29/10/2025
រដ្ឋមន្ត្រីក្រសួងសុខាភិបាល ឆ្លៀតថ្ងៃឈប់សម្រាកបុណ្យជាតិ ២៩ តុលា ចុះពិនិត្យមណ្ឌលសុខភាពវិហារសួគ៌ ដោយពុំជូនដំណឹងជាមុន ដែលការចុះនេះបានអនុញ្ញាតឱ្យធ្វេីការវាយតម្លៃដោយផ្ទាល់លើគុណភាពសេវាសុខាភិបាលបម្រេីជូនប្រជាពលរដ្ឋក្នុងតំបន់ ដែលមានចំណុចកត់សម្គាល់មួយចំនួន៖
- ការទទួលអ្នកជំងឺ៖ ទទួលបានការពេញចិត្ត ដោយមានស្មារតីសហការល្អ និងអាកប្បកិរិយារួសរាយរាក់ទាក់ល្អ។
- ការត្រួតពិនិត្យ និងព្យាបាលជំងឺ៖ បានអនុវត្តទាន់ពេលវេលា បង្ហាញពីការខិតខំរបស់បុគ្គលិកសុខាភិបាល។
- ការទុកដាក់ថ្នាំសង្កូវ និងសម្ភារៈពេទ្យ៖ មានកម្រិតមធ្យម ត្រូវការការរៀបចំ និងតាមដានប្រសើរជាងមុន។
- ភាពស្អាត និងអនាម័យ៖ ត្រូវការកែលម្អអោយបានប្រសេីឡេីង។
ក្រុមការងារនៃមណ្ឌលសុខភាព ដឹកនាំដោយប្រធានមណ្ឌល បានទទួលយកការកែលម្អ និងប្តេជ្ញាចិត្តពង្រឹងការខិតខំប្រឹងប្រែង ដើម្បីធានាបាននូវបរិស្ថានផាសុខភាព អនាម័យ សុវត្ថិភាព ក្នុងការបម្រេីសេវាសុខាភិបាលដែលមានគុណភាពជូនប្រជាពលរដ្ឋអោយបានទូលាយក្នុងមូលដ្ឋាន។
ការចុះពិនិត្យនេះក៏ឆ្លុះបញ្ចាំងពីការប្តេជ្ញារបស់ថ្នាក់ដឹកនាំគ្រប់លំដាប់នៃក្រសួងសុខាភិបាលក្នុងការពង្រឹងអភិបាលកិច្ច លើទីលានអនុវត្ត ការស្តាប់ពីក្រុមការងារមូលដ្ឋាន ការគាំទ្រចំពោះបុគ្គលិកសុខាភិបាលក្នុងសហគមន៍ និងធានាថាប្រជាពលរដ្ឋគ្រប់រូប ទោះនៅទីណាក៏ដោយ ទទួលបានសេវាសុខាភិបាលសមរម្យ និងប្រសេីរឡេីង ព្រមទាំងរស់នៅដោយសុខដុម។
សាររបស់ប្រធានស្ថាប័នសុខាភិបាលជូនចំពោះមូលដ្ឋានសុខាភិបាលគ្រប់ឃុំទូទាំងប្រទេស៖
“ការកែលម្អគុណភាពសេវាសុខាភិបាលត្រូវការភាពម៉ត់ចត់ សេចក្តីថ្លៃថ្នូរ និងការគោរពតាមស្តង់ដារបច្ចេកទេស និងអនាម័យ។ មណ្ឌលសុខភាពនីមួយៗត្រូវក្លាយជាគំរូនៃការជឿទុកចិត្តសម្រាប់ប្រជាពលរដ្ឋ។”
