https://www.facebook.com/124223038297071/

د. سيف سمير البياتي, Baghdad (2026)

28/01/2026

الرضاعه الصناعيه إلى متى استمر بيها؟
خلينا نضوي الموضوع:
الرضاعه الصناعيه من المميه ( الببرونه ) هي فقط لغايه سنه
و هذا لا يعكس رايي الشخصي
جمعيه اطباء اسنان الاطفال الامريكيه تكول لغايه سنه
جمعيه طب الاطفال الامريكيه تكول لغايه سنه و نصف
جمعيه اطباء الاسنان للاطفال البريطانيه تكول لغايه سنه فقط
اكيد السبب هو ان المميه تغير شكل الفم و تزيد نسبه التسوس
مو بس هاي
تعويد الطفل على المميه حتى يؤثر على تلفظ الطفل للكلمات و تؤدي الى تاخر الكلام عنده
هسه نكول اخر موعد شوكت للفطام من المميه؟
سنه و ٣ اشهر هو اخر موعد
زين شون افطم بسهوله ؟
كتبت الكثير عن بوستات الفطام النهائي من الرضاعه الطبيعيه و الصناعيه
بس لو تبدين من البدايه كلش راح يصير الموضوع اسهل
شون يعني ؟
يعني بعمر ٦ اشهر دخلي الكوب اما العادي او الكوب المثقب
و بعمر ٩ اشهر اعطي الماء بالقصبه
بعمر ١٠ اشهر ضيفي الحليب بالكوب اللي يعطى بالقصبه او بالكوب المثقب
بعمر ٩ اشهر الى ١٠ اشهر
الوجبات خلي تكون ٣ وجبات و مرتين او مره طعام بين وجبات بحيث يكون الحليب ٣ الى ٤ مرات يوميا
بعمر ١١ شهر غيري طريقه اعطاء وجبه ثانيه من الحليب باستخدام الكوب الاعتيادي او كوب القصبه او كوب مثقب
بعمر سنه انتهى الموضوع
الحليب فقط مرتان يوميا و بالكوب
و وداعا للمميه
بعد السنه غيري الحليب من حليب القواطي الى الحليب الاعتيادي على مدى شهر بالخبط بين النوعين
هيجي تحافظين على اسنان طفلك
و يكون الفطام سهل
و تحميه من فقر الدم
و تضمنين صحه افضل لمخارج حروفه و تطوره و اكل صحي اكثر
و هسه نشوف سؤال :
رضعت طبيعي و اسنانهم مثل الصوره ليش؟
الرضاعه الطبيعيه لغايه سنه تحمي من التسوس بس الاستمرار عليها و بافراط و بالاخص الرضاعه الليليه تزيد التسوس و نسبته
و لا ننسى ان الرضاعه الطبيعيه لازم تتدعم بفيتامين دي
دفطمن يا عيني و وكلنه من أكل البيت و هسه هو او هي كبروا عليمن سنونه الحلوه رايحه من وره المميه
الصوره تشرح :
د. سيف سمير البياتي اخصائي طب الاطفال

28/01/2026

🔴 الجرعة السُمّية
🟡 الجرعة المُؤثّرة
فد يوم أكلتوا أكل من مكان واحد،
والكل تمرّض 🤢
إلا شخص واحد؟
معقوله هذا الواحد مجنص؟
أو العكس:
تمرّض شخص واحد
والباقي كلهم الحمد لله ما بيهم شي؟
معقوله هذا الواحد مناعته ضعيفه؟
🤔 شنو التفسير؟
هنا أحب ألفت انتباهكم لمصطلح طبي مهم جدًا اسمه:
Minimal Infective Dose
أو
أقل جرعة مُعدية تُسبب أعراض
🔍 شنو معناها ببساطة؟
مو أي بكتيريا تدخل الجسم تسوي مرض.
لازم العدد يوصل لحدّ معين حتى تبدي الأعراض.
يعني:
إذا دخل عدد قليل ⬅️ الجسم غالبًا يتغلب عليها
إذا دخل عدد كبير ⬅️تظهر الأعراض (إسهال، تقيؤ، حرارة…)
🦠 وهالعدد يختلف من جرثومة لجرثومة:
▪️ السالمونيلا مثلا
حتى يصير تسمم غذائي، لازم يوصل العدد تقريبًا إلى
100,000 بكتيريا بالغرام الواحد من الطعام
▪️ تسمم الرز غير المخزن جيدًا
الموضوع مو بكتيريا فقط، بل سموم
والجرعة المؤثرة تكون بين:
100,000 إلى 100,000,000 جزيئة سم بالغرام الواحد
💡 ولهذا: مرات تاكلون نفس الشاورما 🍔
واحد يتسمم
واحد تعبان شوي
واحد ما يحس بأي شي!
مو لأن الأكل “نظيف” عند شخص و”مو نظيف ” عند الثاني
لكن لأن الكمية اللي وصلت لكل شخص كانت مختلفة
📌 وهذا يفسّر جملة نسمعها دائمًا:
«إحنا أكلنا وما صار شي»
العلم يقول:
صار فرق بالجرعة… مو بالحظ 😉
✨ بالعلم نرتقي
✨ بالعلم نفهم المرض
✨ وخليكم دائمًا منفتحين على التفسير العلمي
د. سيف سمير البياتي
أخصائي طب الأطفال 👶🏻🩺

