Techo Santepheap National Hospital

18/08/2025

យយល់ដឹងពីជំងឺលើសសម្ពាធឈាម អំណានលើឧបករណ៍វាស់សម្ពាធឈាម​ សម្រាប់​បងប្អូន​តាមដាន​សម្ពាធ​ឈាម​ដោយ​ខ្លួនឯង​នៅផ្ទះ​។ ករណី​មាន​សញ្ញា​គួរ​បារម្ភ​ សូម​អញ្ជើញ​ប្រឹក្សា​ជាមួយ​គ្រូពេទ្យ​។

18/08/2025

យល់ដឹងពីសញ្ញានៃជំងឺគ្រោះថ្នាក់សរសៃឈាមខួរក្បាល ឬជំងឺស្ត្រូក
BE FAST

15/08/2025

មន្ទីរពេទ្យ​​ជាតិ​ តេជោ​សន្តិភាពបានរៀបចំវគ្គបណ្ដុះបណ្ដាលបដិសណ្ឋារកិច្ច និងការប្រាស្រ័យទាក់ទងក្នុងបរិបទសុខាភិបាល។
————————
មន្ទីរពេទ្យជាតិ តេជោសន្ដិភាព៖ នាថ្ងៃទី១៥ ខែសីហា ឆ្នាំ២០២៥ ដោយទទួលបានការអនុញ្ញាតពីលោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព លោកវេជ្ជបណ្ឌិត តាំង បូណា នាយករងមន្ទីរពេទ្យបានអញ្ជេីញចូលរួមជាអធិបតីភាពបើកវគ្គបណ្ដុះបណ្ដាលបដិសណ្ឋារកិច្ច និងការប្រាស្រ័យទាក់ទងក្នុងបរិបទសុខាភិបាល។ វគ្គ​បណ្ដុះបណ្ដាល​នេះ​បាន​រៀបចំ​ និង​បណ្ដុះបណ្ដាល​ដោយ​​ផ្នែក​ថែទាំ​ នៃ​មន្ទីរពេទ្យ​ជាតិ​ តេជោ​សន្តិភាព​។
វគ្គបណ្ដុះបណ្ដាលនេះមានគោលបំណង៖
១. បង្កើនចំណេះដឹង និងជំនាញផ្នែកបដិសណ្ឋារកិច្ចសម្រាប់មន្ត្រីរាជការ បុគ្គលិកសុខាភិបាល និងបុគ្គលិកមិនមែនសុខាភិបាល។
២. បង្កើនសមត្ថភាពក្នុងការប្រាស្រ័យទាក់ទងប្រកបដោយប្រសិទ្ធភាពជាមួយអ្នកជំងឺ សាច់ញាតិ និងក្រុមការងារដើម្បីលើកកម្ពស់គុណភាពសេវាសុខាភិបាល។
សូមបញ្ជាក់ផងដែលថាវគ្គបណ្ដុះបណ្ដាលនេះរៀបចំឡើងចំនួន២ថ្ងៃ ដែលផ្តល់នូវការគ្របដណ្តប់ដល់បុគ្គលិកទាំងអស់ដោយគិតចាប់ពីថ្ងៃទី១៥ ខែសីហា ឆ្នាំ២០២៥ ចំនួន២វេន និងថ្ងៃទី១៨ ខែសីហា ឆ្នាំ២០២៥ ចំនួន២វេន។
វគ្គបណ្ដុះបណ្ដាលនេះបានឆ្លុះបញ្ចាំងសកម្មភាពផ្នែកទ្រឹស្ដី ការបង្ហាញអនុវត្តដោយផ្ទាល់ (Demonstration) សម្ដែង(Role Play) និងកិច្ចពិភាក្សាចែករំលែកចំណេះដឹងបន្ត។

12/08/2025

មន្ទីរពេទ្យ​ជាតិ​ តេជោ​សន្តិភាព​ពង្រឹង​កិច្ចសហប្រតិបត្តិការ​ជាមួយ​កម្មវិធីអ្នកស្ម័គ្រចិត្តអូស្រ្តាលី (Australian Volunteers Program) ក្រោមជំនួយឧបត្ថម្ភរបស់រដ្ឋាភិបាលអូស្រ្តាលី ដេីម្បី​កៀងគរ​អ្នកជំនាញ​បច្ចេកទេស​សុខាភិបាល​សម្រាប់​ការ​បណ្ដុះបណ្ដាល​បន្ត
_______

