Dr. Hoshyar Murad

02/02/2025

ڕەنگە جەنگان دژی جەهل و نەزانی
لە جەنگان دژی دوژمن گرنگتربوو!

بەڵام ڕەنگە هێشتا گەورەترین دوژمنی هۆشیاری، نەزانین نەبێت
بەڵکو ئیدیعای زانینە!

بڕۆ کۆمێنت تکایە👇👇👇

27/01/2025

نە لایەنگریمی نە دژی، بەڵام ئەم تێبینیەم کرد
منیش ووردم ها؟😜

19/01/2025

تاوانی تۆ

تەنها ئەوە نەبوو بەو دەستانەت کە بۆنی گەنمیان ئەدا

باڵندەکانت ڕا ئەکێشا

بۆ ئەوەی فڕین بخەێتە قەفەسەوە

تۆ گەنمیشت بێ بەها کرد!!!

16/01/2025

We stand with palestine 🙏🙏🙏

جەنگ دێت و هەموو شتە جوانەکان لەگەڵ خۆی ئەبات و ئەڕوات!!!

تەنها کەسێک لە جەنگ تێئەگات ئەو کەسەیە کە چاوەکانی بە جەنگ بەخشیوە

ئەو سەربازانەی بە شەلی و بە یەک قاچەوە لە جەنگ ئەگەڕێنەوە،
ئەو مناڵانەی بە بێ باوک لە جەنگ دێنەوە
ئەو دایکانەی کە جەنگ هەموو شتی لێ سەندونەتەوەو وێنەیەکی پێبەخشیون لە ژوری میوان،
ئەو هاوسەرانەی کە دڵیان بە جەنگ بەخشیوەو ئەڵقەیەکیان بۆ جێ ماوە
هەرگیز بە خەڵاتی ڕێزلێنان...... ناگەڕێنەوە بۆ ژیان!!!

جەنگ هەرگیز ڕەحم بە کوژراوەکانی خۆیشی ناکات
تا یەکەم کەس هەبێ، کە ئاڵای سەرکەوتن دائەکوتێ، کێ ناوی کۆتا سەربازی لە بیرە کە گیانی بەخشیوە؟!

جەنگ وەک شەیتانێک دێت و فریوی بردنەوەت ئەداتێ، بەڵام هیچ کەس لە جەنگدا براوە نیە!
ڕەنگە ئەمە تەنها سەربازێک درکی بکات کە بە چاوەکانی لە جەنگ تێگەشتووە

فەیلەسوفێک ئەڵێت:
هەرگیز وەک خۆیان نەگەراونەتەوە، ڕووبارانێک بۆ دەریا ڕۆشتوون و
سەربازانێ بۆ جەنگ و
یارانێک بۆ دیاری غەریب!!!!!

کێ ئەزانێت؟ ڕەنگە پاش جەنگ...
سەربازێک دەستە ماندووەکانی خۆی لەسەرپەلەپیتکە
هەڵگرێت وبیانخاتە سەر نۆتەکانی پیانۆیەک
وە ناوی هەموو منداڵەکانی بەناوی ئەوسەربازانەوە بنێت کەکوشتونی!!!
تا لەباوەشیاندا تۆڵە لەخۆی بکاتەوە...

کێ ئەزانێت ؟؟؟
ڕەنگە تەمەنی گۆرانیەک لەتەمەنی جەنگ درێژتربێت...
وە دەنگی فیشەکێک کەلەسنگدا نقوم بووە ،
ڕەنگە تۆۆنێک بێت ناشاز ،لەناو یەک سەمفونیا
کە ئێستا کەسیتر جگە لە منداڵێکی غەززە یان ڕۆژئاوا
لێی تێنەگات!!!...
.....................

ئەوانەی ئەتوانن دونیا بگۆڕن تەنها ئەو منداڵە بێ نازانەن کە دوای جەنگ جێ ئەمێنن و ئەبنە شاعیر و تا هەتایە بە سەختی دژی جەنگن!!!

01/01/2025

دیاری من بۆ ساڵی نوێی ئێوە بە دەنگە خۆش و نەرمەکەی کاک (زانـا عبدالرحمن)
کاتێکی ئارامی لەگەڵ بەسەر بەرن...

تێبینی/ من کچ نیە، بڕۆ کۆمێنت👇👇👇

31/12/2024

چامان لە پیاڵەکانا
مناڵیمان لە کۆڵانەکانا
ئازیزانمان لە دوورەوەو
خەونەکانمان لە سینەمانا
دڵخۆشیمان بۆ داهاتوو
پێکەنینمان لە وێنەکانا

بەجــــێ هێشــــــت!
................................................

ساڵی نوێتان پیرۆز...

وەک هەمیشە هیواخوازم ساڵی نوێتان پڕ بێت لە کتێب و مۆسیقا و سەفەر...
چونکە ئەمانەم خۆشەوێن بەتایبەت ئەوکاتەی کە لێت ئەدەن!!!