28/01/2026

وعليش تصغرين عقلج وياه!! راد اللعبة اشتريها وخلص
هسه عاد من سعرها؟؟
وشدعوه تخلي يبجي علمود موبايل !! هي دقيقتين ولهي عود 🙄

هاي تعليقات اقراها بشكل يومي بالكروبات من تسال الامهات عن احراجات اطفالها بالاماكن العامة

خلي احجيلكم موقف قبل كم يوم
طلعنا اني وجهالي لمكان ترفيهي للاطفال
وكلت لهم قبل ما نطلع حنروح فلان مكان نتونس ، تمام.. تمام

بنتي الصغيرة عمرها 4 سنوات
وبما ان عمرها 4 يعني عمر التحديات والفيكات الجديدة

المهم كاعدين دنتفرج على الفعاليات . فجاه بنتي شافت طفله بعمرها لازمه موبايل تلعب او تشوف يوتيوب صراحة ما ادري بس شفت بنتي انتبهت عليها

بدت بنتي تتنعوص ، وكالت انطيني الموبايل ، كتلها يا موبايل ؟ كالت موبايلج اريد اتفرج بي !

وعلى الرغم هيج فقرة ما مسويها قبل نهائي ، بس عرفت هي دتريد تقلد الي شافتها وتريد هسه تفرض نفسها عليه وعود حتحرجني

اني كلت لها احنا طالعين نتونس مو طالعين نشوف موبايل
هي بدت النعوصه والنعوصه زادت بجي والبجي صار صياح وكامت تنهزم مني تروح تركض
وعود لان اني حامل ما اكدر اركض وراها 😆
المهم صحت لها تعاي ظلت تكول ما اجي اني ضجت منج
رحت وراها جبتها لزمتها وهي تبجي وتكول اني ضايجه
طلعة محلوة

كتلها تمام ضوجي براحتك ... وبعد شوي نرجع للبيت خلصت الطلعة مابقى شي

المهم بقت اخر فعاليات ناخذ صور للاطفال وكذا
وهي بعدها بنفس البجي واختها تريد اخذ لها صوره ، جبتها كعدتها يمي واخذت صور لاختها كلت لها تاخذين صوره انتي هم .. ؟ كالت لا
كلت لها تمام
خلصنا وطلعنا من مكان الازدحام ورحنا مكان مفتوح وهي بنفس النعوصه والبجي
كعدتها وكلت لها حتبقين تبجين؟
كالت ضايجة .. كلت لها ليش ؟ كالت لي لان منطيتيني الموبايل
كلت لها بالنسبة للضوجه ضوجي براحتك
بالنسبة للموبايل ، احنا مو كلنا حنطلع فلان مكان ؟ كالت اي
كلت لها كتلج حنروح فلان مكان نباوع موبايل ؟ كالت لا
كلت لها خلاص
موبايل ماكو ، واذا تردين تضوجين براحتك ،
لزمتها ورحنا نتمشىى وهي تبجي ... كلت لها هاي التصرفات مال اطفال صغار ومحلوه عليج انتي كبيرة واميرة وتفتهمين
دقيقيتين وراها سكتت
وكالت اسفه ماما
كلت لها اسفة على شنو؟ كالت لان هيج سويت وردت الموبايل
كلت لها زين ليش ردتي الموبايل؟ كالت شفت بنيه تباوع يوتيوب واني هم اريد
كلت لها تمام مرة ثانية لاتسوين هيج واليوتيوب نكدر نتفرج اي وقت اني وياج مو من نكون طالعين
وقت الطلعة نتونس ....
وقت الشاشة عود اختاري يوتيوب .. تمام .. تمام

وانسد الموضوع وخلصنا

ليش هالفلم الطويل خوب انطيها وخلص!؟
هالفلم الطويل هو المواقف الي يتربون بيها الاطفال
اذا هالفلم مصار ومباشرة نطينا الموبايل او بعد البكاء بربع ساعة نطيناه يعني انت باختصار اي تربية مدتسوي

اذا انطيها يعني اخليها تفهم كلما اريد الموبايل اجبر ماما تنطيني حتى لو هي متريد مجرد ابجي واصيح حتنحرج وتنطيني
حنخلي الطفل يستخدم هذا الاسلوب بدل المرة الف

ومن عدا اضرار الموبايل ، ف المبدأ اهم
ان يعرف الطفل الحدود الي ما مسوح يتجاوزها وان تجاوزها ما يحصل الي يريده

