عيادة الدكتورة مهى منصور حسون أختصاص الامراض الباطنية

18/09/2022

السلام عليكم 🌸🌸
بعد انقطاع فترة نرجعلكم بموضوع جدا شائع وماكو احد ممصادفة الي هو (الصداع) 🤕
طبعا بالاول هو هالموضوع يخص اختصاص العصبية ومنريد نتعارض وياهم بس لان دتجينة حالات هواي على الصداع ف خلونة نعرف شنو الصداع...
المريض يجي يكول دكتورة راسي يوجعني جيكيلي الضغظ هاي الجملة الشهيرة الي كل المرضى يحبوها😌
طبعا هواي اكو اسباب للصداع وانواع الصداع منها الصداع الاولي:
الي هو الصداع النصفي او الصداع العنقودي او صداع التوتر او صداع الشقيقة
طبعا اكو عوامل وراثية تخلي بعض الناس اكثر عرضة للصداع من غيرهم
او الصداع الثانوي :
اسبابة التهاب الجيوب الحاد
تمدد الاوعية الدموية الحاد
ارتفاع الضغط
ورم الدماغ
التهاب الاذن
التهاب الدماغ
السحايا
السكتة الدماغية
مرات اكو صداع بسبب اخذ جرعات هواي من المسكنات الالم
مرات اذا تزيد او تنقص سوائل الدماغ هم تسبب صداع
🛑المختصر لازم نتأكد هذا الصداع شنو السبب مالتة
وارجع واكول مو كل صدااع هو سببه الضغط!!!
دمتم بصحة وعافية 🌸
دكتورة مهى منصور
أختصاص (دكتوراه_بورد) في الطب الباطني

29/08/2022

السلام عليكم 🌸
مراجعيني الكرام العيادة مغلقة بسبب الظرف الراهن وفرض حظر التجوال الشامل وأعتذر جدا عن استقبالكم لحين انتهاء الحظر...
تمنياتي بالصحة والامان للجميع

26/08/2022

السلام عليكم جمعتكم مباركة أن شاء الله🌸🌸
اليوم موضوعنا شائع جدآ (خفقان القلب) :
المريض بهاي الحالة يجيني يكول دكتورة عندي( خفقان) هنا كلمة خفقان هي مصطلح واسع وشامل ومرات المريض يكول دكتور عندي تسارع بنبض القلب!! ومرات المريض يوصف حالتة يكول نبضي عبارة عن ضربات قوية احس بيها!! تعالو خلي ناخذ فكرة شنو هو الخفقان...
هو الشعور بضربات سريعة او رفرفة.
ممكن يكون الخفقان بسيط وممكن يكون واحد من اعراض حالة قلبية خطرة مثل عدم انتضام ضربات القلب ويحتاج للعلاج
🛑الأسباب :
توتر او قلق، أكتئاب، ممارسة التمارين، المنشطات مثل الكافايين والنيكوتين، ادوية الزكام، السعال، الحمى، تغييرات هرمونية، أرتفاع هرمونات الغدة الدرقية
مشكلات القلب مثل عدم انتظام ضربات القلب او التعرض السابق لنوبة قلبية
**
ممكن الخفقان يكون مؤشر على وجود مشكلة خطيرة
🛑المضاعفات:
الأغماء
توقف القلب
السكتة الدماغية في حالة الرجفان الأذيني
عجز القلب
🛑التشخيص :
بواسطة التاريخ المرضي للمريض و الفحص السريري واجراء التحاليل اللازمة وتخطيط القلب وايكو القلب والمراقبة بأستخدام جهاز الهولتر
🛑العلاج:
الأهم هو علاج السبب المؤدي للخفقان مثل الاسباب ال ذكرناها بأول فقرة (التوتر والقلق والغدة الدرقية وغيرها...
وطبعا اكو علاجات لتنظيم ضربات القلب 💛
دمتم بصحة وعافية ♥️
د. مهى منصور حسون
اختصاص(دكتوراه_بورد) في الامراض الباطنية

