https://www.facebook.com/154167271757580/

Dlovan M F Jalal, Salahaddin Street, Irbil (2025)

26/09/2025

پێشوازیکردن لە سەرۆكی فیدراسیۆنی نێوده‌وڵه‌تی مافه‌كانی مرۆڤ..
تۆماس شیرماخەر: "ئومێد دەخوازم ئەزموونی كوردستان لە فه‌راهه‌مكردنی دادپه‌روه‌ری و دیموكراسیه‌ت و یه‌كسانی و پێكەوەژیان، بگوازرێتەوە بۆ بەغدا و هەموو ناوچەكانی ڕۆژهەڵاتی ناوەڕاست "

رۆژی پێنجشەممە ٢٥ / ٩ / ٢٠٢٥، پێشوازیمانکرد لە بەڕێز "تۆماس شیرماخەر" سەرۆكی فیدراسیۆنی نێوده‌وڵه‌تی مافه‌كانی مرۆڤی ئەڵمانی ( IGFM-ISHR ) و شاندێكی یاوەری.

لە دیدارەکەدا، سەرۆكی فیدراسیۆن، خۆشحاڵی و سەرسامی خۆی بەرامبەر بە کولتوور و مێژووی دێرین و دەوڵەمەندی شاری هەولێر و ئەو پێشكەوتن و ئاوەدانی و ئارامی و ئاسایش و پێکەوەژیانە دەربڕی، کە لەو شارەدا هەیە و بۆتە نموونە بۆ هەموو ناوچەكە.
پاشان ئاماژەى بەکار و بەرنامەکانیان دا لە ئەنجامدانى کۆمەڵێک پڕۆژە و کارى هابەش لەگەڵ دەزگای خێرخوازی بارزانی.

جێگەی باسە، تۆماس شیرماخەر، سەرۆكی فیدراسیۆنی نێوده‌وڵه‌تی مافه‌كانی مرۆڤە، كه رێكخراوێكی ئه‌ڵمانییە؛ هاوكات سه‌رۆكی په‌یمانگه‌ی ئازادی ئایینیشه‌؛ ناوبراو پیاوێكی خاوه‌ن پێگه‌یه‌ له‌ ئه‌ورووپا و تۆڕێكی په‌یوه‌ندی فراوانی لە جیهان هەیە.

25/09/2025

بەخۆشحاڵییەوە تاقیکردنەوەى پێش کۆتایى(OSCE)ی قوتابییانی قۆناغی سێیەمی پڕۆگرامی کارگێڕی تەندرووستیی ـ ئەنجومەنی باڵای کوردستان بۆ پسپۆڕییە پزیشکیەکان، ئەنجامدرا. بەمجۆرەش، گەشتی قوتابییانی بۆرد هەنگاوێک زیاتر چووە پێشەوە.
جێى خۆیەتى لێرەدا سوپاسێکی تایبەت پێشکەش بە مامۆستایان و بەرپرسی سەنتەر بکەین، لە هەمبەر پشتگیرى بەردەوامیان بۆ پڕۆسەکە.

25/09/2025

زیندوێتى نەتەوەیەک

دواى سەدان ساڵ چەوساندنەوە و هەوڵى لەناوبردن، بەکارهێنانى جۆرەها رێگا بۆ لەڕی لادانى رۆڵەکانى نەتەوە، دواى دەیان و سەدان خیانەت و فێڵی رەنگاو رەنگ بۆ شێواندنى مێژوومان، بەڵام هێشتاش ئەم نەتەوەیە هەر لەسەر پێیە و بەدواى ئامانجە باڵاکانییەتى. ریفراندۆم سەلماندى و بە هەموو دژبەرانى کوردستانى گوت،
ئێمە هەر زیندووین و بە بەردەوامى تێهەڵدەچینەوە.

لە ساڵیادى ریفراندۆمدا، شکۆمەندى بۆ ئەو گەلەى کە چۆکى دانەدا و بە سەرکردایەتى سەرۆک و پێشمەرگەى کوردستان، سەرۆک مەسعود بارزانى، ئازادانە و ئازایانە خواستى میژوویى خۆى دەربڕی.