کتێب..... دەستت ئەگرێ و ئەتبات بۆ بەرزاییەکان، فێرت ئەکا لە پێناو پاروێ نەچیتە ناو دۆڵەکانەوە بژیت، لە پێناو مشتێ گەنم نەچیتە قەفەزەوە، فێرت ئەکا تا کەمتر بزانی خۆشباوەڕتریت، وە بزانە ئەوەی بە کتێب گەورە بێت هەرگیز بچوک نابێتەوە!!!

مۆسیقا....... پێشت ئەکەوێت و ئەتبا بۆ ئەو شوێنەی، بۆ ئەو کاتەی، بۆ لای ئەو کەسەی کە هیچ شتێکیتر ناتوانێ بتبات، بەڕای من هەموان لە کۆتایدا ئەمرن تەنها مۆسیقارەکان نەبێ کە نامرن! بەڵکو ئەبنە ئاواز، تابلۆ کێشەکان ئەبنە تابلۆو شاعیرانیش ئەبنە شیعر

سەفەر........ فێرت ئەکا دونیا لەوە گەورەترە مرۆڤ بیخاتە ڕستەوە، کە ئەڕۆیت هەمیشە کەسێکیتر لە ناو جل و بەرگەکەتا ئەگەڕێتەوە..........
...............................................

23/12/2024

دۆمبیا مووسا ناسراو بە تیکێن یا فاکۆلی...
هونەرمەند و داکۆکیکاری سەرسەختی دۆزی ئەفریقا شاکارێک پێشکەش ئەکا بە بەشداری ٨٥۰ هونەرمەندی جیهان و باسی (کوورد) ئەکات...

هونەر لە توانایدا هەیە دوونیا بگۆڕێت، شیعر ئەتوانێ دەسکاری دوونیا بکات، ئاواز لە توانایدا هەیە دونیا داگیر بکات، گۆرانی ڕەنگە دواین حبل الورید بێ دەستی بۆ بەرین، دواین جزیرە بێ پەنای بۆ بەرین، تا هەموو نەگوتراوەکان بە ڕووی شەپۆلەکانا بدەین،
کێ چوزانێ ڕەنگە تەمەنی گۆرانیەک درێژتر بێت لە تەمەنی جەنگ!!!

21/12/2024

من ئیشم بە شەوی یەڵدا و درێژترین شەویساڵ و ئەم شتانە چیە!؟

هەمو شەقامەکانی ئەم شارە شاهیدن

ئەو شەوەی! کە تۆ ڕۆشتی تا ئێستەش تەواو نەبووە!!!
...............................................

من خۆم هەزار شەوی یەڵدا تەنیا بووم

بۆ من هیچ جیاوازیەکی نیە لەگەڵ شەوانیتر،

یەڵدا...

یانی هەستکردن بە تەنیایی،

تەنها یەک دەقیقە زیاتر لە شەوی پێشوو!!!...
................................................

یەڵدا...

هیچ نیە

بۆ ئەوانەی کە شەوی هەزار ساڵەیان چەشتووە!!!
................................................

شیعری چی؟

تۆ کە پرچەکانت ئاڵتونی و کورت ئەکەیتەوە

شاعیرەکان یەڵدا بە چی بشوبهێنن؟!...
..............................................

من ئەمەوێت هەینی بڕۆم...

پێم وا نیە من و تۆ یەکتر ببینینەوە،

لە بیرم نەکەیت،

بمبورە لەوەی کە زۆر ئازارم دا بیت.

(نامەیەک لە پایزەوە بۆ من!)

some tears never dry...!!!

19/10/2024

پەیامی من بۆ ئەو شارەی کە بۆی ئەژین و بۆی ئەمرین (هەڵەبجەکەم)!
هۆشمەند و خانەوادەی هۆشمەند کێن؟
خەونیان چی بوە بۆ ئەم شارە؟
هەڵوێست ۱٦۱✌✌✌

17/10/2024

ئەوانەی دونیا ئەگۆڕن منداڵێ بەرپرسەکان نین،

بەڵکو ئەو منداڵە بێ نازانەن کە دوای شەڕ جێ ئەمێنن و لە سوچی ماڵەکەیانەوە سەرقاڵی بینینی خەونی گەورەن...

ئەوانەی دەسکاری دوونیا ئەکەن مناڵی سەرمایەدارەکان نین

بەڵکو ئەو منداڵە هەتیوانەن کە لە شەڕ جێ ئەمێنن و ئەبنە شاعیر، تا هەتایە بە سەختی دژی جەنگن،

ئێمە دوای ۱٦ ی ۳ ی ۱۹٨٨ هەموو شتێکمان لێسەندرابوویەوە بەڵام لە جانتاکەی هۆشمەند هەمیشە قورئانێک و وێنەیەکی غاندی و وێنەیەکی لۆتەرکینگ هەبوون، بۆئەوەی ئەو پیاوە گەورانەی دونیایان گۆڕی هەرگیز لە ماڵەکەمان نەڕۆن...
.......................................................................................

