Sjúkrahúsið á Akureyri

22/04/2026

Hollvinasamtök Sjúkrahússins á Akureyri hafa nýverið afhent sjúkrahúsinu tíu svokallaðar CADD-lyfjadælur. Um er að ræða litlar, rafknúnar dælur sem notaðar eru til að gefa sjúklingum lyf stöðugt eða eftir þörfum yfir ákveðinn tíma. Þær eru einkum nýttar í verkjameðferð og í líknarmeðferð, þar sem þörf er á nákvæmri og samfelldri lyfjagjöf.

„Við vitum að þessi búnaður getur haft raunveruleg áhrif á líðan fólks á erfiðum tímum og erum stolt af því að styðja við starfsemi sjúkrahússins með þessum hætti.“ segir Jóhannes Gunnar Bjarnason, formaður stjórnar Hollvina.

Hollvinasamtök SAk hafa um árabil stutt við starfsemi sjúkrahússins með margvíslegum hætti og lagt sitt af mörkum til að efla þjónustu og aðbúnað sjúklinga. Árlegt styrktar- og árgjald er 6.000 krónur, en benda má á að búið er að senda út greiðsluseðla ársins, með eindaga 1. maí. Hægt er að gerast Hollvinur með því að skrá sig hér: https://www.hollvinir.is/services

Á myndinni eru fulltrúar Hollvina og deildarstjóri og aðstoðardeildarstjórar lyflækningadeildar. Frá vinstri: Inga Margrét Árnadóttir, Jóhannes Gunnar Bjarnason, Kristín Sigfúsdóttir, Jóhann Rúnar Sigurðsson, Heiða Berglind Magnúsdóttir, Hermann Haraldsson, Rebekka Héðinsdóttir, Bjarni Jónasson og Ragnheiður Birna Guðnadóttir.

17/04/2026

16/04/2026

Sjúkrahúspósturinn 7.tbl. er komið út!

Blaðið má lesa hér: https://island.is/s/sak/frett/sjukrahusposturinn-7-tbl-er-kominn-ut

Meðal efnis í blaðinu er: samstarfssamningur um krabbameinsþjónustu, aukin þjónusta við sjúklinga með ristilsjúkdóma, útboð vegna fyrsta áfanga nýbyggingar, námskeið í gjörgæsluhjúkrun, ný þjónusta á rannsóknarstofu í lífeðlisfræði, umfjöllun um nýja þjónustu á rannsóknarstofu í lífeðlisfræði, þjálfun sjúkraliðanema, nýtt fagráð, styrkur til rannsókna, vitundarvakning varðandi skráningu nánasta aðstandanda sjúklinga, umfjöllun um lungnaráðstefnu og styrk til eflingar á vægi lyfjafræði utan höfuðborgarsvæðisins, gjafir, nýráðningar, kynningar, heimsóknir og fleira.

15/04/2026

Í dag er alþjóðlegur dagur lífeindafræðinga. Að því tilefni var kaffitíminn sérlega góður!

Lífeindafræðingar starfa á SAk á rannsóknardeild, lífeðlisfræðideild og á meinafræðideild og starfa á fjölbreyttum sérsviðum við blóðmeinafræði, klíníska lífefnafræði, sýkla- og veirufræði, blóðbanka, lífeðlisfræði og meinafræði.

Hægt er að fylgjast með þeim á Instagram (rannsókn_sak) og á Facebook (rannsókn SAk).

Til hamingju með daginn lífeindafræðingar!

15/04/2026

Í apríl fer af stað vitundavakning varðandi skráningu nánasta aðstandanda í sjúkraskrá sjúklinga á SAk. Markmiðið með verkefninu er að vekja athygli sjúklinga á skráningu nánasta aðstandanda í sjúkraskrá og hvetja þá til að uppfæra skráninguna eftir þörfum.

15/04/2026

Námskeið í gjörgæsluhjúkrun haldið í fyrsta sinn á SAk

Dagana 26.–27. mars fór fram tveggja daga námskeið í grunnatriðum gjörgæsluhjúkrunar, Basic for nurses, á Sjúkrahúsinu á Akureyri (SAk). Um er að ræða alþjóðlegt námskeið sem er hluti af svokallaðri Basic-línu fyrir heilbrigðisstarfsfólk og hefur verið kennt víða um heim.

Námskeiðið hefur verið fastur liður í aðlögun hjúkrunarfræðinga á gjörgæsludeild Landspítala síðastliðin tíu ár, en þetta er í fyrsta sinn sem það er haldið á SAk.

Tveir sérfræðingar í gjörgæsluhjúkrun, þau Guðrún Jónsdóttir og Þorsteinn Jónsson, komu frá Landspítala til að kenna námskeiðið. Helga Dögg Jónsdóttir, hjúkrunarfræðingur á gjörgæsludeild SAk, hafði umsjón með skipulagningu þess og tók jafnframt þátt í kennslu.

