18/05/2026
🚨 خبر عاجل هام جدًا | فرصة عظيمة ما تتفوتش ❤️
لكل واحد ظروفه تعبانة، أو مقدم على وظيفة وخايف يترفض، أو الدنيا مسدودة قدامه، أو مريض، أو مهموم، أو مظلوم، أو مقهور، أو نفسه يحقق حاجة شايل همها
هفكرك بعرض مفيش عليه اختلاف.
من بكرة إن شاء الله هتبدأ أفضل 10 أيام في السنة، أعظم وأحب الأيام إلى الله 🤍
أيام الله يحب فيها الدعاء، ويعطي فيها من يسأله، ويبدّل فيها الأحوال.
لو نفسك في حاجة ومش شايل من الدنيا غير همّها، ابدأ من بكرة تهتم بالدعاء والإلحاح على الله في الـ10 أيام دي.
وأقسم بالله إني أعرف ناس بسبب الأيام دي اتبدّل حالهم من حال إلى أحسن حال.
هو ممكن ربنا يرجّعلك ابنك اللي مراته خدته؟
هو ممكن ربنا يرزقك من وسع؟
هو ممكن يفتحلك باب شغل، أو يفرّج همّك، أو ينصرك على اللي ظلمك؟
كل اللي نفسك فيه عند الله سبحانه وتعالى ليس مستحيلًا.
الناس بقت تترجّى البشر وتنسى خالق البشر، مع إن خزائن الله لا تنفد، وهو القادر على تغيير كل شيء في لحظة.
لو قادر تصوم، ابدأ الصيام.
ولو الصيام صعب عليك في الحر ده، ابدأ نية ختمة قرآن في الـ10 أيام دي.
وأنت رايح الشغل، وأنت راجع، وقبل ما تنام… المهم تجتهد وتقرأ قرآن وتدعي ربنا باللي نفسك فيه.
مش قادر تصوم ومعندكش وقت تقرأ قرآن؟
متسبش الذكر طول ما أنت شغال .
• استغفار
• لا إله إلا الله
• اللهم صلِّ على سيدنا محمد ﷺ
واقسم وقتك للذكر، وخلي ليك وقت للدعاء حتى وأنت شغال… ادعي باللي نفسك فيه.
ومقدرتش على كل ده؟
كل يوم وأنت نازل الشغل حط 500 ين في الدرج، وبعد 8 أيام ساعد بيهم حد محتاج أو ابعتهم للمركز الإسلامي.
ومش هتكلم عن الصلاة… لأن اللي مبيصليش ده موضوع تاني، الله يهديه 🤍
المهم حاول بأقصى جهد تسعى في الـ10 أيام دي، وتدعي ليل ونهار.
أقسم بالله ممكن الأيام دي تغيّر حياتك وتقلب لك الموازين.
أنت لو ليك مصلحة عند ملوك الدنيا هتفضل تزن وتلح… فما بالك بالملك القدوس القادر المقتدر سبحانه وتعالى
سامحوني على الرغي… بس ده رغي مفيد، رغي للتذكرة 🤍
تذكرة للناس اللي كل شوية تقول:
• هو ممكن اللجوء يترفض؟
• هو أنا هاخد تصريح الشغل إمتى؟
• هو ممكن ألاقي شغل؟
• هو ربنا ممكن ينتقم ويقهر اللي قاهرني؟
• هو ممكن ربنا يرجّعلي ابني؟
• هو ممكن حياتي تتصلح؟
عايز أقولك
لو صدقت مع ربنا واجتهدت في الـ10 أيام دي، فوالله قادر سبحانه يغيّر حياتك كلها.
منقول