بزانە (قانع خورشید) نوسەری دیار و (علی حەمە ساڵح) پەرلەمانتاری دیار چی لەبارەی هۆشمەندەوە ئەڵێن 👇👇👇

02/10/2024

هەورامان دەنگ مڵۆ بە ڕەگ و ڕیشەو وێش...

هەڵەبجە - لیستو ( ۱٦۱ )ی ، ژمارە ۱

هۆشمەند مورادی برام

26/09/2024

عەلی حەمەساڵح :

- هۆشمەند لە خۆم شاییستەترە بۆ پەڕلەمان

- بمتوانیایە و دیکتاتۆری نەبوایە بە زۆۆۆر هۆشمەندم ئەبردە پەڕلەمان چونکە بە ڕاستی شاییستەی ئەوێیە

- داوا لە هەر تاکێکی هەڵەبجەو دەوروبەری ئەکەم، پێش دەنگدان لەبارەی هۆشمەند موراد و ڕابردووی، ماندووبونی، قوربانیەکانی، شاییستەیی بۆ ئەوەی دەنگی پێبدات؛ بپرسێت، پاشان دەنگی پێبدات، چونکە نوێنەری ڕاستەقینەی هەڵەبجەو دەوروبەریەتی...

عەلی حەمەساڵح
ئەندام پەڕلەمانی کوردستان و خاوەنی زۆرترین دەنگی هەڵبژاردن لە ڕابردوودا

25/09/2024

ئەی هەڵەبجە...

کەسێک بکە بە نوێنەری خۆت کە هێندەی خڕۆکە سوورەکانی ناو خوێنی، ناوی تۆ و ئازارەکانی تۆ بە دەمارەکانیا گەڕابێ

کەسێک بنێرە پەڕلەمان کە پێشەکی گرنگترین شتی ژیانی بەخشیبێ بە تۆ، تا کەس نەتوانی دەستەمۆی بکات، هیچ شتێ نەتوانێ بیکڕێ

ئەم کووڕەت بنێرە پێشەوە ، دڵنیابە هیچ کەس ناتوانێ بیکڕێ

مرۆڤ یا نابێت ببێتە جەنگاوەر، یا کە بوو بە جەنگاوەر ئەبێ شمشێرەکەی تیژ بێت

ئەمجار هۆشمەند هەڵبژێرە ، من ئەزانم شمشێرەکەی ئەڵماس ئەبڕێ!

هۆشمەند مراد/ هەڵەبجە
لیستی هەڵوێست/ ژمارە ۱

23/09/2024

عشق یا ددان ئێشە؟
ئەم چیرۆکە بخوێنەوە ئەزانیت کامیان بە ئازارە...
ــــــــــــــــــــــــــــــــــــــــــــــــــــــــــــــــــــــــــــــــ

چیرۆکی من و گۆرانی (ئەنجێلای) خۆرخێ فیلیسیانۆ

ڕاستە من لە کۆلێژی پزیشکی گشتی بووم، وە کۆلێژەکەمان لە کۆلێجی پزیشکی ددان جیابوو، بەڵام هاوینێکیان بۆ ئەزمون وەرگرتن لە کلینیکێکی ددان کە ناوی (ئەنجێلا) بوو وەک یاریدەدەری پزیشکەکە دەستم بە کارکردن کرد، پزیشکەکە کە پیرەمێردێکی مەسیحی بوو، زۆر میهرەبان و دڵ و دەرون ساف بوو، زیاتر ئیشی دەرکێشانی ددانی ئەکرد، وە ئەم کارەشی بە جوانی و هونەرێکی تایبەت ئەنجام ئەدا، دروست وەک نمایشێک وابوو بۆ ئێمە، ڕۆتینی ئیشەکە وەهابوو، کە سەرەتا گۆرانی بەناوبانگی (خۆرخێ فلیسیانۆ)، بە ناوی (ئەنجیلا) پەخش ئەکرا، وە کاک دکتۆریش لە کاتێکا کە بە لێوو بەبەرخۆیەوە گۆرانیەکەی ئەوتەوە تا ڕەگی ددانەکە ئەڕۆشت بە قووڵی و لە کۆتاییا، گۆرانیەکە بەم شێوە تەواو ئەبوو (بۆ بەجێت هێشتم، بۆ تەرکت کردم ئەنجێلا... ئەنجێلا...) ، ددانی نەخۆشەکەی دەر ئەهێناو، لە لوتکەو تەبەقەی بەرزی گۆرانیەکەدا، ئێمەو خۆرخێ و کاکتۆر پێکەوە هاوارمان ئەکرد ئەنجێلااااا ئەنجێلاااااا، ئەمە وای ئەکرد ناڵەی نەخۆشەکە لە نێوان ئەو هەموو دەنگە وون ببێت.
کاک دکتۆر هەمووجار ئەیوت عەشقت نەچەشتووە تا ددان ئێشەت بیر بچێتەوە، ئەوانیش ئەیان ووت ددان ئێشەو نەچەشتووە تا عشقت بیر بچێتەوە!!!...

