د.شيماء عويضة Dr. Shaima Oweidah

12/05/2026

عجيبين احنا ! كإعلام رسمي وتواصل اجتماعي ومشاهير .. هي الفكرة من نشر الجرائم الفضيحة والا العظة؟

شو بستفيد كمواطن أردني لما بعرف انه هناك طبيب عمل شيء خطأ؟ يعني لو كان مهندس او محامي او معلم ..عادي؟
وشو بستفيد كمواطن أردني بس أعرف تفاصيل الخطأ اللي ارتكبه ؟ رح يفرق لو كان ببيت او عيادة او شارع او مدرسة؟ وشو الهدف من انك تحكيلي انه شكينا وحكينا وما حد سمعنا؟ وكل مؤسسة بدها تثبت انها بريئة !

بتخيل ..ويمكن بتخيل غلط، اننا كمواطنين بنحتاج توعية بأسباب ودوافع عالتصرفات اللااخلاقية .. وبنحتاج نتعلم كيف نحمي أطفالنا وعيلنا .. بنحتاج نتعلم .. ونوثق بأهمية وضرورة الشكوى ...

الاخطاء والذنوب والجرائم موجودة بكل المجتمعات ، الهدف من تسليط الضوء وتجريم الفاعل اننا نتعظ وننغير .. هيك "المفروض"

والا شو رأيكم؟
هل تفاعلنا مع الترند صح؟

09/05/2026

من أكتر المهارات الضايعة منا هالايام .. الصبر وطولة البال ، كل شي بدنا اياه بسرعة ، وبدنا نتحكم بكل شي حوالينا ، وبننقهر اذا الاشياء ما صارت بوقتها وبالطريقة اللي بدنا اياها !
الحياة مش زر .. العلاقات مش ريلز بتقلبها.. ولا الشغل او الدراسة سهلة..
فابدأ بتدريب نفسك عالايقاع البطيء والصبر عالاشياء ،
اسمع لا تحكي ..
تفكر بالطبيعة ..
صلي بهدوء ..
اطفي تلفونك !
#عمان

08/05/2026

مرات بتسعى للتحسين كتير ، أو بتهتم للتفاصيل بزيادة .. وبتكون واثق ومقتنع انه هالشي مهم الك ولغيرك ويمكن للحياة والمجتمع كله

بعدين بتكتشف انه سعيك للتحسين واهتمامك الزائد ما كان في مكانه .. لأسباب كثيرة بتختلف باختلاف الظروف والاشخاص ..

بهاللحظة معركتك بتتحول من معركة مع الحياة لمعركة جواتك ، معركة الحفاظ على تفاؤلك .. ايمانك بالتغيير والتبديل .. والاستمرار بالسعي..

وصدقني هاي المعركة أصعب من كل شي بتمر فيه بحياتك؛ لأنك لو فقدت معتقدك ..انت فقدت كل شيء ، وتحولت لشخص يائس مُحبط ومحَبِط للي حواليه ..

بيجوا أهل بيتك يشتكوا منك ، وأصدقائك بكرهوا يقعدوا معك ، وبتتحول حياتك لأكل ونوم وشغل هذا لو اشتغلت !

لهيك صديقي معلش .. ممكن طريقة سعيك بدها تعديل ، ممكن بدك ترخي شوي وما تشد على نفسك واللي حواليك ، ممكن تتجاوز بعض التفاصيل .....
بس اوعك تفقد إيمانك بأنه السعي مهم واستمر

الله يقوينا ويقويك .

21/03/2026

من الصبح بتابع المنشورات والتعليقات هنا وهناك ، مش طبيعي طريقة تعاملنا مع أي حدث (نفسي) ! بنتحول محللين وقضاة وخبراء ...!

وأنا مع المدعي العام بحظر النشر وكلنا ثقة بسير الاجراءات والتحقيقات بالشكل الصحيح .

المشكلة الحقيقية ؛ كل حد بكتب ومتعاطف وزعلان (من غير أهل الاختصاص) ، عنده حد بيعرفه او ببيته تعبان ومضغوط ومرهق ، وبحتاج دعم نفسي ، ولما يحاول يطلب المساعدة بجاوبه : روح على شيخ يقرأ عليك او كلنا تعبانين وبلا دلع ، والطبيب النفسي بده طبيب يعالجه ، اوعك تروح بخلوك مدمن!!

احنا شعب وعينا النفسي أعلى من الصفر بقليل .. بس عنا قدرة نفتي ونحلل كل شيء 🫡

لهيك عمليا ، إذا انت شخص مهتم وبتصدمك الحوادث في مجتمعك، بلش تثقف ، اسأل الذكاء الاصطناعي عن الاكتئاب وانواعه، القلق وأنواعه ، اضطرابات الشخصية ، الذهان والفصام ، الوسواس القهري، الصدمات كيف بتصير؟ ، طرق العلاج ، اسأله كيف الطبيب النفسي بشخص، شو يعني معالج نفسي وشو بيعمل؟

هاي الثقافة النفسية بعصرنا صارت ضرورة ومش شيء هامشي أبدا، وما النا حجة نضل جاهلين بهالجانب واحنا شعب دارس ومثقف وواعي ..
هيك ثقافة بتحمي نفسك واولادك واحبابك من الاضطرابات النفسية .. وبتساعد مجتمعك ليصير أحسن.