22/09/2025

بەسەرکردنەوەى نەخۆشخانەى رزگارى و رێزلێنان لە بەڕێوەبەرى خزمەتگوزارى
نەخۆشخانەى رزگارى یەکێکە لە ستوونە هەرە مەزنەکانى پێشکەشکردنى خزمەتگوزارى تەندرووستى بە خەڵکى هەولێر. لەم سۆنگەیەوە حکومەتى هەرێم گرنگییەکى تایبەتى پێدەدات.
بە یاوەرى هاوڕێیانم، سەردانێکى نەخۆشخانەکەمان کرد و چاومان بە بەڕێزان "دکتۆر لاوەند سەردار میران" بەڕێوەبەر و هەروەها دەستەی کارگێڕی نەخۆشخانەکە کەوت. دواى بەسەرکردنەوەى بەشەکانی، لەنزیکەوە لەگەڵ پزیشک و فەرمانبەران دواین و گوێمان بۆ سەرنج و راو بۆچوونەکانیان راگرت.
دواتر لە هۆڵی نەخۆشخانە، لە رێوڕەسمێکدا بە بۆنەى کۆتاییهاتنى ئەرکەکەى، سوپاس و پێزانینمان پێشکەش بە بەڕێز "فارس پیرۆت" بەڕێوەبەرى خزمەتگوزارى کرد، کە لە ڕابردوودا و بۆ ماوەیەکی زۆر، خزمەتێکى بەرچاوى پێشکەشکردووە و جێ پەنجەى دیار بووە لە نەخۆشخانەکەدا؛ هیوامان خواست لە هەموو ئەرکەکانى ژیانیدا سەرکەوتوو بێت.
دواتر، فەرمانى دەستبەکاربوونمان پێشکەش بە بەڕێز "چالاک شێخ بزێنی" کرد، تا وەکو بەڕێوەبەری نوێی خزمەتگوزاری نەخۆشخانە دەستبەکاربێت؛ وێڕاى پیرۆزبایى ئەم ئەرکە نوێیە، هیواى سەرکەوتنمان بۆ خواست.

21/09/2025

راگەیاندن و تەندرووستیی
روانگەیەکى جیاواز

جاران دەگوترا، راگەیاندن دەسەڵاتى چوارەمە، بەڵام ئێستا لە سایەى پێشکەوتنە بەرچاوەکانى تەکنەلۆژیاو و خێرایى پەیوەندییەکانەوە، ئەم هاوکێشەیە زۆر گۆڕانى بەسەردا هاتووە و بەڕاستى کەس نازانێ دەسەڵاتى چەندەمە، ئەوەندە دەزانرێ، کە تەنانەت لە کاریگەرییدا، سێ دەسەڵاتەکەى تریش زۆرجار چاویان لەم دەسەڵاتەى چوارەمەیە. بەجۆرێک کە ئێستا دەسەڵات و کاریگەرى راگەیاندن لە ئاستێکدایە، لە ئان و ساتێکدا دەتوانن شتێک بکەنە ترێند و لەناو کۆمەڵگە بیچەسپێنن، بەبێ ئەوەى چاوەڕوانى دەسەڵاتە پەیوەندیدارەکان بن!
لە بوارى تەندرووستیشدا بابەتەکە هەر بەمشێوەیەیە؛ لە دنیاى ئەوڕۆدا و دەتوانین بڵێین لە رابردووشدا، تەندرووستى پەیوەندییەکى راستەوخۆى بە هۆشیارییەوە هەبووە؛ هۆشیارى سەبارەت بە چۆن ژیان، چى خواردن، چۆن کارکردن و......هتد؛ بە دەربڕینێکى تر، پێڕاگەیشتنى تەندرووستى تەنیا پەیوەست نەبووە و نییە بە کارەکانى دواى تووشبوون بە نەخۆشییەک و چاودێریکردنى، بەڵکو زۆر بەر لەوە بە هۆشیارى بەرامبەر بە بابەتە تەندرووستییەکان دەستپێدەکات. لەم نێوەدا راگەیاندن دەتوانێ رۆڵێک بنەڕەتى و کاریگەر بۆ بردنەسەرى هۆشیارى تەندرووستى مرۆڤةەکان بگێڕی؛ بەڵام دوو بابەتى گرنگ هەن، کە پێویستە زۆر بە وردى ئاگاداریان بین:
یەکەم: پێویستە بابەتە تەندرووستییەکان تەنیا بە مەبەستى وروژاندن و، وەک کەرەستەى راگەیاندن بۆ سەرنجڕاکێشانى خەڵک ،نەورووژێنرێن؛ چونکە لێرەدا راستەوخۆ ژیانى مرۆڤى پێوە بەندە و بەو کاریگەرییەى کە راگەیاندن دایدەنێ، دەتوانێ ئەنجامى زۆر خراپ بەجێ بێڵێ.
دووەم: بابەتى تەندرووستى و پشتڕاستکردنەوەى ئەوەى، کە چ شتێک باشە یان خراپ، بابەتێکى زانستییە و پڕۆسەیەکى وردى بەدواداچوونى پێویستە، کە رەنگە لێرەدا بتوانین بڵێین، هیچ ئەنجامێکى تەندرووستى نییە، بە بێ رەچاوکردنى هەلومەرجە تایبەتییەکان، بتوانرێ بگوترێ بۆ هەموو تاکێک وەکو یەک کاریگەرى دادەنێ. واتە هەموو شتێک رێژەییە و پێویستیی بە چاودێری راستەوخۆ هەیە؛ بۆیە هەر لە راگەیاندن و راگەیاندکارەکانەوە بگرە، کە دێسکى تەندرووستییان لە دەستە، تا ئەو پزیشکە بەڕێزانەى کە بەشدارى لە بەرنامە تەلەفزیۆنییەکان دەکەن، پێویستە ئاگادارى ئەمە بن و رەهایەتى لە دەربڕینەکانیان نەهێڵن؛ چونکە لەوانەیە گوێگر یان بینەر بە ئاقارێکدا ببەن، کە ئەنجامێکى باشى نەبێ.
بە هیواى تەندرووستى هەموو لایەک و سوپاس بۆ راگەیاندن و راگەیانکارە بەرپرسەکان...

