21/02/2023
"لعد انتي شنو كنتي تسوين طول اليوم؟!" ... عبارة مؤذية .. هوايه أمهات يسمعوها ...
خل نحاول نجاوب على هذا السؤال 🤔
يعني مثلاً هي تبقى تفتر من ساعة ما تگعد من النوم لحد ما تنام .. يادوب تلگى وقت قصير حتى تلحگ تشرب كوب شاي .. وشاي بارد ها .. او شوية تهرب لهدوء منقوص بالحمام .. وطبعا تمر ايام واسابيع .. شهور .. او حتى سنين على هالمنوال وهي تحس نفسها لا حققت طفرة بشغلها .. وتحس البيت ما مترتب .. و لا كدرت ترجع لوزنها ولا تشوف صديقاتها ولا تستمتع بمشوار صغير ‼️
لا يابه لحد الآن هي ممسوية شي وماكو اي انجاز …
لمن الاطفال يكونون نظيفين وملابسهم نظيفة وملابس ابوهم مكوية ويجون ينامون بفراش دافي .. لالا هذا ما يعتبر فد شي
لمن تحاليل اطفالها تطلع طبيعية .. وصحتهم تمام ونشاطهم نعمة .. لان هي حايرة شتطبخلهم وواكفة ساعات بالمطبخ وتركض وراهم حتى ياكلون وهمها الاول والاخير تغذيتهم تكون مثالية هذا شنعتبره ؟؟
لا هذا واجبها مو فد انجاز ‼️
لمن يكونون متفوقين بالمدرسة ويروحون مكملين واجباتهم اللي ابتلت بيها وحدها لان ابوهم بالشغل .. هذا شي بديهي مينحسب انجاز مو
حتى بمحل عملها لمن تنافس ناس ماعدهم ربع مسؤولياتها ولا عدهم بيت ولا اطفال .. هنا لازم نتجاهل هذا الانجاز ⁉️
المشكلة انهم فهموها من زمان ان الأم هو هذا شغلها !
اوكي خل نعتبره شغل .. بس هي الأمومة عبارة عن شغل بدوام كامل مدى الحياة .. حتى وهي نايمة و بدون أجر 😐
جواب بسيط : مجرد وجود لمسة حنانها بالبيت وتخلي الكل لا ارادياً يحسون بأمان هذا اعظم انجاز
الأم الحقيقية لا مقصرة ولا فاشلة ومحد يحقق إنجاز إنساني أكثر من اللي هي حققته ..
واللي دائماً يردد العبارة الفوك اللي ببداية الكلام هذا عديم ضمير وذوق 😃
تحية كبيرة للانجاز ولصاحبة الانجاز 🫡
د. أحمد ماجد موسى
أخصائي (دكتوراه) بطب الاطفال
