10/12/2025
رب اخٍ لك لم تلده امك //
تجي البنية وية المريضة من محافظة واسط وتكول دكتور اني سمعت عنك وسألت عليك واريد مرسضتؤ تتعالج يمك .
المريضة صاير عدهة سرطان البلعوم المتقدم ، وتحتاج جرعات كيمياوية مكثفة وبعدها جلسات شعاعية ، يعني بين قوسين قصة طويلة وكفاح لازم يتعاون كل الفريق بيه ...
طبعا المريضة فقيرة حيل ومن اهل الله ، بحيث حتى متعرف تشكي من اعراضها بس البنية اللي وياهة هي تسولفلي شنو صار عدهة وشنو المضاعفات والاعراض ، ومن تسولفلي تسولف بحركة ومن كل كلبها ....
كملنا الجرع واستجابت المريضة استجابة جيدة ، وبعدها بدينا بجلسات الاشعاع وبدت معاناة صعوبة البلع ومن يجون تسولفلي المرافقة انه هي دتعصر الاكل وتحوله شوربات علمود مريضتها ، وتسولفلي شلون تدعمها نفسيا وتطلب مني ان اشجعها ، طبعا بفضل الله وقوته وصلت المريضة للشفاء التام واختفى المرض تماما ...
بس المفاجأة انه طلعت هاي البنية مو اخت المريضة، والمريضة هي اخت زوجها وكاعدة وياهم بالبيت لان ما متزوجة !!!
دموع الفرح اللي جانت تنزل من البنية من انطيها اخبار مفرحة على مريضتها ، وحرصها الزايد عليها ، وتفضيلها لمريضتها حتى على اطفالها خلاني ارتاح راحة نفسية مو عادية ...
شنو هالخير اللي شايلته هاي البنية بكلبها ؟
شنو هالحنية والرحمة والرأفة ؟
هنيئا لبطلتنا المرافقة على شفاء مريضتها
وهنيئا لزوجها هاي الزوجة الصالحة الطيبة الحنونة
وشكرا لله اللي دائما يخليني اشوف مثل هالمواقف اللي حقيقة تبقيني صامد وقوي حتى افيد ذولة الناس واحي دائما انه الخير موجود .
