عيادة الدكتور محمد عادل محمود للامراض النفسية والعصبية

27/02/2024

مستوة الدراسي للطلاب ؟!!
وحدة من اكثر مشاكل اللي يعانيها الاهل خصوصا اللي اطفالهم بلابتدائية..
الحلول هواية عدا الضرب والكتل للطفل!!
لان اهنا خليت الطفل يكره الدراسة ويكره المدرسة ويكرهك هم!

اسبابها ترة هوايه
منها عضوية مثل نقص الفيتامينات وسوء التغذية ومشاكل الدماغ العضوية لكن اغلبيتها نفسية مثل القلق العصبية مشاكل النوم والتنمر اللي يصير بالمدارس

اهنا مراجعتي وصديقة العيادة كعدت افتهم منها خطوة خطوة واثناء الجلسة اللي خليتها تبقى وحدها علمود تكدر تعبر براحتها فخصنا الذكاء والادراك والفهم وفحصنا الذاكرة الى ان وصلنا للتشخيص الصحيح وعالجناها ..

الناس شتسوي اول شي؟! فد خمسين نوع شراب مقوي واوميكا وفيتامين دي من دون معرفة السبب الحقيقي وممكن يطلع سبب بسيط كدامنا لكن غافلين عنها مثل مشاكل النوم !!

الدكتور
محمد عادل محمود
اختصاصي الامراض النفسية والعصبية

13/02/2024

جانب من لقائنا بقناة الشرقية وبرنامج صباح الشرقية..
حجينا وحده من اهم اضطرابات بلاطفال اللي هو فرط الحركة وتشتت الانتباه
حجينا باسبابها واعراضها وعلاجها وشون نشخصها
اكو مصطلح بلاونةً الاخيرة اللي هو اضطراب فرط الحركة وتشتت الانتباه بالكبار

تابعو اللقاء وان شاءالله تستفادون

الرابط
https://youtu.be/XX6GWi9EFmE?si=SPdF67bKavtgM6CR

03/02/2024

ماكو احلى شي خلال شغلنا بالعيادة غير كسب حب الاطفال
اصدقائي اعتبرهم وليس مرضايا حبو اليوم يشكروني بهدايا بسيطة
تعبيرا عن مدى تحسنهم واحساسهم براحة من يجون يمي للعيادة

موضوعهم كان تاتاه ووسواس قهري وقلق
كلهم اشتغلنا بيها وخطوة خطوة وبتأني وصبر ودعم العائلة طبعا وبوجود العلاج الدوائي انطت نتائج حلوة ولازال الشغل باقي..

الدكتور
محمد عادل محمود
اختصاصي الامراض النفسية والعصبية

28/01/2024

لاهمية موضوع اضطراب فرط الحركة وتشتت الانتباه..
انتظروني غدا الساعة العاشرة ونصف صباحا وعلى قناة الشرقية الفضائية وبرنامج صباح الشرقية..

رح نتكلمً بصورة ملخصة عن هذا الموضوع..

25/01/2024

موضوع فرط الحركة وتشتت الانتباه بلاطفال صار بيه هوايه كلام واخطاء تشخيصية وحيرة الاهل بالتعامل وياها
علمود هاي قررنا انو نعمل بث مباشر نتكلم بيه عن تفاصيل هذا الاضطراب بلاطفال

غدا الجمعة الساعة التاسعة ونصف مساءا وعلى موقع انستكرام الخاص بالعيادة مع المبدع والعزيز علينا د. سجاد

https://www.instagram.com/dr.muhamed.adil?igsh=MW55M2ltMHFzeHdhdA%3D%3D&utm_source=qr

هذا رابط الاستكرام
وبلتعليقات رح ينزل الكود موقع الانستكرام

19/01/2024

بسم الله وعلى بركة الله
تنويه لمراجعيني الكرام

انتقلت عيادتي الى مجمع مدينة الطب /الطابق الثالث

ورح نباشر من يوم الاحد ٢١/١/٢٠٢٤ نستقبل مراجعيني الكرام
لطفا يرجى الاتصال برقم العيادة لغرض الحجز وترتيب المواعيد

رح يكون تغيير بنوعية الخدمات اللي رح تقدمها العيادة وكلها مبنية على احدث الطرق العالمية والحديثة بتشخيص ومتابعة الاضطرابات النفسية في الاطفال والكبار💪💪

ورح نعلن عنها في قادم الايام ..