لە ڕاستیا قاتی خوارەوەی بیناکەمان نوسینگەی محامیەک بوو، کە من عشقێکی ئەفسانەییم لەگەڵ خانمی مەحامی پەیدا کردبوو، نازانم ئەوکات برادەران ئەیانوت کاتێ ئەزانی عاشقیت، کە چویتە بەردەم کەسێ دڵت خێرا لێ بدا، منیش بەوەیا زانیم عاشقم، لە ڕاستیا من لەبەردەم نیوەی عالەما دڵم خێرا لێئەدا هههه، ئەڵبەت چونکە خۆم شەرمنم، بەهەرحاڵ چونکە تەمەنی ئەو لەتەمەنی من زیاتر بوو، زۆریش زیاتر، نەمەوێرا ئاشکرای بکەم، تا ئەوەی کە ڕۆژێک کاک دکتۆرم تێگەیاند، دکتۆر ووتی: (ووشیار جیان ئەسڵەن خودی ووشەی تەمەن ووشەیەکی گەمژانەیە، چ جای ئەوەی بەهۆیەوە عشقێکی ئەفسانەییت لەدەست بدەیت، وەک من کە لە زەمانی زانکۆمدا عشقەکەم (ئەنجێلا)م لەدەست دا...)
قسەکانی سینیەرەکەم کاریگەر زۆری لەسەر جێ هێشتم، وایکرد کە من ڕۆژێ بڕیارم دا ئیتر پێی بڵێم، دیاریەکم بۆ خانم کڕی کە کتێبێ (دواهەمین هەناری دوونیا)ی بەختیار علی Bachtyar Ali بوو، ئەنجا پرچم ڕاست و چەپ داهێناو لەگەڵ جێڵ و عەتر و تەرتیبات چوم بۆ لای...

ووتم: ماوەیەکە شتێ لە قوڕگم گیراوە...
ووتی: ههه
ووتم: ئاخر ئیمانو هەبێ، (ههه) وەڵامە؟
ووتی: تا ئێستە سەیری خۆتت کردووە لە ئاوێنا؟
ووتم: بەڵێ

ئەمجاڕ دووای ئەوەی بەرز دای لە قاقای پێکەنین، کەمێ جددی بویەوەو برۆیەکی بەرز کردەوە ووتی:
(تۆ کوڕێکی زۆر شیرینی ها، هەندێجار واقع ئازار بەخشە، بەڵام چی بکەی ئەبێ بووترێت، چاوەڕێی چی ئەکەی؟ تۆ هێشتا خوێندکاریییی!!!).
فشەی پێم ئەهات، بەکورتی یانی هێشتا مناڵیت...

ئەو قسە زۆر منی خستە بیرکرنەوەوەو ئازاری دام، تا وای لێکردم چەندین ڕۆژ لە جیاتی (سمنت) ی ددان پڕکردنەوە (لاک)م بەکار ئەهێنا بە هەڵە، بەڵام کاک دکتۆرم هەمیشە هەوڵی ئەدا نەم شکێنێتەوە، بەڵکوو بە پێچەوانەوە زۆر ڕۆحیەتم بەرز بکاتەوە، وەڵا خوای من و تۆ کردی ڕۆژێک خانمی مەحامی هات بۆ ئەوە ددانی هەڵکێشێت.... کاکتۆر داوای کرد کە من ئەو کارە ئەنجام بدەم....
خانم بە ددان ئێشەیەکی زۆرەوە هاتە عەیادەو کە منی بینی هەڵوێستەیەکی کرد، بەڵام چارەیەکی نەبوو، ئەشیعەی ددانەکەی دایە دەستم و لەسەر بێدەکە ڕاکشا
ئاشکرا دیار بوو کە ددانی حەوتەمی خوارەوەی خراپ بوبو(Lower 2nd Molar)، منیش وەک ڕۆتینی هەمیشەیی، گۆرانی ئەنجێلام خستە سەر و هەوڵی تەواوم دا کە ددان کێشانەکەی ڕۆمانسی بکەم، بەڵام ڕەگی ددانەکەی ئەوەندە بەهێز و ڕەق بوو، گریانو فرمێسکی خانمە محامیەکەم بینی...

