الدكتور علي ابراهيم إختصاص طب الأطفال وحديثي الولادة

29/06/2023

عيد أضحى مبارك و كل عام و انتم بألف خير..
كان لنا شرف مصاحبة منتخبنا الوطني المشارك في الألعاب العالمية للأولمبياد الخاصة في العاصمة الألمانية / برلين، حيث كنت طبيب المنتخب العراقي , و بفضل الله تمكنا من الحصول على ١٣ ميدالية ..مبروك لأبطال العراق..
نستأنف العمل في العيادة يوم الأحد القادم ٢ تموز ان شاء الله..

23/03/2023

رمضان مبارك و كل عام وأنتم بألف خير..
المراجعين الأعزاء، أوقات عمل العيادة في شهر رمضان من الساعة ٣ ونصف الى السادسة مساءً ، يوميًا عدا الجمعة..
يكون الدخول للطبيب حسب أسبقية الحضور..
للاستفسار الاتصال على رقم السكرتيرة
0772 528 0913
الدورة ، أبو دشير ، مجاور مطعم البغدادي، عمارة صيدلية محمد عبد الرحمن
د.علي ابراهيم البديري ، دكتوراه في طب الأطفال و حديثي الولادة و الخدج..

بغداد، الدورة، أبو دشير، الشارع العام، مجاور مأكولات البغدادي ، فوق صيدلية محمد عبد الرحمن
العيادة التخصصية لطب الأطفال و حديثي الولادة

28/12/2022

مراجعينا الأعزاء:
سوف تكون العيادة مفتوحة ان شاء الله يوم الجمعة من هذا الأسبوع فقط..
و تغلق يوم السبت بسبب ازدحامات الطرق التي تحصل ليلة رأس السنة..
على أن يستأنف الدوام يوم الأحد ١ /١ /٢٠٢٣..
دوام العيادة من ٤ والنصف الى ٨ والنصف مساء..
كل عام و أنتم بالف خير..
د.علي البديري
دكتوراه طب الأطفال
الدورة -أبو دشير-قرب مطعم البغدادي

18/11/2022

🌺🌺تنويه لمراجعينا الأعزاء🌺🌺
تعلن عيادة (الدكتور علي ابراهيم البديري)
بورد (دكتوراه) طب الأطفال و حديثي الولادة و الخدج..
عن جعل أجور الفحص (١٥ الف دينار)..
و ذلك تزامنًا مع الموجة الفايروسيه شديدة العدوى المنتشرة حاليًا بين أطفالنا و أبناءنا..
للحجز:
07725280913
دوام العيادة من ال ٤ ونصف لل ٨ ونصف مساء، يوميا عدا الجمعة..
(الدخول حسب أسبقية الحضور)
بغداد / أبو دشير/ مجمع الرحمن/ مجاور مطعم البغدادي

بغداد، الدورة، أبو دشير، الشارع العام، مجاور مأكولات البغدادي ، فوق صيدلية محمد عبد الرحمن
العيادة التخصصية لطب الأطفال و حديثي الولادة

16/01/2022

مساء الخير..
تريدين تحافظين على صحة ابنج، و تقللين إصابته بالامراض قد الإمكان..
انتبهي على هذه النقاط..
١-رضعي طبيعي و اعطي قطرات فيتامين دي من اول يوم و قطرات حديد من الشهر الرابع..

٢-اكو مشكلة تعيق الرضاعة الطبيعية، و ماكو حل غير الصناعي إذًا انتبهي على النقاط الآتية:
-اختاري نوع حليب جيدة قدر الإمكان ، تتناسب مع وضعكم و ميزانيتكم..
-حليب رقم ١ الى نهاية ال ٦ أشهر (١٨٠ يوم) ، رقم ٢ الى نهاية السنة، و ماكو حليب اكياس او فل او نيدو قبل السنة نهائيًا نهائيًا نهائيًا..
-كل المي يتفور، كل المي يتفور ، مهما كان نوعه ، المهم يغلي لدقيقة واحدة فقط (يعني من يبدي يبقبق)..
-شخصيا أفضل ماء الاطفال الي يحتوي على نسبة صوديوم قليلة وهم يتفور لان مثل ما گلنا 👆كل المي يتفور..
-أجزاء الممة تنغسل زين و تتفور، وأي شخص عنده امكانية يشتري معقمة ممات فضروري يشتري لان جدا مفيدة و صحية ، واذا سمعتي اكو ناس تريد تجيب فضل لو صوغة ، خل يجيبون معقمة ممات..
-ايضا اعطي فيتامين دي للطفل

٣-الرضاعة الطبيعية كانت سطر واحد فقط و تكلف قطرتين ما بيهن ١٥ الف دينار، شوفوا الصناعية كم نقطة 👆و شكد تكلف !! فنرجع و نكول رضعي طبيعي..

