29/04/2024
https://www.facebook.com/share/p/BXJUdnwyTS34Htky/?mibextid=oFDknk
دكتور ابني ضعيف اريد حليب زين يخلي ابني يصير مثل ابن اختي سمين ومدنفش وحلو
هاي الحجاية هواية اسمعها . وراها اني اسأل الام الاسئلة التالية :
ابنج مريض ؟ . لاء
ابنج مصخن ؟ . لاء
عندة كحة ؟ . لاء
عندة تقيؤ ؟ . لاء
عندة اسهال؟. لاء
يعني الطفل متعافي وما عندة اي مشكلة
شوفو يا عيني . الاخوان والخوات بنفس العائلة من نفس الام والاب مختلفين. واحد طويل واحد قصير واحد سمين واحد ضعيف واحد ابيض واحد اسمر
ليش هيجي مختلفين ؟
لان الام مو طابعة استنساخ تطلعلك نفس الطفل كل مرة .
زين اذا اب وام مختلفين من غير عائلة . طفلهم يشبه طفلكم ؟
القصد من هذا الكلام انه لا تقارنون اطفالكم بأطفال اخرين لان كل طفل عبارة عن دولة مستقلة مالة علاقة بالباقين حتى لو اخوانه من نفس العائلة .
اذا متعافي ويرضع وصحته زينة ابنكم سليم تماما وما يحتاج اي تغيير للحليب لغرض التسمين
زين دكتور شلون نتأكد ابننا متعافي وما بي مشكلة؟
هاي سهلة نقيس وزنه ونخلي على جداول خاصة بالنمو حسب عمره . اذا طلع ضمن الطبيعي هاهية . واذا لاء نبدي ندور عالسبب ونعالجه
ربي يحفظكم ويحفظ اطفالكم من كل سوء
دكتور صباح سلمان عبد
اختصاص (دكتوراه) بورد عربي في طب الاطفال والخدج وحديثي الولادة
مجمع النور الطبي حي الجهاد نهاية الشارع التجاري مقابل الكراج قرب صيدلية بريق الياقوت
متواجدين من السبت الى الخميس من الخامسة مساءا الى الثامنة مساءا
رقم الحجز والاستفسار 07702538923