„Það er virkilega jákvætt að geta staðið fyrir námskeiði sem þessu á SAk,“ segir Helga Dögg. „Stöðluð kennsla sem þessi er mikilvægur liður í því að styðja við og efla þá sérhæfðu hjúkrun sem á sér stað á gjörgæsludeild.“

Alls sóttu tíu hjúkrunarfræðingar sem nýlega hafa hafið störf á gjörgæsludeild SAk námskeiðið, auk eins hjúkrunarfræðings frá gjörgæsludeild Landspítala við Hringbraut. Kennslan var bæði bókleg og verkleg og lauk námskeiðinu með prófi.
Samkvæmt niðurstöðum könnunar sem lögð var fyrir þátttakendur í lok námskeiðsins þótti það bæði gagnlegt og skemmtilegt.

„Með tilkomu námskeiðsins á SAk skapast ný tækifæri til að efla faglega þekkingu og styðja við markvissa aðlögun nýrra hjúkrunarfræðinga á gjörgæsludeild, sem er lykilþáttur í að tryggja öryggi og gæði þjónustunnar,“ segir Helga Dögg enn fremur.

14/04/2026

Aukin þjónusta við sjúklinga með ristilsjúkdóma á Sjúkrahúsinu á Akureyri

Á Sjúkrahúsinu á Akureyri hefur á síðustu misserum verið byggð upp aukin sérhæfð þjónusta í aðgerðum á ristli. Tveir skurðlæknar við sjúkrahúsið, sem hafa sérþekkingu á neðri meltingarvegi, hafa leitt þá uppbyggingu samhliða almennum skurðlækningum sínum.

„Starfsemin hefur vaxið jafnt og þétt, en nú er meðal annars farið að framkvæma valaðgerðir á ristli með kviðsjá, sem hefur talsverða kosti fyrir sjúklinga. Slíkar aðgerðir leiða oft til hraðari bata, minni verkja og styttri legutíma samanborið við opnar aðgerðir,“ segir Kristín Jónsdóttir, kviðarholsskurðlæknir.

Þessi þróun þýðir að sjúklingar á Norðurlandi geta í auknum mæli fengið meðferð nær heimabyggð, í stað þess að þurfa að leita til Reykjavíkur með tilheyrandi raski fyrir þá og aðstandendur þeirra.
„Það hefur verið mikil ánægja meðal sjúklinga að geta farið í aðgerð hér norðan heiða,“ segir Kristín.

Margir þeirra sjúklinga sem fara í slíkar aðgerðir eru með krabbamein í ristli en einnig eru aðrar ástæður fyrir meðferðinni. Kristín segir að árangur hafi verið góður en frá áramótum hafa verið framkvæmdar fimm kviðsjáraðgerðir þar sem hluti ristils var fjarlægður, þar af tvær í síðustu viku.

„Það er mikilvægt að auka vitund meðal heilbrigðisstarfsfólks um þessa þjónustu, þar sem nú er mögulegt að vísa sjúklingum beint til Sjúkrahússins á Akureyri í stað þess að senda þá til Reykjavíkur,“ segir Kristín enn fremur.

13/04/2026

Nemendur Háskólans á Akureyri sem eru í fagnámi fyrir starfandi sjúkraliða hafa undanfarin tvö ár fengið þjálfun í að taka blóð á Sjúkrahúsinu á Akureyri. Nemendurnir eru ýmist í fagnámi með áherslu á öldrunar- og heimahjúkrun og hins vegar í samfélagsgeðhjúkrun.

Háskólinn á Akureyri er fyrsti háskóli landsins sem býður upp á fagnám til diplómaprófs fyrir starfandi sjúkraliða. Um er að ræða tveggja ára sveigjanlegt nám, sem skipulagt er með þeim hætti að nemendur geti sinnt starfi samhliða náminu.

Fulltrúar SAk sjá um fræðslu og sýnikennslu í Háskólanum á Akureyri auk þess sem nemendur mæta á sjúkrahúsið, fylgjast með og læra – og taka blóðprufur hjá þeim einstaklingum sem samþykkja það.

„Það er gefandi og skemmtilegt að vera í samstarfi við nemendur HA bæði sjúkraliðanema sem og hjúkrunarfræðinema sem einnig koma til okkar í kennslu í blóðtöku.“ segir Guðný Björg Jensdóttir, sjúkraliði á rannsóknardeild SAk.

Meðfylgjandi eru myndir af nokkrum hópum sjúkraliðanemum í HA sem hafa mætt í kennslu og þjálfun í blóðtöku á SAk.

