Hljóðbókasafn Íslands

16/04/2026

Við fengum góða gesti í vikunni. Rut Sverrisdóttir er lögblind og hefur verið lánþegi á safninu í 40 ár. Hún hefur verið búsett í Svíþjóð undanfarna áratugi. Rut og Eddie Bergstrand fengu styrk til að koma til Íslands og gera samanburð á hlutskipti blindra og sjónskertra í þessum tveimur löndum og benda á hvað betur mætti fara í þjónustu við þennan hóp.

12/02/2026

Karl Ágúst Úlfsson þekkja flestir. Það er leitun að Íslendingi sem glatt hefur þjóð sína oftar og betur en hann. Karl lauk rétt í þessu innlestri á sinni nýjustu afurð, minningabókinni Fífl sem ég var. Í kynningartexta um hana segir: Hver þekkir ekki föndurkennarann, leigubílstjórann, Silla, Geir (og Grana) og margar fleiri hetjur úr Spaugstofunni? Og ekki má gleyma Eyjólfi í Ytri-Hnjáskeljum, Danna í Líf-myndunum og fleiri slíkum.

Leikandi allra þessara kunningja okkar, Karl Ágúst Úlfsson, rifjar hér upp sköpunarsöguna sem vissulega hefur ekki verið án átaka. Þá fléttast inn barátta hans sjálfs við illkynja sjúkdóm, sem hefur gengið vonum framar.

Karl Ágúst er ennþá ferskur og bókin segir lesandanum að hann muni áfram gleðja okkur með því að sýna þjóðinni í spéspegilinn.

23/12/2025

Hljóðbókasafn Íslands sendir lánþegum sínum og velunnurum bestu óskir um gleðileg jól og farsælt komandi ár og minnir á mikilvægi lesturs fyrir alla.

20/11/2025

Einn af velunnurum Hljóðbókasafns Íslands í hópi rithöfunda er leik- og skáldkonan fjölhæfa, Sólveig Pálsdóttir. Hún sendi nýlega frá sér spennusöguna Ísbirnir sem hefur mælst mjög vel fyrir, jafnt hjá leikum sem lærðum. Hún hefur nú lokið við að lesa bókina inn fyrir lánþega safnsins og fyrir það erum við sérstaklega þakklát.

08/09/2025

Bókasafnsdagurinn er í dag, 8. september, og í tilefni hans minnum við á hlutverk Hljóðbókasafns Íslands: Að gera efni aðgengilegt og miðla því til fólks sem glímir við blindu, sjónskerðingu, lesblindu eða aðra prentleturshömlun. Markmið laga um safnið er að uppfylla réttindi þessara hópa fyrir hönd íslenska ríkisins. Þema dagsins er:

Lestur er bestur - fyrir sálina

05/06/2025

Hljóðbókasafnið fékk á dögunum nemanda í starfskynningu úr 10. bekk í Áslandsskóla í Hafnarfirði. Lea Karen Friðbjörnsdóttir hefur verið blind frá mjög ungum aldri og hefur alla tíð notað þjónustu Hljóðbókasafns Íslands. Það var því kærkomið fyrir safnið að fá að kynnast henni betur og fá vitneskju um hvað mætti gera betur, hvaða bækur hana langaði til að safnið gerði aðgengilegar og svara þeim fjölmörgu spurningum sem Lea hafði um safnið og starfsemi þess. Næsta vetur byrjar Lea nám í Flensborgarskóla og safnið er í samvinnu við Sjónstöð Íslands byrjað að undirbúa námsefni til að mæta því. Heimsóknin var fróðleg og skemmtileg fyrir alla aðila og bjartsýni, dugnaður og jákvætt viðhorf Leu einstaklega smitandi.

07/05/2025

Hljóðbókasafnið og fjölþjóðlegt samstarf um hljóðbækur:

Í apríl var Hljóðbókasafn Íslands gestgjafi fundaviku tveggja samstarfshópa: UX-hópsins og IT Forum, sem samanstanda af sérfræðingum frá norrænum og evrópskum stofnunum sem vinna að aðgengi að hljóðbókum fyrir notendur með prentleturshömlun. Fundirnir fóru fram í húsnæði Hljóðbókasafnsins og í fyrsta sinn var haldinn sameiginlegur fundur beggja hópanna, sem markaði nýtt skref í samstarfinu.