٤-لا تبدين بإطعام الطفل أكل صلب قبل اكمال ٤ شهر ، ١٢٠ يوم..

٥-لا تخلين ياهو الي يجي للبيت يحضن الطفل و يبوسه، الجو كله فايروسات من ما لذ و طاب ، و بوسه وحدة من شخص مصاب ممكن تسبب ذات الرئة للطفل..

٦-انتبهي على الاماكن الي يلعب و يزحف فيها الطفل، ماكو شي يجرح، ماكو شي ينبلع ،ماكو درج قريب ، ماكو طفل ثاني اكبر منه يركض و يلعب قريب منه و ممكن يدوس علي و يأذي..و لا تخلون طفل يشيل طفل أبد، و كاتب بالصفحة قصة الطفله الي كانت تحملها اختها ام ال ٥ سنوات و فلتت من ايدها و وگعت وصار عدها نزيف دماغي..

٧-لا تخلين أحد يدخن او ينركل يم ابنج و بنتج..

٨-اللقاحات مواعيدها مقدسة، ماكو شي اسمه فات لقاح او نسينا لقاح او ما صار مجال ، إكمال جدول لقاح الطفل ما بي نقاش..

٩-الولد يتطهر (الختان) بأول شهر..
البنت تزرف اذنها بعد الشهر الرابع ( تكون مستلمة جرعتين من لقاح الكزاز)..

١٠-ماكو طفل يتفرج على شاشة (تلفزيون، موبايل ، ايباد) قبل عمر السنة و نص..
و بعدها ساعة واحدة في اليوم كحد أقصى..
حالات التوحد و تأخر النطق و الاضطرابات النفسية حاليا جدًا منتشرة عند الأطفال…

د.علي ابراهيم البديري
دكتوراه بورد عربي طب الأطفال
الدورة، أبو دشير ، مجاور مطعم البغدادي
‎0772 528 0913
رقم الحجز

12/01/2022

مساء الخير..
تكملة لمنشورات الأيام السابقة..
حقيقة لازم كلنا نعرفها..و نعمل بيها..

من غير الممكن أسيطر على حالة ربو ، حساسية قصبات او التهاب قصيبات ، وأخلي الطفل مرتاح و تنفسه زين و بدون گحة و ينام بهدوء و عندي بالبيت شغلة من هاي الشغلات:

١- جگارة تُدخن داخل البيت..
ماكو شي اسمه أدخن بغير غرفه، ذرات الجكارة تلتصق بالأثاث و الأقمشة و الستائر داخل البيت لمدة أشهر و يظل الطفل يتحسس منها..
الي يدخن لازم يطلع خارج البيت تماما..

٢-نرگيلة عادية او الكترونية او v**e كلها نفس الشي و حالها حال الجگارة..

٣-الصوبة النفطية ، جدًا سيئة و تأثر سلبًا على تنفس الطفل..
نحاول نشغل صوبه كهربائية و ندفي المكان الموجودين بي، أضعف الأيمان و عند الحالات القصوى و اذا البيت بارد و كهرباء ماكو و مو ممكن شوية نزيد الأمبيرية علمود الصوبة الكهربائية ، نستخدم فتيلة جديدة و نخلي الصوبة بمكان مفتوح، مو غرفة صغيرة..

٤-الباودر ، العطور، معطرات الجسم، معطرات الجو، البخور، الحرمل، الأتربة، الحيوانات، كلها تسوي تحسس و تخلي الطفل يگح و الصدر يخرخش..

من أكون ناطي بخاخات للطفل، و علاجات و قائية، و معالج التهاب الصدر، و معالج حساسية الانف و الاسترجاع اذا موجود، و كل هذا و الطفل بعده يگح و مو مرتاح فلازم نراجع النقاط ال ٤ الفوق 👆..
اذا أعطي كل علاجات الصيدلية و تظل أكو جكارة تشتعل داخل البيت و صوبة نفطية تدخن راح يظل الطفل مثل ما هو..