الدكتور
محمد عادل محمود
اختصاصي الامراض النفسية والعصبية

11/01/2024

نهاية سعيدة لنهايه شهر ونهاية اسبوع بزيارة صديقة العيادة ميار اللطيفة
صديقتنا ميار تحسنها مستمر
التقييم على هلاسس تصير:
تحسن ادائها بالمدرسة
درجات صارت ١٠
التركيز احسن والانتباه ممتاز
تواصلها بصورة عامة صار ممتاز
حتى رسوماتها صارت اكثر وضوحا بعد ماكانت شخابيط
واخيرا من تحس نفسها زينه تجيبلي هدية بسيطه 😍

الصورة نزلت بعد موافقة الاهل

الدكتور
محمد عادل محمود
اختصاصي الامراض النفسية والعصبية

25/12/2023

طريقة تعامل الاهل مع اطفال التوحد هو الجوهر الاساس بتحسنهم!

اكو شغلتين اساسيات تحدد مستقبل اطفال التوحد
مستوى الذكاء
وسرعة تطور التواصل اللغوي عدهم

وهذني تجي بالتدريبات ومتابعه الاهل المستمر مع طفلهم

علاج اضطرابات طيف التوحد بيها عدة محاور تبدي من الطبيب النفسي واهل الطفل والمركز التدريبي والاهل
الكل مهمين ويحتاج تعاون الجميع في سبيل تطور حالة الطفل

كل السلامة لاطفالنا وكل التوفيق والصبر لاهالي اطفال التوحد وبارك الله بجهودهم وتعبهم ويارب يشوفون نتائج تعبهم وصبرهم🙏🙏
مثل الطفل اللي بالصورة 💪

الدكتور
محمد عادل محمود
طبيب اختصاص الامراض النفسية والعصبية

23/12/2023

مهما اتكون الهدية بسيطة وبمختلف الاعمار تبقى الها معنى كبير يم الطبيب
من يكون الطفلة عمرها ست سنوات اتحس بنفسها بالتحسن واتفكر اتجيب هدية لطبيبها فهلشي كلش يفرحنا اكثر من الهدية نفسها..

الاكتئاب بلاطفال ( نزلنا هواية منشورات بيها)ايصير حالها حال الكبار بس الفرق الوحيد انو بعبرون عنها عن طريق سلوكهم وتصرفاتهم واكثر شي يجون على شكل فرط حركة..

فمو كل فرط حركة معناه اضطراب فرط الحركة وتشتت الانتباه ADHD وهاك رسبريدون😉
خلو التشخيص الصح للطبيب النفسي المختص🫡

الدكتور
محمد عادل محمود
اختصاصي الامراض النفسية والعصبية

18/12/2023

عشاق القطط ومربين القطط خصوصا الاطفال والمراهقين
هاي احدث دراسه صارت بخصوص تاثير القطط

الباحثين باستراليا على مر عشرات السنوات واكثر من سبعة عشر دراسه ثبتو علاقه قوية بين وجود وتربية القطط وبين ظهور اعراض انفصام العقل لمربين القطط !

الاسباب غير معروفة بالضبط لكن النظريات تتجه الى وجود عدوة داء القطط او toxoplasmosis !
يعني اصابه بلانفصام او شيزوفرينيا كان خبر صادم خصوصا بلاطفال والمراهقين وعدا التهابات اخرى اخرى مثل فطريات وغيرها

مع ذلك فان تربية الحيوانات الاليفة والقطط تنطي راحة نفسية واستقرار نفسي للشخص

فيبقى القرار الكم تريدون تستقرون نفسيا بس ممكن تنصابون بانفصام العقل 😅

الدكتور
محمد عادل محمود
اختصاصي الامراض النفسية والعصبية

30/11/2023

اضطرابات النفسية والعصبية بالاطفال حالها حال الكبار وممكن تكون اصعب بسبب عدم قابلية الاطفال على التعبير وصعب للاهل ان يتقبلون ان طفلهم ممكن يعاني اضطراب نفسي..