Fjallað var um lykilatriði í þróun aðgengis og þjónustu við lánþega með prentleturshömlun. Rætt var um auknar kröfur um afritunarvarnir og áhrif þeirra á lánþega og kynntar niðurstöður notendarannsóknar á upplifun fólks með lesblindu, ADHD og einhverfu af talgervlaröddum. Einnig voru til umræðu frá Noregi niðurstöður viðtala við foreldra barna með fötlun til að bæta þjónustu við þennan hóp. Kynntar voru skýrslur frá Sviss og Finnlandi um hvernig hægt er að bæta þjónustu við viðkvæma notendahópa með einföldum forritum og litlum spilurum sem gætu komið í stað geisladiska fyrir suma lánþega.

Rætt var um stefnu og leiðbeiningar varðandi notkun gervigreindar í framleiðslu, þar á meðal myndlýsingar og leiðir til að auka skilvirkni í framleiðslu og minnka kostnað án þess að það komi niður á lánþegum. Farið var yfir nýja innkaupaferla fyrir EPUB framleiðslu og stöðu námsbóka í raungreinum.
Fulltrúar frá eftirfarandi stofnunum tóku þátt í fundunum:

• Tibi (Noregur)
• Dedicon (Holland)
• MTM (Svíþjóð)
• SBS (Sviss)
• Nota (Danmörk)
• Celia (Finnland)
• Hljóðbókasafn Íslands

16/04/2025

Hljóðbókasafn Íslands óskar öllum lánþegum og velunnurum safnsins gleðilegra páska! 🐣

21/03/2025

Fyrir skömmu náði Hljóðbókasafnið fimmta og síðasta Græna skrefinu. Hvert skref inniheldur 20-40 aðgerðir til að innleiða grænan rekstur. Aðgerðunum í hverju skrefi er skipt í sjö flokka sem ná yfir helstu umhverfisþætti í skrifstofurekstri. Til að standast úttekt þarf að uppfylla a.m.k. 90% aðgerða í hverju skrefi. Framundan er svo að viðhalda þessum góða árangri og halda áfram að hugsa grænt. Á myndinni má sjá tvo þriðju af umhverfisráði safnsins með viðurkenningu frá Umhverfisstofnun.

05/03/2025

Bækur mánaðarins í mars á Hljóðbókasafni Íslands eru allar eftir Birgittu Halldórsdóttur. Frumkvöðullinn Birgitta er einn afkastamesti – og vinsælasti – glæpasagnahöfundur landsins og var lengi vel eina konan í þeirra hópi.
Það fer því vel á því að við vekjum atthygli á Birgittuþingi – málstofu um rithöfundinn Birgittu H. Halldórsdóttur og verk hennar sem haldin er í samstarfi við Hið íslenska glæpafélag á Bókasafni Kópavogs sunnudaginn 9. mars klukkan 13.00-16.00.

Öll velkomin, skráning á eyrun.osk@kopavogur.is

Birgittuþing - málstofa um rithöfundinn Birgittu H. Halldórsdóttur og verk hennar.

28/02/2025

Stórafmæli. Þórunn Hjartardóttir er afkastamesti hljóðbókalesari í sögu Hljóðbókasafns Íslands. Hún hefur lesið inn hundruðir bóka fyrir safnið enda er hún einn þeirra lesara sem er jafnvígur á innlestur allra tegunda bóka. Þórunn er sextug í dag og við á Hljóðbókasafni Íslands óskum henni innilega til hamingju. Myndin er tekin í jólaboði safnsins fyrir örfáum árum.

10/02/2025

Menningar-, nýsköpunar- og háskólaráðherra hefur lokið við úthlutun styrkja til hagnýtingar og innleiðingar íslenskrar máltækni fyrir styrkárið 2024. Styrkirnir, sem voru auglýstir undir heitinu Skerfur, eru hluti af máltækniáætlun 2. Alls voru 12 verkefni styrkt og okkur á Hljóðbókasafninu til gleði var verkefni okkar eitt af þeim sem hlutu styrk. Verkefnið nefnist „MathCAT fyrir íslensku“ og er hugbúnaður sem gerir talgervlum kleift að lesa STEM-bækur (raungreinabækur).