کاتێ پڕۆسەکەم تەواو کرد خانم بە ناڕەحەتیەکی زۆرەوە کلینیکەکەی بەجێ هێشت و ڕۆشت، بەڵام سبەی هاتەوە، چونکە ئازاری ددانەکەی هیچ باش نەبوبو، کاک دکتۆر سەیری ئەشیعەی ددانەکەی کرد و پێی ووت:

(ئەو کوڕێکی زۆر شیرینە ها، هەندێجار واقع ئازار بەخشە، بەڵام چی بکەی ئەبێ بوترێت، بەداخەوە لە جیاتی ددانی شەشەم ددانی حەوتەمی هەڵکێشاوی بە هەڵە، چاوەڕێی چی ئەکەی؟ ئەو هێشتا خوێندکارە!!!)

20/09/2024

کچی خۆم...

من تێگەشتم ئەوەی زیاتر ئەیوت (نازانم)... لە هەموان زیاتری ئەزانی...

ئەوەی بۆ هەمووشتێ ئەیوت ئەزانم... لەهەمووان نەزانتربوو...

ئەوەی زیاتر قسەی گاڵتەی ئەکرد... جددیتر سەیری ژیانی ئەکرد...

ئەوەی زیاتر پێئەکەنی... دڵتەنگی زیاتر ناخی ئەخوارد...

ئەوەی ئارامتر ئەدوا... ووشەکانی بەهێزتر و کاريگەرتر ئەیبڕی...

ئەوەی کە زیاتر ئەیوت (هەڵەم کرد )... لە هەموان (باوەڕبەخۆبونی) بەهێزتربوو...

ئەوەی کە بەهێزترین بوو... کەمترین خۆی نمایش ئەکرد...

ئەوەی کە لە بەردەم جیاوازی مرۆۋەکان زیاتر ئەوەستا... زیاتر خاڵی هاوبەشي لەگەڵيان پەیدا ئەکرد...
کچم ئەوەی زیاتر ئاسان و ساددە بوو... ڕۆحی لە هەموان قورستر بوو

ئەوەی بێدەنگتربوو... زۆرترین تەوژمی نهێنی لەدەرونیا مەوجی ئەداا...

ئەوەی قاقاکانی بەرزتر بوون... لەهەموان ئەفسوردەتر... دڵتەنگتر... بەحەسرەتتربوو...

من زۆر باش تێگەیشتم..............................................................

چەند دێڕێك لە نامەی 15 بۆ کچەکەم
تێبینی/من کچم نیە

14/09/2024

بەیانیت باش گوڵم...
دونیا جوانە بەڵام تازە بە من و تۆ چی ئیلیانا!

لە گۆڕستانێکدام لەژێر نوری مانگەشەوەوە ئەم نامەیەت بۆ ئەنووسم، کە گۆڕەکانی ئەوەندە ڕۆشنن، یەک دڵۆپ خوێن بەسە بۆ زیدوبونەوەی مردووەکانی،
نامەوێ بۆت بنوسم کە دڵتەنگم، بەڵام گۆرانیەک کە تۆم بیر ئەخاتەوە شەو تا بەیانی چەندینجار گوێی لێ ئەگرم، ئاوازەکان بێ ڕەحمن ئیلیانا، بێ ویستی خۆمان ئەمانگەڕێننەوە بۆ ئەو زەمین و زەمانەی کە خۆیان ئەیانەوێ، لێمان ئەدەن و هەر ئەچینەوە باوەشیان، برین ئەکەنە گیانمانەوەو چەپڵەیان بۆلێ ئەدەین، ئەمانکوژن و سوپاسیان ئەکەین، کە مێردمناڵین هەموان ئەترسن لەوەی فیشەک و کوشتن و چەقۆ ببینین، کەچی کەس ناترسێ لەوەی ئەو هەموو ئاوازە ئەبیستین کە باسی دڵتەنگی و ئازارو دڵشکان ئەکەن!

نازانم تۆ ڕۆژگارت چۆن تێئەپەڕێنی ئێستا بەڵام لای من ژیان هەر ڕۆژێک بوو لەدوای ئەو ڕۆژەوە پاییزێکی درێژ دەستی پێکرد،
بۆ من هەموو شتێک سەخت و غەمگین تێپەڕی جگە لەو ڕۆژەی کە بۆ یەکەمجار چاوەکانی تۆم دی،
سوێند ئەخۆم لەو کاتەوە بۆ ئەوەی ئەو وێنەیە لە زیهنمدا بمێنێتەوە تا ئێستا سەیری چاوەکانی کەسم نەکردووە،

دەمێکە نانوسم و خوم داوەتە زانست، لە شیعر و لە هونەر و لە خۆشم دوورم
بەڵام ڕاستی بڵێم هەرکات لە تەنیشت تۆوە بووم بۆ خۆی شیعر بوو، لەناو تۆیا شتانێکی ئەبەدی هەبوون کە مرۆڤ حەزی ئەکرد باوەڕ بە شیعر بهێنێت،
من شیعر نازانم، بەڵام ئەزانم ئەم ووشانەی بۆتۆیان ئەنووسم یەکتریان خۆشەوێ