ភ្នំពេញ​៖​ នាព្រឹក​ថ្ងៃទី​១២​ ខែសីហា​ ឆ្នាំ​២០២៥​ លោកវេជ្ជ​បណ្ឌិត​ សួន​ សាមិត្ត​ នាយក​មន្ទីរពេទ្យ​ជាតិ​ តេជោ​សន្តិភាព​បាន​ដឹកនាំ​សហការី​ជួប​ពិភាក្សា​ការងារ​ជាមួយ​លោកស្រី​ ប៊ូ​ មល្លិកា​ ប្រធាន​គ្រប់គ្រង​កម្មវិធី​នៃ Australian Volunteers Program (AVP) នៅ​កម្ពុជា​ព្រមទាំង​សហការី​។
កិច្ច​ពិភាក្សា​នេះ​ផ្តោតសំខាន់​លេី​ការ​ពង្រឹង​ទំនាក់ទំនង​សហប្រតិបត្តិការ​ ជាពិសេស​ការផ្តល់​អ្នក​ជំនាញ​ក្នុង​ការ​សហការ​បណ្តុះ​បណ្តាល​បន្តជូនដល់​មន្ត្រី​សុខាភិបាល​។
បច្ចុប្បន្ន​កម្មវិធី AVP បាន​ផ្តល់ជូន​អ្នក​ជំនាញ​ផ្នែក​អភិវឌ្ឍ​សុខភាព​កុមារ​ដោយផ្តល់​សេវា​ពិគ្រោះ​ចំពោះ​កុមារ​ដែល​មាន​វិបត្តិ​យឺតយ៉ាវ​ក្នុង​ការ​អភិវឌ្ឍ​រាងកាយ​ និងផ្លូវចិត្ត​ ជាពិសេស​កុមារ​ដែល​មាន​បញ្ហា​អូទីស្សឹម (Autism)។
សេវា​ពិគ្រោះ​សម្រាប់​ការ​អភិវឌ្ឍ​កុមារ​មាន​ផ្តល់ជូន​នៅ​មន្ទីរពេទ្យ​ជាតិ​ តេជោ​សន្តិភាព​រៀងរាល់​ថ្ងៃ​ចន្ទ​ ដល់​ថ្ងៃ​សុក្រ​ ពី​ម៉ោង០៨:០០ព្រឹក​ ដល់​ម៉ោង​១៦:០០រសៀល​។

07/08/2025

នាយកមន្ទីរពេទ្យជាតិ តេជោសន្តិភាពបាននាំយកអំណោយជាបរិក្ខារពេទ្យមួយចំនួនទៅកាន់មន្ទីរពេទ្យបង្អែកខេត្តបាត់ដំបង
----------------------
ខេត្តបាត់ដំបង៖ ថ្ងៃព្រហស្បតិ៍ ១៣កើត ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី៧ ខែសីហា ឆ្នាំ២០២៥ លោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព និង​សហការី​បានអញ្ញេីញចុះទស្សនកិច្ច និងនាំយកអំណោយជាបរិក្ខារពេទ្យមួយចំនួនទៅកាន់មន្ទីរពេទ្យបង្អែកខេត្តបាត់ដំបងដើម្បីចូលរួមចំណែកដល់ការបម្រើសេវាសុខាភិបាលជូនប្រជាពលរដ្ឋក្នុងខេត្តបាត់ដំបង។

ដំណើរទស្សនកិច្ចនេះមានគោលបំណងរួមចំណែកក្នុងការចូលរួមអភិវឌ្ឍវិស័យសុខាភិបាលឱ្យកាន់តែប្រសើរឡើងតាមរយៈការផ្លាស់ប្ដូរការចែករំលែកបទពិសោធន៍វិជ្ជាជីវៈ ព្រមទាំងការពង្រឹងទំនាក់ទំនងរវាងមន្ទីរពេទ្យជាតិ តេជោសន្ដិភាព និងមន្ទីរពេទ្យបង្អែកខេត្តបាត់ដំបង។