19/08/2022

السلام عليكم جمعتكم مباركة أن شاء الله 🌸🌸
تأخرت عليكم اليوم بموضوعنا الي الناس تحبة كلش وتحب تعرف معلومات عليه لان ماكو عائلة تخلة منة موضوعناا هو أرتفاع ضغط الدم:
هو من الامراض الشائعة الي ممكن اتأدي الى مشاكل القلب والشرايين
🛑اعراضة: أغلب المرضى ماعدهم اعراض!!! تتخيلون😅
بعض المرضى يكون عدهم صداع، ضيق نفس، نزف الانف
**
1_اذا عمرك ١٨ سنة الاحسن كل سنتين تقيس ضغطك
2_اذا عمرك ١٨_٢٩سنة وكنت معرض للاصابة بارتفاع ضغط الدم هنا الاحسن قياس الضغط كل سنه.
🛑طبعا ٩٥٪ من الضغط مالة سبب هذا نسمي ضغط الدم المرتفع الأساسي
ارتفاع ضغط الدم الثانوي هنا لا يكون اكو اسباب مثل:
1_انقطاع نفس انسدادي النومي وهذا يصير بالمرضى الي يكون عدهم زيادة بالوزن
2_امراض كلى
3_امراض غدة كضرية
4_مشاكل الغدة الدرقية
5_ادوية تنضيم النسل ومسكنات الالم
🛑منو اكثر عرضة للأصابة؟
تقدم العمر
تاريخ عائلي بضغط الدم
زيادة الوزن
قلة النشاط
التدخين
كثرة الملح بالطعام
الكحول
نقص البوتاسيوم وامراض الكلى والسكر
🛑مضاعفاتة:النوبات القلبية، السكتة الدماغية، عجز القلب، عجز الكلى
دمتم بصحة وعافية 🌸🌸
د. مهى منصور حسون
أختصاص (دكتوراه_بورد) في الأمراض الباطنية

12/08/2022

السلام عليكم جمعتكم مباركة ان شاء الله🌸🌸
اليوم راح نتكلم عن مرض يمكن ماكو احد بينة مسامع بي!!
القرح الهضمية(Peptic ulcer) خليني اعرفكم ع هذا المرض وتصير عدكم فكرة عنة
هو قرح مفتوحة تصير بالغشاء المحيط للمعدة والامعاء الدقيقة عدي نوعين من هاي، القرح
1_ قرح تصير داخل المعدة
2_ قرح تصير بالاثني عشري
🛑اهم اسباب هاي القرح هي
1_عدوى H_pylori (هنا خل نذكر جهان قاسم من صارت بيها وكالت عدي هلكوبتر😥😅) هي نفسها الي يسموها جرثومة المعدة
2_الاستخدام طويل الامد للادوية غير الاستيرودية الي اقصد بيها هناا( مسكنات الالم) مثل النابروكسين والبروفين اكثر ادوية مسكن الشعب يستخدمة...
***اريد هنا انوه ع شي مهم هواي من الناس، فاهمين انه الاغذية الي تحتوي توابل كثيرة هية سبب الاصابة بالقرحة هية بالواقع لاتؤدي الى اصابة القرحة لكن تزيد من الاعراض مالتها!!!
🛑الاعراض:
الم المعدة او حرقة، شعور بالأمتلاء او الانتفاخ، غثيان، عدم تحمل الاغذية الدهنية، التقيؤ الدموي او اللون القهوائي، وجود دم بالبراز او براز لونة اسود، صعوبة تنفس، فقدان وزن، تغيرات بالشهية
**اذا كانت عندك اعراض مثل المذكور🖕يجب زيارة الطبيب
🛑عوامل الخطر: التدخين، الكحول
🛑مضاعفات القرحة اذا لم تعالج:
نزف، انسداد، سرطان المعدة
*وقاية
عدم استخدام مسكنات الالم وفي حالة احتاجيت مسكن الم يجب استخدام مضادات الحموضة
عدم شرب الكحول
التدخين
تناول الاطعمة المطهية بشكل كامل حتى تقل العدوى
🛑التشخيص:
من خلال التنظير الداخلي
🛑العلاج:
التنظير الداخلي(ناظور) او مضادات الحموضة والابتعاد عن المسببات ك الكحول والتدخين ومعالجة السمنة والاكل الصحي
دمتم بصحة وعافية 🍁🍁
د. مهى منصور حسون
أختصاص (دكتوراه_بورد) في الأمراض الباطنية

08/08/2022

تنويه.....
العيادة مغلقة يوم غد الثلاثاء بمناسبة أستشهاد الإمام الحسين عليه السلام
عظم الله لنا ولكم الاجر