اما بعد هذا الموقف ، ممكن حترحع تجرب مرة او مرتين بنفس الاسلوب واذا حصلت نفس النتيجة انه ما استجابيت لها ، حينلغي من قاموسها نهائي وتكتب عليه بعقلها ال لاواعي ، هذه الطريقة فاشلة ، لم تحقق الهدف

بقت شغلة اخيرة دائما اركز عليها ، من يعبرون عن اي مشاعر .. انطي لهم السماح والحرية ، من يكول ضايج اكول له اوك ضوج
من يكول حزين اكول له اوك احزن
من يكون سعيد.. اوك استمر بالسعادة

ليش؟ لان المشاعر لازم ما تنكبت هي مو بعبع
خلي يضوج ينقهر يحزن يسعد ويمر بالشعور الى ان يخلص

الخوف من المشاعر غير صحي نهائيا وفكره ان نكون ( المصباح السحري ) الي يغير شعور اطفالنا غير صحيحة وغير صحية

نساعدهم يفهمون مشاعرهم ، يمرون بيها بشكل كامل ، ثم يوصلون مرحلة يتحكمون بيها
بدل ما تتحكم بيهم
وهذا موضوع طويل نفصله بوقت لاخ

وهسه بعدك مع المقولات ببداية المنشور، وكلشي يلا وشدعوه لو تحاولين تستغلين هاي المواقف حتى تربيهم صح؟؟

د.اسماء

27/01/2026

شوكت يوكف الطفل ؟
الطفل يكدر يوكف مسنودا تحت الابط بعمر ٤ أشهر إلى ٨ أشهر
و يكدر يوكف مستندا على الأثاث بعمر ١١ إلى ١٣ شهر
و يمشي من عمر ٩ أشهر إلى سنه و نصف
و اني مشيت بعمر سنه و ٣ اشهر
و أطفالي مشوا بعمر ١١ شهر و نصف إلى ١٣ شهر
و انت شوكت مشى طفلك ؟

27/01/2026

الامهات والاباء المبالغين بالحمايه
اللي تحس انه ٢٤ ساعه فوق راس الطفل
اكل
اشرب
اكعد
تنفس
تحرك
اكعد
الخوف المبالغ بيه يخلينا نظن انه احنا دا نحميهم
دا نخلينا ملتصقين بيهم ٢٤ ساعه
مو بس الخوف و الحرص
اكو من يبالغ و يريد طفله ما يغلط ابد
و اكو امهات تبالغ لدرجة كبيره و بس تراقب بحيث تريدهم ما يغلطون حتى يكولون الله شون ام مثاليه
و النتيجه؟
يا اما استنزاف لطاقتك كاب او كام
و بالتالي ما نكدر نقدم المزيد
و بالنسبة للاطفال انت دا تخنكيهم مو تحميهم
دائما اكول للامهات اللي يجبرون ابنهم على تناول الطعام انه من حقه يقاضيك دستوريا
انت خنكتيه زهكتيه مللتيه بعيشته و حولتي حياته الى كابوس
انت خليتي عينك على كل نفس و كل لقمه اكلها طفلك و كل تصرف تصرفه لوحده
و بعدين تظلين تكولين هذا غلط و هذا مو زين و هذا مو حلو و تظل تصحح بالطريقه اللي انت تظنها زينه
النتيجه لهيجي تصرفات راح تكون انتقاد و لوم و استنكار تصرفات و تعليقات على حياتهم و اصدقائهم
اما اتعس نتيجه هي انه ما خلينا الهم اي شخصيه و لا اي تفكير
لا خليناهم يغلطون و لا يصححون الخطا
و لا يعرفون الجوع و لا يعرفون الشبع
و من يكبرون نشتكي نكول
هاي ليش هيجي ابني شخصيته ضعيفه !!!
الله !!!
لا تخنكوهم
لا تجبروهم
دائما قيس الامور على مستواك الشخصي
هل تقبل انه احد يسوي وياك مثل ما تسوي باطفالك ؟
د. سيف سمير البياتي
اخصائي طب الأطفال