ក្នុងឱកាសដ៏មានតម្លៃនេះលោកវេជ្ជបណ្ឌិត ហាន ឧត្តម ប្រធានមន្ទីរពេទ្យបង្អែកខេត្តបាត់ដំបងបានថ្លែងអំណរគុណយ៉ាងជ្រាលជ្រៅចំពោះលោកវេជ្ជបណ្ឌិត សួន សាមិត្ត និងក្រុមការងារដែលបានចំណាយពេលដ៏មមាញឹកមកទស្សនកិច្ច និងបានផ្ដល់ជូនសម្ភារចាំបាច់សម្រាប់បម្រើដល់ការងារព្យាបាលប្រជាពលរដ្ឋឱ្យ​កាន់តែ​មាន​ប្រសិទ្ធភាព​។

07/08/2025

មន្ទីរពេទ្យជាតិ តេជោសន្ដិភាព​ទទួល​ស្វាគមន៍​គណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គមដើម្បីសិក្សាលើការងារផ្ដល់សេវាជូនជំងឺដែលប្រើបណ្ណគាំពារសង្គម
---------------------------
រាជធានីភ្នំពេញ៖ នាព្រឹកថ្ងៃព្រហស្បតិ៍ ១៣កើត ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃ ទី៧ ខែសីហា ឆ្នាំ២០២៥​ដោយ​មាន​ការអនុញ្ញាត​ពី​លោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្ដិភាព លោក​វេជ្ជបណ្ឌិត​ ង៉ែត​ សុបញ្ញា​ នាយក​រង​មន្ទីរពេទ្យ​ និង​សហការី​បានអញ្ញេីញទទួលស្វាគមន៍គណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គមដឹកនាំដោយ លោកជំទាវ ប៉ែន សុបភា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការប្រតិបត្តិ។

ក្នុងដំណើរទស្សនកិច្ចនេះមានគោលបំណងសិក្សាលើប្រព័ន្ធនៃការបម្រើសេវាមន្ទីរពេទ្យ ការគ្រប់គ្រងមូលនិធិសុខាភិបាល និងរំហូរនៃការចំណាយរបស់អ្នកជំងឺដែលប្រើប្រាស់ប្រព័ន្ធធានារ៉ាប់រងផ្សេងៗទៀត។

ក្នុងឱកាសនេះដែរលោកជំទាវ ប៉ែន សុបភា បានសម្តែងនូវការកោតសរសើរយ៉ាងស្មោះស្ម័គ្រ​ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងបុគ្គលិកមន្ទីរពេទ្យជាតិ តេជោសន្ដិភាព ក្នុងការរៀបចំសេវាព្យាបាលប្រកបដោយគុណភាព។ លោកជំទាវបានគូសបញ្ជាក់ជាពិសេសអំពីប្រសិទ្ធភាពនៃការបម្រើសេវាជូនប្រជាពលរដ្ឋ ជាពិសេសចំពោះ អ្នកជំងឺដែលប្រើប្រាស់បណ្ណគាំពារសង្គម ដែលបានទទួលការព្យាបាលប្រកបដោយយកចិត្តទុកដាក់ និងទាន់ពេលវេលា។

លោកជំទាវបានបន្តថា ដំណើរទស្សនកិច្ចនេះពិតជាមានប្រយោជន៍ខ្លាំងណាស់ សម្រាប់ការប្រមូលព័ត៌មានជាក់ស្ដែង ដើម្បីរៀបចំ និងកែលម្អគោលនយោបាយគាំពារសង្គមឱ្យកាន់តែមានប្រសិទ្ធភាពខ្ពស់ក្នុងការផ្ដល់សេវាសុខភាពជូនប្រជាពលរដ្ឋកម្ពុជាឲ្យបានទូលំទូលាយនាពេលអនាគត។

