Guðs vitund

21/04/2026

Það er ekki fyrr en þú finnur hið raunverulega heimili og frið innra með þér sem þú áttar þig á því að alla tíð hefur heimurinn sem þú býrð í verið að reyna að selja þér einhverja lausn fyrir utan þig...

Þú áttar þig á því að friðurinn sem heimurinn er að reyna að tryggja þér var aldrei fundinn í því að eiga meira, tryggja sig betur eða vernda sig.

Þú ert sjálfur friðurinn, öryggið og verndin! 🎯

Þegar þú hefur fundið þitt innra heimili tekur þú það með þér hvert sem þú ferð 🏃‍♀️

Þú tryggir aðeins tálsýn í ytri veruleikanum, þegar þú lifir frá ótta í stað trausts, ómeðvituð um eigin stórleika ❤️💫

18/04/2026

💜 Viska á lífsgöngunni 💜
Ég hef lært það á minni vegferð að við komum hingað í vissum tilgangi og er ætlað að ganga vissa leið að þeim tilgangi. Við höldum á vissum tímum að við vitum allra best hvað er okkur fyrir bestu og þjösnumst stundum við vitlausa hluti í þrjósku þangað til við þurfum að gefa upp stjórn svo að lífið (Guð) geti sýnt okkur aðra leið, sú leið er ekki gegn því sem þér er ætlað heldur í flæði við það sem er þér fyrir bestu.

Lífið verður skemmtilegra, allt gengur miklu betur, innsæi okkar styrkist og mótstöðulaust flæðum við með alheimskraftinum og öllum þeim lexíum sem fylgja þeirri leið 🥰
Við lærum af öllu og öllum og þroskumst þannig í kærleika og umburðarlyndi ❤️

Ég hef fengið að upplifa sjálfa mig sem skapara lífs míns og margt af því sem ég vel fyrir mig raungerist þegar ég hef losað um hindranir í minni trú gegn því.

Hugurinn er gagnrýninn en hjartað þekkir leiðina og þarf ekki hugann til að afsanna fyrir mér hvort eða afhverju eitthvað er "ekki hægt".
Gildrur hugans eru margar en með reynslu lærum við að þekkja þær og endurforrita hugann til að treysta hjartanu og leið Guðs að okkar besta lífi 💫💃

06/04/2026

Ást er ekki bara mannleg tilfinning milli ástfanginna einstaklinga, ást er uppruni þinn og samtengjandi afl okkar allra.

Ást er aflið sem skapar nýjan heim.
Fegurð í brosi og ósögðum orðum, velvild og hjartahlýja til alls sem er á dýpi sem fæst ekki lýst með orðum, aðeins fundið í dýpstu tengingu sálar við upprunann. Það sem augun sjá er takmarkað - það sem hjartað finnur, endalaust.

Ást er aldrei sóað, jafnvel þó að aðrir geti ekki tekið þinni ást nema á því dýpi sem þeir elska sjálfa sig. Fræjum er sáð, kærleikur opnar á kærleika og opið hjarta opnar hjörtu.
Ég hef sönnun þess í eigin lífi.

Kærleikurinn fellur aldrei úr gildi, hann er eilífðar gjaldmiðill. Sterkari en allt annað og mest heilandi afl alheimsins.

Ég mun elska allt og alla af öllu hjarta alla tíð því ástin umbreytir og skapar heim sem ég vil lifa í ❤️💫✨️

27/03/2026

Fyrri hluta ævi minnar lifði ég frá huganum. Hugurinn er sá sem vill hafa allt á hreinu, stjórna öllu, spá fyrir um allt og vernda mig gegn sársauka og óvissu. Hugurinn er öflugt verkfæri en honum var aðeins ætlað að koma mér svo langt og síst af öllu var honum ætlað að vera stjórnandi lífs míns. Þegar ég lifði frá huganum var lífið þungt og innantómt þrátt fyrir tilraunir til annars.