05/08/2022

السلام عليكم جمعتكم مباركة ان شاء الله🌸🌸
موضوعنا اليوم موضوع شائع هم ويصادفنة هواي
(تورم القدمين او الوذمة)
التورم هذا يكون ناتج من السوائل المحتبسة في انسجة القدمين
🛑أسبابه:
1_ البقاء في وضعية واحدة مدة طويلة
2_ الافراط في الاطعمة المالحة
3_ ادوية معينة مثل ادوية الضغط او العقاقير غير الستيرودية، الاستيرويد، بعض ادوية السكر والاستروجين
🛑اكو حالات وامراض يكون تورم القدم هو علامة الهم مثل فشل القلب الاحتقاني
تليف الكبد
امراض الكلى
ضعف اوردة الساقين
عدم كفاءة الجهاز اللمفاوي
عوز البروتين
🛑مضاعفات تورم القدمين : ممكن يؤدي التورم بالقدمين الى حدوث مضاعفات مثل 1_الالم 2_صعوبة المشي 3_التعرض لخطر العدوى في القدم المتورمة 4_انخفاض الدورة الدموية 5_تقرح الجلد
🛑عند حدوث تورم في القدمين يجب على المريض مراجعة الطبيب المختص واجراء التحاليل الضرورية وفحوصات القلب وتحاليل وضائف الكلى وغيرها لمعرفة السبب واعطاء العلاج اللازم
دمتم بصحة وعافية 🍁🍁🍁
د. مهى منصور حسون
أختصاص(دكتوراه_بورد) في الامراض الباطنية

29/07/2022

السلام عليكم جمعتكم مباركة ان شاء الله 🌸
اليوم راح نحجي بموضوع مهم الي هو (الربو القصبي)
(asthma)
هو حالة تتضيق بيها الممرات الهوائية وتنتفخ مما يؤدي الى صعوبة التنفس وصوت صفير وضيق النفس
طبعا ممكن تكون اعراض بسيطة وممكن تكون الأعراض تؤدي الى مشاكل كبيرة ونوبات ربو شديدة
🛑الأعراض:
ضيق النفس والصدر وألم في الصدر وأزيز عند الزفير، نوبات سعال جاف ممكن تكون بسيطة وممكن تكون نوبات ضيق نفس شديدة تحتاج الدخول للمستشفى
طبعا علامات الربو ممكن تتفاقم في حالات معينة مثل
بعد ممارسة الرياضة او الربو الناتج عن العمل في مكان يحتوي على المهيجات مثل الابخرة، الغازات، الغبار
او ينتج من الحساسية من الحيوانات وغيرها
طبعا اسبابه ممكن (وراثية) وممكن (بيئية)
🛑منو يكون معرض أكثر للأصابة؟
اذا كان احد اقربائك مصاب بالربو
زيادة وزنك
اذا كنت مدخنا او تتعرض للدخان والمواد الكيميائية او اذا عندك حساسية الجد
🛑العلاج :اهم شي بالعلاج هو الابتعاد عن المسببات والمهيجات والغبار
ضرورة الالتزام بالعلاج الموصوف من قبل طبيبك والأهم هو تعلم استخدام العلاج بواسطة البخاخ
يجب على المصاب اخذ لقاح الانفلونزا السنوي ولقاح المكورات الرئوية مرة في العمر
مراجعة المستشفى في حالة نوبات ضيق النفس الشديدة التي لا تستجيب للعلاج المنزلي
🛑التشخيص: يتم عن طريق التاريخ المرضي وفحص المريض وفحص وضائف الرئة
طبعا الالتزام بالعلاج يقلل من النوبات ويجب المحافظة على وزن صحي و ممارسة الرياضة