06/08/2025

មន្ទីរពេទ្យជាតិ តេជោសន្ដិភាព ពង្រឹងកិច្ចសហការជាមួយមន្ទីរពេទ្យប៉ៃលិន ដើម្បីត្រៀមឆ្លើយតបស្ថានការណ៍បន្ទាន់
---------------------
ប៉ៃលិន: នៅថ្ងៃពុធ ១២កើត ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី៦ ខែសីហា ឆ្នាំ២០២៥ លោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្ដិភាព បានដឹកនាំក្រុមគ្រូពេទ្យជំនាញក្រុម​ទី៣ ដើម្បីចេញទៅប្រចាំការជំនួសក្រុមចាស់ ដែលបានបញ្ចប់បេសកកម្មអស់រយៈពេល ជាច្រើនថ្ងៃកន្លងមក។ ការផ្លាស់ប្ដូរក្រុមគ្រូពេទ្យជាប្រចាំនេះ គឺជាការបង្ហាញពីភាពរៀបចំច្បាស់លាស់ ដើម្បីត្រៀមលក្ខណៈឆ្លើយតបទៅនឹងស្ថានការណ៍បន្ទាន់ដែលអាចកើតឡើងជាយថាហេតុនៅតាមបណ្ដោយខ្សែបន្ទាត់ព្រំដែន។

លោកនាយកមន្ទីរពេទ្យបានណែនាំដល់មន្ដ្រីប្ដូរវេនប្រចាំការ ត្រូវបន្តពង្រឹងកិច្ចសហការជាមួយមន្ទីរពេទ្យបង្អែកខេត្តប៉ៃលិន ដែលជាមន្ទីរពេទ្យសម្ព័ន្ធមេត្រីភាព និងធ្វើការយ៉ាងជិតស្និទ្ធជាមួយក្រុមគ្រូពេទ្យនៃមន្ទីរពេទ្យខេត្តប៉ៃលិន ដើម្បីត្រៀមខ្លួនទ្រទ្រង់គ្រប់សភាពការណ៍ បម្រើសេវាថែទាំសុខភាពដល់វីរកងទ័ព និងប្រជាពលរដ្ឋដែលរស់នៅតំបន់​ព្រំដែន​។

លោកវេជ្ជបណ្ឌិតនាយកមន្ទីរពេទ្យ និងឯកឧត្តមវេជ្ជបណ្ឌិត ស្លេះ យូ ប្រធានមន្ទីរសុខាភិបាលខេត្តប៉ៃលិនក៏បានអញ្ជើញចុះសួរសុខទុក្ខ និងពិនិត្យសុខភាពប្រជាពលរដ្ឋ និងពលករ ដែលបានធ្វើមាតុភូមិនិវត្តន៍ពីប្រទេសថៃច្រើនកុះករនាថ្ងៃនេះ។

06/08/2025

មន្ទីរពេទ្យជាតិ តេជោសន្ដិភាព បានរៀបចំកិច្ចប្រជុំគណៈកម្មការប្រចាំសប្ដាហ៍ស្ដីពីការពង្រឹងសេវាព្យាបាល និងត្រៀមឆ្លើយតបស្ថានការណ៍បន្ទាន់នៅតាមព្រំដែន
---------------------
នៅព្រឹកថ្ងៃអង្គារ ១១កើត ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី៥ ខែសីហា ឆ្នាំ២០២៥ មន្ទីរពេទ្យជាតិ តេជោសន្ដិភាព បានរៀបចំកិច្ចប្រជុំគណៈកម្មការប្រចាំសប្ដាហ៍លើកទី១ នៃខែសីហា​ ឆ្នាំ២០២៥។ កិច្ចប្រជុំដ៏សំខាន់នេះ មានគោលបំណងពង្រឹងគុណភាពបម្រើសេវាសុខាភិបាលជាទូទៅ និងត្រៀមឆ្លើយតបក្នុងករណីមានការផ្ទុះអាវុធឡើងវិញនៅតាមតំបន់ព្រំដែន។

ក្រោមអធិបតីភាពរបស់លោកវេជ្ជបណ្ឌិត សួន សាមិត្ត នាយកមន្ទីរពេទ្យ បានណែនាំដល់មន្ដ្រី និងបុគ្គលិកទាំងអស់បន្តការងារ​ព្យាបាល​អ្នកជំងឺតាមប្រក្រតី ថែមទាំងបន្ដយកចិត្តទុកដាក់ ព្យាបាល ថែទាំ ជនភៀសសឹក និងយោធាជួរមុខដោយយកចិត្តទុកដាក់ប្រកបដោយប្រសិទ្ធភាព។