Ég g*t hugsað um að vilja frið og betra líf á meðan það ríkti stríð innra með mér. Hugurinn hljóp með mig í hringi í ótta en það er ekki þar sem mér var ætlað að vera. Þér er ekki ætlað að vera þar heldur.

Þér er ætlað að lifa frá hjartanu ❤️

Þegar þú tengist hjartanu víkur hugurinn og allar hans gildrur því hjartað veit og finnur hvað er satt, hvaða leið er rétt og hvað vill fæðast í þínu lífi. Þegar þú leyfir hjartanu að taka við stýrinu færðu að finna og sjá hversu töfrandi lífið getur verið og hvernig aðstæður mæta þér á annan hátt. Þú finnur þig inn í aðstæður í stað þess að hugsa þig í gegnum þær, þú treystir meira en að stjórna og þú opnar á annan veruleika sem er margfalt fegurri.

Hjartað finnur það sem hugurinn getur ekki tengt sig við. Það sem hugurinn sá sem vandamál finnur hjartað sem lærdóm og vöxt. Það sem hugurinn túlkar sem töf eða hindrun sér hjartað sem Guðdómlega tímasetningu. Hjartað sameinar og skapar einingu á meðan hugurinn finnur leiðir til að sundra. Þú ferð frá því að reyna að lifa af yfir í að dansa í takt við flæði lífsins vegna þess að traust þitt margfaldast og þú veist að allt er alltaf eins og það á að vera. Þú finnur hvernig þú ert leidd áfram að rétta fólkinu, réttu orðunum og réttu tækifærunum. Innsæi þitt styrkist og þín orka berst frá þér óhindrað til þess að sameina í heiðarleika og kærleika. Þú þráir að vera sönn og hreinskilni þín verður skarpari.

Hjartað er heimastaður sálarinnar og sálin leiðir þig alltaf áfram í kraftaverkum og tengir þig við dýpri sannleika sem hugurinn getur ekki útskýrt. Að lifa frá hjartanu krefst hugrekkis og trausts í upphafi - að venjast því að láta af stjórn hugans og finna þig inn í nýjan leiðandi kraft. Hjartað er heilagt og mun aldrei leiða þig villu vegar og þegar þú færð sönnun þess aftur og aftur finnur þú sanna lífsgleði, upplifir fegurð og heilaga nærveru eigin sálar þrátt fyrir allar áskoranir og sársauka. Viska hjartans opnar á heilagt líf sem þú þarft ekki að taka þér frí frá. Þegar hjartað er leiðandi í þínu lífi mun hugur þinn að endingu fylgja ráðleggingum þess með ró, trausti og skýrleika. 🥰💫🙌

20/03/2026

Tveir veruleikar - Þú átt valið hvorn þú fæðir

Það er áþreifanleg tilfinning í loftinu og þú getur fundið hana og séð ef þú fylgist vel með innra með þér sem og í ytra umhverfi.
Tveir ólíkir heimar eru í gangi á sama tíma.
Annar er hávær, knúinn áfram af ótta og dregur fólk dýpra inn í hræðslu, reiði & árásir á meðan hinn er rólegur, friðsæll og stöðugur ef þú bara hægir nógu mikið á til að taka eftir og finna það.

Við stöndum á tímamótum þar sem þú færð að velja í hvorum veruleikanum þú býrð í, því sannleikurinn er sá að það sem þú setur athygli þína og orku í er þitt val að lifa í og með.

Sterkustu einstaklingarnir eru ekki þeir sem berjast við allt sem þeir sjá heldur þeir sem skilja leikritið og neita að falla í gildru óttans. Það eru einstaklingarnir sem velja að byggja á kærleika, skapa og elska djúpt, jafnvel þegar allt á yfirborðinu virðist óstöðugt.

Eitthvað djúpt innra með þér finnur hvað þú vilt en leiðin þangað er óljós, það er allt í lagi. Þú þarft ekki að vita hvað er framundan heldur eingöngu að skilja að þú hefur valið og þitt val mun endurspeglast í þínum veruleika því þú ert skapari hans.