علاج الصدر مو بس ادوية، علاج الصدر بالسيطرة على الأوضاع في البيت..

د.علي ابراهيم البديري
دكتوراه بورد عربي طب الأطفال
الدورة، أبو دشير ، مجاور مطعم البغدادي
‎0772 528 0913
رقم الحجز

11/01/2022

مساء الخير ..
تكملة لمنشور البارحة و أول البارحة..
بعد ما تعرفنا البارحة على المنقذ الأول في هذه الأيام الفايروسية التحسسية..
هسه نتعرف على المنقذ الثاني..
وهو (القطرات الملحية، البخاخ الملحي)..

هو عبارة عن ماء و ملح، او ماء البحر ،(كلوريد الصوديوم)، و يكون معبأ على شكل قطرات او بخاخ صغير، وتستخدم لتنظيف الأنف..
ممكن ايضا استخدام المغذي الملحي و نسحب بسرنجة و ندفع في انف الطفل بصورة مائله في الجهتين، بحيث يطلع السائل من الجهة الأخرى، وهذه أفضل طريقة و أرخص طريقة، بس قليل من الأهل يفضلوها..

مراجعيني يعرفون ما عندي وصفة تخلى من البخاخ الملحي..
و شخصيا افضل القطرات الملحية جوه عمر الشهر..و فوق الشهر استخدم البخاخ الملحي لان دفعه أقوى و ينظف احسن..

من اكتب البخاخ الملحي لا تسألني دكتور شكد أظل علي..هذا مي وملح يسلك و ينظف خشم الطفل، نعطي شكد ما نريد و كل ما نحتاجه..يعني مو مادة كيميائية و لازم نستخدمها بجرعات محددة..

لازم نخلي في بالنا، نظرية البوري و المغسلة، البوري هو الخشم و المغسلة هي الصدر، مادام البوري يذب مي راح تظل المغسلة مليانه و تفيض، ومدام الخشم يذب سوائل و افرازات تنزل من الجانب الخلفي لأنف و عن طريق البلعوم الى الصدر ، فراح يظل الطفل يگح و صدره يخرخش..

سلكوا خشم الطفل زين بالماء الملحي..
لأن ماكو صدر نظيف اذا مو ويا خشم نظيف..
وماكو طفل مرتاح و يرضع و ينام و خشمه مسدود..
الرشح ممكن يطول ..وماكو فد علاج يوقفه تماما..بس الي لازم يصير هو الاستمرار بتنظيف الخشم و تسليكه حتى الشفاء التام..

**الصور لبعض من مرضانا لهذا اليوم الي كانوا حبابين و گدرنا نصورهم، أتمنالهم الشفاء العاجل…

د.علي ابراهيم البديري
دكتوراه بورد عربي طب الأطفال
الدورة، أبو دشير ، مجاور مطعم البغدادي
‎0772 528 0913
رقم الحجز

10/01/2022

مساء الخير..
تكملة لمنشور البارحة..
هذا هو جهاز البخاخ ..
المنقذ في هذه الأيام التحسسية..
المنقذ في هذه الأيام الفايروسية..

أي عائلة عدها أطفال مصابين بتحسس القصبات او الربو لازم يمتلكون مثله..
أي عائلة عدهم طفل مصاب بالتهاب القصيبات لازم يشترون مثله..

طفل يگح بالليل كل موسم خريف و شتاء و صدره يبدأ يوصوص من تبرد الدنيا 👈 نشتري جهاز..
طفل عمره جوه السنة ، خشمة مسدود و يختنق بالگحة وتنفسه يتسارع و بي صفير و راجعنا الطبيب و شخصه التهاب القصيبات 👈نشتري جهاز بخاخ..

هذا الجهاز يوصل العلاج بطريقة مباشرة للرئة و بدون ما نعاني من الآثار الجانبية للعلاجات الفموية و الأبر و الي تنتشر عن طريق الدم لباقي أجزاء الجسم يعني بطريقة غير مباشرة..

ممكن نخلي بالجهاز مغذي مالح ونسوي تبخير للطفل، او أدوية يوصفها الطبيب مثل الفنتولين، البلمكورت، الاتروفينت و غيرها..