27/01/2026

اليوم نحچي عن موضوع مهم: اللقاحات 👶💉
أولاً وقبل كل شيء:
الالتزام بمواعيد اللقاحات أمر أساسي جداً، وأي تأخير ممكن يقلل الحماية.
ملاحظات مهمّة لازم تنتبهولها 👇
1️⃣ الالتزام بالموعد مو خيار
بعض اللقاحات إلها عمر محدد، وإذا عدى هذا العمر ما تنعطى بعد.
2️⃣ لقاح الفايروس العجلي (الروتا)
إذا عدى عمر 8 أشهر وما تلقح الطفل، ما يگدر ياخذه بعد.
هذا اللقاح يحمي من أهم سبب للإسهال بالعالم.
3️⃣ فوات لقاح الروتا
راح يقلل مستوى حماية الطفل من الإسهال الشديد،
وهنا يجي دور النظافة وغسل اليدين كعامل مساعد فقط، مو بديل عن اللقاح.
4️⃣ لقاح السل (BCG)
حسب آخر تحديث (2019):
إذا تلقح الطفل وما ظهر الأثر بعد شهرين ⬅️ ما يحتاج إعادة، واللقاح فعّال.
5️⃣ فوات اللقاح لأي سبب
(حرارة، مرض بسيط، سفر، عدم توفر اللقاح)
ممكن تعويض كل اللقاحات تقريباً ⬅️ عدا لقاح الروتا.
6️⃣ هل يتأثر الطفل إذا ما أخذ لقاح معيّن؟
نعم.
ماكو مناعة ضد المرض اللي ما تلقح ضده،
واللي آخذ جرعتين حمايته أعلى من اللي آخذ جرعة وحدة.
7️⃣ المانع الحقيقي للتطعيم
حرارة عالية فوق 38.5 هي المانع الوحيد تقريبا للقاح
الرشح، الكحة الخفيفة، الإسهال البسيط، أو التسنين⬅️ مو موانع للقاح.
8️⃣ خافض الحرارة واللقاح
يفضل إعطاؤه بعد ظهور الحرارة فقط،
وإذا ما ظهرت حرارة ⬅️ ما يحتاج.
9️⃣ إعطاء خافض بدون حرارة خطا كبير
أكو أدلة علمية تشير إن إعطاء خافض الحرارة بدون سبب
ممكن يقلل من استجابة الجسم للقاح.
🔟 استثناء خافض الحرارة
الأطفال اللي عدهم تاريخ شمره حرارية
مسموح إعطاؤهم خافض حرارة قبل أو بعد اللقاح مباشره
1️⃣1️⃣ “اللقاح ما اشتغل لأن ماكو حرارة” ❌
هذا مفهوم خاطئ.
الحرارة عرض جانبي مو دليل نجاح اللقاح.
اللّقاح يشتغل حتى لو الطفل ما صعدت حرارته نهائياً.
1️⃣2️⃣ شدة الأعراض مو مقياس
طفل تصعد حرارته وطفل ما صعدت
الاثنين ممكن يكون عندهم نفس مستوى المناعة.
1️⃣3️⃣ المناعة ما تبين فوراً
الجسم يحتاج وقت حتى يكون الأجسام المضادة،
يعني اللقاح مو حماية فورية من أول يوم ممكن ياخذ الموضوع اسبوعين يلا يبدي
1️⃣4️⃣ الرضاعة الطبيعية
تبقى أول وأهم لقاح ياخذه الطفل،
وتكمل دور اللقاحات وما تستبدلها.
🤍 الخلاصة:
اللقاحات تحمي حتى لو ما شفنا أعراض جانبيه
والتأخير أو الإهمال يقلل الفائدة.
د. سيف سمير البياتي
اختصاصي طب الأطفال 👶💙

26/01/2026

وحده من النظريات اللي تشرح عن سبب المغص هي :
ان المغص هو بسبب اللاكتوز الموجود بالحليب
و كون اللاكتوز يحتاج إلى انزيم اسمه لاكتيز يهضمه
و كونه الطفل بعده ما ناضجه انزيماته فيحتاج إلى تدعيم باستخدام ماده اسمها اللاكتيز
هذا اللي خله شركات تفكر بانتاج قطرات اللاكتيز مثل كوليف و ميلك ايد و بايوفين
و هذا اللي خله قطره كوليف القطره الاكثر انتشارا بالعراق لان النتيجه سريعه و يرافقها زياده بوزن الطفل لان يسهل الهضم
شنو الجديد بالموضوع؟
الجديد بالموضوع انه اكو بحث علمي نشر بمجله هنديه عن تاثير قطرات اللاكتيز على الرضع اللي عدهم مغص
لاحظوا انه الاطفال اللي أخذوا لاكتيز القطرات كانوا اقل بكاء و مرتاحين اكثر و حتى شربهم للحليب اكثر !

زين خو نفكر و نخلي الطفل على حليب خالي اللاكتوز و بلا هذه الماده
يجينا الجواب سريعا ان ماده اللاكتوز ضروريه لتطور الدماغ
نجي نتعلم من فوك الآتي:
❤ الحليب يسوي مغص عند اغلب الاطفال
❤ نطلب من الأم اللي ترضع طبيعي تقطع الحليب و مشتقاته اذا لاحظت ان طفلها بدا مغص
❤ اذا ما فادت العلاجات التقليديه للمغص ممكن اضافه قطره تحتوي على انزيم اللاكتيز
❤ حليب خالي اللاكتوز ما يصير نستخدمه الا بوصفه طبيب و ما نستمر عليه أكثر من 6 أسابيع الا بوصفه طبيب
❤ احب اكول لكل اللي غيرت حياتهم نصيحه مني و استفادوا منها فقط ادعولي بالتوفيق لا اكثر
د. سيف سمير البياتي اخصائي طب الاطفال

