09/11/2025
#أبدًا_ما_بدها_تسأل
عملت فحص لمُراجعة وطلعت حامل
سألت كم عمر الجنين دكتور؟
شهرين يااا دوب.
تعرف دكتور... أنا ما بدي أسألك عن جنس الجنين أبدًا.
خير ما تعملي... شو عندك أولاد.
عندي رهف ونغم و غزل
الله يخليلك إياهم.
خلص دكتور أبدًا ما رح أسألك... خليها عالتساهيل.
إتفقنا... راجعيني كل بداية شهر.
♦️ المراجعة الأولى: أثناء الفحص ظهر جليًا إنه ولد فتبسمت عَفويًا، وهي كانت تراقب الشاشة وتراقب تعابير وجهي، فسألت : دكتور ؟ ليه بتضحك....شكله الجنين ولد؟ إتفقنا ما نسأل خلينا عالوعد.
♦️ المراجعة الثانية : كان عندي ضغط شغل وتعبان فسألتني دكتور ليش مكشر... شكله الجنين بنت؟ لا أبدًا مش مكشر..؟ ضغط شغل.
♦️ المراجعة الثالثة: : دكتور أنا ماعندي فرق بين الولاد والبنات...بس عشان عمتي حابة ولد وكل يوم بتسٱلني.. شو قال الدكتور : شو أحكي لعمتي دكتور ؟ أحكيلها إنه أنت ما بدك تعرفي جنسه و ما بدك تسألي الدكتور هيك إتفقنا.
♦️ المراجعة الرابعة : دكتور شو رأيك بإسم #شهم؟
حلو ومعناه حلو... يعني أسميه شهم ؟ إن شاء الله.
يعني الجنين ولد..؟ أنا ركزت على صحته وما ركزت على جنسه لإنه ما بهمك تعرفي وأنا بحترم رغبتك.
♦️ المراجعة الخامسة : دكتور سلفتي جابت ولد وأختي ولد وأخت زوجي ولد... شكلها السنة موسم ولاد...؟
شو هي مواسم الشغلة... هو تفاح ؟! الله أعلم،
♦️ المراجعة السادسة : دكتور ... .مين أحلى اللون الأزرق ولا الزهري؟ أنا كدكتور بحب اللون الأخضر لإنه يعني الحياة. دكتور خلص تعبت أنا، شو أجهز للبيبي أزرق ولا زهري من الآخر؟ كله حلو.
♦️المراجعة السابعة : دكتور ما بروّح من عندك غير لما تحكي جنس الجنين.. أنا تعبت... أنا وعدتك ما أحكي ووعدت زوجك وكله بناءً على رغبتكم.
♦️ المراجعة الثامنة : دكتور إمبارح حلمت أبوي الله يرحمه أعطاني خاتم... الخاتم مذكّر صح دكتور؟ بقولوا عطية الميت كويسة شو ما كانت.
♦️ المراجعة التاسعة قالت : السلام عليكم وسريعًا قلت : وعليكم السلام ورحمة الله وبركاته.. حيّا الله أم #شهم.
يعني ولد... يعني شهم إن شاء الله... نعم أم شهم ومن الشهر الثالث عرفت إنه ولد وحكيت لزوجك وإتفقنا نختبر صبرك.
طلع ما عندك صبر من أول مراجعة زهقتيني بتلميحاتك.
و أحلامك وتفسير اتك.
بصراحة دكتور
😃😃😃😃😃