اضطرابات العصبية والقلق والوسواس واضطرابات السلوك واضطرابات فرط الحركة وتشتت الانتباه واضطرابات التوحد ومشاكل تاخر النمو ومشاكل للدراسة والذكاء وغيرها من هلاضطرابات النفسية تحتاج
تقييم جيد وتشخيص دقيق والتأني وخلق بيئة مناسبة وعلاقة صديقة مع الطفل علمود نوصل للتشخيص الصح

عادة نحتاج عدة جلسات علمود نوصل للشي الصح وليس جلسة خمس دقايق !!!

الحل ليس باعطاء اوميغا ثري ومقويات وهاي هي!!
مااعرف شنو الربط بين الاوميغا وبين كل الاضطرابات النفسية للاطفال😅

كل الصحة وسلامة لاطفالنا ان شاءالله

الدكتور
محمد عادل محمود
اختصاصي الامراض النفسية والعصبية

10/11/2023

صرنا يومية نسمع قصص فلان داخل جن بيه!
فلان صاير مس !
فلان عنده جن عاشق!

صرنا نسمع طفل ميحجي يكولون عليه عنده جن
كل الامراض النفسية بدو يربطوه بالجن!!
ومن تحجي وتناقش يتهمونا احنه ملحدين ومعدنا ايمان لا بالله ولا يالقرآن !

شوفو هلحلقة اللي قدمه الاعلامي المبدع علي عذاب عن قصة امراة يتهموها انو عدها جن وتاكل قطط وتصرفات غريبة!
بينما الموضوع هو عدهاا اضطراب نفسي وتم معالجتها

ياريت الناس تبدي تفتهم وتوعي على نفسها
ياريت الناس اللي عدها سلطة ومتابعين ان يفهمون المجتمع باهمية الامراض النفسية ومدى خطورتها في حال لم تتم علاجها

هذا الرابط من اليوتيوب
https://youtu.be/mXyrLEwPbQw?si=VFtRWUITGR1QlPVm

الدكتور
محمد عادل محمود
اختصاصي الامراض النفسية والعصبية

06/11/2023

الوسواس المرضي!

الحمدالله الذي جعلنا سببا بسعادة الناس
الموضوع ليس دعاية شخصية وانما باهمية الطب النفسي ومراجعة الطبيب النفسي وعدم الاستسلام بسهولة

مراجعتي كانت من محافظة ديالى
وموضوعها جان الوسواس المرضي او القلق المرضي انو الشخص يفكر هو مريض بمرض خطر وهلافكار تجيله بشكل مستمر واضافه افكار وسواسية اخرى خلت المريضة تفوت في اضطراب الكابة الحاد وتوصل لمراحل الانتحار

العلاج الدوائي جان الخيار الامثل الها بعد ماشرحت الحالة واسبابها وشلون نخلي خطة علاجية الها

الحمدالله والشكر المراجعة رجعتبنا بتحسن ممتاز ورجعت لحياتها الطبيعية والضحكة والبسمة بوجها وزوجها وباقي افراد عائلتها

الهدف من القصة لا تستسلمو بساع
المرض النفسي قابل للتحسن
راجعو طبيبكم واسالو طبيبكم وخلو هدفكم بالحياة هو التحسن والشفاء💪💪

الدكتور
محمد عادل محمود
اختصاصي الامراض النفسية والعصبية

28/10/2023

اكو شي اسمة الصرع الكاذب!!
يعني هي نفس الاعراض او شي مشابه للصرع لكن بدون سبب عضوي

هذا النوع من الصرع بلاطفال ممكن تصاحب الصرع الحقيقي
يعني مو كل مرة هو صرع حقيقي ولا كل مرة هو صرع كاذب

اليوم هاي الطفلة الحلوة اللي تم تحويلها النا من قبل د زيد عبدالامير طبيب اختصاص جملة عصبية لغرض تقييمها نفسيا
وفعلا اثناء الجلسات اكتشفنا انو الطفلة عدها نوبات صرع غير حقيقي
نوبات هي كلاتي:
سلوك غريب مفاجإة ومرات يصاحبها هلاوس سمعية او بصرية
وفقط بالمتابعة وبعمل جلسات للطفلة ومتابعة مع الاهل اختفت كل اعراض الصرع