25/01/2026

الرضاعة والنوم…
والنوم والرضاعة
واحدة من أكثر الأخطاء الشائعة بتربية الرضع
هي ربط الرضاعة (طبيعية أو صناعية) بالنوم
يعني:
👉 الطفل ما ينام إلا وهو يرضع
👉 وإذا صحى… لازم رضاعة حتى يرجع ينام
شلون نعرف إنو سوّينا هذا الخلل؟
إذا كان عندك طفل:
بعمر 4 أشهر (حوالي 120 يوم)
وما ينام نوم متواصل 6–7 ساعات بدون رضاعة
أو يصحى مرة أو مرتين بالليل فقط حتى ياخذ رضاعة ويرجع ينام مباشرة
📌 هنا غالبًا المشكلة مو جوع
📌 المشكلة هي ربط النوم بالحليب
ليش يصير هذا الربط؟
لأننا نرضع الطفل إلى أن ينام تمامًا
وهذا الشيء غير مُفضل
الصحيح:
الروتين هو الأساس
والرضاعة جزء من الروتين
مو هي نهاية الروتين ولا مفتاح النوم الوحيد
شنو الطبيعي حسب العمر؟
بعمر 4 أشهر
أغلب الأطفال اللي يرضعون صناعي
يكدرون ينامون حوالي 7 ساعات متواصلة بدون رضاعة
بعمر 5–6 أشهر
أغلب الأطفال اللي يرضعون طبيعي
يقدرون ينامون 7 ساعات متواصلة بدون رضاعة
📌 أحب أطمنكم:
في هذه الأعمار
الطفل ما يحتاج طاقة الحليب بالليل حتى ينمو
زين… شنسوي إذا الطفل متعود ينام على الرضاعة؟
🌷 أولًا: افصلي الرضاعة عن النوم
الروتين… الروتين… الروتين
خلي الرضاعة أول خطوة بروتين النوم
أرضعي الطفل:
بغرفة غير غرفة النوم
وبوجود ضوء خافت جدا
أفضل تسلسل:
رضاعة 👈 لعب خفيف 👈 نوم
🌷 ثانيًا: نوميه وهو نعسان مو نايم
خليه يحس بالنعاس
بس لا تخليه يغفو كامل بحضنك
إذا تضايق:
هزيه برفق
أول ما تحسيه نعسان ⬅️ حطيه بفراشه
الهدف:
يتعلم ينوم نفسه بنفسه مو على الرضاعة
🌼 إذا كعد من النوم وبده يبجي
تظاهري إنك نايمة
استخدمي كلمات هادئة:
شششش
يلا نام
الكل نايمين نام حبيبي
لا ترفعيه
لا تلعبيه
هزه خفيفه
شوي شوي يرجع للنوم
⚘ أهم نقطة
❌ لا تستسلمين وترضعينه حتى ينام
حتى لو بالبداية كانت صعبة
👉 مع التكرار تصير أسهل
🌷 إذا كان النوم مرتبط بالرضاعة شلون
الحكلي؟
ممكن تعطي رضعة وحدة بعد:
4–5 ساعات من النوم
مع التذكير:
الطفل مو محتاج رضاعة ليلية
وأنا ضد توقيت الرضعات
ومع ترك الطفل يرضع متى ما يريد بالنهار
🔁 أخيرًا
التزمي بهذا الروتين
لمدة أسبوع واحد فقط
وراقبي الفرق 🌱
د. سيف سمير البياتي
اختصاصي طب الأطفال

23/01/2026

شلون نعلم الطفل وهو بعده ما يحجي ولا يردد ورانا؟
وخصوصا اذا كبر وعنده تاخر لغوي ؟

تعليم الاطفال يكون بطريقة الاستقبال فقط بدون تعبير ، كبداية

يعني من تريد تعلم طفل لاتنتظر يعيد وراك
ولا تنتظر يكلك اي افتهمت
ولا تنتظر يعيد صياغة الي حجيته بنفسه
ولا تنتظر تكله اني شنو كلت ويرجع يعيدلك
ولا من تساله هاي شنو اسمها يجاوبك

كل هاي تعيق عمليه التعلم وتاخرها كلش هواي
لان انت كاعد تنتظر القدرة التعبيرية والي هي تتاخر اساسا ولا تساوي القدرة الاستيعابية

يعني والحل؟؟

الحل والطريقة الصحيحة لتعليم الاطفال
اول شي لازم نتاكد هو يسمع ، وسمعه سليم
ثاني شي نبعد عنده المشتتات السمعية والبصرية ، من تلفاز وشاشات والعاب هواي واي اصوات عاليه تطغي على الي نكوله

وبعدها نعلمه بالي نريده بشكل سريع واضح وصوت عالي
ولمده قصيرة
مو نبقى نحجي موضوع يطول 5 دقائق ❌