دمتم بصحة وعافية🌸🌸
د. مهى منصور حسون
أختصاص(دكتوراه_بورد) في الأمراض الباطنية

28/07/2022

22/07/2022

السلام عليكم جمعة مباركة🌸
اليوم راح نحجي على موضوع كلش مهم وهواي نصادفة بحياتنة وهو (فرط نشاط الغدة الدرقية)Hyperthyroidism
🛑وهو مرض يصيب الغدة الدرقية ينتج عنه زيادة انتاج هرمون الثايروكسين(Thyroxine)
وطبعا زيادة الهرمون اكيد راح يؤدي الى العديد من المشاكل وتقريبا بكل انظمة الجسم
🛑اعراضه
نقص بالوزن وهالشي مو بسبب دايت او حمية يعني القصد المريض يجينة عندة فقدان بالوزن بدون ماهو مقلل بالاكل، يعني المريض يكول اني اكل بس دينزل وزني
طبعا ايضا المريض ممكن يعاني من الخفقان، زيادة الشهية، العصبية، الرعشة، صعوبة النوم، تساقط الشعر وغيرها من الأعراض الي من ضمنها ايضا جفاف وجحوظ العين واحمرارها
🛑عدنة بهذا المرض هواي عوامل خطورة (يعني منو يصير اكثر عرضة لهذا المرض )
1_ اذا عندك احد بالعائلة مصاب بهذا المرض
2_ اذا كنتي انثى
3_اذا عندك سكر من النوع الأول
🛑بما انه هرمونات الغدة تنظم جسمك اذآ زيادتها اكيد بيها مضاعفات مثل:
♦️امراض القلب، هشاشة العظم، مشاكل العين وايضا تورم الجلد
🛑يتم التشخيص بواسطة هرمونات الغدة الدرقية
وتصوير الغدة الدرقية
🍁🍁🍁🍁
اكو طرق عديدة للعلاج ممكن بواسطة الادوية المضادة للدرقية او اليود المشع وممكن تضمن جراحة الغدة الدرقية
🛑والشي الحلو طبعا انه الأستجابة للعلاج جيدة جدا
دمتم بصحة وعافية 🍁
د. مهى منصور حسون
أختصاص (دكتوراه_بورد) في الأمراض الباطنية

15/07/2022

السلام عليكم☘️
اليوم راح نتكلم عن مرض ال كوليرا Choleraلتعدد حالات الأسهال هذه الأيام وضرورة التمييز بين الأسهال الناتج عن الكوليرا واسباب الأسهال الاخرى
🛑الكوليرا :
هو مرض انتقالي يصيب كافة الاعمار والأجناس
ويكون اشد خطورة عند الاطفال وكبار السن..
🛑طرق أنتقال مرض الكوليرا
1_ الماء الملوث
2_ بواسطة الأشربة والأطعمة الملوثة مثل الفاكهة والخضر
🛑أعراض وعلامات مرض الكوليرا
تظهر الاعراض بعد ساعتين الى خمس أيام (٢٤ ساعة الى ٤٨)بعد تناول الطعام او الماء الملوث
أغلب حالات الكوليرا تكون عبارة عن اسهال بسيط او معتدل يصعب تفرقته عن الأسهال الناتج عن اي مشكلة صحية اخرى، بينما يصاب البعض بمؤشرات واعراض شديدة للكوليرا غالبا ماتظهر خلال عدة ايام من الاصابة بالعدوى
1_ أسهال مفاجئ شديد غير مصحوب بألم او مغص
2_ تقيؤ شديد غير مصحوب بالغثيان مع جفاف الفم
3_ الأسهال يكون اصفر اللون في بادء الامر ويحتوي على المواد البرازية ثم يتحول على شكل مائي يشبه ماء الرز
3_ فقدان المريض كميات كبيرة من السوائل والأملاح، ومن أعراض ال جفاف جفاف الفم، الارهاق، قلة التبول، انخفاض ضغط الدم واضطراب ضربات القلب ومن مضاعفات الجفاف الاكثر خطرا الصدمة حيث يحدث انخفاض شديد في ضغط الدم وأيضا من المضاعفات الخطيرة هو الفشل الكلوي
🛑التشخيص
يتم التشخيص بالأعتماد على التاريخ المرضي والفحص السريري والفحص المختبري للبراز (stool exam)
🛑الوقاية والسيطرة على مرض الكوليرا
1_ استعمال الماء المعقم للشرب واعداد الطعام
2_ في حالة عدم وجود الماء المعقم فيتم تعقيم الماء باحد الطرق التالية
_ بواسطة الغليان
_ اضافة حبوب التعقيم
_ التعقيم الشمسي
3_ غسل اليدين جيدا بالماء والصابون قبل اعداد الطعام وقبل تناوله وبعد استعمال المرافق الصحية
4_ عدم تناول الأطعمة من الباعة المتجولين
🛑🛑🛑
من الضروري مراجعة العيادات و المراكز الصحية في حالة الأصابة بالمرض (الأسهال المائي الشديد مع باقي الاعراض) وبدون تأخير لما فيه من خطر على حياة المريض
حيث يمكن علاج مايقارب نسبة ٨٠ بالمية من حالات الكوليرا عند استخدام املاح تعويض السوائل عن طريق الفم (محلول الأرواء) (ORS)
أما في حالة المرضى المصابين بالجفاف الشديد ف يتم عن طريق الحصول على السوائل بالحقن الوريدي وتناول المضادات الحيوية
دمتم بصحة وعافية☘️

د. مهى منصور حسون
أختصاص(دكتوراه_بورد) في الأمراض الباطنية