النتيجة كلش ممتازة واليوم ودعنا رانية الرائعة والذكية

كل الشكر للاخ العزيز د زيد عبد الامير

وكل السلامة والتوفيق لصديقتنا

الدكتور
محمد عادل محمود
اختصاصي الامراض النفسية والعصبية

24/10/2023

برايكم شيخلي الشخص يرسم هشكل؟؟
الورود داخل عقل الشخص اللي طلع يدل على عودة الشخص للحياة الطبيعية بعز الظلام والسواد!!

القصة كلاتي:
مراجعه عمرها بدايات العشرينات راجعت بعد فترة طويلة من القلق المرضي!
يعني الشخص يحس نفسه دائما عنده مرض خطير ومعين وحياته رح يخلص!!
الشخص كان عايش في دوامة من هيج افكار الى ان صار الشخص كئيب وصعب يطلع من الحالة اللي بيها !!
وبعد الاف التحاليل وتخطيط القلب وايكو القلب يطلع الشخص سليم لكن الافكار السلبية مدتصير زينه!

بدينا بالعلاج الدوائي والسلوكي وبصورة مكثفة وزيارات متكررة وتعمقنا باساس الافكار السلبية هاي وكدرنا نغيرها
وبعد اربع الى خمس اشهر من العلاجات والزيارات
اكدر اكول (الشخص )وليس المريضة جابت هاللوحة ووضعها جان فوق الممتاز وعبرت عن حالتها بهل لوحة اللطيفة وتحسنت تماما من هلمرض المزعج..

التشخيص كان اضطراب القلق المرضي
Illness Anxiety Disorder

الحمدالله على سلامتها ونكللها اهلا بيج بلحياة مرة لخ 🙏

الدكتور
محمد عادل محمود
اختصاص الامراض النفسية والعصبية

09/10/2023

هواية تسمعون قصص نجاح بمواقع التواصل والافلام مرات معظمها تكون فقط دعاية ومو كلشي حقيقي

اليوم حبيت انشر هالقصة لمريضة تشخصت باكتئاب مابعد الولادة من النوع الشديد مع افكار انتحار وايذاء للطفل

لكن المريضة مااستسلمت وقررت تتعافى من مرضها وبوجود الطبيب النفسي والادوية النفسية وتعبها ومتابعتها لنفسها خلتها تتعافى من المرض

ومو بس تعافت .. بدت تطور من نفسها وصارت انسانه ناجحة جدا وغيرت حتى من زوجها وبيتها للاحسن

ملاحظة / هاي المريضة مو من مراجعاتي كانت تراجع غير طبيب اختصاص بلامراض النفسية لكن حبيت انشر قصتها لسببين:
ماكو ياس واستسلام بالحياة
ماكو شي اسمه بطر وافتعال لكن اكو شي اسمه اضطراب نفسي ويحتاج تداخل مع الطبيب المختص

واخيرا.. حياتنا عبارة عن اختيارات
اختارو الصح وعيشو الحلوة والمرة بيها..

الدكتور
محمد عادل محمود
اختصاصي الامراض النفسية والعصبية

03/10/2023

اهم سؤال بالنسبه للاهالي..
هل استخدام العاب الالكترونية تسبب الادمان !!؟؟
الجواب
نعم !

هل يعني احنة نعزل الاطفال والمراهقين ونخليهم على العاب الكترونية بحجة العالم الخارجي موزين وبيه فساد !!!

التفاصيل بهل حلقة المميزة من لقائنا على قناة الشرقية وبرنامج صباح الشرقية

الرابط

الدكتور
محمد عادل محمود
اختصاصي الامراض النفسية والعصبية

28/09/2023

يمعود دكتور الوسواس من الشيطان..
اغلبية الناس تحسب الوسواس انه من الشيطان وبالتالي يضغطون على الشخص انو يساعد نفسه
لكن بالحقيقة هو اضطراب نفسي حاله حال اي اضطرابات

يصير بلاطفال؟؟!
اي والله يصير وعادي حاله حال الكبار وبنفس الشدة
تصور طفل يغسل ايدك خمسين مرة باليوم ومن تمنعه يصير عصبي وحتى دخل مراحل الاكتئاب ووصل يفكر ينهي حياته!!