ربع دقيقة وقت جيد جدا
واذا عمر صغير ف 5-10 ثواني

وهاهيه ، ننتقل للعبه اخرى ، ونشاط اخر ولاسيما لو كان حركي

ونرجع باقرب وقت نكرر نفس الي كلناه ، وهم ما نطول بي
وبعد فتره نكرره وهكذا ... خلال اليوم

هيج الطفل يتعلم ... رغم حيبدو الموضوع انه شي كلش قليل ، لكن اثره خيالي وحيكون تراكمي وبالتالي حيجمع حصيله ممتازة بعد فتره من الزمن

نلاحظ ما نكول له عيد
ولا هاي شنو
ولا يلا كول وراي
كل هاي الاساليب تعيق التعلم
لان العقل يكون منفتح يستقبل
لكن ما عنده بعد قدره ان يعبر
ف بكل مره تكول له يلا عيد هو حينغلق على نفسه ويصير مثل بلوك بعد حتى الشي الي انت تكوله مايستوعبه
لان ارجع اكول التعبير شي مختلف تماما عن التخزين والاستيعاب

ف حتى تعلمه .. ركز على اعطاء المعلومات ببساطه, بسرعة ، بوضوح ... بدون اي مقابل

وفجاة حتنصدم كيف يجي يوم يحجي كل الي جنت تكوله بهاي الطريقة

وهاي الطريقة هي نفسها طريقة جلين دومان، بفرق ان جلين دومان يعتمد المسار البصري + السمعي يعني يقدم المعلومات ك صوت وكصورة
حتى يضاعف المعلومات الاستيعابية ويطور الذاكرة الصورية الي اساسا الاطفال تكون عدهم جدا قوية

وووو كم مره جربت تكول للطفل كول وراي وشفته بعدها ينفر حتى ان يسمع الك ؟

د.اسماء

21/01/2026

يكولك ابني عمره ٤ سنوات ونص 👶
اشوفه نوبات يفرفر بالبيت
مرّة يركب على المكنسة الكهربائية على أساس هي حصان طاير 🐎
ومرّة يشيل الموزة ويخابر بيها صديقه أو صديقته 📞🍌
ساعات يضحك على نفسه
وساعات يضحك ويا “صديقه” التخيلي
مجرد تراقبه ولو ساعة وحدة…
راح تشوفه :
من كرسي لكرسي
من طاولة لطاولة
قفز من أعلى مكان بالبيت
يتاذى و يصيح
و يرجع يكرر الاذيه!!
وكل شوي:
«أخ… أووي… تعوّرت أني!»
ما يميّز الخطر من الأمان
يحب اللعب هواية
وإذا لگى علبة مكياج؟
ها… سلّملي 😄
قلم الحمره صار قلم جاف
و الكحله تلطخت بالحايط
والحمد لله البيت صغير
وما بيه حديقة
وإلا كان الطين ترس البيت كله!
تكول له: لا
ما يفيد
أمه تكول: لا
ما يفيد
وهو مصرّ:
إنه هو صغير
وإنه هو الصح
وإحنا الغلط
السؤال هنا و موضوع البوست هنا :
منو الصح؟
ومنـو الخطأ؟
خلّينا نفهم ليش الطفل بهالعمر يتصرف هيچ.
أول شي لازم نعرف:
هل هذا الطفل طبيعي ؟
شلون نعرف الطفل طبيعي؟
الطفل الطبيعي بعمر ٤ سنوات :
بهالعمر يعرف الألوان
يكمل جملة
يحچي قصة بتفاصيل
يعرف اسمه، جنسه، وحتى عنوانه
يتواصل ويه الآخرين
زين…
ليش هالتصرفات دكتور؟
أغلب الناس راح تجاوب:
«لأنه صغير بعده»
وهذا الجواب فعلا
اللي ممكن يكون صح
وممكن يكون خطأ
هو فعلًا صغير
بس هذا ما يعني عقله مو كامل
إنما يعني
إنه يفكر بطريقة مختلفة
ويستقبل المعلومة
ويترجمها بأسلوب غير شكل
وما عنده وعي بوجهة نظر الآخرين
ولا تأثير تصرفاته عليهم
إذا فهمنا هالنقطة
راح نوقف نلصق بأطفالنا
تهم مثل:
عنيد
قليل أدب
متعمد يكسر الكلام
واللي غالبًا توصل
لعقاب لفظي أو جسدي… بدون داعي
خلّينا نوضّح أكثر 👇
الطفل بهالمرحلة
يشوف العالم من وجهة نظره فقط
ويتخيل إن الكل يشوف الأمور مثله
وهذا يسموه:
Egocentric
يعني:
ما يربط تصرفه بمشاعر غيره
فمن ياخذ قلم الكحل
ويرسم بيه على المراية
هو يشوفه فن
وانتِ لازم تقدّرينه 🎨
وما راح يفتهم
ليش تصيحين أو تعصبين
إذا لگى قلم جاف
ورسم على الحايط
حتى لو ملختي نفسك من العياط
هو بداخله دا يكول:
«شنو هالأوفرة؟
《 شكد تبالغين 》
شنو سوّينا أصلًا؟»
هو مو قليل أدب
ولا يعاندك
ولا مستمتع بكسر كلامك
هو فقط
ما يعرف ليش أنتِ دا تبالغين
لا تنسون
تفكيره بهالعمر خيالي
المكنسة حصان
الموزة تلفون
الكارتونة بيت 🏠
فما عنده أي إدراك
للعواقب أو النتائج
وهذه ببساطة… حياته
ويضاف إلى هذا
رغبة قوية جدًا
باكتشاف الأشياء
عن طريق الحواس الخمسة
فأسئلته كثيرة
حركته أكثر
وحوادثه أكثر
طيب دكتور…
إلى متى يبقى الطفل Egocentric؟
من عمر سنتين
إلى تقريبًا عمر ٧ سنوات
بعدها
يبدي يفكر بطريقة منطقية أكثر
ويهتم بمشاعر الآخرين أكثر
إلى أن يوصل
لمرحلة نضج أوضح
حوالي عمر ١٢ سنة
مختصر مفيد 👇
لغاية ١٢ سنة
الطفل دا يتعلم
ويتغير
وينضج
بطريقته الخاصة
إذا فهمنا شلون يفكر
راح نربي شخص سوي
محترم
ومتزن
نعطيه مساحة
يجرب
يلون
يشخبط
يقذر نفسه
وإحنا نمشي وياه بهالطريق
نشرح
ونعيد
ونكرر
إي…
راح نعصب
راح نغضب
راح ننفعل
إحنا بشر
ومن حقنا
بس حاول قدر الإمكان
تبعد غضبك عن الطفل
وترجع تشرح بهدوء
وخلي بعقلك هالجملة دائمًا 👇
كلما تعاملت بعقلانية أكثر
كلما كان الطفل أكثر تفهمًا
وردود فعله أكبر من عمره