Hið gamla þarf að enda til að nýtt geti hafist og það er í þínum höndum að draga athygli þína þangað.
Þú velur fyrir þig og aðrir fyrir sig, þannig er ferðalagið okkar.

Haltu fast í þitt skærasta ljós, vellíðan, frið og kærleika og leyfðu því sem er andstæðan að verða eftir. Vertu jarðbundin í því hver þú ert og veldu þá leið sem er rétt fyrir þig sama hvaða skoðanir aðrir mega hafa á því.

Þeir sem sjá báða veruleika án þess að láta draga sig inn í þann neikvæða sem er á lægri tíðni eru þeir sem móta það sem kemur næst. Hvort sem þú gerir þér grein fyrir því eða ekki þá er nýr veruleiki að þróast sem er sá sem þú hefur innst inni þráð að fá að upplifa. Leyfðu þinni þrá eftir einhverju betra að sá fræjum fyrir frábæra framtíð og hafðu trú á þeirri sköpun þó að heimurinn varpi öðru fram til að halda þér fastri 🙏❤️💫

04/03/2026

“Burnout” er líkamlegt ástand sem gerir vart við sig þegar líkami og sál dansa ekki í takt og andlega hliðin þín hefur verið svelt svo um munar á kostnað taugakerfis þíns. Það er þín áminning á að því meira sem þú gerir “þarna úti”, því aftengdari ertu þínum raunverulega kjarna, sál þinni og innri veröld.
Þetta ástand er ákall aftur heim! Heim í hjartað, heim í innri ró, heim til sjálfrar þín og þíns taugakerfis. Þú hefur rúllað áfram á hraða sem þú valdir ekki meðvitað, álagi sem annar hefur sett á þínar herðar og gert að þínu og þú hefur gleymt algerlega hvað það er sem þú í raun og veru þarft og komst hingað til þess að gera.

Samfélagið eins og það hefur verið í áraraðir hefur farið fram á meira og meira af okkur og hraðinn aukinn langt framúr því sem eðlilegt telst. Viljandi er okkur haldið frá því að hægja á til að finna okkur sjálf. Það er ekki fyrr en hið svokallaða “burnout” ástand líkamans gerir vart við sig að við neyðumst til að setja í bremsu og í framhaldi skoða hvað það er sem olli því að við enduðum þar.

Líkaminn okkar er fullkominn - hann segir okkur til allan tímann ef við bara kunnum að hlusta og öll líkamleg einkenni stafa af ójafnvægi, spurningin er bara hvaða einkenni er verið að sýna þér og hvað er það að benda þér á?

Ef þú hefur brunnið út er mjög líklegt að það hafi komið þér í skilning um hvað þú hefur verið að fara á mis við. Það hefur breytt stefnu lífs þíns, gert þig að betri manneskju sem er meira í núinu, tengdari tilfinningum sínum, meira vakandi fyrir umhverfi sínu og með aðra forgangsröðun í lífinu en áður.

Þegar þú horfir á ástandið frá æðri augum sérðu að fleiri og fleiri manneskjum á heimsmælikvarða er gefið tækifæri til að velja aftur, tækifæri til að sjá og skilja hver þau eru og hvers vegna við erum hér í jarðarskólanum. Ég horfi á fleiri og fleiri einstaklinga leiðrétta afvegaleiðingu lífs síns vegna þess að þeir heyrðu ekki ákallið í tæka tíð í öllum hraðanum.

Ég sé ný tækifæri, kærleikann breiða úr sér, hjörtu opnast og skilning myndast og sem heild sköpum við ný tækifæri þar sem ekkert okkar þarf að upplifa að vera útbrunnin, heldur ríkir ró, friður og taugakerfið okkar dansar ljúfum lífsdansi ✨️❤️💫💃

03/03/2026

Ekkert særir okkur meira en eigin hugsanir.
Skoðaðu hvaða áhrif sjálfstal þitt hefur á þig, hvernig þú ert þinn eigin versti dómari.