اليوم عموري بعد شهرين من العلاج الصح صار جدا طبيعي واختفت كل الاعراض وصار طفل حاله حال كل الاطفال

النقطه اللي خلت عموري يصير زين هو اهتمام اهله بهلجانب بحيث عالجو قبل متبدي المدارس

كلش فرحنا بتحس عموري وحبينا ناخذ صوره حلوة وياه

نشوفكم بقصة تحسن لخ بقادم الايام💪💪

الدكتور
محمد عادل محمود
اختصاصي الامراض النفسية والعصبية

17/09/2023

تتذكرون اكيد نادين الذكية
ليش ذكية؟؟
لان تلبس نظارات طبية مثلنا 😅

جوابا لاستفسارنا قبل كم يوم عن موضوع الكابه بلاطفال
الاطفال صعب يعبرون عن مشاعرهم وداخلهم فرح يطلعوها على شكل تصرفات وسلوك عصبي او يكونون حركين واندفاعيين
اهنا يجي دور الطبيب النفسي يميز بين الكابه وبين فرط الحركة وبين لضطرابات السلوك لان كلها تتعالج بصورة مختلفة

والموضوع بيه تفاصيل هوايه في قادم الايام ننشر عنه فديو

وهالصورة وية نادين تذكارية بعد ماوعدتني تقلل مشاهدة الايباد والموبايل🙏💪

الدكتور
محمد عادل محمود
اختصاصي الامراض النفسية والعصبية

12/09/2023

جانب من المحاضرات القيمة اللي انطيناها للاطباء والصيادلة واطباء الاسنان وكذلك من الكوادر الطبية العاملين في المراكز الصحية

المحور كان عن الكشف المبكر عن الاضطرابات النفسية والامراض العصبية النمائية للاطفال منذ الولادة

دورهم كلش مهم بلتقييم الاولي للطفل في حال الطفل يعاني من اي مشكلة في التطور الحركي او الحسي او الاجتماعي او اللغوي

الهدف هو التشخيص الاخير من قبل الطبيب الاختصاص الامراض النفسية والعصبية
التدخل المبكر
والعلاج المبكر

وبالتالي مستقبل افضل للطفل💪💪

الدكتور
محمد عادل محمود
اختصاصي الامراض النفسية والعصبية

26/08/2023

دكتور بنتي بس تشكي من راسها!
دكتور ابني بس يشكي من بطنه!
دكتور شو ابني صاير عصبي !
دكتور بنتي حيل تخاف من المدرسه!
دكتور ابني يصيح بحلمه !

عبالكم الاطفال ميعشيون القلق والخوف؟!
حالهم حال الكبار بالمشاعر لكن بسبب عمرهم فهمه غير قادرين على التعبير عن اللي داخلهم

فاغلبيتهم يجونا على شكل اعراض جسديه مثل وجع البطن او الصداع الغير عضوي وبدون وجود اي سبب

خصوصا فتره بدايات المدارس
حتى العصبية اللي اتكون بلاطفال ممكن سببها القلق

اغلبية الاطفال نكدر نعالجهم سلوكيا وبنصائح بسيطه للاهالي تكون كافية
لكن مرات القلق ياثر سلبا على الطفل وعلى مستواه الدراسي فهنا العلاج يكون دوائيا همينه وانطي نتائج كلش ممتازه

اهنا صديقة العياده رسمتني بنفس الدقيقه اللي كنت احجي وياها 😅وهي رسامه ماهره جدا
ولازم نطور من مهارات الرسم للاطفال لان هي وسيلة للتعبير عن داخلهم 😊

الدكتور
محمد عادل محمود
اختصاصي الامراض النفسية والعصبية

21/08/2023

دكتور صار فتره انطيه ميلاتونين لابني بنتي علمود ينامون!!

دسمع الدراسه اللي طلعت

تحذير هام جداً

في دراسه صادمة نشرت بتاريخ ٢٥/٤ /٢٠٢٣ في المجله العالمية المعروفه JAMA وهي من اهم المجلات الطبيه .

