02/04/2025
“NGJYRAT E FJALËS”
Në kuadër të datës 2 prill, ditës ndërkombëtare të Librit për Fëmijë, nën drejtimin e mësuese Anila Berberi, koordinatore e Shkollës Shqipe “Scanderbeg” Parma, dhe mësueses Marsela Manaj, shkolla “Migjeni”, Fano, merr jetë projekti më i ri për të vegjëlit tanë “Ngjyrat e fjalës”. Në grupin e punës do të bëjnë pjesë edhe Monda Mara, mësuese e shkollës “Mësonjëtorja” në Breshia, Erona Hasula, mësuese shkolla “At Gjergj Fishta” në La Spezia dhe Egla Teja, mësuese shkolla “Ura” në Novara.
Projekti “Ngjyrat e fjalës” është konceptuar si një përvojë krijuese dhe edukuese që ka si qëllim të nxisë krijimtarinë, të shtojë kureshtjen në përdorimin e fjalëve dhe të zhvillojë jo vetëm aftësitë gjuhësore, por edhe ato artistike si mjete për të mësuar duke eksploruar.
Ky projekt është i menduar për fëmijët, për të nxitur krijimtarinë e tyre nëpërmjet fjalës apo për të zhvilluar një koncept nëpërmjet ngjyrës, duke u dhënë mundësi atyre që të përjetojnë çdo fjalë, çdo emocion dhe t’i japin një ngjyrë mendimit të tyre.
Nëpërmjet përkthimit, fëmijët do të mësohen të reflektojnë për përdorimin e fjalëve në përshkrimin e emocioneve apo të ngjarjeve, ndërsa nëpërmjet vizatimit do t’u japin formë dhe ngjyrë fjalëve. Të gjitha këto i ndihmojnë që të zhvillojnë kompetencat e tyre treguese dhe komunikuese si edhe të eksplorojnë se si gjuha mund të bëhet më shprehëse dhe më e pasur.
Në kuadër të këtij projekti janë përzgjedhur disa poezi dhe disa tregime të shkurtra në italisht dhe në shqip, të cilat duhet të përkthehen dhe të bëhen objekt krijimi artistik nga vetë fëmijët nëpërmjet një vizatimi apo një kolazhi.
Janë të ftuar të gjithë mësuesit dhe shkollat që t’i bashkohen kësaj nisme.