نامەوێ وەک شاعیرانیتر بۆت بنوسم باش نیم بەڵام وەک جگەرەیەک وەهام کە گەشتبێتە کۆتایی هیچ گرنگ نیە لە تەپڵەکێکی زێڕدا بکوژێتەوە یان قەراغ جۆگایەکی کۆڵانەکەمان

بیرتە ئەتووت دەستم بگرەو وەها خۆشت بوێم کە لە سنگتام، کە ئەگەر نەبم ئەمریت!!!
ئێستا لە هەر شوێنێکی دەورم ڕا ئەمێنم و تۆی تیا نیت، بەشێک لە دەرونم ئەمرێت
بیرتە هەمووجار ئەتووت بیرکاری لە عیشقدا جیاوازە! دوو، یەکی لێ دەرکەی، هیچی نامێنێتەوە!
ئێستا ئازارەکانم لێ بتەکێنی هیچم پێوە نەماوە!
ئەتووت تۆ وا دابنێ هەموو شتێکیان لێ سەندوینەتەوە، نانیان لە سفرەو خەویان لە سەرینەکەمان برد، ئەی باشە چی لە خەونەکانمان ئەکەن؟
ئێستە خەونەکانم ئەوەندە لێکترازاون نازانم هی منداڵیمن یا گەنجێتی
بێدەنگی ئەوەندە داگیری کردووم هەموان دەنگی خەونەکانم ئەبیستن

هەمیشە ئەتووت: مرۆڤ ئەبێ کەسێکی هەبێ کە دەریا، ئاسمان، تەنانەت پەلکەزێڕینەشی بە یەک قەڵەم بۆ بکێشێت!!!
ئێستا بێ تۆ تەنانەت بەهاریش ئەڵێی تابلۆیەکەو بەقەڵەم ڕەساس کێشراوە!!!

نامەوێ وەک شاعیرانیتر بۆت بنوسم باش نیم بەڵام وەک ئەوەی کە لە نێوان لاپەڕەکانی کتێبێکی غەمگینا جێهێڵرابم! چاوەڕێی ڕەحمی نوسەرێ یا خوێنەرێ ئەکەم لە دونیایەکا هیچ شتێ وەک کتێب تەنیا نیە...

من یەک جار چومە ناو کتێبێکەوەو تا ئێستەش لەوێم!!!
بیرتە یەکەم ڕۆمانی خۆشەویستیم خوێندەوە، نەخۆش کەوتم، تام گرت؟ بە بەردەوامی ئەڕشامەوە تا ئێوارەی ئەو ڕۆژە؟
مرۆڤ یەکجار دڵی ئەبرێ ، یەکجار لە تەمەنیداو، بۆ ئەبەد لەو شوێنەی دڵی براوە ئەمێنێتەوە
ئێمە هەمومان لە حەفتا ساڵیدا بە برینێکەوە کە لە بیست ساڵیدا کەوتۆتە گیانمانەوە ئارام ئارام ئەمرین،

هەمیشە ئەمووت جگە لە دڵت شوێنێکی ترم نیە، بێ خانەو لانەم مەکە
ئێستا وەک باڵندەیەکی کوێر هەر شەوەو لە هێلانەیەکا ڕۆژ ئەکەمەوە
کە خەبەرم ئەبێتەوە یان لە هۆتێلێکم لە بەرلین یان لە چادرێکم لە کەنار دەریای ڕەش یا لە باخیرەیەکم لە ئیکۆمەنیزیا یا لە کەمپێکم لە کاڵاس

هەموان ئەپرسن ژیان چی لێ کردی ئەوەندە غەمگین ئەنووسی؟ ئااااە ئیلیانا... ژیان هیچ کات بەبەری ئێمە نەشیا هەرچۆن بڕیمان و دوریمان، نازانم ئەم هەموو جوانیەمان چۆن پێکرا لەم دوونیا ناشرینەدا، ئەو هەموو میهرەبانیەمان چۆن پێکرا لەژێر برۆکانی ئەم دونیانە مۆنەدا، وەرە ببینە ئێستا چەند بێ زەوقە جیهانێک کە من و تۆی پێکەوە نەدی

ڕۆژگاری ئێمە سەخت بوو ئیلیانا هەر پەردەیەکمان لادایەوە لە پشت پەنجەرەکەیەوە شەوبوو!
باڵندەیەک بووم کە هەر زوو ئاسمانەکەیان لێ دزیم،
مەجبوور بووم ئەوێ جێ بهێڵم کە زانیم فڕین لەو شارە قەدەغە کراوە،
ئەمویست تۆ لە هەموو شتەخراپەکانی ژیانم دوور بخەمەوە تەنانەت خۆشم،
بێ خواحافیزی ڕۆشتم، ئاخر مرۆڤ هەرگیز ناتوانی ئەو کەسەی کە خۆشی ئەوێت بۆ دواهەمێن جار سەیری بکات،
من ئەڕۆشتم و تۆش ڕۆحت لە کراسەکەم گیر بووبوو