ولازم نعرف زين أنه البخاخ:
-ما يسوي إدمان، و الطفل ما يتعود علي، على العكس الطفل يحتاجه و يستفاد منه..
-ما يتعب القلب وما يأثر علي، على العكس حالات الربو المتقدمة و الغير مسيطر عليها هي الي تأذي القلب..

د.علي ابراهيم البديري
دكتوراه بورد عربي طب الأطفال
الدورة، أبو دشير ، مجاور مطعم البغدادي

09/01/2022

مساء الخير..
حاليا أكثر الاطفال يگحون گحة قوية و رشح، وهواية منهم سخونه و صدرهم يوصوص،
اسبوع و يطيب و بعدها بأسبوع يرجع الطفل يتمرض و ينتكس و هكذا..

حاليا موسم النزلات الفايروسية و التهاب القصيبات ، اكثر الاطفال الي يتأذون من هذا الموسم همه المصابين بالربو و حساسية القصبات، و الاطفال الي عمرهم جوه ال ٦ أشهر،
و اكثر الاطفال الي يصابون بشكل متكرر ولكن الاصابات غالبا بسيطة الى متوسطة الشدة ،همه الاطفال الي يروحون للروضة و المدارس…

بالنسبة للأطفال الي بالمدرسة، انصح بالتركيز على لبس الكمامة بالشكل الصحيح، و نعلم الطفل و نوصي عليها قدر الامكان، اذا ابنج مريض و اكو سخونه لا تخلي يروح للمدرسة، خلي بالبيت يرتاح و حتى نقلل العدوى لباقي الاطفال بالمدرسة…

بالنسبة للأطفال المصابين بالربو و حساسية القصبات، لازم يراجعون طبيبهم هالفترة عند ظهور اي اعراض كحة و ضيق تنفس او صفير بالصدر، حتى يعطي العلاجات الوقائية خلال فترة الشتاء الي تقلل لنا من شدة الاصابة بنزلات الربو، وتعليم الاهل على البخاخات الي هي اهم خطوة في العلاج..

بالنسبة للاطفال تحت السنة و خاصة جوه ال ٦ شهر، الي عدهم اعراض گحة شديدة مع اختناق، تسارع و تضيق بالتنفس، صوت صفير، لازم مراجعة طبيبكم..لان كثير من هؤلاء الاطفال يحتاج عناية خاصة و بعضهم يحتاج دخول مستشفى..

نرجع و نأكد على اهمية شراء جهاز البخاخ لأغلب الحالات المذكورة في المنشور 👆

جهاز البخاخ هو اهم منقذ للأطفال حاليا، وبفضل الله كثير من المرضى عالجتهم بنجاح في البيت بمساعدة جهاز البخاخ ، و ايضا حتى نتجنب قدر الامكان الدخول للمستشفى و الي مراجع حاليا مستشفيات الاطفال يعرف شنو الوضع و الزخم واكثر من طفل على السرير الواحد…

د.علي ابراهيم البديري
دكتوراه بورد عربي طب الأطفال
الدورة ، أبو دشير ، مجاور مطعم البغدادي…

11/11/2021

مساء الخير..
أهم أسباب قلة الشهية عند الأطفال:

١-طفل يشرب هواية حليب، كل شوية محضرين اله ممه، فأكيد هذا الطفل راح يشبع وما يشتهي الأكل..

٢-طفل شوية عمره أكبر من الطفل الي قبله، يومية يشرب ٣ قواطي
ببسي، و ٢ جبس، و ٤ نساتل ، و ٣ كيكات و كثير من الأندومي، بحيث أبو الدكان صار صديقة المفضل، هذا الطفل تتوقعون من يجهز الغداء راح ياكل؟؟ أكيد لا ، لأن شهيته انسدت تماما ..

٣-طفل عنده امساك مزمن و بطنه ما تطلع الا كل مدري كم يوم، ويطلع شوية شوية وما يفرغ بطنه كامله، فهذا أكيد ما يشتهي ياكل..

٤-طفل عنده فقر دم🩸 ، لان كان يرضع فقط طبيعي و ما أخذ حديد من عمر ٤ شهر، أو ظل يشرب بس ممات و ما جرب ياكل لحم او دجاج..

٥-طفل يعاني من التهاب مجاري بولية متكرر وما ياخذ العلاج
الصحيح..