Þú skapar líf þitt með þínum hugsunum og orðum og því er mikilvægt að huga að því hvaða hugsanir og orð þú ert að raungera, til þess að geta meðvitað breytt því ef þörf er á.

Gríptu þig glóðvolga næst þegar þú hugsar um eitthvað sem er ekki þér í hag og leyfðu þér að auka meðvitund þína fyrir því sem er að geisla frá þér.

Þakkaðu sjálfri þér fyrir hvert skipti sem þú stendur þig að verki í neikvæða átt og leyfðu þér að velja nýja og fallegri hugsun í stað þeirrar gömlu.

Áður en þú veist af hefur þú meðvitað breytt um mynstur og ekki er áþreifanlegt rými innra með þér fyrir neitt annað en kærleika, þakklæti og umburðarlyndi í eigin garð sem og annarra ❤️💫🦋

24/02/2026

Þegar þú leyfir þér að vera að fullu þú sjálf, án tilgerðar, án grímunnar sem þú setur upp, án hræðslunnar við að orð þín falli ekki í kramið hjá öðrum, að þú sért "of mikið" fyrir einhvern, lýsir þú öðrum leið! 🕯

Besta útgáfan af þér ritskoðar sig ekki heldur er í hugrekki sínu algerlega óhefluð, raunveruleg og frjáls. Heiðarleiki þinn opnar á hugrekki annarra og ljós þitt sýnir öðrum hvar þeir hafa reynt að fela sig í skugganum, hrædd við eigið ljós.

Leyfðu þínu ljósi að skína eins björtu og sólinni og finndu frelsið í því að vera að fullu þú sjálf! ❤️🦋💫

20/02/2026

20.febrúar 2026

Það er ekki ólíklegt að þessa dagana sértu að upplifa skringilegar tilfinningar sem eru þér ókunnar.
Sterk sorg, tilfinningar sem þú hefur jafnvel ekki nafn yfir ásamt því að finnast þú týnd.
Hlutir sem þú áður elskaðir eru innantómir og þig þyrstir í eitthvað nýtt en færð ekki hugmyndir um hvað það ætti mögulega að vera.

Þú ert í millibilsástandi. Ástandi þar sem gamla þú er ekki lengur til staðar en sú nýja hefur ekki enn komið fram í dagsljósið. Millibilsástandið er ruglingslegt, sársaukafullt og eins og rússíbani sem þú hefur enga stjórn á. Taugakerfið þitt er viðkvæmara, áreitið í umhverfinu er erfitt á þig og það þyrmir auðveldlega yfir þig. Tilfinningar af kvíða koma upp þar sem líkami þinn er að upplifa ástand sem er þér ókunnugt og hræðist það sem hann þekkir ekki. Það versta sem þú gerir er að streitast á móti, þér er ætlað að flæða frá einum stað yfir á annan og finna tilfinningarnar í stað þess að hunsa þær eða hlaupa frá þeim.

Á þessum tíma er mikilvægt að hugsa um lífið
ekki út frá fortíð eða framtíð, heldur aðeins útfrá hverju líðandi augnabliki. Taktu einn dag í einu og gerðu þitt besta í að finna ró, gera það sem nærir þig og reyndu að finna eitthvað til að vera þakklát fyrir þann tiltekna dag. Þetta tímabil er ERFITT, en þú værir ekki í því nema þú værir nógu sterk til þess að takast á við það 💪

Þú munt rísa upp sterkari, seigari, kærleiksríkari og þakklátari þó þér líði mögulega ekki þannig núna. Þú munt finna meiri frið og nýja hluti til að njóta en það er ómögulegt í þessu millibilsástandi.
Þetta er eins og að vera í lausu lofti og ná hvergi fótfestu, allt er ókunnugt þar til það er það ekki lengur.

