27/04/2026
📱 ليش طفلك مرات يصير مثل "الموبايل المشتغل"؟ يسولف بس ما يسمع! 👶
تدرون إن التواصل عند الأطفال مو بس حجي وكلمات تنكال؟ التواصل بالأساس هو مهارة اجتماعية وتفاعل بين طرفين مبني على "الأخذ والعطاء".. يعني الطفل الطبيعي لازم يسأل وينتظر جواب، ويسمع من أحد يحاجيه ويجاوب على كد السؤال.
🚫 زين.. شلون الموبايل والتلفزيون ديخربون هذا التواصل؟
من نترك الطفل كدام الشاشات لفترات طويلة، راح يتعلم ويتبرمج على "التواصل من طرف واحد". الشاشة تغني وتسولف وتطلع ألوان، بس ما توقف وتنتظر منه جواب ولا تسأله شنو رأيك!
هالشي راح يسبب مشكلتين كلش جبيرة:
1️⃣ الطفل يصير مثل "الراديو":
يبدي يحفظ أغاني وحجي ويسولف وية نفسه، بس ما يعرف شلون يستخدم هالكلمات حتى يحجي وية الناس الحقيقيين ويعبر عن احتياجاته.
2️⃣ ينسى شلون يسمع وينتظر:
يصير الطفل حرفياً مثل الموبايل المشتغل؛ يسرد حجي وما يسكت بدون ما يوجه كلامه لأحد، وما ينتظر أي رد من المقابيله، لأن بكل بساطة ما متعود على هالشي وما تدرب عليه بالشاشات!
💡 الخلاصة:
الطفل يحتاج "بشر" كدامه يسولف وياهم حتى يتعلم الحجي الصدك والتفاعل، مو أجهزة تلقنه كلمات وهو بس يباوع.
قللوا الشاشات، واستبدلوها باللعب والسوالف الحقيقية حتى نرجع نبرمج طريقة تواصلهم صح. ❤️