10/04/2026

Samstarfssamningur vegna krabbameinslækninga​

Sjúkrahúsið á Akureyri og Landspítalinn hafa gert með sér samstarfssamning vegna krabbameinslækninga á SAk. Fjögurra manna teymi lækna Landspítala mun sinna krabbameinslækningum á SAk og skiptast læknarnir á þriggja daga viðveru á Akureyri. Teymið samanstendur af tveimur læknum sem starfað hafa á SAk um nokkurra ára skeið, þeim Signýju Völu Sveinsdóttur blóðlækni og Örvari Gunnarssyni krabbameinslækni. Þá bætast við í teymið tveir nýir krabbameinslæknar, þær Þóra Rún Úlfarsdóttir og Ólöf Kristjana Bjarnadóttir.

„Við erum mjög ánægð með að hafa gengið frá þessum samningi og tryggt áframhaldandi þjónustu krabbameins- og blóðlækna. Við hlökkum til samstarfsins og að sjá þjónustuna eflast og þróast enn frekar,“ segir Guðni Arnar Guðnason, starfandi forstöðulæknir lyflækninga.

08/04/2026

Flutningar á dag- og göngudeildarþjónustu geðdeildar

Nú standa yfir flutningar á hluta af dag- og göngudeildarþjónustu geðdeildar Sjúkrahússins á Akureyri í nýtt húsnæði að Hafnarstræti 97, 6. hæð. Gengið inn á sama stað og á heilsugæslunni áður, hvort heldur sem er úr göngugötu eða að ofan frá Gilsbakkavegi.

Sú starfsemi sem flyst nær til allrar dagþjónustu sem sinnir bæði legudeildar- og göngudeildarsjúklingum, sem og hluta af göngudeildarþjónustu.

Flutningarnir munu hafa tímabundin áhrif á þjónustu. Engin dagþjónusta verður veitt fyrir legudeildarsjúklinga nk. föstudag, en hún hefst á ný mánudaginn 13. apríl með breyttri dagskrá í nýju húsnæði.

Sjúklingar í dagþjónustu á göngudeild hafa flestir þegar fengið boðun í viðtöl í næstu viku á nýjum stað. Ný dagskrá fyrir dagþjónustu hefst mánudaginn 20. apríl með nýrri dagskrá.
Björg bjargráðarhópur mun einnig hefjast á nýjum stað mánudaginn 13. apríl.

Þeir sem eiga bókuð viðtöl á göngudeild munu fá upplýsingar um breytingar á staðsetningu viðtala eftir því sem við á.

Við leggjum áherslu á að gera flutningana sem þægilegasta og hlökkum til að taka á móti skjólstæðingum í Hafnarstrætinu.

08/04/2026

Gjöf til endurhæfingarsundlaugar á Kristnesi

Rebekkustúka nr. 16 Laufey – Oddfellow færði nýverið sjúkraþjálfun á endurhæfingardeild Sjúkrahússins á Akureyri veglega gjöf þegar stúkan gaf flotbúnað til notkunar í sundlauginni á Kristnesi.

„Með gjöfinni hefur aðstaða til flotmeðferðar tekið stórstígum framförum, en sundlaugin býr nú yfir flotbúnaði fyrir allt að tíu einstaklinga í senn. Þetta skapar ný og fjölbreytt tækifæri í endurhæfingu, bæði fyrir einstaklingsmeðferðir og samflot, þar sem áhersla er lögð á djúpslökun, líkamsvitund og andlega vellíðan,“ segir Sólveig Bennýjar og Haraldsdóttir, aðstoðarmaður sjúkraþjálfara.

Hugmyndin að gjöfinni kviknaði þegar Ester Gestsdóttir dvaldi í endurhæfingu á Kristnesi í janúar 2026. Hún sá þá möguleika á að efla þessa meðferð, þar sem einungis eitt sett af flotbúnaði var til staðar. Í framhaldi lagði hún hugmyndina fyrir stúku sína sem brást afar vel við. Ragnheiður Sveinsdóttir og Ester komu sjálfar og afhentu búnaðinn við hátíðlega athöfn.

Jafnframt er vert að nefna að Sólveig Bennýjar og Haraldsdóttir, aðstoðarmaður sjúkraþjálfara og jógakennari við deildina, hefur lokið námi í flotleiðsögn hjá Flothettunni í Reykjavík. Sú þekking mun styðja enn frekar við faglega þróun flotmeðferðar á staðnum.

„Gjöfin mun nýtast fjölbreyttum hópi skjólstæðinga og styrkja bæði líkamlega og andlega endurhæfingu þeirra sem nýta sér þjónustu deildarinnar,“ segir Sólveig Bennýjar og Haraldsdóttir enn fremur.

01/04/2026

Í gær barst Sjúkrahúsinu á Akureyri rausnarleg gjöf þegar um 1.100 páskaegg voru afhent til að gleðja bæði starfsfólk og skjólstæðinga yfir páskahátíðina.
Með gjöfinni vildi fyrirtæki hér í bæ sýna stuðning við starfsemi SAk og færa smá páskagleði inn í daglegt líf þeirra sem hér starfa og dvelja.
Við kunnum þeim innilega þakkir fyrir hlýhuginn og óskum þeim sem og öllu starfsfólki SAk gleðilegra páska.