20/01/2025
វិធីសាស្ត្រ ៥យ៉ាងធ្វើឲ្យកូនលូតកម្ពស់លឿនតាមបែបធម្មជាតិ
១. ទម្លាប់ញ៉ាំអាហារដែលល្អសម្រាប់សុខភាព
ការញ៉ាំអាហារដែលផ្តល់សារធាតុចិញ្ចឹមគ្រប់គ្រាន់ ជាផ្នែកមួយសំខាន់ដែលកុមារគួរតែទទួលបានជាប្រចាំដើម្បីការលូតកម្ពស់របស់ពួកគេ។ សារពាង្គកាយរបស់កុមារ ជាពិសេសឆ្អឹង ត្រូវការសារធាតុចិញ្ចឹមចាំបាច់ដើម្បីធានាដល់ការលូតលាស់។ ក្នុងចំណោមសារធាតុជាច្រើន ប្រូតេអុីនជាចំណែកមួយដែលចូលរួមក្នុងការធ្វើឲ្យឆ្អឹងលូតលាស់បានល្អ ដោយលោកអ្នកអាចផ្តល់ឲ្យកូនបានតាមរយ:ការឲ្យពួកគេបរិភោគអាហារមួយចំនួនដូចជា ស៊ុត និងសណ្តែកសៀង។ល។ លើសពីនេះទៅទៀត អ្នកត្រូវធានាថា កូនអ្នកទទួលបាននូវវីតាមីន និងសារធាតុរ៉ែគ្រប់គ្រាន់ ពីអាហារដែលពួកគេបរិភោគប្រចាំថ្ងៃដូចជា មើមការ៉ុត ផ្លែស្វាយ និងស្ពៃ Spinach។
២. ធ្វើលំហាត់ប្រាណ
ក្រៅពីជួយការពារកុមារពីជំងឺធាត់ ការធ្វើលំហាត់ប្រាណទៀងទាត់ក៏ជាផ្នែកមួយដែលអាចជួយឲ្យឆ្អឹង និងសាច់ដុំលូតលាស់បានល្អផងដែរ។ ប្រភេទកីឡាមួយចំនួនដែលអាចជួយដល់ការលូតលាស់ឆ្អឹងរួមមានការហែលទឹក យូហ្គា និងការហាត់ពត់ពេនខ្លួនជាដើម។
៣. សម្រាកឲ្យបានគ្រប់គ្រាន់
នៅពេលកុមារគេង សារពាង្គកាយរបស់គេផលិតនូវអ័រម៉ូនដែលមានតួនាទីជួយក្នុងការលូតលាស់ (Growth Hormone) ដែលជាមូលហេតុក្មេងគួរតែគេងឲ្យបានគ្រប់គ្រាន់ជារៀងរាល់ថ្ងៃ។ តាមការសិក្សា កុមារតូចៗ (អាយុចន្លោះ ១ទៅ៣ឆ្នាំ) ត្រូវការគេងចំនួន ១២ទៅ១៤ម៉ោងក្នុងមួយថ្ងៃ រីឯកុមារអាយុចន្លោះ ៥ទៅ១២ឆ្នាំ ត្រូវការគេងពី ១០ទៅ១១ម៉ោងក្នុងមួយថ្ងៃ។
៤. ឥរិយាបថឈរ ឬអង្គុយត្រឹមត្រូវ
លោកអ្នកគួរតែព្យាយាមបង្រៀន និងលើកទឹកចិត្តឲ្យកូនៗមានទម្លាប់ក្នុងការឈរ ឬអង្គុយឲ្យបានត្រឹមត្រូវចៀសវាងក្នុងការអង្គុយ ឬឈរកោងខ្នងដែលជាប្រការមួយផ្តល់ផលប៉ះពាល់ដល់ការលូតលាស់របស់ឆ្អឹងកងខ្នង។ ក្រៅពីអាចជួយដល់ការលូតលាស់របស់ឆ្អឹង ទម្លាប់ទាំងនេះជាឥរិយាបថមួយដែលល្អសម្រាប់កុមារ និងអាចបង្កើននូវទំនុកចិត្តឲ្យពួកគេផងដែរ។
៥. ញ៉ាំទឹកដោះគោដែលមានផ្ទុកជាតិកាល់ស្យូម
កាល់ស្យូមដើរតួនាទីសំខាន់ក្នុងការធ្វើឲ្យឆ្អឹងលូតលាស់បានល្អ និងមានទម្រង់ត្រឹមត្រូវ។ បន្ថែមពីលើចំណីអាហារ ទឹកដោះគោជាប្រភពកាល់ស្យូមមួយសំខាន់ ហេតុនេះហើយលោកអ្នកគួរបង្កើតទម្លាប់ឲ្យកូនញ៉ាំទឹកដោះគោជាប្រចាំ ដើម្បីធានាបាននូវបរិមាណកាល់ស្យូមគ្រប់គ្រាន់ដែលចាំបាច់សម្រាប់ការលូតលាស់ឆ្អឹងរបស់ពួកគេ។
ដើម្បីឲ្យកូនលូតកម្ពស់បានល្អ លោកអ្នកគួរតែចាប់ផ្តើមសាកល្បងអនុវត្តតាមការណែនាំដែលយើងបានរៀបរាប់ខាងលើជាប្រចាំបន្តិចម្តងៗ នោះវានឹងក្លាយជាទម្លាប់ ដែលអាចផ្តល់ឲ្យកូនអ្នកនូវសុខភាពល្អ និងការលូតលាស់ឆ្អឹងប្រកបដោយភាពត្រឹមត្រូវផងដែរ។...............
