12/02/2026
សង្គមដែលចូលចិត្ដវាយតម្លៃត្រឹមជ្រុងម្ខាង
នៅក្នុងបណ្ដាញសង្គមបច្ចុប្បន្ន មនុស្សមួយចំនួន ឬអាចនិយាយបានថាមួយភាគធំ ចូលចិត្ដវាយតម្លៃស្ថានការណ៍ ឬរឿងអ្វីមួយដោយមើលតែជ្រុងម្ខាង ឬស្ដាប់តែម្ខាង អ្នកខ្លះមិនទាន់ទាំងស្ដាប់សាច់រឿងគេអស់ផង ក៏ចែករំលែក និងលើកឡើងនៅគំនិតផ្ទាល់ខ្លួន ស្ថានភាពផ្លាល់ខ្លួនដែលមិនទាំងស្រដៀងនឹងស្ថានភាពដែលកើតឡើងនោះផង។
ការវាយតម្លៃ គួរតែធ្វើនៅពេលអ្នកយល់ពីស្ថានការណ៍នោះច្បាស់ មិនមែនការឆ្លើយតបរហ័សដែលគ្មានខ្លឹមសារនោះទេ។ ជាក់ស្ដែងដូចរឿងដែលពាក់ព័ន្ធនឹងការបញ្ឈប់ពីការងាររបស់បុគ្គលិកម្នាក់ ដែលមនុស្សក្នុងបណ្ដាញសង្គមលើកមកនិយាយ អ្នកខ្លះក៏គាំទ្រនៅភាពមិនសមហេតុផលរបស់ក្រុមហ៊ុន អ្នកខ្លះក៏លើកឡើងពីភាពខ្លាំងរបស់បុគ្គលនោះនឹងមិនត្រូវបានបណ្ដេញចេញនោះទេ។
តើសង្គមការងារនៅកម្ពុជាជាក់ស្ដែង វាបែបណា? តើបុគ្កលិកដែលមានសមត្ថភាពពិតជាមិនត្រូវបានបណ្ដេញចេញពិតមែនទេ?
ក្នុងនាមជាក្រុមហ៊ុន
ការវាយតម្លៃបុគ្គលិក ពិតជាវាយតម្លៃលើសមត្ថភាពបុគ្គលិក អត្ដចរិកការងាររបស់បុគ្គលិកពិតមែន ប៉ុន្ដែតើអ្នកណាអ្នកវាយតម្លៃ? តើប្រាកដដែលទេថាអ្នកវាយតម្លៃនោះពិតជាវាយតម្លៃបានត្រឹមត្រូវ? ចំណុចនេះ ខ្ញុំអាចនិយាយបានថា ប្រសិនបើអ្នកមានមេ ឬថ្នាក់លើដែលចូលចិត្ដបុគ្គលិកដែលមានសមត្ថភាពនោះអ្នកនឹងទទួលបានការវាយតម្លៃដែលត្រឹមត្រូវ។ ប៉ុន្ដែចុះបើថ្នាក់លើរបស់អ្នកជាមនុស្សដែលខ្លាចកូនចៅខ្លួនមានសមត្ថភាពជាងខ្លួន ខ្លាចការបង្ហាញសមត្ថភាពរបស់អ្នកនឹងអាចប៉ះពាល់មុខដំណែងរបស់គេវិញ តើអ្នកគិតថាការវាយតម្លៃរបស់គាត់ចំពោះការងារអ្នកនៅត្រឹមត្រូវទៀតដែរទេ?