٦-وهذه النقطة الأهم، طفل أمه تلح بالأكل ويا، و تلزم الخاشوكة و الماعون و تقابلة ٣ ساعات على كل وجبة، و تصير معارك و حروب بين الطرفين، هذا الطفل ما راح ياكل، وهاي الطريقة عمرها ما جابت نتيجة، بالعكس الطفل هذا راح يعاند و راح تصير نتيجة عكسية لسببين، الأول انو العناد هو جزء من تكوين شخصية الطفل و حتى يثبت انو هو عنده قرار و رأي و صار شخصية مستقلة و مرموقة بالمجتمع، و السبب الثاني لجذب الانتباه، هذا الطفل في اللاوعي راح يگول لنفسه، انو اهتمام الام الزائد هذا ، هو بسبب قلة الأكل، فطول ما هو ما ياكل فأمه راح تظل يمه و قريبه منه، وهو حريص انو ما يفقد هذا الاهتمام…

هذه النقاط ال ٦ المهمه، نعالجها بعلاج السبب…

الصورة لمراجعنا الجميل بعد الشفاء

08/11/2021

مساء الخير..
كلش هواية اسمع جملة
(دكتور ابني منشول من الولادة)
وهذه الجملة تدل على انسداد أنف الطفل المزمن..
بالحقيقة هي مو نشلة و لا هي انفلاونزا..

الطفل حديث الولادة ممكن نلاحظ انسداد أنفه و نسمع صوت بعمر ساعات، وهذا الشي يصير بسبب هرمونات الأم الي تعبر للطفل و تسبب هذه الحالة..

الأطفال الي عمرهم أقل من ٦ شهر و دائما خشمهم مسدود فهذه ايضا مو نشلة، هذه حالة اسمها (الخنفرة) و تصير بسبب صغر حجم ممرات أنف الطفل الي تكون دائما قابلة للأنسداد بفعل الافرازات…
بعد عمر ال ٦ شهر ، قنوات خشم الطفل يتضاعف حجمها و تروح هذه الأعراض..

طبعا المشكلة هي من تصير عدوى فايروسية (نشلة او انفلاونزا) و يكون اصلا الطفل عنده مشكلة الخنفرة و انسداد الانف المزمن، فبهذه الحالة راح يقفل الأنف، ينزعج الطفل، صعوبة في الرضاعه، كحة و ضيق في التنفس..

أهم شي هو (الخشم يتنظف زين)
قطرات ملحية، بخاخ ملحي، شفاطة ضغط او شفاطة سحب، كلينكس، منشفة،
أي شي ممكن تستخدمي على راحتج ، المهم نحقق الهدف وهو تنظيف الأنف قدر الامكان..

عملية استخدام القطرات او البخاخ الملحي جوه عمر ٦ شهر و في حالات النشلة و الزكام، انصح بيها دائما للمرضى، واريدها تكون عملية مكررة خلال اليوم ( ٤ الى ٦ مرات يوميا ) حتى نحقق النتيجة الي نريدها وهي راحة الطفل و رضاعة سلسة…

07/11/2021

مساء الخير..
حاليا أكو موجة التهاب امعاء فايروسية، بداية الأعراض تكون تقيؤ ، يصاحبها حرارة بسيطة و بعدها يبدأ الاسهال الشديد،

الي أشوفه حاليا أنه كثير من الحالات تحتاج دخول مستشفى ، لتلقي المغذيات الوريدية و علاجات التقيؤ..
ولكن طبعا الجانب الأكبر ممكن علاجه في البيت..

أهم شي هو إيقاف التقيؤ حتى نعوض السوائل الي نفقدها بالأسهال عن طريق زيادة الرضاعه و محلول الارواء الفموي لتجنب الجفاف..
زيادة تناول الحليب، اللبن، التمن، البطاطا السلق ، الموز (الجديد القوي مو لاحگ) ، تفاح بدون قشر، شوربة خضار ، التوست الأبيض..
مع تجنب العصائر بكل أنواعها و الحلويات الي تزيد الأسهال..

اذا التقيؤ استمر لا تتهاون عن الذهاب الى المستشفى لان السوائل شلون راح تتعوض!!!

الخلاصة (هذا التهاب فايروسي يطول من ٣ الى ٨ ايام و يروح من وحدة، بس المهم أنه نكمل هذه الأيام واحنا محافظين على الطفل من فقدان السوائل و بدون حدوث الجفاف )

الصورة لسلطان..و محاولات التخلص من الفحص 😜😜..