ئێستا نامەوێ ئەدای نوسەرانیتر دەربکەم و بڵێم بیرت ئەکەم بەڵام وەک وێنەیەکی لەتکراو کە بیری لەتەکەیتری ئەکات، وەهام.
نامەوێ بڵێم دڵتەنگم بۆت بەڵام لەم شارە گەورەیەدا کە تۆ تەنانەت یەک ڕۆژ پێت تێنەخستوە، نازانی بە شوێن تۆدا گەڕان چەند سەخت و غەمگینە...

بیرت نەچێ نامەیەکم بۆ بنێرە نامەیەک بەڵام زەرفەکەی تێر ماچ بکە هەر بەو لێوانەی کە چایەکەت ئەنۆشی خەریکبوو دڵی پیاڵەکە بوەستێ

لە کۆتاییدا ، ئەگەر لەبیر کردن هونەر بێت، من بۆ لەبیرکردنی تۆ بێ هونەرترینم،
ئاگات لە جوانیەکانت بێت، دەستبەرداری خەونەکانت نەبیت، هاوڕێی باشت هەبێت، مرۆڤ ئەبێ کەسێکی هەبێ کە دەریا، ئاسمان، تەنانەت پەلکەزێڕینەشی بە یەک قەڵەم بۆ بکێشێت!!!

ماڵئاوا...

18/07/2024

چیرۆکی من و چارلی پاکەر...

((ئەوە لەبیر نەکەیت کە هەرگیز درەنگ نیە بۆ ئەوەی کە ببیتە ئەو کەسەی کە ئەتەوێت ببیت...))
ئەوە کۆتا ڕستەی ئەو نوسینە بوو کە لە کۆتا پۆستم بۆ جەژنانەی ئێوە نوسیبوم، کە چومە سەر جێگەی نوستنەکەم هەر بیرم لێئەکردەوە، بیری (کەمانچە)کەشم ئەکرد کە لە کوردستان جێم هێشتبوو تا خەوم لێکەوت، خەونم بە (چارلی پارکەر)ەوە بینی، کە کەسێکی زۆر هەڵکەوتو بوو لەم شارە ئەژیا کە منی لێم، لە ژەنینی ساکسیفۆندا کەس نەئەگەشتە تۆزی بەرپێی، لە خەومدا لە (نیومۆرنینگ کڵەب)دانیشتبوم و چارلی ئاوازێکی جازی پێشکەش ئەکرد...

لێی نزیک کەوتمەوەو ووتم، هێی چارلی تۆ بێ وێنەیت جەللاد، بە ڕای تۆ ڕۆژێک منیش ئەتوانم وەک تۆ لە گروپێکی (جاز)دا عەزف بکەم؟
چارلی ئاوازەکەی ڕاگرت و بززەیەکی کردوو ساکسیفۆنەکەی ئەدایە دەستم، ووتم نا نا ئەزانی من هێشتا نازانم ساکسیفۆن بژەنم،
کاتێ کە ئەم قسانەم ئەکرد سەیری دەستەکانی خۆمم ئەکرد پیر بوبون ، ئەلەرزین، چرچ و لۆچ بوون، لە خەوەکەمدا نزیکەی هەشتا ساڵ تەمەنم بوو، بەڵام هێشتا نەمئەزانی ساکسیفۆن بژەنم، ئەزانی ئەوە یانی چی؟!! یانی کارەساااات.
من لە منداڵیەوە ئارەزومم ئەوە بوو بتوانم ڕۆژێک ساکسیفۆن بژەنم، بەڵام هەرگیز نەمتوانی، لە ڕاستیا هەلی ئەوەم بۆ نەڕەخسابوو، کاتێ بیست ساڵ بووم بە خۆمم ئەوت ئەگەر بگەڕامایەتەوە بۆ مناڵی حەتمەن فێری ژەنینی ساکسفۆن ئەبووم، کاتێک بومە بیست و پێنج ساڵ دیسان ئەم وت ئەگەر بگەڕامایەتەوە بۆ بیست ساڵی ئەوا بە شوێن ساکسیفۆن ژەنیندا ئەڕۆشتم، بەمشێوەیە ئەم قسەیەم تا سی ساڵی و زیاتریش بە خۆم ئەوت، هەمیشە وا بیرم ئەکردەوە کە ئەگەر هیچ نا پێنج ساڵ پێشتر بە دوای خەونەکەمدا بڕۆشتمایە ئێستا گەشتبومە شوێنێک...
ڕاستی خەوی دوێشەو زۆر بیرکردنەوەمی مەشغوڵ کردووە، لە خەوما تەنانەت دەستەکانم ئەلەرزین و پەنجەکانم بێ هێز بوون وە ئەو تەمەنە بۆ دەست پێ کردن زۆر درەنگ بوو، بەڵام تەنیا بیر لەوە ئەکەمەوە نەکا ببمە هەشتا ساڵ و هێشتا فێری ژەنین نەبوبم و دیسان بە خۆم بڵێم ئەگەر بە حەفتاو پێنج ساڵی دەستم پێ بکردایە ئێستا ئەمتوانی لە گروپێکی جاز دا عەزف بکەم!!
ڕەنگە ساڵی داهاتو بچم بە شوێن حەزوو ئارەزوەکەمدا، بەڵام مرۆڤ نازانێ تا کەی ئەژی و زیندوو ئەبێت، ئەگەر (چارلی پارکەر) وەک من بوایەو تەنها حەسرەتی ڕابردوی بخواردایە و وەستابایە هیچ کات نەدەبویە ئەفسانەی جاز و ساکسیفۆن ژەنین، ئەزانی بۆچی؟! چونکە ئەو تەنها (سی و پێنج) ساڵ ژیا!!!!!!.........................
ئەوە لەبیر نەکەیت کە هەرگیز درەنگ نیە بۆ ئەوەی کە ببیتە ئەو کەسەی کە ئەتەوێت ببیت...