د. سيف سمير البياتي
أخصائي طب الأطفال

21/01/2026

📍السيناريو الاول:
_شكد عمر ابنج ما شاء الله؟
_خمس سنوات
_الله يخلي .. شلون مكضي نهاره؟
_والله عايفته على راحته خطيه ("بعده صغير") يباع تاب شويه يوتيوب .. يلعب بلي.. مرات ينزل العاب ع تلفوني.. ومن يمل منهم أطلعه يشتري من الأسواق شي نستله جبس عصير..
_اممم مدام بعدج حامل شنو رئيك تجربين مثلا تعلمي شويه تلعبي العاب ذكاء تسويله انشطه قبل متجيبين وتلتهين..
_لاعيني عليش اتعب عقله (بعده صغير) لاحك يكبر ويتعلم ويشبع ضيم 😬....

📍السيناريو الثاني:
_لا ماما شدتسوووي !! اني اسدلك السحاب..
_لا ماما شدتسوووي .. اني اوكلك لتوسخ هدومك
_ماما شدتسسوي !! عوف اخوك بعده صغير! كوم باع تلفزيون بين ما اكمل العشه.

📍السيناريو الثالث:
ولكم وتاااالي ويااااكم ذبحتوني.. كلشي متعرفون تدبرون لاقراية مال اوادم. لااكل عدل .. لاتلمون هوستكم من الكاع .. شصير اني أظل عمري أعلم بيكم واركض وراكم!!
ومناك عندي اختكم الصغيره مسهرتني الليل كله والنهار تطلعولي انتوا..

🌼التعليق: طفلج اول سنوات حياته (اول 7 سنوات) هي الفتره الذهبيه كلما تتعبين بيها كلما ترتاحين بعدين..
علمي كلشي تكدرين عليه ...
سواء القراءة او الحساب او العلوم
و كذلك علمي الاعتماد على نفسه
علمي الثقه بالنفس
علمي يكون مسؤول..
علمي شلون يلزم القلم .. شلون ياكل.. شلون يعيش كإنسان !
لتكولين من يكبر.. كلما يكبر كلما ينتهي دورج خلاص لتتوقعين بعد يتعلم منج .. ببساطه هو أخذ قالبه. وحتحتاجين أضعاف الجهد حتى تعيدين تشكيله..

⁦🗝️⁩وتذكري من حيكبر غالبا حيكون عندج طفل غيره ينتظرج .. والجبير هاهيه اخذ فرصته بس انتي مستغليتيها ..
الي بعدهم أطفالهم صغار.. انتبهوا ولاتعيدون اخطاء غيركم ..

