عيادة الدكتور محمد عادل محمود للامراض النفسية والعصبية

22/07/2025

ماكو شي يفرح الطبيب اكثر من انو يشوف المراجعة تحسنت!
هالمرة مو بس تحسن جان!! هالمرة المراجعة جابت درجة ممتازة وطلعت الاولى على العراق بسادس الاعدادي!

يعني معقوله شخص يصير عنده وسواس وهيج ينجح يطلع الاول؟!
اي كلش معقولة
القصة بدت من افكار وسواسية خلت المريضة منهارة وتعبانه نفسيا وكذا مرة دخلت اكتئاب !
شسوينا ؟؟
جبنا الورقة والقلم وتعمقنا بكل فكرة جانت تجيها الى ان عرفنا منين تجي وليش تجي هلافكار وشون نسيطر عليها
الطريق جان طويل وصعب
المريضة ما أيست وكذلك الاهل ماضاجو من مراجعة طبيب النفسي واحنة خلينا كل جهدنا في سبيل نخلصها من هيج شي.. واخذت هواية جلسات بدون ملل جان الاصرار والامل والثقة بالطبيب اساس النجاح والتحسن..

مرات الشخص يأيس ويضوجً من يطول الاضطراب عنده لكن في قصتنا اليوم المريضة ما أيست وكدرنا نحول الوسواس الى افكار منطقيه ومعقولة ونكدر نسيطر عليها

القصة انتهت بنتيجة خلى الطبيب والاهل وكل الناس تفتخر بيها والحمدالله.. #
خليكم ويه رسالة الشخص اللي مانكول عليها مريضة بعد

الدكتور
محمد عادل محمود
اختصاصي الامراض النفسية والعصبية

19/07/2025

ليش مكان فحص الاطفال لازم يكون مهم؟
شنو الميزة الجديدة الوفرناها بعيادتنا ؟؟

انطيكم مثال
مثلا حالة الطفل اللي عدنا اليوم
من واحد يشوفه لاول مرة يكول اكيد توحد او فرط حركي
بس شنسوينا ؟
خليناه بالغرفة اللي خصصناها للاطفال علمود ياخذون راحته
شويه لعب وشويه انشغل الى ان عجبه الوضع واهنا استلمته😎

فحصت التواصل البصري طلع مضبوط
الادراك والفهم والذكاء واللغه كلها براحتنا جيكناها وطلعت كلها تمام بعد ما شكينا انه عنده مشاكل معينة

العلاج شنطينا ؟؟@
ولاشي مجرد بعض النصائح وخلينا بالمتابعة

الشي اللي فادنا اليوم هو راحة الطفل
من يكون مرتاح نكدر نجيكه براحتنا
مايصيررر بدقيقة ننطي تشخيص من اول مانشوفه !!!

ولاتنسون ماعدنا سرة للاطفال اي وقت يجون يدخلون 🙏

الدكتور
محمد عادل محمود
اختصاصي الامراض النفسية والعصبية

07/07/2025

اعزائي المراجعين
الادوية النفسية حالها من حال كل العلاجات الدوائية
بيها فوائد وبيها اعراض جانبيه محتملة لكن غالبيتها آمنة على المدى القريب والبعيد وتكون ماخوذة حصرا من قبل الطبيب النفسي..

فمن مبدا الامان الطبيب من يكتبلكم الدواء ارجعو شوفوه للطبيب يتاكد منها ويجيكها ويعلمكم التفاصيل

كذا مرة صارت انو كاتبين الادوية والمراجعين ماخذين غير شي ( ما نلوم احد ) خصوصا انو المراجعين مكررين الوصفات من يمهم دون الحضور للطبيب

مثلا
مراجع كنت كاتبله venlafaxine tab75 mg لمدة ثلاث اشهر
المراجع بالشهر الثاني من رايح صيدلية قريب الهم منطيله pregabaline tab 75mg وكايليلها هذا نفس الشي!!

لو مرات ينطول كبسول بدال الحب او حب بدال الكبسول وكذا مرة صار تغيير بنمط وطريقة الدواء وهذا ياثر سلبا على حالة المراجع..

