12/04/2026
کاریگەریا ژیانا مۆدێرن و فشارێن دەروونی ل سەر ساخلەمیێ.
د جیهانا ئەڤرۆ دا، کو ب جیهانا لەزاتیێ و تەکنەلۆژیایێ دهێتە نیاسین، شێوازێ ژیانا مە ب ئاوایەکێ مەزن هاتیە گوهوڕین. هەرچەندە ئەڤ پێشکەفتنە کارێن مە ب ساناهی دکەن، بەلێ ل لایەکێ دی بارەکێ گران ئێخستیە سەر ساخلەمیا مرۆڤی ب تایبەتی ئەندامێ هەرە گرنگ کو دلە! ئەڤرۆ نەخۆشیێن دلی ئێدی تنێ بۆ ژیێ مەزن نینن، بەلکو گەنجێن مە ژی د بن مەترسیەکا مەزن دانە ژبەر وێ جەنجالیا د ناڤ باژێڕی دا دهێتە دیتن.
فشارێن دەروونی (ستێرس): دوژمنێ ڤەشارتی!
ئێک ژ مەزنترین کێشەیێن ژیانا باژێڕڤانیێ و مۆدێرن، فشارێن دەروونی یێن بەردەوامن. د جیهانا کار و هەڤڕکیێ دا، مرۆڤ یێ د بن فشارەکا دەروونی یا بێدەنگ دایە. دەمێ مرۆڤ دکەڤیتە بن ڤێ فشارێ، لەشێ مرۆڤی هندەک هۆرمۆنێن تایبەت وەکی ئەدریناڵین و کۆرتیزۆڵ دەر دهاڤێژیت. ئەڤ هۆرمۆنە ل دەمەکێ کورت دا دبیت هاریکار بن، بەلێ ئەگەر فشار هەر یا بەردەوام بیت، دبیتە ئەگەرێ بلندبوونا فشارا خوینێ (زەختێ) و تێکچوونا لێدانێن دلی. ئەڤ ستێرسە، ژیانەکا بێدەنگ ل ناڤ دەمارێن خوینێ دەستپێدکەت و مرۆڤ هەست پێ ناکەت هەتا دگەهیتە قوناغەکا مەترسیدار.
پیسبوونا ژینگەهێ و کاریگەریا وێ:
ئەگەر ئەم ل باژێڕێن مەزن بنێرین، دوکێلا ترۆمبێلان، کارگەهان و پیسبوونا هەوای ئێکە ژ ئەگەرێن سەرەکی یێن تێکچوونا کارێ دلییە. ئەو تەنۆلکەیێن بچیک یێن د هەوایێ پیس دا هەی، ب رێکا سیپەلکا دچنە ناڤ خوینێ و دبنە ئەگەرێ هەودانا (ئیلتیهابا) دەماران. ئەڤە ژی رێکا جەڵتەیا دلی خۆش دکەت. لەورا، ژینگەهەکا پاقژ نە تنێ بۆ سیپەلکا، بەلکو بۆ پاراستنا لێدانێن دلی ژی یا فەرە و پێدڤییە مرۆڤ جاران قەستا سروشتی بکەت.
خوارنا نەساخلەم:
د ناڤ باژێڕی دا، زۆربەیا خوارنان بووینە فێست فوود کو تژی رۆن و خویێنە. ئەڤ خوارنە دبیتە ئەگەرێ قەلهەبوونا زێدە و بلندبوونا کۆلێسترۆلی د ناڤ خوینێ دا. ژ لایەکێ دی ڤە، زۆربەیا کارێن مە بووینە روینشتن ل پشت مێزان یان د ناڤ ترۆمبێلان دا. وەرزش نەکردن، ئەڤەژی وە دکەت کو ئەڤ چەوریە د ناڤ دەمارێن دلی دا نیشتەنی ببن و رێکا خوینێ تەنگ بکەن، کو ئەڤە ژی مەترسیا سکتەیا دلی زێدە دکەت.
چەوا دلی خۆ بپارێزین؟
بۆ هندێ دلەکێ ساخلەم مە هەبیت و ژ ڤان مەترسیان دویر بکەڤین، فەرە ئەڤ گوهۆڕینە د ژیانا مە دا هەبن:
۱. وەرزش: رۆژانە کێمتر ۳۰ خۆلەکێن پیادەچوونێ دشێت مەترسیا نەخۆشیێن دلی ب رێژەیەکا زۆر کێم کەت.
۲. خوارنا سروشتی: زێدەکرنا کەسکاتیێ و فێقی و کێمکرنا خوێ و شەکرێ ئەرکەکێ فەرە بۆ هەر مرۆڤەکی.
۳. رێگری ل فشارێ: پێدڤییە مرۆڤ دەمەکی بۆ بێهنفەرهیێ و دویرکەفتن ژ جەنجالیێ دابین کەت دا کو فشارا ل سەر دلی کێم ببیت.
۴. پشکنینا دەوری: ب تایبەت بۆ وان کەسێن کو د خێزانا وان دا نەخۆشیا دلی هەبیت، پێدڤییە زوو زوو سەرەدانا دکتۆری بکەن.
د.روژین مهدی
https://www.calameo.com/read/000139418f3509c8b200c?fbclid=IwZnRzaARIqR9jbGNrBEeXoGV4dG4DYWVtAjExAGJyaWQRMUJ6dllScnBKWTlaYmhMRGpzcnRjBmFwcF9pZBAyMjIwMzkxNzg4MjAwODkyAAEe6TrICI4lxVsNfiNewCWOXYOkJ9gkjxCi0YU5jR8IYwXkZQDYdZFb2n7g98g_aem_z8LEYJdKQ0JxVU5t3TbDYA