قامو بدراسة الميلاتونين الذي تنتجه ارقى ٢٥ شركة في امريكا على شك ( gummy ) ( جيلاتين )

حيث جذب انتباه الباحثين الى ارتفاع غير مسبوق وصل الى ٥٣٠٪؜ بنسبة دخول الاطفال للمستشفى نتيجة التسمم بجرعات عالية جدا منذ عام ٢٠١٢ الى عام ٢٠٢١ ( هذه معلومات فدرالية رسمية ) ، مما جعل الباحثين يحاولو استكشاف الاسباب .

🔴 الصادم حقيقةً هو انهم وجدوا ان جرعة الميلاتونين الحقيقية تختلف اختلاف هائل و مخيف عن الجرعة المكتوبة على العلبه .

👈 اكثر بـ٣٤٧٪؜ عن الجرعة التي تكتبها الشركة على علبة منتجهم ، رقم مخيف و كارثي

🔴 و وجدوا ان بعض الشركات اصلاً لا تحتوي اصلا على الميلاتونين .

🔴 بل الادهى انهم وجدوا بعض الشركات تحتوي منتجاتها على مادة الـ cannabidiol و هي علاج للصرع المستعصي المستخلص من عشبة الماريجوانا .

🤏 لذا ندعوا اهلنا و احبتنا الى عدم شراء هذه المنتجات التي تباع على شكل ( gummy) ( جيلاتين ) لأي شركة كانت مهما كانت

🤏 كما ندعوا اطباءنا و زملائنا الصيادلة الاعزه الى عدم التعامل مع هذه المادة الى حين الجزم من هذه النتائج .

15/08/2023

شنو اللي يفرح الطبيب ؟؟؟
اكثر شي يفرح الطبيب هي شغلتين

من تشوف المراجعة مالتك قبل شهر جانت تعاني من فرط حركة وتشتت انتباه وهسه رجعت طفلة طبيعيه ١٠٠٪؜

والشغلة الثانية انو اهل الطفل واقارب الطفل يدعولك بالخير والنجاح والضحكه مرسومة على وجوههم

التغير اللي صار وية ميار خلى كل اطرافها سعداء وفرحانين حتى الطبيب 😊

مو بس هذا
الطفلة رجعت لمواهبها السابقة وهي الرسم والابداع في التلوين والترتيب والجلسة القادمة رح ننزل رسوماتها💪

الحمدالله على سلامتها وشفائها

الدكتور
محمد عادل محمود
اختصاصي الامراض النفسية والعصبية

07/08/2023

مشاركتي في مقالة خاصة لاطفال الاضطرابات طيف التوحد
اهم المشاكل اللي نعانيها
وامثلة من الحالات الموجودة
وكيفية تقليلها

شبكة نيريج للصحافة الاستقصائية
https://nirij.org/2023/07/29/%d9%85%d8%b1%d8%b6%d9%89-%d8%a7%d9%84%d8%aa%d9%88%d8%ad%d8%af-%d9%85%d8%b9%d8%a7%d9%86%d8%a7%d8%a9-%d8%a8%d9%84%d8%a7-%d9%86%d9%87%d8%a7%d9%8a%d8%a9-%d8%b6%d8%ad%d8%a7%d9%8a%d8%a7-%d8%a7%d9%84/

الدكتور محمد عادل محمود
اختصاصي الامراض النفسية والعصبية

26/07/2023

تكرار لهيج حالات بهل ايام
الرجاء انتباه للاهالي
ماكو علاج بالحقن الشرجية لطفل التوحد
ماكو حرمان الطفل من اهم الاكلات بحجة الحمية الغذائية

مؤذيه مشاهدة هيج اطفال كضحايا للدجل والخداع..

