27/11/2025
بخصوص التلوث الي بالعراق ..
لان موضوع عاجل راح اكتبه … شوف موضوع التلوث مو شي جديد . بس گمت تشوفه بعينك لان برد الجو .. بالصيف ما جنت تشوف الدخان لان يصعد وي الهواء الحار . اما بالشتاء وخصوصآ الصبح تتكون طبقة هواء باردة وثقيلة قريبة على الارض وفوقها طبقة هواء دافئة تحبس الدخان والتلوث بالطبقة القريبة على سطح الارض وما تسمح للدخان انه يصعد .
ف التلوث ترة يوميآ موجود وكل مناطق العراق مو فقط بغداد . لكن يكون اكثر بالشتاء ، المهم الي عليك تسويه ٧ خطوات ادناه .. ( سواء الك ، لطفلك ، بالسيارة ، بالبيت و ل عائلتك .. طبق الاتي .
1. اشتري جهاز تنقية هواء منزلي .. مو غالي ومتوفر ب تطبيقات التسوق الالكتروني العراقية . حتى لو تاخذ واحد فقط لغرفة النوم HEPA Air purifier . لكن ضروري. خصوصا اذا كاعد ب ٧٠ متر. بمنطقة سكنية ابغداد .
2. اذا تحب اشتري نباتات منزلية وظيفتها تنقية الهواء ( افضل وارخص شي هو نبتة الثعبان السنسفيريا ، .. واكو تقريبا ١٠ انواع نباتات ظلية هم جمالية وهم تنطيك هواء نقي . متوفرات ب اغلب المشاتل
3. اذا عملك او انت طبيعتك تكون بيها اغلب الوقت خارج البيت ، هنا البس كمامة N95 . ولا تركض او تسوي اي رياضة او جهد بهيج جو .
4. الشبابيك في بيتك اذا PVC شي جيد ، اما اذا كانت حديد ف حاول تضرب الحافات سيليكون . واغلق النوافذ والابواب دائمآ. واذا تريد تحصل تهوية جيدة. استخدم مفرغة هواء تكون بالمطبخ. بالبيتونة. وب اي مكان تحسه مغلق ورطب . ولا تشغل صوبة نفطية ابد ابد ابد . لحد يقنعك بيها. واذا عندك وخدة بيعها ولاتبقيها ابد .
5. الهواء الملوث يسبب جزيئات حرة بالجسم من شئنها تضرب ال DNA بشكل مباشر ، واني اعتبره واحد من اهم العوامل الفوق الجينية المسببة للاورام .. ف حتى نقلل نسبة ال ضرر المباشر لل DNA لازم نتناول اطعمة تحتوي على مضادات اكسدة . وعلى مقياس ORAC ف افضل طعام بيه نسبة مضادات اكسدة عالية تحمي ال DNA هو ( الكركم والسماگ , العنب. التكي ، الرمان ، التوت ، سبانخ ، زنجبيل ) تناولهن بكثرة . والموضوع جدآ مهم للحماية من مرض السرطان. وبيه شرح اكثر . لذلك راح راح اتكلم عليه ب اول حلقات البرنامج ان شاء الله ، قريبآ .
6. اذا تتنقل هواي بالسيارة. بدل فلتر التبريد ، ودائما اضغط على دكمة اعادة تدوير الهواء. هاي الدكمة تستخدم من انت تكون ب ازدحام حتى لا تسحب دخان السيارات الي امامك . واذا تحب اكو اجهزة تنقية هواء خاصة للسيارة .مناسبة ومفيدة خصوصا اذا تبقى ساعات طويلة بالسيارة . متوفرات بالعراق. وحتى تتاكد من فعاليتهن. نزل تطبيق AQI يقيس نسبة التلوث الهواء .
7. اخيرآ . اذا عاجبك تصرف بس بالمقابل تحصل افضل نتيجة ممكنة ، او مضطر وعندك مريض. كبير بالعمر ، طفل تخاف عليه ، حساسية ) افضل شي تشتريه هو جهاز تنقية هواء محمول حول العنق من شركة Respiray ، شحن يشتغل ١٢٠ ساعة . هذا الجهاز يسحب الهواء من الاسفل ويدفع هواء نقي بوجهك . وظيفته ينقي الهواء من الدخان والفايروسات والبكتريا وينطيك هواي نقي جدآ بنسبة ٩٩.٩٧٪ .. سعره شي ٣٠٠ دولار واصل العراق .
غزوان فيصل