Besta leiðin áfram er að halda áfram að gera þitt besta, það er allt sem þú getur beðið um.
Mundu að þú ert að gera nóg og þú ert á réttum stað nákvæmlega þar sem þú ert! ❤️

Ég veit hvernig þér líður! 🦋
Vanti þig styrk og stuðning - ekki hika við að hafa samband 🫂

18/02/2026

Það koma tímar, þegar allt virðist óljóst, yfirþyrmandi og þér finnst þú ekki hafa neina stjórn á því sem lífið færir þér að þú þarfnast akkeris.

Akkerið stendur staðfast í lífsins ólgusjó, rótgróið í djúpinu og bíður þess að jarðtengja þig, hughreysta og styrkja.

Styrkur akkerisins heldur þér stöðugri þegar öldur lífsins verða of harðar. Akkerið er kyrrðin í storminum, tenging þín við æðri mátt og áminning þín á að þú ert ekki ein, það minnir þig  á að þú ert tengd öllu sem er í tíma & takmarkaleysi.

Leitaðu þíns akkeris þegar þig vantar einhvern til að minna þig á eigin styrk og hugrekki til að takast á við allt sem ólgusjórinn færir þér ❤️🌊💫

14/02/2026

Manst þú hver þú ert í raun? ❤️💫

Independent civilizations, separated by geography and centuries, described the same underlying structure of reality.If the pattern holds across time and cult...

06/02/2026

Hver einstaklingur er einmitt það, einn og stakur.
Það þarf þroska til að skilja að ekki öllum er ætlað að ganga sömu leið og þú gengur og dýpri visku til að heiðra ferðalag annarra, sama hvaða skoðun þú megir hafa á því hvert þeirra leið liggur.

Í langan tíma hefur fólk átt erfitt með að skilja að ekki allir hugsa eins og þú. Okkur er kennt að dæma, bera okkur saman við og taka því nærri okkur þegar leiðir skilja. En þegar dýpri skilningur gerir vart við sig sér maður dýrmæt ferðalög einstaklinga á allt annan hátt.

Hver einstaklingur býr yfir vissri tíðni, hefur vissu hlutverki að gegna og hefur einstakar skoðanir myndaðar af umhverfi sínu. Við höldum að öll kynni séu endanleg og sögur okkar séu skrifaðar í stein og verði alltaf eins en þannig virkar lífið bara aldeilis ekki. Lífið er ekki bein leið, það þróast, vex, blómstrar og hvert og eitt okkar blómstrar á sinn hátt. Tíðni okkar breytist í vexti og þannig vöxum við stundum í sundur og leiðir okkar skilja, ekki afþví að eitthvað kom endilega upp á sem olli slitum, heldur vegna þess að við erum ekki lengur tíðnislega að passa saman. Mín leið er önnur en þín og öfugt og það þarf að virða.

Þegar þú sleppir þörfinni á því að aðrir skilji þitt ferðalag og hættir að reyna að “bjarga” fólki, finnur þú loks frið í hjarta og sál. Þín tjáning er þín og tjáning annarra er þeirra. Það gerir ekki þína leið betri eða þeirra verri, hún er bara það sem hún er – Einstök!

Stefna annarra er ekki höfnun á þér, heldur virðing við eigið sjálf. Við vöxum öll í okkar eigin takti og sterkustu sálirnar læra að blessa þá sem víkja frá þeirra vegferð vitandi það að hver og einn er að stíga inn í sitt eigið hlutverk. Við erum kölluð í mismunandi hlutverk og öll hlutverk skipta máli fyrir heildina. Þín leið og þín tjáning í þessu lífi er mikilvæg.

Í stað þess að dæma vegferð annarra gætum við horft á hvern einstakling sem litapunkt - hver með sinn lit. Litirnir vefast saman í mynstur og saman myndum við fegursta veggteppi sem þú gætir nokkurn tíman augum litið.

Styðjum við vegferð hvers annars án þess að dæma hana, hjálpumst að frekar en að sundra og munum að lífið er ferðalag sem getur reynst mörgum erfitt. ❤️💫