29/08/2025
យើងខ្ញុំទាំងអស់គ្នាជាថ្នាក់ដឹកនាំ និងមន្ត្រីរាជការនៃមន្ទីរពេទ្យបង្អែកខេត្តកំពង់ចាម គ្រប់លំដាប់ថ្នាក់សូមសំដែងនូវការគោរពកោតសរសើរដោយស្មោះ ជូនចំពោះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដែលបានផ្ដួចផ្ដើមឲ្យសាលាភូមិន្ទរដ្ឋបាលរៀបចំនូវមុខវិជ្ជាថ្មីមួយ ដែលមានឈ្មោះថា «ឧត្តមភាពមន្ត្រីរាជការ» ក្នុងគោលបំណង ដើម្បីបណ្តុះគំនិត មន្ត្រីរាជការ ឲ្យក្លាយទៅជាមូលធនមនុស្ស ប្រកបដោយសក្តានុពល និងមានភាពធន់ ក្នុងការផ្សារភ្ជាប់មនសិការ ស្មារតី វិជ្ជាជីវៈជាមន្ត្រីរាជការ ឱ្យសិស្សមន្ត្រី និងធ្វើឱ្យក្របខណ្ឌនៃការបណ្តុះបណ្តាល នៅសាលាភូមិន្ទរដ្ឋបាល កាន់តែមានភាពពេញលេញ ទាំងការបណ្តុះជំនាញ ចំណេះដឹង ចំណេះធ្វើដោយប្រើប្រាស់ចំណេះដឹងទាំងអស់នេះ ដើម្បីបម្រើប្រទេសជាតិ និងប្រជាជន ។
យើងខ្ញុំទាំងអស់គ្នា សូមគោរពថ្លែងអំណរគុណយ៉ាងជ្រាលជ្រៅជូនចំពោះឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដែលបានផ្តល់កិតិយសដល់ ថ្នាក់ដឹកនាំ និង មន្ត្រីរាជការនៃមន្ទីរពេទ្យយើងខ្ញុំ ដោយបានជ្រើសរើសយកមន្ទីរពេទ្យបង្អែកខេត្តកំពង់ចាម ជាកន្លែងសម្រាប់សិស្សមន្ត្រីក្រមការជំនាន់ទី១១ នៃសាលាភូមិន្ទរដ្ឋបាល ចុះធ្វើទស្សនកិច្ចសិក្សា ដើម្បីឆ្លុះបញ្ចាំង ពីទ្រឹស្តីដែលបានសិក្សានៅក្នុងសាលា និងធ្វើការប្រៀបធៀបជាមួយបទពិសោធន៍ជាក់ស្តែងនិយមស្តីពី ឧត្តមានុវត្តន៍ និងនវានុវត្តន៍នៃការគ្រប់គ្រង និងការផ្តល់សេវា រួមជាមួយ គុណតម្លៃ និង បទពិសោធន៍ជាមន្ត្រីរាជការនៃមន្ទីរពេទ្យបង្អែកខេត្តកំពង់ចាម ដោយផ្តោត លើចំណុចសំខាន់ៗមួយចំនួនរួមមាន៖ ១.) ការសិក្សាស្វែងយល់ប្រកបដោយភាពជាក់ស្តែងនិយម ដោយសិស្សមន្ត្រីបានទទួលស្តាប់នូវ គោលគំនិតឧត្តមភាពមន្ត្រីរាជការ, ២.) ការផ្លាស់ប្តូរគោលគំនិត និងឥរិយាបថនៃមន្ត្រីរាជការស៊ីវិល និងការដកស្រង់ បទពិសោធន៍ដោយផ្ទាល់នៅអង្គភាពផ្តល់សេវាសាធារណៈគំរូ ដើម្បីឆ្លុះបញ្ចាំង និងឆ្លើយតបទៅនឹងខ្លឹមសារ និងអត្ថន័យពិតប្រាកដអំពីឧត្តមភាពមន្ត្រីរាជការ និង ៣.) បានជួបផ្ទាល់ជាមួយប្រធានអង្គភាព និងអ្នកពាក់ព័ន្ធអំពី ដំណើរការពង្រឹងឧត្តមភាពសេវាសាធារណៈរហូតដល់ទទួលបានជ័យលាភី និងទទួលស្គាល់ជាកម្រិតថ្នាក់ជាតិ ជាជ័យលាភីអង្គភាពផ្តល់សេវាសាធារណៈគំរូ ចំណាត់ថ្នាក់លេខ១ សម្រាប់មន្ទីរពេទ្យបង្អែកផ្តល់សេវាសំណុំសកម្មភាពបង្រ្គប់កម្រិត៣ សម្រាប់ឆ្នាំ ២០១៩ និង ឆ្នាំ២០២៤ ។
យើងខ្ញុំទាំងអស់គ្នា សូមគោរពជូនពរ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងសហការីទាំងអស់ សូមទទួលបាននូវសុខភាពល្អ សំណាងល្អ និង ទទួលជោគជ័យគ្រប់ភារកិច្ច ការងារ ដើម្បីជួយជាតិ មាតុភូមិ និងប្រជាជន ព្រមទាំងសមប្រកបទៅដោយពុទ្ធពរទាំងឡាយ៤ ប្រកាគឺ : អាយុ វណ្ណៈ សុខៈ ពលៈ កុំបីមានឃ្លៀងឃ្លាតឡើយ ។