កត្តា ៥ យ៉ាងដែលអាចធ្វើឱ្យលោកអ្នកមិនសូវលូតកំពស់
សុខភាព៖ ការទទួលទានអាហារ និងសកម្មភាពប្រចាំថ្ងៃ និងហ្សែនពីកំណើត គឺជាប់ទាក់ទងនឹងការលូតកំពស់ ឬមិនសូវលូតកំពស់របស់លោកអ្នក។
ជាធម្មតា បុរស លូតកំពស់រហូតដល់វ័យ ២៤-២៥ឆ្នាំ ចំណែកឯ ស្រ្តីឈប់លូតកំពស់ត្រឹមអាយុ ២២ ទៅ២៣ឆ្នាំ។
ជាការពិតណាស់ មនុស្សគ្រប់សុទ្ធតែចង់លូតកំពស់បានខ្ពស់ស្រឡះ គ្មាននរណាម្នាក់ចង់មានកំពស់ទាបឡើយ។
ដូច្នេះ ដើម្បីការពារកុំឱ្យមានការរាំរាំងដល់ការលូតកំពស់ លោកអ្នកគួរតែយល់ដឹង និងគួរចៀសវាងកត្តាទាំង ៥ យ៉ាងខាងក្រោមនេះ៖
១- ការទទួលទានចំណីអាហារដែលគ្មានជីវជាតិវីតាមីណ A, B, C, និង D គ្រប់គ្រាន់ ជាពិសេសកង្វះជាតិកាល់ស្យូម គឺជាកត្តាសំខាន់មួយដែលធ្វើឱ្យសុខភាពឆ្អឹងមិនរឹងមាំ និងលូតលាស់មិនបានល្អ។ ត្រូវដឹងថា របបអាហារមានទំនាក់ទំនងយ៉ាងខ្លាំងជាមួយនឹងឆ្អឹង ហើយជាពិសេសជាតិកាលស្យូម គឺជាសារជាតិរ៉ែម្យ៉ាងដែលឆ្អឹងត្រូវការបំផុត វាមិនត្រឹមតែធ្វើឱ្យឆ្អឹងរឹងមាំនោះទេ ថែមទាំងជម្រុញឱ្យការលូតកំពស់របស់អ្នកបានល្អផងដែរ។
២- ការគេងឱ្យបានគ្រប់គ្រាន់ មិនត្រឹមតែផ្ដល់អត្ថប្រយោជន៍ចំពោះសុខភាពនោះទេ ថែមទាំងជម្រុញដល់ការផលិតអរម៉ូនដែលល្អសម្រាប់ឆ្អឹងផងដែរ។ ដូច្នេះ បើអ្នកគេងឱ្យបានគ្រប់គ្រាន់ក្នុងវ័យជំទង់ ឆ្អឹងរបស់អ្នកក៏លូតលាស់បានល្អ។
៣- ក្នុងវ័យកំពុងលូតលាស់ ការធ្វើលំហាត់ប្រាណ គឺជារឿងចាំបាច់ណាស់ដើម្បីការលូតលាស់នៃសរីរាង្គ និងដើម្បីសុខភាពផ្ទាល់។ ដូច្នេះ កង្វះលំហាត់ប្រាណ មិនត្រឹមតែធ្វើឱ្យសុខភាពទន់ខ្សោយ ឬងាយឈឺថ្កាត់នោះទេ ថែមទាំងធ្វើឱ្យឆ្អឹងមិនរឹងមាំ និងលូតលាស់មិនបានល្អ ដែលធ្វើឱ្យប៉ះពាល់ដល់ការលូតកំពស់របស់អ្នក។
៤- ជក់បារីក្នុងអំឡុងវ័យឆ្អឹងកំពុងតែលូតលាស់ វានឹងធ្វើឱ្យប៉ះពាល់ដល់ការលូតលាស់របស់ឆ្អឹង និងធ្វើឱ្យឆ្អឹងផុយ ងាយប្រេះ និងបាក់។ ចំពោះអ្នកដែលហិតផ្សែងបារីវិញក៏ដូចគ្នាដែរ ទោះបីជាមិនបានជក់បារីក៏ដោយ។
៥- ក្នុងអំឡុងពេកឆ្អឹងកំពង់តែលូតលាស់ ប្រសិនបើយើងប្រើប្រាស់ស្មាស្ពាយ ឬលើករបស់ធ្ងន់ៗញឹកញាប់ពេក ឬជាប្រចាំថ្ងៃ នោះវានឹងធ្វើឱ្យឆ្អឹងលូតលាស់មានល្បឿនយឺត ដូច្នេះនៅពេលដែលអ្នកឈានចូលដល់វ័យឆ្អឹងលែងលូតលាស់ អ្នកនឹងមានកំពស់ទាប ឬមិនសូវខ្ពស់៕
089 909212
