07/06/2025
អភិបាលរងខេត្តកំពង់ចាម ដឹកនាំបរិច្ចាគឈាមដោយស្ម័គ្រចិត្ត ក្នុងមន្ទីរពេទ្យខេត្តកំពង់ចាម
(កំពង់ចាម) លោក ហាន កុសល អភិបាលរងខេត្ត ដំណាងខ្ពង់ខ្ពស់ ឯកឧត្ដម អ៊ុន ចាន់ដា គណះនៃអភិបាល ខេត្តកំពង់ចាម នឹង លោក លី ចែ នាយកតំបន់កំពង់ចាម តំណាង អគ្គនាយកគ្រឹះស្ថានមីក្រូហិរញ្ញវត្ថុ អម្រឹត នៅព្រឹកថ្ងៃទី៧ ខែ មិថុនា ឆ្នាំ២០២៥នេះ បានដឹកនាំ បុគ្គលិកស្មគ្រ័ចិត្ត ចូលរួមបរិច្ចាគឈាម ប្រមាណជា ១៥០នាក់ ចូលរួមក្នុងយុទ្ធនាការការបរិច្ចាគឈាម នៅមជ្ឈមណ្ឌលផ្តល់ឈាម ក្នុងមន្ទីរពេទ្យខេត្តកំពង់ចាម។
លោក ហាន កុសល អភិបាលរងខេត្តបានមានប្រសាសន៍ថា ក្នុងយុទ្ធនាការនេះ តំណាងអគ្គនាយកគ្រឹះស្ថានមីក្រូហិរញ្ញវត្ថុអម្រឹត និងបុគ្គលិកដែល ស្ម័គ្រចិត្ត ចូលរួមបរិច្ចាគឈាម ប្រហែលជា ១៥០នាក់ នៃតំបន់កំពង់ចាម ហើយការចូលរួមធ្វើយុទ្ធនាការបរិច្ចាគឈាមនេះ ក្នុងគោលបំណងដើម្បីបង្កលក្ខណៈឲ្យយុវជន យុវនារី ប្រជាជនទូទៅ ចែករំលែកក្តីស្រឡាញ់របស់គាត់ ដោយចូលរួមបរិច្ចាគឈាមជួយដល់ជនរងគ្រោះដែលត្រូវការឈាម។
លោកអភិបាលរងខេត្ត បានបញ្ជាក់ថា:យុទ្ធនាការបរិច្ចាគឈាម ថ្ងៃនេះ គឺពិតជាមានសារៈសំខាន់ គឺជាការធ្វើអំពើល្អ ជាការចែករំលែកនូវសេចក្ដីស្រលាញ់ សេចក្ដីអាណិត ដល់ជនរងគ្រោះទាំងអស់ ដែលត្រូវការឈាមដើម្បីព្យាបាល និងជួយសង្គ្រោះជីវិតក្នុងឧប្បត្តិហេតុអ្វីមួយ។
លោកអភិបាលរងខេត្តបន្ថែមថា ការផ្តល់ឈាមគឺជាទឹកចិត្តនៃការលះបង់ ក្នុងការជួយសង្គ្រោះរបស់ខ្ញុំ និងបងប្អូនយុវជន នៃក្តីស្រឡាញ់របស់ជនរួមជាតិ ទៅកាន់អ្នកដទៃតាមរយៈធ្វើសប្បុរសធម៌ ពិសេសគឺតាមរយៈការបរិច្ចាគឈាមរបស់ខ្លួនឯងដើម្បីជួយសង្គ្រោះជីវិតអ្នកដទៃ។
ទិវានេះក៏បានឆ្លុះបញ្ចាំងនូវសមាណចិត្តក្នុងការបរិច្ចាគឈាម ជាសប្បុរសធម៌ដើម្បីជួយសង្គ្រោះជីវិតមនុស្ស ហើយយើងត្រូវផ្សព្វផ្សាយ និងលើកទឹកចិត្តដល់ សាច់ញាតិ បងប្អូន និងអ្នកដទៃដែលមិនទាន់បានបរិច្ចាគឈាម សូមជួយបន្តបរិច្ចាគឈាមដើម្បីបុព្វហេតុមនុស្សធម៌ និងជួយ សង្គ្រោះជីវិតមនុស្ស ដែលត្រូវការឈាម សង្គ្រោះជីវិត។
លោកអភិបាលរងខេត្ត ក៏បានយកឱកាសនោះ ថ្លែងអគុណយ៉ាងខ្លាំង ដល់លោក លី ចែ នាយកតំបន់កំពង់ចាម តំណាង អគ្គនាយកគ្រឹះស្ថានមីក្រូហិរញ្ញវត្ថុ អម្រឹត ដែលបាននាំបុគ្គលិក ដែលស្មគ្រ័ចិត្ត ចូលរួមបរិច្ចាគឈាម នៃតំបន់កំពង់ចាមផងដែរ មកជួបក្នុងការផ្ដល់ឈាមជូនមន្ទីរពេទ្យខេត្តកំពង់ចាម ដេីម្បីចូលរួមជួយដល់ប្រជាពលរដ្ឋទូទាំងខេត្តកំពង់ចាម៕
