26/01/2023
اتمنى كل ام واب يقره هالمنشور💜
طفح الحفاظات !
وحدة من المشاكل اللي تواجه الاطفال باختلاف نوعيه بشراتهم و اختلاف نوعيه حفاظاتهم و حتى نوعيه طعامهم
طفح الحفاظات شائع جدا
و يتعالج كثيرا كما في اغلب امراض الاطفال خطا
لان ام عبودي تخلي العصارة الصفره ( النستاكورت ) و طفلها يرتاح عليها
فلازم ام جود و ام محمد و ام علي يستخدموها
هذا كله لان عبودي مرتاح على العصارة الصفرة !
و ممكن الطفل يتحسن فعلا
و تظل ام محمد مستمرة على العصارة للابد لان حمودي صار يخبل عليها
المهم
العصارة الصفره بيها مواد كيماويه كثيرة وحده من هذه المواد الكثيره و لكون جلد الطفل رقيق راح تمتص
و تظل تمتص
و تعبر للدم
بالدم راح تعارض شغل الانسولين فتسوي سكر
و تسحب الماء لداخل الجسم و تسوي ضغط
و تشفط الكالسيوم من العظام فتسوي هشاشه عظم و حصى كليه
و بعدين تحتبس السوائل و يصير بيه مثل الصورة لطفل من الهند امه تستخدمله نفس المرهم لمده شهرين لان ام شابور كالتلها ابني صار يخبل عليها
الكارثه جبيره
الكارثه مخفيه بكل استخدام مطول ( اكثر من 5 ايام ) لعصارات و خلطات مراهم طفح الحفاظات
كان ممكن تجنبها ببساطه لو اهتمينا بنظافه الطفل اكثر و غيرنا نوعيه الحفاظ و خلينا مراهم الزنك او اساسها الزنك مع كل تبديل حفاظ و خلينا مجال بين حفاظ و اخر للتهويه
صباحكم ود و وعي صحي
د. سيف سمير البياتي اخصائي طب الاطفال