فياريت تنتبهون على هاي للنقطة وارجعو للطبيب بكل وقت واحنة الممنونين ونشكركم على حرصكم..

الدكتور
محمد عادل محمود
اختصاصي الامراض النفسية والعصبية

21/05/2025

من زمان مامنزلين قصة نجاح
اليوم القصة بيها شغلتين مهمات :
اولها ايمان اهل الطفل بالطب النفسي خصوصا الام كان السبب الاساسي لتحسن حالة الطفل
ايماني اني شخصيا بالطفل وقدرة الطب النفسي لحل الاضطرابات النفسية

عبالكم الاطفال مايصير عدهم قلق ؟؟!
غلطانين..
حالهم حال الكبار
الرهاب الاجتماعي يصير بالاطفال وممكن اختلافهم عن كلار فقط في طريقة التعبير وعادة تكون على شكل اعراض جسدية فهاي يخلي الاهل يفترون عدة اختصاصات قبل مايلكون الحل الاخير
احنة كطب النفسي نؤمن بعمل كفريق متكون من عدة اختصاصات سوية تجاه اي حالة ..

هذا الطفل تحول من شخص مايحجي اي كلمة الى طفل اجتماعي وشاطر ومحبوب من قبل الكل

ونزلنا تفاصيل الحالة برسالة والدته..

المنشور والصور بموافقة الاهل

الدكتور
محمد عادل محمود
اختصاصي الامراض النفسية والعصبية

28/04/2025

تفاصيل عيادتنا المميزة
مكان انتظار مريح وواسع ونظيف
مكان خاص لتقييم الاضطرابات النفسية بلاطفال
مكان خاص لانتظار اهالي الاطفال اللي يدخلون التقييم
علاج بالجلسات النفسية وجلسات سلوكية معرفية
الوصفات تكون جميعها مطبوعة وواضحة
الحجوزات عن طريق الاتصال وبمواعيد ثابتة
مدة معاينة كل شخص ٣٠ دقيقة

العنوان كركوك \ شارع الاطباء\تقاطع شارع الاطباء الرئيسي قرب مستشفى دار السلام الاهلي

29/03/2025

وبنهاية شهر الرمضان المبارك وبمناسبة عبور شهر على بداية عيادتنا المميزة نحب ننشر قصة نجاح تنصاف للقائمة

القلق الاجتماعي شي وارد بالاطفال ويعني الخوف من الاختلاط بالمجتمع وبهيج اعمار يجون على شكل الرفض القاطع انو الطفل يروح للمدرسة او من يروح تظهر عليه اعراض جسدية ناتجة من القلق الشديد

علمود نختصر القصة
علاوي جان رافض يطلع برة البيت اصلا واهله جابوه وبدينا بنظام علاجي مكون من العلاج الدوائي والنصائح المستمرة للاهل والحمدالله اليوم علاوي جان غير طفل يروح ويجي ويختلط حتى كام يصعد مصعد بعد ماجان يخاف يصعدها !!!

وانطينا هدية واصرينا انو يمتنع انه ينعزل ويبقى على الموبايل بس بعد مااخذ الهدية كال اريد ساعة باليوم اتفرج يوتيوب😅

الدكتور
محمد عادل محمود
اختصاصي الامراض النفسية والعصبية

10/03/2025

الحمدالله والشكر لله
من طفل ماكو اي نطق الى طفل ناطق ويحجيً ويتواصل بفضل العلاج الصح والتدريب المضبوط والتواصل الممتاز بالروضة
ان شاءالله نشوفه احسن واحسن

الدكتور
محمد عادل محمود
اختصاصي الامراض النفسية والعصبية

02/03/2025

بعون الله
انتقلت عيادتنا الى العنوان الجديد اللي هو مجمع آسيا الطبي..
وبخدمات مميزة وشاملة في الطب النفسي الحديث للاطفال والكبار..
ننتظركم بكل شغف من تاريخ 4/3 بعد غد ان شاءاالله
من الساعة الثانية ظهرا لغاية الافطار في شهر رمضان المبارك
ورمضانكم كريم 🙏🙏

انتقلت عيادة الدكتور محمد عادل محمود
الى مجمع آسيا الطبي

اختصاصي الامراض النفسية والعصبية للكبار
اختصاص اضطرابات التوحد وفرط الحركة للاطفال