18/09/2025

هەڵمەتێکى پێویست لە کاتێکى گونجاودا

ئەمڕۆ پێنج شەممە ٢٠٢٥/٩/١٨، بە یاوەرى بەڕێزان بەڕێوەبەری گشتی پەروەردەی هەولێر، بەڕێوەبەری دەستەی ژینگەی هەولێر و سکرتێری یەکێتی قوتابییان و لاوانی کوردستان، بەشداریمان کرد لە هەڵمەتێکى هاوبەشى بەرفراوانى بەڕێوەبەرایەتى تەندرووستى هەولێر، بەڕێوەبەرایەتى گشتى پەروەردەیى هەولێر و یەکێتی قوتابییان و لاوانى کوردستان، کە بۆ پاککردنەوەی قوتابخانەکان رێکخرابوو.
ئەم کارە بە کارێکى بەنرخ دەزانین و وەکو بەڕێوەبەرایەتى تەندرووستى، بە ئەرکى سەرشانى خۆمانى دەزانین، تا ژینگەیەکى خاوێن و شیاو بۆ قوتابییە ئازیزەکانمان لە ساڵى نوێى خوێندندا ئامادە بکەین، کە وا بڕیارە ٢١ى ئەیلوول دەستپێبکات.
هەربۆیە تەواوى تیمەکانمان لە پاراستنی تەندرووستی قوتابخانەکان و تیمەکانی کۆنتڕۆڵکردنی هەوکردن راسپاردوون، بە کاریگەرترین شێوە، گرنگى بە هەلومەرجى تەندرووستى قوتابخانەکان، لەساڵى نوێى خوێندن، بدەن.

بەهیواى ساڵێکى پڕ لە سەرکەوتن و سەلامەتى بۆ قوتابییانى ئازیز و خۆشەویست.

18/09/2025

رێزلێنان لە کارمەندانی ڕاگەیاندنی دەزگا تەندرووستییەکان
رۆژی سێشەممە ٢٠٢٥/٩/١٦، بە ئامادەبوونى ژمارەیەک لە بەرپرسانی حکومی و حزبی و بەڕێوەبەری بەشە پەیوەندیدارەکان، بەشی ڕاگەیاندنى بەڕێوەبەرایەتى تەندرووستى، رێوڕەسمێکى بۆ رێزگرتن لە کار و پێگەی کارمەندانی ڕاگەیاندنی تەواوی دەزگاکانی تەندروستی لەسنوری شاری هەولێر، رێکخست.
لە وتەیەکدا، وێڕاى نیشاندانى پێزانین بۆ بەشى راگەیاندن بۆ رێکخستنى ئەم چالاکییە، تیشکمان خستەسەر گرنگى رۆڵ و پێگەى کارمەندانى راگەیاندن، کە دەتوانن رۆڵێکى مەزنیان لە ژیانى تەندرووستى کۆمەڵگەدا هەبێت. بۆیە دەستخۆشیمان ئاڕاستە کردن و پێزانینى قوڵمان بۆ هەوڵ و چالاکییەکانیان دەربڕی.

