03/10/2025
احجيلكم عن رونق وامها /
رونق بنوتة خجولة وحبابة وكل الناس تحبها ، عمرها ١٧ سنة ، محجبة وانيقة وما تأذي بشر ، امها تفاجأت بأعراض جديدة لرونق ،
دوخة ووجع راس وتقيؤ ، راجعت بيها وتفاجأت بورم بالراس طلع بفحوصاتها ، سوولها عملية خطرة حيل ونجحت العملية بس الاصعب بعده جان ما جاي ، لان الزرع اثبت وجود واحد من اصعب واخطر الامراض (إيوينك ساركوما) فد نوع سرطاني حقير وسريع الحركة ، ويستوجب جرعات كيمياوية قاسية حيل .
بلشنا اني وياهم رحلة علاج صعبة ومعقدة وجانت جرعاتها من اصعب مايكون ، بس جانوا صابرين ومحتسبين بالرغم من صعوبة الموقف اللي ينضافلها امكانيتهم المادية المحدودة .
احتاجينا جلسات اشعاع لرونق وكملناها على خير وسلامة بس بهالاثناء امها اكتشفت انه هي هم دتشوف عدهة ورم غريب ، اجتني مرعوبة مو على نفسها ، بس جانت مرهوبة خاف تقصر بعلاج بنتها ، رتبنا على عملية استئصال لام رونق وهنا هم طلع الزرع نوع سرطاني ساركوما بس نوع هاديء مو سريع وهذا من لطف الله ، طبعا قراري جان انه ام رونق راح تحتاج جلسات اشعاع فقط وترتب الموضوع بالحكومي وبشكل مجاني بتساهيل رب العالمين .
الام تشافت ، وكملت علاجها الشعاعي ، بس هي بقت برغم معاناتها تداري بنتها لان رونق بعدها محتاجة جرع كيمياوية مكثفة لازم تكمل عليها سنة !!
ما اريد اطول عليكم قبل تقريبا اسبوع جابولي الفحص النهائي مال رونق بعدما كملنا كل علاجاتها وجان الفحص يعلن انتصار البطلة الزغيرونة على اشرس انواع الامراض وهذا كله بفضل الله سبحانه وتعالى وبفضل امها الصبورة الغيورة ...
لقائنا الاخير ما جان مثل لقائنا الاول ، ضحكنا وسولفنا وتونسنا واعلنّا الانتصار ، بينما لقائنا الاول جان كله خوف وترقب حتى اني جنت خايف عليها ما اجذب عليكم .
شتكولون لرونق الحلوة ؟
وشتكولون لامها البطلة ؟