*وێنەکە 22/3/2009 لە گەلەریە بچکۆلەکەی م.حسن مراد ی برام کە لەوێ قوم قوم لەزەتمان له تابلۆ و مۆسیقا ئەبرد، پێک پێک شیعرمان ئەنۆشی

some tears never dry...!!!

16/06/2024

جەژنی قوربانتان پیرۆز بێت...
خزم و دوست و هاوڕێی پەیجەکەم، لەم جەژنەیا تەنیا ئەتوانم هەندێ هیواو ئارەزوی سادە سادە بۆ خۆم و تۆش بخوازم،
کە بەشێک بوو لە (نامەیەک بۆ پەیدا گیان)..................

هیوادارم شەوان خەونی باش ببینی، بەیانیان بە تاقەت و ووزەی ئەرێنیەوە هەستیت و بەتانیە سپیەکەت دەق بگریت و جلەکانت ئوتو بکەیت، پەنجەرەی ژورەکەت بکەیتەوەو کاتێ کە چایةکەت ئەنۆشی هەتاو بێتە سەر ڕومەتت دانیشێت، ئەخوازم کتێبی باش بخوێنیتەوە، ژمارەی کراسەکانت لەکتێبەکانت زیاتر نەبن! سەیری فیلمی باش بکەیت، فیلمەکان بەناوی ئەکتەرەکانیان نەناسیتەوە، گوێ لە گۆرانی با ش بگریت، عەتری باش بۆن بکەیت، سەیری کەناڵی تەلەفزیۆنی باش بکەیت، ئەگەرنا پەنا ببەیتە بەر ڕادیۆ باشترە! لەگەڵ ئینسانی گەورەو باش قسە بکەیت.

ئارەزومە بەو کەسانەی کە خۆشت ئەوێن بڵێیت خۆۆۆشم ئەوێیت، ئەگەرنا ئومێدەوارم توانای ئەوەت هەبێت کە پێکەنینی دەستکردو نواندن بکەیت، ئارەزومە بە ئاسانی دان بنێیت بە هەڵەکانتاو داوای لێبوردن بکەیت، شانازی بە کەوتنەکانتەوە بکەیت. بزانە تەنیا ئەوانە ناکەون کە هەرگیز هەڵنەساونەتەوە!!!

هیوادارم جیاواز بیت و کە جیاواز ڕێ ئەکەی گوێ بەو چاوانە نەدەیت کە ئەچەقن بە گیانتا، خۆت بیت نەک وابزانی توانای هەڵبژاردنت هەیە بەڵام ئەوەی هەڵی ئەبژێری پێشتر بۆت دیاری کرابێت و بە پێی ئەو بیرکردنەوانە بێت کە زۆۆرینە کردویانەتە زیهنتەوە،
تەنانەت ئەو شتانەی بە جوانیان ئەزانیت دەرخواردت درابێت!
فێر بیت کە هەندێجار تەنیا بیت و لە تەنیاییا هەموو پرسیارەکانی زیهنت لە خۆت بکەیت، هەرگیز وەک گەمژەکان بە یەکەم وەڵام ڕازی نەبیت، چونکە هەمیشە یەکەم وەڵام ڕاکردنە لە ڕاستی و مانەوەیە لە ناو نەزانیدا...

ئەوە لەبیر نەکەیت کە هەرگیز درەنگ نیە بۆ ئەوەی کە ببیتە ئەو کەسەی کە ئەتەوێت ببیت...

جەژنت پیــــــــرۆز.