16/09/2025

سەردانى یەکێتى ئافرەتانى کوردستان
لەناو هەر کایەیەکى مرۆڤایەتییدا، ئافرەتان ئامادەییان نەبێ، یەکێک لە ستوونە هەر بەهێزەکانى ئەو کایەیە ناتەواو دەبێت؛ ئەمە جگە لەوەى کە کاریگەری نەرێنى درێژماوە لەسەر پێشکەوتن و چالاکیی کۆمەڵایەتى و سیاسیش دادەنێ.
لە روانگەى باوەڕهەبوونمان بە گرنگى رۆڵى ئافرەتان لە هەموو کایە کۆمەڵایەتییەکان و بەتایبەت تەندرووستى، رۆژى ١٥/٩/٢٠٢٥، سەردانى یەکێتى ئافرەتانى کوردستانمان کرد و لەلایەن بەڕێزان (زیبا تەها) سکرتێری یەکێتی ئافرەتانی کوردستان و هەڤاڵانی مەکتەبی سکرتاریەت پێشوازیمان لێکرا.
وێڕاى بەرزنرخاندنى رۆڵى ئافرەتان و بەتایبەتى یەکێتى ئافرەتانى کوردستان لە میژووى سیاسى و کۆمەڵایتى گەلەکەمان، باسمان لە هەماهەنگی زیاتری بەڕێوەبەرایەتی گشتی تەندرووستی و سکرتاریەتى ئافرەتان کرد، بۆ مەبەستی پێشکەشکردنى باشترین خزمەتگوزارییە تەندرووستییەکان بە ئافرەتان.
بەخۆشییەوە روانگە و بۆچوونەکان زۆر لێک نزیک و ئەرێنى بوون و ئومێدى کارى هاوبەشى زۆر باشیان لێدەکرێ.

16/09/2025

بە یادى رۆژانى رابردوو و پیرۆزباییەک

شکڵگرتنى کەسایەتى مرۆڤ پڕۆسەیەکى دووروودرێژە؛ ئەگەر نەڵێین بەشى هەرەزۆرى ئەم پڕۆسەیە، ئەوا بە دڵنیاییەوە بەشى هەرە گرنگیی، لە رابردوودایە. بۆیە رەشنەکردنەوەى رابردوو لە یادەوەرییەکانمان، مانایەکى گەلێک گرنگى هەیە؛ گرنگترین بەشى ئەو مانایە، وەفایە، کە یەکێکە لە باڵاترین بەهاکانى مرۆڤ.
من و زۆرێک لە هاوڕێکانم، یەکەمین هەنگاوەکانى هۆشیارى کۆمەڵایەتى و سیاسیمان لە یەکێتییەکانى قوتابییان و لاوان، هەڵبڕین؛ بەجۆرێک کە دەتوانین بڵێین رۆڵێکى زۆر گرنگى لە شکڵپێدان بە کەسایەتیمان هەبووە.
بۆیە بە یادى رۆژانى رابردوو و بە مەبەستى پیرۆزبایى دەستبەکاربوونی ستافی نوێی بەرپرس و دەستەی کارگێڕی لقى قەڵات و لقى منارەى یەکێتی قوتابییان و لاوانی دیموکراتی کوردستان، رۆژى دووشەممە رێکەوتى ١٥/٩/٢٠٢٥، بە یاوەرى هاوڕێیانم لە ئەنجومەنى کارگێڕى دیوان، سەردانمان کردن و لە لایەن هەڤاڵان (زاهیر زاهیر ) و (گەیلان سلێمان) بەرپرسانى لق و هەڤاڵانى دەستەی کارگێڕی لقەوە، پێشوازیمان لێکرا.
وێڕاى پیرۆزبایى دووبارە، هیوای سەرکەوتنیان بۆ دەخوازین و هاوکار و پاڵپشتیان دەبین.

15/09/2025

کردنەوەى بنکەیەکى تەندرووستى لە سەنتەرى شارى هەولێر

لە درێژەى بەرنامە چڕ و پڕەکانى بەڕێوەبەرایەتییەکەمان و بە گشتى لە چوارچێوەى سیاسەتى کابینەى نۆیەمى حکومەتى هەرێمى کوردستان بۆ فراوانکردنى چەترى تەندرووستى لەپێناوى خزمەتکردنى هاوڵاتییانى خۆشەویستى کوردستان، رۆژى یەکشەممە ١٤ی ئەیلولی ٢٠٢٥، بە ئامادەبوونى بەڕێزان "ئومێد خۆشناو" پارێزگارى هەولێر و ژمارەیەکى بەرچاو لە کاربەدەستان و کارمەندانى تەندرووستیى و پزیشک، لە رێوڕەسمێکدا، بنکەى تەندرووستى " قەڵات "مان، بۆ خزمەتکردنی هاوڵاتییان، لەنێو سەنتەرى خانەشینی پیاوان و ئافرەتانى هەولێر کردەوە.
شیاوى ئاماژەیە، ئەم بنکەیە رۆڵێکى گرنگ دەگێڕێ لە چارەسەرکردنى هاوڵاتییان و پێشکەشکردنى خزمەتگوزاریى تەندرووستى پێویست بۆ خانەنشینان، کە ڕۆژانە ژمارەیەکى زۆر لە ئافرەتان و پیاوانى خانەنشین، سەردانى دەکەن.
پێویستە ئەوەش بگوترێ کە بەڕێز پارێزگار لە کۆنگرەیەکى رۆژنامەوانیدا، سوپاسى بەڕێوەبەرایەتییەکەمان و هەروەها تیمى فریاکەوتنى (١٢٢)ى کرد، بۆ کردنەوەى ئەم بنکەیە و بە کارێکى گرنگى لەقەڵەم دا.