شهادة الدكتوراه ( بورد عراقي ) للطب النفسي / بغداد
بكالوريوس طب وجراحة عامة / كركوك

للحجز والاستفسار الاتصال على الرقم التالي
07709217011

العنوان : مجمع آسيا الطبي
كركوك - تقاطع شارع الاطباء الرئيسي - قرب مستشفى دار السلام الاهلي

21/02/2025

المؤتمر العلمي الخامس لجمعية اطباء النفسية العراقية
وحدة من فعاليات العلمية الراقية اللتيي اقيمت في العاصمة بغداد وجمعتنا بالاساتذة والزملاء والعلماء من داخل وخارج العراق

ركزت على اخر التطورات في الطب النفسي خصوصا بما يخص الطب النفسي للاطفال والمراهقين وحالات الادمان
وهذا ان دل على شيئ انما يدل على حرص الاطباء بمواكبة اخر التطورات العالمية رغم وجود وصمة الاجتماعية وقلة الموارد واختلاف الثقافات داخل العراق

المؤتمر كان اكثر من ممتاز وبيضت الوجوه بجهود القائمين عليها
شكرا جزيلا لجمعية اطباء النفسية العراقية على حسن الضيافة وادارة هكذا فعاليات 🙏🙏

31/01/2025

خل نتفق على نقطة وحدة بس..

تاخر النطق بالاطفال صار شي شائع تقريبا..
زين شنو اللي رح يصير اذا بقيته هيجي!!
الطفل سلوكه رح يتغير مثل العصبية او الانفعالية ورح يصير عندة مشاكل بالتواصل الاجتماعي مع الكبار والصغار
تدرون حتى مشاكل صحية ممكن تصير لاان الطفل مرح يعبر زين اذا جوعان او عطشان او عنده الم بمكان ما بجسمه..

هاي الشغلات البسيطة اللي ترافق تاخر النطق بالاطفال

انمار اللي بالصورة جان يعاني من هالشي بس الحمدالله بفضل التشخيص المبكر والعلاج الصحيح والتدريب الممتاز من قبل الكادر الموجود يمنا انمار صار وضعه ممتاز..
هل انتهى التدريب وخلص نعوفه هيجي؟؟
لا هسه اجى الوقت انو يتدرب على مهارات التواصل الاجتماعي ويبقى بالروضة الطبيعية الى ان يتأقلم وياهم حاله حال اي طفل طبيعي..

وهاي شويه صور حلوة تذكارية مع رسالة ابو انمار اللي يلخص حالة انمار

الموضوع للتوعية بين الناس مو اعلان وتفاخر..
الصور والرسالة بعد اذن الاهل..

اخوكم الدكتور
محمد عادل محمود
اختصاصي الامراض النفسية والعصبية/كركوك..

21/11/2024

ليس شرطا ان يكون طفلك الافضل..
يكفيه ان يكون سعيدا.

اذا خليت الطفل يكون سعيد بشنو رح يفيده ؟؟
وشنو مضار الطفل من يكون غير سعيد..

وباقي التفاصيل تشوفوها بهاي الحلقة من برنامج صباح الشرقية

هذا الرابط
https://youtu.be/gABbhSAUfpA?si=vlNenA9B7JQNcX6w

الدكتور
محمد عادل محمود
اختصاصي الامراض النفسية والعصبية..

16/11/2024

استخدام المفرط للميلاتون صار شائع في مجتمعنا خصوصا للاطفال

الاطفالً من اول يوم ولاده تبدي تتنظم اوقات النوم الهم ومع اول سنه تقريبا الطفل يبدي ينام اللليل ويكعد الصبح
بدون حاجه للميلاتونين الا في حالات مرضيه معينه

اكثر من دراسه نزلت على مضار الميلاتونين خصوصا النوعيات اللي تكون على شكل حامض حلو او جلي مثل ميسموه

اكو هوايه طرق تكدرون تخلون الطفل ينام بدال الادوية..

استشيرو طبيبكم قبل ماتنطون هلادوية لاطفالكم

الدكتور
محمد عادل محمود
اختصاص الامراض النفسية والعصبية