14/03/2026

من مقاومتك لكل شيء صار وبصير حوالينا ورفض المختل، هو انك تكمل وتسعى وتجتهد وتعيش .. المكتئب ما بعمر بلاد ولا بحرر أرض وعالة على المجتهدين والمؤمنين .. طبعا هذا ما بتعارض مع انك تحزن وتتكدر ، تعيد حساباتك وترتيب أولوياتك

28/01/2026

ما بتصدقوا عدد المرات اللي سمعت فيها بالجلسات هالتعليق " انا بنصح غيري وبعرف الصح بس مش عارف أطبقه على حالي"

او " عندي معلومات وقرأت كثير بس ما بطبق "

لهالشي أسباب كثيرة ، بس اللي بدي أركز عليه بهالبوست التالي:
# انك بتعرف مشكلتك ، بتعرف الحلول الممكنة ، هاي خطوة مهمة وكبيرة ، لانه الجهل عدونا، فالعلم نعمة بدك تستشعرها 😉

# في مسافة نفسية بين (بعرف) وبين (نويت العمل) وبين (بدأت العمل باللي عرفته) ، فعالقليلة انوي .. النية عليها أجر وفيها بركة 🙂‍↕️

# الجدية بتسبق الإرادة ..آه يمكن حابب تغير ، بس انت مش جدي بالتغيير ، فمن وين بده ييجي العزم والإرادة؟؟
فعالقليلة كون جاد بتطبيق اللي عرفته ، أو احكي أنا مش جاد واختصر 😅

# بس أنا جربت ! هووون النقطة اللي بيوقع فيها أغلب الناس، تجربة فاشلة ما بده يعيدها، او تعب ووقف ...
الحل انك تقيّم تجربتك وتعرف وين الخلل .. مش تنسحب .

# أهم شي تعرفه ..انه النفس ما بتتحمل التغييرات الهائلة الكبيرة، بدها تدرييييييج وصبر ، الخمس دقائق أحسن من صفر وأحسن من ساعة ، في البدايات اقبل وارضى عن الخمس دقائق .. وشوف الفرق .

في ببالكم نقاط تانية؟ شاركوني آرائكم 🫰

22/01/2026

كل واحد فينا كان طفل صغير، وكلنا كنا بحاجة لصوت يوجهنا، يواسينا، ويشدنا لقدام.

سؤالي🤗
لو رجعتوا وحكيتوا مع نفسكم وهي صغيرة … شو أول جملة بتحكوها اليوم؟

18/01/2026

ريحة الكيك الساده احلى ريحة ممكن تشمها بفصل الشتا 🌧️🔥 ولكبير قبل لصغير حوليك بستنى قطعه سخنه ياكلها ع السريع🥧، واكيد كاسة الشاي بالنعنع صديقة السهرات الليليه الطويله..

شغلات بسيطه ممكن نعملها تفرح أهل بيتنا🏡وتجمعنا مع بعض حتى لو للحظات قليله.

16/01/2026

15/01/2026

آفتنا بهالعصر اننا رابطين هدوءنا النفسي بالناس !
الطلاب بتتعطل دراستهم لانه تخانقوا مع صاحب او سمعولهم كلمة ، وكل شيء اسمه " تنمر " يستدعي التدخل والا ما بندرس!

الزوجات بتكتئب وبتمرض لانه زوجها بلحظة هوى خان أمانته وعصى ربه.. وهااات أقنعها انه انت ما الك علاقة !

الموظفين بتوتر وبقلق لانه مديره/ا قرر يوما ما انه أداء هالموظف مش عاجبه واستلمه ، والله يعين هالموظف شو يعمل!

ما بجوز بالدين والمنطق يكون أداءك، استقرارك، أو فرحك وهدوءك رهينة لتقلّبات البشر، فلحظة برود وتجاهل تضربلك نهارك، او كلمة عابرة تزعزع ثقتك بحالك …
الناس بتمر بظروف .. بتتغير .. بتخطئ، لهيك انت ما بتقدر تتحكم فيهم انت بتتحكم بتصرفاتك انت .. ومزاجك انت .. وهدوءك انت، وطالما مركز وعم تمشي بتقوى الله ، ما يهمك حد .

آه معناها كل الناس نقاطعهم وما نسأل فيهم؟

لا طبعا ، الحياة مش أبيض وأسود ، فلا تحجم تفكيرك بأنه إما بهتم لحكي الناس وبربط سعادتي فيهم ..
أو ما بسمعهم بالمرة حتى لو هم الصح 🤷‍♂️
وااازن وركز وبس .

13/01/2026

هالبرررررد شو بدو ؟؟ 😄
بدو عزيمة كستنا مشوية على حساب شخص غالي عليك 😋

يلااا منشنوهم 😎😁