ក្នុងកិច្ចប្រជុំនេះ លោកវេជ្ជបណ្ឌិតនាយកមន្ទីរពេទ្យបានឱ្យក្រុមការងារដែលកំពុងប្រចាំការនៅខេត្តកោះកុង និងប៉ៃលិន បន្តសហការយ៉ាងជិតស្និទ្ធជាមួយ មន្ទីរពេទ្យបង្អែកខេត្តសម្ព័ន្ធមេត្រីភាព ផ្តោតលើការផ្លាស់ប្ដូរបទពិសោធន៍ និងបច្ចេកទេសព្យាបាល ដើម្បីត្រៀមឆ្លើយតបក្នុងករណីមានភាពអាសន្ន ឬមានការផ្ទុះអាវុធសារជាថ្មីនៅតាមព្រំដែន។

ជាចុងក្រោយលោកនាយកបានថ្លែងអំណរគុណដល់មន្ដ្រីរាជការ និងបុគ្គលិកមន្ទីរពេទ្យជាតិ តេជោសន្ដិភាពទាំងអស់ ក្នុងការបម្រើប្រជាជនប្រកបដោយវិជ្ជាជីវៈ និងសីលធម៌ខ្ពស់ ព្រមទាំងការត្រៀមខ្លួនជាស្រេចដើម្បីឆ្លើយតបគ្រប់កាលៈទេសៈ។

05/08/2025

04/08/2025

សារលិខិត​ជូនពរ​ សម្ដេច​អគ្គមហាសេនា​បតីតេជោ​ ហ៊ុន​ សែន​ ប្រធាន​ព្រឹទ្ធសភា​ និង​ជា​ប្រធាន​ក្រុម​ឧត្តម​ប្រឹក្សា​ផ្ទាល់ព្រះមហាក្សត្រ​ នៃ​ព្រះរាជាណាចក្រ​កម្ពុជា​ ក្នុង​ឱកាស​​ចម្រើន​ជន្មាយុ​គម្រប់​ ៧៣​ឆ្នាំ​ ឈាន​ចូល​ ​៧៤​ឆ្នាំ​។
គោរព​ជូនពរ​ពីក្រុម​ប្រឹក្សា​ភិបាល​ ថ្នាក់​ដឹកនាំ​មន្ទីរពេទ្យ​ មន្ត្រី​រាជការ​ និង​បុគ្គលិក​ទាំង​អស់​ នៃ​មន្ទីរពេទ្យ​ជាតិ​ តេជោ​សន្តិភាព​។

02/08/2025

មន្ទីរពេទ្យជាតិ តេជោសន្តិភាព បន្តបេសកកម្មចុះជួយគាំទ្រការងារបច្ចេកទេសដល់មន្ទីរពេទ្យសម្ព័ន្ធមេត្រីភាពខេត្ត​ប៉ៃលិន និងកោះកុង
----------------------------
ថ្ងៃសៅរ៍ ៨កើត ខែស្រាពណ៍​ ឆ្នាំម្សាញ់ សប្តស័ក​ ព.ស.២៥៦៩ត្រូវ​នឹង​ថ្ងៃទី២ ខែសីហា ឆ្នាំ២០២៥ នេះក្រុមការងារជំនាញបច្ចេកទេសនៃមន្ទីរពេទ្យជាតិ តេជោសន្តិភាព ដឹកនាំដោយលោកវេជ្ជបណ្ឌិត សួន សាមិត្ត នាយកមន្ទីរពេទ្យ បានបន្តចុះបំពេញបេសកកម្មយ៉ាងសកម្មដើម្បីជួយគាំទ្រ និងពង្រឹងគុណភាពសេវាព្យាបាលនៅតាមមន្ទីរពេទ្យសម្ព័ន្ធមេត្រីភាពក្នុងខេត្តប៉ៃលិន និងខេត្តកោះកុង។

