشين بهاي التعليمات حتى قبل صدورها 🙏🙏🙏

فما يخص بتوجيه العلاج نحو وقاية القلب والكلى والاعصاب والشرايين 💪🏻💪🏻

وحتى باعتماد time in range لمن يتمكن من استخدام الsensor

وهاي ميزة حصر شغلك باتجاه واحد وفكرة جعل العيادة مختصة بالسكر والضغط والسمنة ومقاومة الانسولين

للحصول على افضل خدمة تضاهي افضل مراكز العالم
ولله الحمد والمنة

10/12/2025

05/12/2025

مبروك للفائز الاول كارت ٢٥
ولان المنافسة جانت محتدمة هدية للفائز الثاني كارت ١٠

ولا نزعل احد ولا يهمكم

منشور مؤقت

منافسة محتدمة بالتعليقات

اليوم المغرب تنتهي المسابقة ان شاء الله

05/12/2025

٨ اعوام 🙏🙏
و-١٨ كيلو🤣

03/12/2025

قبل يومين ماكدرت انام من وقت
حاولت انام بكل الطرق مافاد
سبحان الله من جان عندي امتحانات انام على الكتاب وبدون مخدة او فراش
لا وجنت البس نظارة والكاها الصبح طابعة على وجهي 🤣
ومن اريد انام يطير النوم🥲
المهم نمت مااعرف شوكت بس الي اعرفه ان الموبايل انهجم ورة ساعتين من النومة 🥶🥶
كلت ياستار ياحافظ خاف صار شي
من رفعته
" دكتور اني جانت اموري عالعلاج زينة هسة شو كام يصعد السكر ؟
كتله انطيني اسمك واخر وصفة
طلعت بشهر الثالث ب ٢٠٢٤!!!

وراها ضليت كاعد وتريكت وبدا اليوم
بعدين الحمد لله صارلي مجال انام بين الظهر ووقت العيادة
احزروا شصار ؟؟؟
صديقي حرك الموبايل عليه
ومن رفعته كال" دكتور اني جنت ماشي على نظام الاكل الي اتفقنا عليه وهسة قررت اخذ. مونجارو اغير شي بيه لو نفسه؟
😭😭

بالله هاي مكدور عليها
قبل فترة راسلني مريض ( دكتور معدتي توجعني قبل فترة تحسن الالم وهسة رجع ممكن ترسلي العلاج )
اني مرات احاول اسهل الامور واخاف لا يكول عليه مادي فالي اكدر اساعد بيه اسويه فدزيتله اسم احدث عنصر من عائلة مشهورة من علاجات المعدة ….

ورة شهر تراسلني وحدة دكتور علاجك الي كاتبه لمريضنا بالموبايل سوى عنده تلف بالصمام !!!!

منو مريضكم ؟ ووين اكو علاج هيج يسوي؟!!!

طلع الجماعة ورة شهر مكتشفين المريض عنده خلل بالشرايين ( ولادي) وحسب حجيهم طبيب طكة عطية كايللهم هذا العلاج هيج يسوي !!!

ومن طالبت باسمه وهددت اشتكي عليه بالقانون والنقابة لغو الموضوع بس تخيلو حجم المشكلة الي رادت تصير !!!!!


وعليه قانون جديد ومو بس لان لازم ارتاح حتى اكدر اخدم المريض لا والله
لان المريض تتغير حالته خلال ايام
واحنه بشر وممكن باي لحظة ننصاب بشي لا سامح الله خطر
اذا طمنتك او انطيتك علاج مو صح راح ادخل بخطيتك …..

القانون الجديد يكول ( للمريض الحق بزيارات مجانية لحد ما نسيطر على حالته طبعا وله الحق بالاتصال او ارسال رسالة في الحالات الطارئة حصراً مرفقة بصورة اخر وصفة وخلال شهر من اخر زيارة)

02/12/2025

قصة اليوم عبرة لازم الكل يعتبر منها ( مو شرط تغوش عينك)

اليوم دخل مريض عمرة بداية الاربعينات وسيم ومرتب

- دكتور اني مشغول وناجح بعملي وشوية هالفترة هملت السكر …
من ضمن الاسئلة الروتينية لمتابعة السكر سؤال عن المضاعفات ( عندك خدر او حرارة برجليك او ايديك؟ نظرك شلونه؟ وزنك شلون اموره)

- دكتور مااشكي من اي شي بس اني انشغلت ومااهتميت للسكر وهسة قررت اغير

التراكمي جان 7,7 وفحص القلب والكلى والاعصاب والشرايين جيد جداً
من وصلنا لفحص شبكية العين انصدمت …..

العين متاثرة جداً والحمد لله انا فحصناها لان جان ممكن نفقد البصر على شي تافه مثل نظام غذائي او تغيير علاج !!!

فيا اخوان مو شرط عينك تغوش او ادرارك يقل
الفحوصات الدورية للسكر ضرورية وتحمي كلى من غسل الكلى
وتحمي العين من عمليات او فقدان بصر !!

محد يكدر يحزر من يتاثر اول
العين لو الكلى لو العصب

بس نكدر بعون الله نحافظ عليها 🙏🙏🙏

02/12/2025

المراجعين الواعين رزق
وما يمر يوم اذا ما يخجلني رب العالمين بكرمه واشوف الناس شكد محترمة وشلون تفاجئك بهدايا و دعوات تطير التعب كله وتخلي يومك سعيد …

الحمد لله

01/12/2025

اهم طريقة للحفظ هي تقسيم وتجزئة المعلومات وضرب الامثلة للوصول لفهم المعلومة
قبل شوية طلع كدامي فديو جنت مسويه للطلاب بزمن حضر التحوال والدوام الالكتروني
قبل مااسوي الصفحة
ومن هنا انبثقت فكرة الصفحة للمرضى 🤝👏🙏
يمكن هالفديو ماراح يفيد المتابعين
بس اكيد راح يفيد طلاب الاسنان والصيدلة ولحد ما طلاب الطب العام
لان مركز عالاساسيات المهمة
اذا عدكم طلاب طب اسنان او صيدلة منشنوهم