قريت بهاي الفترة بكروبات الامهات شكاوي هوايه وكلش هوايه عن تدريس الاطفال بالابتدائية !!! والاهل في حاله من السترس والضغط النفسي المبالغ جدا جدا

كلت لهم اني هم عندي اطفال بالمدرسة ، وما اقريهم
لان سبق تعبت وياهم اول 5 سنوات واتبعت مناهج مختلفه لكن الي فادني اكثر شي مناهج جلين دومان
وهسه همه والفضل لله مستقلين ويدرسون وحدهم
ومستواهم ممتاز ...
هالاشياء ما تصير صدفة

وللعلم بذلك الوقت من جنت انشر يومياتي اني واطفالي بجلسات التعليم واللعب والبطاقات ، نفس الفئة من هاي الامهات جانت تستهزأ وتقلد عليه وتكلي مضيعة وقتك او "بطرانه"

لكن الي يحسبها صح هو الي يرتاح بعدين
ومو فقط راحتي وهدوئي ان همه مستقلين بدراستهم وهمه صغار ، وانما اطمئناني بقدراتهم العقلية وانهم فعلا اذكياء

احسبيها صح واستثمري باطفالك بشكل صحيح ، والفائدة حتكون الك والهم للمجتمع كله 💖

مع محبتي ♥️
د.اسماء

20/01/2026

كل وحدة تحلم ببنية
شعرها طوله متر
وخدودها منفوخة عبالك طوبات
تشبه اللي بالصوره…
وبالأخير تطلع الحلوة كرعة 😅
إي والله… ولا شعرة، راسها مثل الكيوي 🥝🥝
(مثل بناتي 🤍)
خليني أحچيلچ كم كلمة مهمّة عن شعر الطفل بأول سنين العمر 👶✨
❤️ اول اربع أشهر
لا تخلين على شعر الطفل أي شي:
لا زيوت صناعيه، لا كريمات، لا شد ولا فرك. لا قراصات لا بوند
بشرة الرأس تكون حساسة ورقيقة وما تتحمل أي مؤثر خارجي
الزيوت الطبيعيه فقط ممكن استخدامها مثل زيت اللوز الحلو او زيت جوز الهند
❤️ إذا الطفل إجه أكرع؟ عادي جدًا
لا تخافين ولا تستعجلين.
الشعر يحتاج 3 إلى 4 سنوات حتى يثخن ويبين شكله الحقيقي.
قريتي ؟
اي ٤ سنين يلا ممكن يبين شعر الطفل
❤️ بعض الأطفال يولدون بشعر كثيف
وغالبًا هذا الشعر راح يوكع لاحقًا،
وهذا طبيعي وما يدعو للقلق.
❤️ المطلوب بأول 4 أشهر
نظافة وغسل فقط.
ومو يومي، حتى لا يجف الشعر ولا تجف البشرة.
و شويه ترطيب بزيت طبيعي
مو زيت الزيتون لطفا
❤️ الشامبو
لازم يكون مخصص للأطفال
والأفضل الأنواع الأقل تحسسًا.
و استخدمي شركات تفتخر انه هي طبيعيه 100 بالميه مثل مايلي اوركانك و بايولاين و كاليفورنيا بيبي و كانتو و ايرث ماما
❤️ التمشيط
استخدمي فرشاة شعر ناعمة مخصصة للأطفال،
تفيد بالترتيب وتحفّز البصيلات بلطف.
❤️ المساج والزيوت
ممكن استخدام الزيوت الطبيعية للمساج الخفيف
مثل زيت اللوز الحلو 🌿
آمن، لطيف، ومناسب لبشرة الأطفال.
❤️ إذا تحسين شعر الطفل ناشف
ممكن ترطيب خفيف باستخدام
الألوفيرا + فيتامين E.
❤️ ما عندچ وقت للتسريح؟
قصّ الشعر صفر خيار مناسب
خصوصًا إذا المولود ولد.
❤️ إذا الطفل عنده شعر طويل
قصّي شوي وشذّبي الحواف
حتى يبقى مرتب وصحي.
❤️ الشعر المجعد
متعب للأم والطفل،
ممكن استخدام مكيف أو detangler مخصص للأطفال.
و هم اكو نوعيات طبيعيه مثل بايبيت و فريش مونستر و كاليفورنيا بيبي و اتيتيود
❤️ دايمًا انتبهي
تشذيب الأطراف المتقصفة يحافظ على شكل الشعر.
❤️ وخدعة مشهورة لازم نوقفها ❌
"قصّيه هسه حتى يثخن"
❌ غلط
قص الشعر ما ينبت خلايا جديدة
بس نهاية الشعرة تكون أعرض فيبان أحسن
أما الكثافة؟ نفسها… ما تتغير
د. سيف سمير البياتي
اختصاصي طب الأطفال 🩺💙

د. سيف سمير البياتي

28/01/2026

28/01/2026

28/01/2026

27/01/2026

27/01/2026

27/01/2026

26/01/2026

25/01/2026

23/01/2026

21/01/2026

21/01/2026

20/01/2026

Address

Website

Alerts

Shortcuts

Share

Category