មកនិយាយពីការបណ្ដេញបុគ្គលិកចេញវិញ តើក្រុមហ៊ុនបានផ្ដល់នៅហេតុផលសមរម្យដើម្បីអោយបុគ្គលិកដែលត្រូវបណ្ដេញចេញនោះអាចទទួលបានដែរឬទេ? ដូចជា បុគ្គលិកធ្វើខុសបទបញ្ជាផ្ទៃក្នុងរបស់ក្រុមហ៊ុន មិនមែនគ្រាន់តែមិនពេញចិត្ដ មិនចូលចិត្ដ មិនត្រូវចិត្ដក៏បណ្ដេញចេញនោះទេ វាត្រូវតែមានកំហុសធ្ងន់ដែលក្រុមហ៊ុនវាយតម្លៃហើយទទួលយកមិនបាន។ មកពីបែបនេះ ទើបមានច្បាប់ការងារនឹងហា
ក្នុងនាមជាបុគ្គលិក
មិនមែនជាបុគ្គលិកត្រូវចាំអោយក្រុមហ៊ុនវាយតម្លៃយើងនោះទេ យើងផ្ទាល់ក៏ត្រូវវាយតម្លៃក្រុមហ៊ុនដូចគ្នា។ សួរថាវាយតម្លៃបែបណា?
រវាងក្រុមហ៊ុន និងបុគ្គលិក ប្រៀបបាននឹងការដោះដូរផលប្រយោជន៍ មិនមែនដូចតែគេនិយាយថាក្រុមហ៊ុនផ្ដល់ការងារអោយអ្នកអ្នកជំពាក់គុណគេទេ ឬមេអ្នកបង្រៀនការងារអ្នកហើយអ្នកជំពាក់គុណគេសងមិនអស់នោះទេ។ បើនិយាយរឿងគុណស្រ័យ ត្រូវនិយាយថា ពេលគេបង្រៀនការងារអ្នក អ្នកបានយកអ្វីដែលគេបង្រៀននោះទៅធ្វើការអោយគេអោយល្អវិញឬទេ បើអ្នកបានធ្វើល្អហើយនោះ វាក៏ដូចនឹងការតបស្នងនឹងការបង្រៀននោះដែរ មិនមែនជំពាក់គុណទៅណាមិនរួចនោះទេ។ ចង់និយាយថា អ្នកជំពាក់គុណមេអ្នកសងមិនអស់ សួរគាត់ផងថាគាត់បានសងគុណបង្រៀនការងារគាត់អស់នៅ? ចូលសាច់រឿងវិញ ហេតុអ្វីបានរវាងក្រុមហ៊ុន និងបុគ្គលិក ប្រៀបបាននឹងការដោះដូរផលប្រយោជន៍ ទៅវិញ? និយាយអោយងាយ ក្រុមហ៊ុនផ្ដល់ការងារ និងប្រាក់ខែអោយបុគ្គលិក (បើអ្នកគ្មានសមត្ថភាព ក៏គេមិនអោយអ្នកធ្វើដែរ គង់ដេញចេញទេ) ហើយបុគ្គលិកផ្ដល់លទ្ធផលការងារដល់ក្រុមហ៊ុនវិញ។ បើវាមិនមែនជាការដោះដូរប្រយោជន៍ទេ វាជាអ្វីវិញ?
បុគ្គលិកអាចធ្វើការវាយតម្លៃក្រុមហ៊ុនវិញ លើអ្វីដែលខ្លួនទទួលបានថាតើសាកសមនឹងអ្វីដែលខ្លួនបានផ្ដល់អោយក្រុមហ៊ុនដែរឬទេ? តើការវាយតម្លៃរបស់ក្រុមហ៊ុនមកលើខ្លួនពិតជាត្រឹមត្រូវដែរទេ? បើអ្នកគិតថាមានអ្វីមួយដែលមិនត្រឹមត្រូវគួរស្វែងរកដំដោះស្រាយជាមួយក្រុមហ៊ុន ប៉ុន្ដែបើចុងក្រោយអ្នកមិនទទួលបានយុត្ដិធម៌ទេ គួរស្វែងរកការងារថ្មីដែលសាកសមនឹងអ្នក ហើយចាកចេញ ទុកអោយអ្នកសាកសមគេធ្វើទៅ។ អ្នកអាចសមកន្លែងល្អជាងនឹង។
សម័យនេះហើយកុំប្រើពាក្យទ្រាំយកបទពិសោធន៍ពេក កន្លែងណាក៏ផ្ដល់បទពិសោធន៍អោយអ្នកដែរ មិនមែនមានតែ១កន្លែងទេ។
បើគ្មានយុត្ដិធម៌ទេ បង្កើតវាទៅ😉
Send a message to learn more