اكو مبدأ بالطب يكول
اذا ماتكدر تنفع المريض.. لاتضره

اجالنا طفل بعمر ست سنوات اتشخص باضطراب طيف التوحد من كان عمره اربع سنوات
كان علاجه عباره عن حميه غذائية قاسية جدا الطفل محروم من ٢٢ نوع من الاكلات المهمه
شراب رسبريدون بجرعة ٤ سي سي يوميا
انواع اشكال مقويات وشرابات
تحاليله الطفل عبارة عن نقص في مستوى هيموغلبين الدم ونقص الحديد ونقص كل الفيتامينات في الجسم

الطفل شفناه عباره عن كتله لحم صاير اصفر شاحب مايكدر يرفع راسه ومامتعلم كلمه وحده ولا متعدل اي سلوك مع الاسف

هو هذا علاج طيف التوحد؟!
كثر المدعين باختصاص طيف التوحد مستغلين عطف ومشاعر الاهل

حجة الاهالي هو الطبيب النفسي طب المجانين وابنا مو مجنون

رجاءا عوفو هذا المبدأ الخاطئ مو علمودكم.. لكن علمود اطفالكم
هسه بكل محافظات اكو طبيب نفسي وانفتحت مراكز للتشخيص في بغداد وكربلاء وبصرة وبامهر الاطباء النفسية باختصاص دقيق للطيف التوحد
رح تستفادون جدا
احنه ماندعي احنه نشفي مرضى طيف التوحد اكو هوايه من زملائنا يكدرون يشخصون لكن المهم بالمتابعة ومراقبة الطفل ومواصلة التمارين والنصائح مع الاهالي

اتمنالكم ولاطفالكم كل السلامة والصحة يارب🙏🙏

الدكتور
محمد عادل محمود
اختصاصي الامراض النفسية والعصبية/ كركوك

17/07/2023

هاي القصة اللي اتفقنا انو ننشرها
الطب النفسي عالم واسع وبحر ومتخلص الحالات والقصص الموجودة بيها وكل قصة تختلف من غيرها
ذكرنا سابقا التعاون بين الاطباء بمختلف الاختصاص تنطي نتيجة ممتازة
التعاون بين طبيب النفسي وبين طبيبة النسائية جانت سر نجاح وشفاء هاي المريضة
الموضوع بيه تفاصيل هوايه لكن طلبت من المريضة تكتب تفاصيل مهمه

انتو عبالكم التحرش الجنسي وصدمات الطفولة تعبر سلامات بالبنت؟؟!
تصورو حتى البنت تزوجت وانتهى لكن بقى الموضوع صادم الها واثر على زواجها وعلى قدرتها للانجاب..

ان شاءالله نعمل بيه بث مباشر مع د. حلا بخصوص هلموضوع وشلون ياثر على الحمل

ملاحظه مو كل عقم معناه اكو سبب نفسي لكن موضوع العقم النفسي جدا وارده وخصوصا مجتمعنا احنة اللي بيها هيج شغلات

اني من اول جلسة للمريضة كنت جدا واثق انو رح تتعالج وتصير زينة لان ارادتها وايمانها كان نقاط قوة في شفائها

احتاجينا علاج دوائي بلاضافة الى النصائح والتمارين حتى تنطي نتائج جيدة واكيد مع الحمل نوقف الادوية💪

الدكتور
محمد عادل محمود
اختصاص الامراض النفسية والعصبية

15/07/2023

الاطفال الحلوين البسطاء صارو جزء يومي من عيادتنا
مواضيع التأتأة صارت هوايه

نزلنا بيها عدة منشورات سابقا

احب اذكركم انو اغلبية الاسباب للتاتأة هي نفسية منها قلق والخوف
الاطفال مرات مايكدرون يعبرون عن داخلهم فتصير عدهم تلعثم والتاتاة خصوصا مواضيع اللي يتوترون ويخافون منها

ونحتاج نقيم زين اذا اكو غير اسباب عضوية

ملاحظة مو كل تاتاة معناه تنطوه الف نوع شراب اوميغا
اكو تدريبات خاصة ننطيها ونعلم الاهالي بيها وتفيد جدا وهذا احنه نحددها حسب حالة الطفل ولاننسى النوم والاكل الصحي للطفل ضروري مع التدريبات وتنطي نتيجة حلوة

الصورة بعد اذن الاهالي واشكرهم على ثقتهم وتفهمهم لهاي المشكلة🙏🙏

كل السلامة الهم ولباقي الاطفال

الدكتور
محمد عادل محمود
اختصاصي الامراض النفسية والعصبية