Hrafnista Reykjavík - Laugarás

18/02/2026

Um hundrað manns mættu á Skálafell þegar Bjarni töframaður lék listir sínar og starfsfólk brá sér í ýmis gerfi í tilefni öskudags.

13/02/2026

Í dag var hér í Laugarásnum sérstök Valentínusarsöngstund, í tilefni af Valentínusardeginum sem er á morgun, 14. febrúar. Okkar kæru vinir, Össi og Matti, spiluðu og sungu nokkur rómantísk lög auk þess sem viðburðarstjóri hússins, hún Heiða, tók nokkur lög með þeim félögum. Það yljaði líka sérstaklega um hjartaræturnar þegar vetrarsólin skein af miklum krafti inn um gluggana og baðaði gesti Skálafells geislum sínum. Það er því ekki úr vegi að senda óskir um góða og kærleiksríka helgi og vitna í Hannes Hafstein sem orti um sólina:

Blessuð sólin elskar allt
allt með kossi vekur;
haginn grænn og hjarnið kalt
hennar ástum tekur.

Geislar hennar út um allt
eitt og sama skrifa,
á hagann grænan, hjarnið kalt:
Himneskt er að lifa.

06/02/2026

30/01/2026

Þorrablótið okkar var haldið fimmtudaginn 22. janúar. Á meðan gestir komu sér fyrir í sætum lék píanóleikarinn Helgi Heiðar ljúfa tóna og á sama tíma fengum við Odd Carl til þess að hlaupa með gítarinn á milli allra deilda og syngja nokkur lög fyrir íbúa ☺️ Veislustjóri kvöldins var Guðrún Gunnarsdóttir og með henni var píanóleikarinn Pálmi Sigurhjartarson. Ásdís iðjuþjálfi og Hörður fyrrum húsvörður, fluttu minni karla og kvenna svo skemmtilega áður en maturinn var borinn á borð. Guðrún og Pálmi skemmtu með fallegum söng og spili en á eftir þeim tóku svo Oddur Carl og Matthías Ægisson við og spiluðu fjörug lög fram á kvöld 🥰

23/01/2026

Vertu velkominn, þorri! Bóndadeginum var fagnað hér í Laugarásnum í dag þar sem gítarleikarinn Oddur Carl hélt uppi fjörinu. Boðið var upp á svellkaldan Bóndabjór, viskítár og súkkulaðiköku í tilefni dagsins. Margir klæddust íslenskum lopapeysum og því ekkert um að frysi í æðum blóð í dag en vonandi fer Kári um okkur mjúkum höndum þennan veturinn 🌬

16/01/2026

Vinir Villa heimsóttu okkur hingað í Laugarásinn í dag og spiluðu úrval af bestu lögum Magnúsar Eiríkssonar. Það var því bæði sól úti og sól inni, sól í hjarta og sól í sinni því lögin hans Magga eru einhverjar ástsælustu dægurlagaperlur þjóðarinnar ❤️

13/01/2026

Það var kátt á hjalla og margskonar iðja stunduð á vinnustofunni í Burstafelli í dag. 🥰🧩🎨🧶🪡🖼

09/01/2026

Það var líf og fjör hér í Laugarásnum þegar Auður Harpa danskennari mætti á svæðið og stýrði dansleikfimi við mikinn fögnuð viðstaddra. Það var vel tekið undir bæði í söng og dansi og einhverjir sem höfðu orð á því að það hefði komið ánægjulega á óvart að ekki enn væri farið að fenna í danssporin 💃👣

19/12/2025

Í gær fengum við yndislega tónleika þegar Aríel Pétursson, formaður sjómannadagsráðs kom ásamt börnum sínum Jökli og Esju og Helgu móður sinni. Þau sungu fyrir okkur og léku á fiðlur, píanó og gítar, falleg og ljúf jólalög. Á eftir var boðið upp á smákökur, jólaglögg og ristaðar möndlur 🥰🎄

17/12/2025

Við fengum í heimsókn góða gesti úr nágrenninu þegar barnakór Laugarneskirkju söng birtu inn í hug og hjarta Hrafnistufólks. Við þökkum þeim kærlega fyrir komuna og sendum hlýjar jólakveðjur. 🎄