14/09/2025

پەرەپێدانى بەردەوامى هێزى مرۆیى
لەسایەى پێشکەوتنە بەرچاو و خێراکانى ژیانى مرۆڤ لە هەموو رەهەندەکانەوە، خۆئەپدەیتکردنەوە و شارەزابوونى هەرچى زیاتر لە تەکنیک و هونەرە جیاوازەکانى کارگێڕى، لەپێناوى باشترین سوودوەرگرتن لە سەرچاوە مرۆییەکان، بووەتە زەروورەتێکى هەنووکەیى و زۆر گرنگ.

لە سایەى ئەم تێگەیشتنەوە، بە ئامادەبوونى تەواوی بەڕێوەبەرە کارگێڕییەکانی دەزگاکانی تەندرووستی سنوری بەڕێوەبەرایەتی تەندرووستى هەولێر، سیمینارێکمان سەبارەت بە (کارامەیى بەڕێوەبەرى تەندرووستى) بەڕێوەبرد، کە بە سوپاسەوە لە لایەن "د. نیاز سەلاحەدین ئەحمەد" ەوە پێشکەشکرا.
ئامانجى سەرەکى ئەم جۆرە کارانە، پێشکەشکردنى باشترین خزمەتگوزارییە بە هاوڵاتییان، لەڕووى کارگێڕى و راییکردنى کارەکانیانەوە. لێرەدا جێى خۆیەتى، سوپاسی بەڕێوەبەری کارگێڕیی نەخۆشخانە و دەزگاکانی تری تەندرووستی بکەم، کە دەستێکی باڵایان هەیە لە ڕاییکردنی کارەکانی نێو نەخۆشخانەکان .

11/09/2025

شۆڕشى ئەیلوول، شۆڕشى هەمووان
شۆڕشى ئەیلوول لە ١١ى ئەیلوولى ١٩٦١، بە شریخەى چەکى پێشمەرگە تەقیەوە، بەڵام لە قوڵایى وجودى خۆیدا، شۆڕشێکى دیموکراتخوازانە و مرۆڤپەوەرانە بوو. بەو مانایەى کە بەبێ جیاوازى ئایین، ئایینزا و نەتەوە و رەگەز، هەمووى لەخۆدەگرتن و دەنگ و رەنگى هەمووان بوو. لەراستیدا شۆڕشى ئەیلوول رەنگدەرەوەى رۆحى راستەقینەى کوردستان بوو؛ کوردستانێک کە لەدێرزەمانەوە، ناوەندى پێکەوەژیانى ئاشتیانە و پێکەوەهەڵکردن بووە. هەربۆیەشە سەرەڕاى تێپەڕینى ٦٤ ساڵ، هێشتاش خاوەنى گرنگییە و دەتوانێ لەگەڵ پێوانە هەرە نوێیەکانى سەردەم، لەڕووى پێکەوە هەڵکردن و دیمۆکراسى، بێتەوە و، مایەى ستایش و ئیلهام لێوەرگرتن بێت.
لە بیرەوەرى ئەم شۆڕشە گەورەیەدا، یاد و ناوى سەرجەم شەهیدانى کوردستان، سەروەریان بارزانى نەمر، رابەر و سەرۆکى شۆڕش و کاک ئیدریسى هەمیشە لەیاد، بەرزرادەگرین و ، بەڵێن دەدەین کە وەفادارى ئامانجە مرۆیى و پێشکەوتنخوازەکانى بین، لە پێناوى بەدیهێنانى کوردستانێکى ئازاد و سەرفراز.

Dlovan M F Jalal

26/09/2025

25/09/2025

25/09/2025

22/09/2025

21/09/2025

18/09/2025

18/09/2025

16/09/2025

16/09/2025

15/09/2025

14/09/2025

11/09/2025

Address

Website

Alerts

Contact The Practice

Shortcuts

Share

Category