សកម្មភាពនៃបេសកកម្មរួមមាន​ ការជួយរៀបចំបន្ទប់វះកាត់ បន្ទប់ក្រោយវះកាត់ បន្ទប់សង្គ្រោះបន្ទាន់ មន្ទីរពិសោធន៍ បណ្ដុះបណ្ដាលជាក់ស្តែងដល់គ្រូពេទ្យ ការសង្គ្រោះបន្ទាន់ក្នុងគ្រាអាសន្ន និងការបញ្ជូនអ្នកជំងឺ។ លើសពីនេះក៏មានការបង្ហាត់​បង្ហាញផ្ទាល់ពីរបៀបប្រើប្រាស់ម៉ាស៊ីនជំនួយដង្ហើម និងការថែទាំអ្នកជំងឺក្រោយវះកាត់ប្រកបដោយសុវត្ថិភាព។

លោកវេជ្ជបណ្ឌិត សួន សាមិត្ត រួមជាមួយក្រុមការងារបានចុះសួរសុខទុក្ខ និងផ្ដល់កម្លាំងចិត្តផ្ទាល់ដល់មន្ត្រីសុខាភិបាល និងកងកម្លាំងសមត្ថកិច្ចដែលកំពុងបំពេញបេសកកម្មយ៉ាងសកម្មនៅច្រកចាំយាមដើម្បីសម្របសម្រួល និងទទួលពលករខ្មែរដែលមាតុភូមិ​និវត្ត​មកវិញ​។

31/07/2025

គណៈប្រតិភូជប៉ុនអញ្ជេីញទស្សនកិច្ចមន្ទីរពេទ្យជាតិ តេជោសន្តិភាព ដើម្បីពង្រឹងកិច្ចសហប្រតិបត្តិប្រយុទ្ធប្រឆាំងនឹងជំងឺឆ្លងជាពិសេសជំងឺផ្ដាសាយបក្សី H5N1
----------------------

នារសៀលថ្ងៃព្រហស្បតិ៍ ៦កើត ខែស្រាពណ៍ ឆ្នាំម្សាញ់ សប្ដស័ក ព.ស.២៥៦៩ ត្រូវនឹង ថ្ងៃទី៣១ ខែកក្កដា ឆ្នាំ២០២៥ លោកវេជ្ជបណ្ឌិត សួន សាមិត្ត នាយកមន្ទីរពេទ្យជាតិ តេជោសន្តិភាព រួមជាមួយថ្នាក់ដឹកនាំ និងមន្ត្រីជំនាញបានទទួលស្វាគមន៍ចំពោះគណៈប្រតិភូនៃវិទ្យាស្ថានជប៉ុនសម្រាប់សន្តិសុខសុខភាព ដឹកនាំដោយលោកស្រីវេជ្ជបណ្ឌិត SEKI Naomi នាយិកា​មជ្ឈមណ្ឌលសម្រាប់ត្រៀមលក្ខណៈសង្គ្រោះបន្ទាន់ និងឆ្លើយតបជំងឺឆ្លង ដើម្បីបំពេញទស្សនកិច្ច​ និងពង្រឹងកិច្ចសហប្រតិបត្តិការប្រយុទ្ធប្រឆាំងនឹងជំងឺឆ្លង ជាពិសេសជំងឺផ្ដាសាយបក្សី H5N1។

គោលបំណងនៃដំណើរទស្សនកិច្ចនេះ គឺដើម្បីផ្លាស់ប្តូរបទពិសោធន៍ បច្ចេកទេស និងស្វែងយល់ពីប្រព័ន្ធត្រៀមលក្ខណៈ និងឆ្លើយតបជំងឺឆ្លងនៅមន្ទីរពេទ្យ ជាពិសេសការគ្រប់គ្រងករណីជំងឺ H5N1 ។

ក្នុងឱកាសនៃទស្សកិច្ចនេះ លោកស្រីវេជ្ជបណ្ឌិត SEKI Naomi ប្រធានគណៈប្រតិភូបានថ្លែងអំណរគុណដល់ចំពោះលោកនាយកដែលបានចំណាយពេលដ៏មានតម្លៃដើម្បីមកទទួលស្វាគមន៍យ៉ាងកក់ក្ដៅ និងបានកោតសរសើរ លោកវេជ្ជបណ្ឌិត សួន សាមិត្ត ក្នុងការលើកកម្ពស់សមត្ថភាពហើយបាននិងកំពុងឆ្លើយតបទៅនឹងជំងឺឆ្លងនានា។